|
|
 شمارات الخرطوم وبطلها بلف فى ابو جنزير
|
قبل ان ابدا فى نقل الشمارات انوه الى مصطلح(بلف) ومقصود به الكمسارى بتاع الحافلة )
كعادة سائقى الحافلات بعد الساعه العاشرة يرتصون فى انتظار الدور وفى مثل هذا الوقت تنشط حركة ستات الشاى وجماعة (برد) وتكون اكياس الصعود هى التى تعطر المكان ولا ننسى دخان حجار بتاع المشاطات زمان وبالله شوف الزمن ده كيف من البنسون والروثمن الى البرنجى ما علينا اصلو نحن شعب مشكلته عولمة الكيف لسه ما وصلته طبعا السواقين يجلسون على بنابر ستات الشاى والبعض يستغل الفرصة ويعمل ليه مشوار راكب (حداشر خ )اما البلوف وهم الكمسارى يتجمعون حول الحافلات فى انتظار تحرك الصف وهاك يا سواقه بس لمن الصف يكون تعبان الشمار بيكون تمام وخاصة انو ااى بلف من ديل من الصباح الى المساء بيكون سمع مليون خبر من الركاب وده فرصته يستعرض بيه امام الفرد المهم بلف ابو جزير كان تمام شايل سيجارته ابو قندول وفى الخشم وعلى الشلفوه الفوق دقار سفه وبدا يحكى
تعرفوا يا فرد اليومين البلد ده العساكر مفحضين تمام كل نجى بالحافلة فى شارع ما اسمع ليكم الا صفارة الانذار انا ما عارف اصلو الناس ديل لقوا سلاح والله لقوا عربات هونداى مخزنه حاجة عجيبة حرم السلاح الفى سوق ليبيا شتات ساى بالنسبة للقبضوه والمشكلة لا فى جريدة الدار بنلقاه ولا فى كومر تلفزيون السودان بجبوه بالله مش كلام عجيب .واحد من الفرد لقاه فرصة وعلى طول دخل بعد ان اخد ليه نفسين من السيجارة تعالوا اقول ليكم امبارح بالليل كنا شايلن اخر دور وعلى كرور عدل اول ما وصلنا مقابر حمد النيل هاك يا تفتيش بس الظريف انو فى واحد من الركاب قفل معاى وقال طالب لو ما المعلم خلاه كنت عملت ليه شتات زولكم ده اول ما العسكرى جى للسواق على طول كورك يا جنابو انته الحاصل شنو ده التفتيش الثالث نحنا ما عندنا اولاد منتظرننا المهم صاحبكم ده بقى موضوع العسكرى
نواصل
|
|
 
|
|
|
|
|
|
|
|
Re: شمارات الخرطوم وبطلها بلف فى ابو جنزير (Re: بلدى يا حبوب)
|
زولن ده حرم دقه جنس جرسة بس الكويسة انو العسكرى نزله وهرشه وقال ليه انته ساكن وين بكل ادب قال ليه فى ابو نيران على طول قال ليه انته بنتاعين النيران ذاتكم يالله معانا بس انا المزعلنى انو الزول الصباح مع اول فردة كحلته ليك راكب جب السواق وعلى طول كشكشته التقول عرفه على طول دفع كامل وقعد يضحك ويقول الله ينعل حكاية طالب ده كانت لمبارح داير تدوينا فى داهية وكله بسبك يا بلف زعلتنى و وخليتنى ازعل العسكرى ده كله ما مهم بس تعرف امبارح جماعتك على حس ابو نيران ده حرم للصباح تاكين عربيتهم ولمن الاذان قال يا رحمن يا رحيم تعال شوف يا عربات وزول يطلع مافى حتى الطلبة الا بالبطاقات طبعا البلف حكاية البطاقات ده ريحته وهاك يا ضحكة لكن انا النفعنى انو كنت نايم فى العربية واول ما الكشه جات هاك يا تفحيضة لكن الحصل شنو بعد ما طلعته ده شمار باكر بيجبوه ليكم بغباره
بلف ابو جنزير مسك المجلس وبدا يحكى عن كشة الحارة التاسعه بالثورة والكانت من الصباح لا زول يطلع ولابتاع لبن يدخل وقال ليهم كترة عساكر ومعاهم كمان امنجية ما خلوا بيت يفتشوا ساى ادخلوا بعض البيوت واجوا راجعين شايلن الكلاشات المهم انا طبعا ما ساكن التاسعة اصلوا انا من سكان صابرين واحد من البلوفه بضحك قال ليه انت يا جماعه مش صابرين ده قالوا اتحجبت والله شنو يا زول الكلام ده بتوريه لينا انته ما ساكن معاه بلف ابوجزير اكلها وعمل نايم وحكى عن كلام الركاب الساكنين جنب التاسعه وشافوا الحصل وقال ليهم تعرفوا