|
|
 مصرة ليمونة
|
في يوم من الايام والدنيا اجازه وعيد والكلام ده من كم سنه كده
انا ومعاي بعض من شرامة وشفوت الحله اتفقنا كعادتنا في الاجازات والاعياد على كسر رتابة العطاله وقعاد المصاطب بعمل رحلة ظريفونه وخفيفونه في مزرعة عمك حاج الطاهر خال مجدي الطيره
وطبعا وبدون شك كلنا وافقنا على ان نرفع اي واحده تلاقينا في الظلط واحنا ماشين على المزرعه لزوم عشان نطعم الرحله و الاستكانه والبشكه بالليمون .... 1
رفعنا عدتنا وفرشاتنا وتحركت قافلتنا المارقه للربا والتلاف صوب المزرعه
لاكين يا اخوانا ده كلام شنو عاد؟؟
الليله من دون الايام وطول المشوار مافي اي واحده بالغلط ساي واقفه في الشارع .... قدر ما تلفتنا شمال ويمين وشرق وغرب فتشنا اي ملف واي زقاق سلقط ملقط ... ما لقينا صيده ,, قاطه قطت عدوكم بعيد عنكم
من النوع البسر البال داك من ذوات الثدي اللبونات ذوات العيون الناعسه والشعر الاسود المجدول اللائي يمشين الهوين كما يمشى الوحي الوجل ....... طيب يااخوانا دي مصيبه شنو !!! المطلوقات ديل نان مشن وين الليله ...... خاصة وانو البلد حالتها الاقتصاديه راقده صلطه
وعشان كده اهل المطلوقات ديل فكوهم يشوف ارزاقم في الشوارع والصواني .... والفقر مرات بعمل اكتر من كده .. 0 0
المهم وصلنا المزرعه بدون ما نرفع اي واحده معانا في العربيه التقوم بينا .... تودينا ...... دي العربيه ... اهو قعدنا نغني مجموعه من الاغاني الهابطه عشان نملا الفراغ .. لاكين مانفع ... نزلنا البحر عومنا وجلبقنا .. دورنا الكشاتين ولعبنا كونكان اربعتاشر ما في نزول تفتح بس ..... برضو الشغلانه دي ما نفعت ...... لانو االحاجه الاتعودنا تملا لينا الفراغ وتبهج نفوسنا وتشبع شهواتنا وبنقضي بيها باقي اليوم ما جبناها معانا ........ طيب والحلل شنو؟؟ 0
طبعا ان كنت من اكثر الناس امتعاضا وقرفا انو الرحله ناقصه اهم شي .... والجمبه دي اهم شي والسندوتشي المابعشي ... فقمت جمعت ليك الشرامه صاحبيني قلت ليهم الشغلانه دي ما جايه ومخستكه خالص ... ولازم نمشي نفتش تاني في الحله بالعربيه واكيد حانلقى لينا واحده مطرفه كده,, خاصة ان الدنيا عيد والشوارع فاضيه ومافي اي عوارض والدوره دي مافي عزل حانرفع اي واحده تقابلنا.... عجوزه .. قبيحه تشبه روحا ..مجربعه ..كريعنا الاتنين لفت .... ما مشكله وكمان يعني حانرفع من طرف واي حاجه بتقضي القرض ...... اتفقنا وقمنا بتوزيع الادوار ووضع الخطه الشيطانيه (عفا اله عما سلف)...ركبنا انا واشرف العربيه وخلينا بقيت الشباب يجهزوا حالهم ويظبطوا المكان ويكشفوا المكان كويس ويتأكدو تماما مافي هوا والغام وللا واحد بتاع لجان شعبيه مسلط يتسلط علينا
خشينا الحله انا واشرف ..... صراحه اعصابنا كانت بايظه لانو دي حله والخطف من شارع الزلط ما زي الخطف جوه الحله لانو اي حركه مريبه بتكون ظاهره لانو احنا مامن اولاد الحله دي ... المهم بعد نص ساعه من اللف والدوران والرغبه والتربص نشوف ليك الصيده الشديده واللضيضه كاتله الملف و ماشه على ميدان الكوره ... فقلت لي اشرف انت نزلني هنا وانا بتصرف ليك معاها (طبعا اخوكم خبره ) وتعال لاحقني في الشارع التاني وانا بحاوال الاقيها قبال ماتقطع الميدان وتخش بيتم .... تندرب نطيت من العربيه وبخطوات سريعه بس بشكل محترم عشان ما اثير الشبهات لحقتها ليك قبال ماتطش مننا
من جاي لي جاي الشغلانه ماخدت مني خمسمه دقايق ودردقتها ليك وركبناها معانا في العربيه لامن انا ذاتي ماصدقت الموضوع ده تم بالسهوله دي وبقيت كلو مره والتانيه اتلفت ورا اشوفها واتاكد انو انا ما حلمان لانو اصلو قبال كده ما رفعنا لينا واحده بالشده دي بالاضافه الى انها هاديه ومهذبه ( اذا صح التعبير يعني)... وبعدين ووب علي ياناسي ..مسكينه جنس مسكنه ... حتى انا فكرت اخليها تنزل تمش محل ما ماشه...... لاكين وين بعد والقصقصه دي كلها .. معقول بس وصلنا المزرعه ولقينا الشباب شفقانين وجهزوا الاوضاع واي حاجه في السمبتيك ..... طبعا الجماعه ما صدقوا لما شافوها ... المهم عشان هي تاخد الموضوع عادي ومتنزعج من الخلق المبحلقين فيها قمت اديتها مويهتبر قلبها البقول تح تح تح تتح... وبعدما شعرت اخدت راحتها قمت مسحت على شعرها بعطف و سقتها معاي على انفراد لغاية ماوصلنا شجره جمب البحر ضلها بارد وفي حته الشيطان ذاتو ما بجي بي جمبها ...... عشان الموضوع ماياخد ما يطول وياخد وكت ..... والجماعه بهناك منتظرني اخلص بي بسرعه... سريع سريع قلعت الطاقيه وجلابتي البيضا ومكويه والعراقي ومافضلت الا بالسراوال لمن هي مافهمت اي حاجه ... وقبال ماتستغرب زياده اخوكم بي حركه بهلوانيه طباها ليكم وكان نام بيها واطه وهي بتحاول تتملص مني وتتمحرك وتتسوى ......... استعدلت روحي وبقيت من فوق ليها اتحسس في رقبتها ........ ولحسن الحظ ما عملت اي صوت لغاية ماشافتني طلعت السكين حتن قالت ماااااع
والله منظرها وصوتها شدة ما حنني لمن قمت كده فكيتها واطلقت سراحها ..بعديها مشيت رجعت للفرد اصحابي الكانو جهزوا البصل والشطوط وولعوا النيران .... وقلت ليهم ياشباب الحقوا ........ الغنمايه شردت
منقول
كوول داون - سودانيت
|
|
 
|
|
|
|
|
| |
garjah
الزنجي
قرشـــو
brakat
فيس بوك
تويتر
انستقرام
يوتيوب
بنتيريست