|
|
|
 Re: غير عاجل .. إلى بكرى أبوبكر و مساعديه الفنيين (Re: Sidig Rahama Elnour)
|
الأخ الفاضل صديق رحمة
شكرا و أنت تمنحنى إحساسا بتخلصى من وحدة ظننتها تلازمنى فى هذا المنبر .. شهور عدة و أنا أتنقل بين بوستاسته لم أجد زميل دراسة أو عمل .. كأننى درست فى الواق و عملت فى الواق الأخرى
نعم يانى "على" بتاع الميزانية و اللاجئين المحمل بذكريات الشواك التى تمور داخلى إنتظارا لشريك يساعدنى على إجترارها
تعال يا صديقى لنتجدع فى هذا البوست .. و لاتخاف على الباندودث .. و الذى لم أعرف كنهه إلى الآن .. لأن لى كوتة لم أكملها
آآآآآه .. ما أجملها أيام الشواك .. جئناها و شهاداتنا لم يجف حبرها .. جئناها عزّابا لم يلوثنا عذاب الغربة
أنا خجلان من نفسى .. أتدرى لماذا ؟؟ سأقول ذلك لاحقا و ربما لا تحوجنى لذلك
و الآن المايكرفون معك ..
| |
 
|
|
|
|
|
|
|
|
Re: غير عاجل .. إلى بكرى أبوبكر و مساعديه الفنيين (Re: ensana)
|
الاخ علي
ياخي الناس يعرفوك كيف ؟ اذا أنت أسمك في جيهة وشخصيتك في جيهة ؟ واخوك لو ما فقري ما كان فرزك في خلق الله الكتار ديل.
أولاً : الف حمد الله على السلامة اللمينا فيك ، حتى نتحرر من هذه الادغال ونتخالط بالحرية والجمال والمحبة ونلتصق بأنسانيتنا قبل كل شي ، نستعير من حقولنا لون سنابلها ، ونغوص في حلة سلك ثم نخرج الى مرقوبة ، ولالمبا ، ثم نعرج الى حي الورشة ، وندخل في اسلاك ذلك المبني الذي جمعنا على الخير ( إدارة اللاجئين ومكاتب الأمم المتحدة ، وتلك الخيران أبوقرع ، وكتوتة ، ثم ندلف لجرف عوض أبوحجل ، لنأخذ قسطاً من نفس العطبراوي حيث تتراءي لنا عبودة من خلف الكرب تناجي جبل عكلاييت الغراق في نظراته نحو غريمتها أم قرقور وكأنها يدعوها للتلاقي على غابات الفيل.
تعال الى ذكريات السمسم ، والعيش ، وذلك المطر الهاطل في مقطع ود الزين ، وتلك البودة التي تخادع بلون البنفسج لتنال من ضحيتها
تعالي الى لأفشاء تلك الرؤية الانسانية المشتركة في إدارة ذلك البؤس الذي حاق بأخواننا في الإنسانية ، والجميع يشمر عن سواعده ليساعدهم ، لم يسالهم ما ديننهم ، وما لونهم ، فقط ادركوا أن على الجميع مصيبة يجب ان يتكاتفوا لتجاوزها وقد كان.