فى واحد شكله كده زايده حبه ورابط الموبايل على حزام البنطلون ومعلق السماعه حرم التقول ما شايل موباايل التقول (دوشكا) من كترة الاسلاك وزولنا ده بس الكويسة كلامه مقعد وقال لناس الحافلة الراكبين معانا يا جماعه السلاح ده ناس الحكومة ديل بلعبوا علينا ساكت السلاح ده ما جابوه من زمان ودسوه فى الحارة التاسعة زمن بداية المشورع الحضارى بتاعهم لمن كان الترابى وعلى الحاج والبشير والزبير فى جك واحد ده وحتى لمن المظاهرات طلعت ناس الحاره التاسعه جابوا الكلاشات وهددوا ناس المظاهرة بالرصاص لكن كل حاجة ليها نهاية حسه بعد ما دعوة (كيدهم فى نحرهم) بقوا يعملوا المديدة حرقتنى ونحنا مالنا نتفرج بس اصلو ده المناظر والظاهر الفيلم بيكون كابوى فى النهاية
نواصل
| |
|
|
|
|
|
|
|
|
 Re: شمارات الخرطوم وبطلها بلف فى ابو جنزير (Re: بلدى يا حبوب)
|
احد البلوفه كان يتسكع داخل ابو جنزير بحثا عن وجود شده فى حافلة بدون بلف لكن حكاية الكشات والمداهمات اثرت فى حركة الحافلات واستغل بعض السواقين الفرصة بالوقوف على سوق المورده ومغازلة السمك البلطى واخرون دخوا الى احراش سوق ابوزيد للتمتع بالمشوى من خراف زريبة ابوزيد التى كادت ان تشيخ نتيجة عزوف المواطنين عن الشراء وحتى الضان الذى ما زال فى شبابه دخل عالم البيركس الرجالى نتيجة الركود وفى نهاية الامر ما على سواق الحافلة الا اصطياد كشات البوليس والتفنيش واخبار صاحب الحافلة بذالك يعنى ما فى ايراد . زولنا البلف اول ما لقى المجموعه ضحكاتهم مولعه دخل على طول وبدأ يحكى عن تجربيته مع كشة البرارى والتى كانت امس والحديث قالوا سمح من خشيم سيده وقال تعرفو يا فرد امبارح انا كنت مع الملعم فرملة وطالعين شده الانتين من شارع الجامعة الى البرارى المهم اول ما وصلنا نهاية معرض الخرطوم نشوف ليك ناس دفعه مالين المكان وبصراحة انا من بعيد مطلع راسى اكشف الشارع عرفت الفيلم كابوى وعلى طول على ركاب الحافلة المم الشترتيت (القروش) قبال ما نصل التفتيش والجماعه يعملوا زغبير بس يا خسارة اول ما جانى ناطى بتاع الحركة وعلى المعلم فرمه طبعا لا رخصة ولا خط والحافلة كانت عنده للتوضيب الموضوع كله كان عمل فرده لزوم العضة وبينى وبينكم خليت ليك المعلم فرمه ودستوره نازل مع بتاع الحركة وشتات على برى المحس بس يا ريت لو وصلته اول حاجة وقوفنى ليك وهاك يا تحقيق جاء من وين وساكين وين ومعاك بطاقة واهللك من وين بينى وبنكم قلته ده فرصة اعمل لى جنسية ده ما تحرى عديل والظاهر ما خلوا زول فى شباك الجوازات والجنسيات ما جابوه ماليهم حق قالوا العسكرى ما يجى مكان شغله من اول الصباح الا والتنوسيه على دارفور المهم عارفين اخوك بلف وكمان فى لستك مشرشر لزوم المخارجة وبعد ان تم الشتات من البوليس على طول قلته يا ولد انت شفته اول المسلسل ما بطال تشوف بقية الحلقات اصلو المسلسل دارفورى طبعا يا فرد الكلام انا ما قلته قالته الحكومة واعترفت بيه انو حكاية التمرد الكان حيضرب البلد وعملوه ناس الشعبى ذى العربية القندران الفيات الراس صناعة دارفورية وارد جبل الطينة والمقطورة صناعة خرطومية وارد جياد كندا انا عارف فى بلوفه الكلام ده ما بفهموه عشان كده بقول جياد كندا ده على وزن دقة كندا والبلف على طول قعد يرقص والجماعة معاه رقصة دقة كندا والطريف فى شماشة لمن شافوه المجلس غباره علق هاك يا ردح الموضوع بقى فارغ خلاص المشكلة الموقف عدمان البوليس حتى بتاع الحركة من ابو جنزير الى شارع الردمية بالحاج يوسف لزوم التفتش وكمان حتى عساكر الطلبيات بتاعن المؤسسات