لن أطيل عليك ، النقة كتيرة ، والذكريات تزخر بكل ماهو جميل ، ودايرين نعرف أنت وين ، وعامل شنو ؟ صحيح أن هذا المنبر أصبح الوطن الإفتراضي للذين تناثروا على كل مقاطع الأطلس. يمكنك الكتابة على عنواني :
[email protected]
ولنا ألف عودة ،
| |
|
|
|
|
|
|
|
|
|
Re: غير عاجل .. إلى بكرى أبوبكر و مساعديه الفنيين (Re: Sidig Rahama Elnour)
|
عزيزى صديق .. لماذا تخرجنى من قمقمى
قبل أن ينطلق الدخان
Let me refresh your memories
حكــاية من الواقع .. مـديـــرى الأسبق
مديرنا راجل صعب بلحيل .. بالظبط مثال الخدمة المدنبة الخلوها الإنقليز .. ما عارف قصة خلوها الانقليز دي صاح ولّ غلط .. لكن بي مفهومنا الليلة راجل دكتاتوري .. أنا خريج جديد لنج ودوني اشتغل هناك في منطقة في شرق السودان اسمها الشواك .. إسمها يغني عن حالها .. الشواك ليست بنائية ولكن نأت عنها كل الخدمات الأساسية .. لا يوجد ارسال تلفزيوني .. والرداي إلا تكون محظوظ وعندك واحد مغترب رسل ليك راديو سوني اب تسعة موجات .. لمن تكون في مباراة مهمة نشيل تلفزيون الميز في مهمة مؤقتة لتنتهي مهمتة الرئيسية كتربيزة لأكياس الصعوط .. نشيلو ونطلع بيهو للغابة .. غابة طلح تقع ما بين الشواك والقضارف .. نوصلو بي بطارة العربية ونتابع المباراة .. بالاحري دعونا نقول … نتابع صوت المذيع .. اللاعبين ديل نشوفهم طشاش طشاش .. ما تفرز بين حموري وسانتو .. العزاء الوحيد إنو عندنا عربات كرت .. لاندكروزر آخر موديل .. اهـا الاندكروزر دا ما موضوعنا .. موضوعنا المدير … في المساء ما عندنا موضوع .. الترفيه الوحيد إنو كل الموظفين يجتمعوا من الساعة سبعة في الميز .. البرنامج الوحيد هو الكوشتينة أو الســكر .. دي شكلوها إنتو .. بالفتح أو الضم .. البعض مننا بكتفي بي واحد منهم .. والبعض الآخر بدمج برنامجين في واحـد .. برنامج روتيني ومعروف … للدرجة البنكون فيها قاعدين في المصطبة قدام الصالون وبنسمع صوت عربية .. ونقول دا الطيب زروق .. دا فيصل السيد .. الناس العندهم اسر كانو ساكنين في في بيوت … لاكين ملتزمين بي برنامج الساعة السابعة … برنامج مكرر .. لحدي ما وصلنا للدرجة البنسمع فيها كلب بينبح .. نقول دا كلب فيصل السيد بنبح في ســلمان … الكلب ما موضوعنا .. موضوعنا المدير … الناس كلهم يتجمعوا … الكوشتينة بأنواعها المختلفة تدور … وستي .. كومي .. هــارت … حــريق .. والكاسات بأنواعها المختلفة تدور أيضا .. عرقي كوكـس .. عرقي الجنوبيين .. جــن حبشي وميلوتا .. زي ما قلت ليكم .. العبد جديد لنج .. ومعاي مجموعة من الفرش قراديويتس .. عاملين فيها مهذبين .. التهذيب دا ما موضوعنا … موضوعنا المديــر .. أو السـيد المدير فيما بعد .. وفجاءة نسمع صوت عربية المدير ... صوت الكريسدا ما واضح … يدخل الميدير .. وإذا بالكل وقوف .. حتي الجماعة الأكبر منّو .. نحنا زي ما قلت ليكم جداد لنج .. ما ناقشين قصة الوقوف دى .. لكن أعمامنا الزملاء فهمونا الواجب .. وبقينا نقيف زي الكركون بمجرد دخول السيد المدير … بعد كم يوم دخلنا في البروقرام .. تعلمنا الكومي والحريق والوســت والوسك .. وكيف نعاين بي نص عين لي ورق المدير نشوفو محتاج لي شنو .. نديهو يفتح .. يدينا اســنا … يأكلنا دامــة .. قلنا مافي مشكلة … دا بروتوكول المــيز .. وفي النهاية الناس ديل ضيوفنا .. الضيوف ما موضوعنا .. موضوعنا السيد المــدير .. أول تجربة لي معاهو يوم جاني واحد زميلنا في الجامعة .. جاء مقدم لي وظيفة هو كان المقدم الوحيد .. لأنو كان تخصص نادر.. اســـماك .. أنا قاعد في تربيزتى علي الكمبيوتر .. زميلي التاني كان في تربيزتو بجــهز في الميزانية .. وضيفنا العزيز قاعد في كرسي الضيوف .. المدير جاء ووقف في الباب .. قال السلام عليكم .. قلنا وعليكم السلام .. رد السلام طبعا سنّه … وواصلنا في شغلنا … فجاْة الزول دا وشو إتقلب .. آآآآه … ما بتقيفو ... كمان ما بتقيفو … يلّا أقيفو علي حيلكم … بدون شعور لقينا تلاتتنا واقفين … الضيف وقف .. عيونا مليانة بالدهشة .. وفجاْة المدير إختفي .. الضيف لملم وريقاتو وقال بلدكم دي أنا ما لي فيها شغل .. برنامج الشغل كبر … وزاد معاهو عدد الخريجين الجدد .. وزادت معاهو روح التمرد … قصة الوقوف دي ما راكبة لينا في راسنا .. وقولة السيد ما إسسستسغناها .. الطامة الكبري كانت لمن عددنا كبر .. وزاد عدد البنات بيناتنا .. جات مناسبة عيد المرأة .. قلنا نحتفل .. المدير كان غائب في مأمورية .. وزعنا الأدوار .. ودعينا كل العاملين في المكتب .. حتي الفراشات كانو ما مصدقين .. كونهم يقعدو معانا في قاعة الأجتماعات جنبا لجنب .. بعد ما كانو القاعه ما بشوفوها إلا لمن يكون في إجتماع .. يا يجو ينضفو أو يقدمو الشاي … تناولنا دور المرأة .. تاريخها ونضالها .. حقوقها .. ما لها و ما عليها .. ما خلينا حاجة … بعــد كم يوم المدير رجــع .. الشمارات خلال فترة غيابة وصلته أول بأول .. الشمارجية ما قصروا .. حكو ليهو كل حاجة .. حتي يوم المرأة العالمي أعلموهو ليهو .. الشغلانة ما عجبتو … تحليلاتو قالت ليهو دي بوادر تشرزم للخروج عن طاعته … فما كان منه إلا أن نادانا نحن المنظمين .. هرشنا هرشة رجل واحــد .. وقال بكرة عايزكم تعملو نفس العملتوهو يوم الإحتفال .. منو قال شنو .. منو قاعد وين وجنب منو .. في اليوم التالي .. في نفس الزمان و المكان .. أعدنا الأحتفال .. صورة طبق الأصــل ... صورة بالكربون .. كل جلس في مجلسة الأول .. كل قال ما قالة قبل الشهر تقريبا .. حتي الضمة والشولة لم ننساها .. إتجاه رؤسنا .. حركة أعيننا .. والرمشة ياها ذاتا الرمشة .. ألم أقل لكم لقد إنتهــت قصة من قصص مديرنا …
دعنى أسترجع بعض الأسماء
تاج السر النجيب (الطافوش الأعظم)
عبد المجيد بشار
حماد
حسن عبد المنعم
فايقة
الحاج دمور
إخلاص
معاوية المهندس - ولدكم
معاوية أب صلعة
ياسين
فاطمة
جعفر الشاورابى
كمال كيكى ؟؟؟؟
أبو سم
شول وليم قرنق
فيصل السيد
ميز الهبوب
ود شريفى
محمد عثمان
و البوس الكبير
و القائمة تطول .. و هناك شخصيات لن تبق لبكرى حتحات باندودث
| |
|
|
|
|
|
|
|
|
|
Re: غير عاجل .. إلى بكرى أبوبكر و مساعديه الفنيين (Re: Ali Alhalawi)
|
الاخ علي
القصة التي ذكرتها هي من دلني عليك ! الأسماء التي ذكرتها متفرقة في أنحاء الدنيا ، لكن الكويسة مافيهم واحد لحقت أمات طه
القائمة طويلة جدا وطبعا معانا هنا في السعودية كمية من الخلق
منهم علس بيل المثال (عادل جلال ، جمال أحمد الحاج ، محمد الحسن التيجاني ، اسماعيل يوسف التوم ، صبري عبدالعليم ، الزين حسن ، عمر الماحي ، عمران حسن صالح ، خليفة الامدادات ، حسن حبيب الله ، طه يوسف يسن ،عماد دمعة ، سيف اب بيش ،،، الخ كم من الخلق أكتب لي على الأيميل أو أديني عنوانك البريدي
ولك شكري
| |
|
|
|
|
|
|
| |
Sidig Rahama Elnour
يازولyazoalيازول
فيس بوك
تويتر
انستقرام
يوتيوب
بنتيريست