الواحد فيهم ما يصدق ورديته انتهت بعد ان شهدت ليلة هادئة على طحن عضام الجداد طبعا ديل بتاعن البنوك والشركات الحكومية اما ناس بقية الوزارت حرم الواحد قبال ما يستلم ورديته بكون من الصباح فى اقسام الحسابات داير حق سندوشات فول ابو العباس يعنى حتى نظام الحرسات بالورديات للعاملين بالدولة خشم بيوت وحدين عديل بوليس ابواب وواحدين بعد الساعة عشرة مساء كابويات بمشوا وين انا ماعارف ده موضوع طويل ما علينا بس المهم الجماعة ديل بعضهم بجى على مواقف الحافلات والواحد راسماله صفارة ويركب مكنة بوليس حركة وحتى اليومين ديل بقوا شتات من الموقف معليش سرحت بيكم كتير ونسيت موضوع حكاوى البلف عن كشة برى المحس وكمان الدرايسة اه يالكم نشوف الحصل شنوى
نواصل
| |
|
|
|
|
|
|
|
|
|
Re: شمارات الخرطوم وبطلها بلف فى ابو جنزير (Re: بلدى يا حبوب)
|
حكاية كشة االبرارى قالوا كل ما شافه قام جارى والبلف بحكى وبيقول لمن اتخارج من البوليس شاف اقرب حجر فى شارع الزلط االدخل على البرارى وشاله وقعد عن مدخل سوق برى وجلس فى صينية برى بتاعت الطلس ده والمحيرنى انو يقول عليها صينية كيف وكمن العربات بتلف عليها المهم بدأ يعمل بلغة الشماسة ( عين صقر) عينه على كل عربية داخلة او ركشة حابية او امجاد راجيه وه اول ما تقيف العربية على طول هالك يا تفتيش ويا ويل من شافوه عينه حمره لناس البوليس ده موضوعه ما تانى تفتيش صاح اوامره ارضا سلاح وزحفا بدون اوساخ ده لو سعيد ولو كتر وما عمل نمرة اربعة للخلف هاك يا السح الدح ابوى الزول ده مسكلين كان ماشى ازور بيت عمه يعنى لمن يصل بيت عمه بحالته ده مصيره يا المأزون ومؤخر الصداق او الانتظار حتى يروق المنقه جنب اى مأسورة دكان فى السوق زولنا لقى الحكاية ماشية وكما الفيلم نظامه بيعاد فى الثلاثة ا ادوار على شاشة برى الشريف ولمن شاف ليه عربية حكومة انسحب من الصينية اصلو خاف قال كمان ديل اطلعوا لينا موظفين ا محلية الخرطوم يعملوا ليه قضية استخدام قطة زلط لزوم الجلوس من قلب الشارع ده كله ما خايف منه بس المخوفه جريدة الشمار من اول الصباح تكتب بالخط العريض (مواطن ينتعل الزلط ويتوسط صينية اسنتكارا على حملا ت التفتيش ) ما ناس الجريده ديل حرم لو كديسة شافوها قاطعه زلط البرارى ماشه جنائن الشريف ببرى يقول عليها (ظهور نمر فى جنائن برى الشريف) وبرضو الجماعه يشتروا ما علينا المهم اول ما عربية الحكومة وقفوها وفتوشها والموظف المفروض يوصوله لبيته من كلامه عرفه عمل مجنانى الا يوصوله لبيته وطبعا السواق كان داير اتخارج لكن فى النهاية العربية اتحركت والكويسة انو البيت ما بعيد والبلف تابع ليك النمرة ده كويس واول من الموظف نزل يشوف ليك العسكرى طالع من البيت وقبال ما يفتح خشمه شافوا ليك داخل على بيت تانى المهم لمن وصل بيته كان ماشى بالجنبه خايف يدوس ليه عسكرى ويبقى فى المخارجة لمن اذكر انو ناس العربية قالوا ليه جيب لينا موية ووبسراع شال الجك ومعاه الكباية قلنا كباية ما (كوز ) لقى سواق العربية فترق ورجع البيت البلف الموضوع ده ذى ما بقولوا استكان ايه وفضل يتابع ناس الكشة من بيت لبيت والدكاكين بصراحة تفتيش قوى قالوا بدولابيه وحتى الديب فريزل لو كانت مركونه بسبب لعنة الجمرة الخبيثه مصيره ذى الدولاب بعد زمن الموظف صاحبنا ما يسمع ليك الا البورى بتاع عربيتهم جبن الباب ولمن فتح الباب لقى ليك جماعته وعلى طول جرى اجيب المويه لكن قبال ما يدخل قالوا ليه ما كان احسن ليك قبيل تجيب لينا مويه حسه بقت مقيل عديل اصلو من ما قارقناك من تفتيس لتفتيش واخر التفاتيش طلبوا منا العودة الى مكان جينا لانو بحكم القاقنون مافى زول يطلع ولا عربية تعبر خارجة لمن انتهت نوبة التفتيش وبعد ما البوليس اتخارج كل العربات والناس بقت تتخارج واحد من مجموعة البلوف قال ليه طيب اه بعد ده لقوا شنو البلف اصلو بتاع مخارجة مفتتح قال ليه انته مستجعل ليه بس خلى اضانك على نشرة الاذاعة البقت كل نصف ساعة التقول ناس الاذاعة ديل الساعة البشوف بيها زمن النشره اشتروها من الفراشة الفدام موقف ابو جنزير لانو انا اشتريت لى ساعه منهم بثلاثة اهيف( 3الف جنيه) وكمان فيها جرس والمجننى كل ما تمر نص ساعه اسمع جرسه واحد بلف مستكين على تجهيز سفه بضحكة قال هو ناس الاذاعه ديل خلوا لدارفور حاجةمن الصباح (دارفور سلام ) وهاك يا كلام والله ما فضل ليهم الا الدعايات تكون برد من موية حجر قدو وانقاره (كركدى) من مزارع نيالا وكبكبى السرور من كبكابية وبخور العديل والزين من طلح وادى صالح وبسكويت ابو حصان من مصنع جنجويد برام وحلاوة طحنية من مصنع باشمرقة المغربية وتانجو برتقان من جبال تورا بورا بس كل ما فى الحكاية برى المحس قالواطلعت براءة ده ما كلامى ده شمارات ناس برى
نواصل
| |
|
|
|
|
|
|
|
|
|
Re: شمارات الخرطوم وبطلها بلف فى ابو جنزير (Re: بلدى يا حبوب)
|
اليوم الحكاية بقت فى بلف ابوجزير ذاتو وكعادته يتمرد على الحافلات وينوم بباقى الركاب ويكون مصيره الطرد ولكن كغيره من اهل النظام امورهم ماشه. ما اول الصباح كان يبحث عن حافلة فى ميدان الشهداء بامدرمان تعانى من مشكلة عدم وجود بلف الى ان قادته ارجله الى الخرطوم كمساعد بلف فى وجود البلف الاصلى ولكن عند جامع فاروق حدث ما لا يحمد عقباه بعد نزول بعض الركاب كام مصيرهم الانتظار بينما صعد احد افراد الشرطة العسكرية وباسلوب افتزازى بطلب من كل الركاب اشهار بطاقاتهم والا فمن لا بطاقة له فتحت الوعيد والتهديد يكون مصيره الجلوس تحت الزنك المواجه للجامع فاروق ولكن نظام الانقاذ غير اسمه الى جامع (الشيخ ارباب العقائد) لكن الاسم اصبح مجرد يافطه معلقة وكل البلووف عند وصول الحافلات الى الجامع ينادون (جامع فاروق حدى نازل ) عندماسأله العسكرى بطاقتك اخرج من جيبه بعض الشترتيت (قروش حديدية ) حتى يتخارج بانه بلف بينما البلف الاصلى كان قد سيقه فى تعريف هويته فما كان من العسكرى الا ان انزله ليجلس فى صف الزنكى الذى ضم بعض الشيوخ والشباب وبعد قليل ظهر الدفار بس المره ده ما دفار الزامية ده دفار دارفور عديل الظاهر وهاك يا رفع. الدفار مليان بالمواطنيين والعساكر معلقين فى اطرافه حقيقة منظر عجيب حتى الشيوخ كانوا من ضمن الجحافل البشرية التى تشحن واقول تشحن فى الدفارات ونهاية المطاف حوش محلية الخرطوم وهنالك الكلام ممنوع والشوف بجيب اللوم ما عليك الا تعمل جكه وتتخارج ويكون احسن لو اتجهت ناحية الطرف الاخر للمحلية واكيد ستجد من يطلب منك الهوية ولو كنت تحمل فى يديك شنطه (تمكنا) فهنا مربط الفرس بعض المواطنيين فتحت شنطهم وتناثر ما بداخلها نتيجة التفتيش والذى يتكرر عند كل مكان بس الشىء الوحيد البخارجك الصعود الى اول حافلة حتى ولو ماشيه ام ضوبان او امدوم اما عساكر التفتيش ليس لهم خاصية السكون وبالمزاج بفتشون ويختارون والافت فى سوق الخرطوم خلوه من الباعة المتجولين وحتى اماكن التمباك او( الصعود) لا ترى فيها غير ااوراق معلقة كتب عليها (خلى بالك من النشالين) وبنى وبينكم بحال السوق ده الخرم اتلاشى يعنى لا سفه ولا سيجارة حتى زلط السوق العربى خلالى من ثانى اوكسيد العطرون (التمباك) وما تبعد من غازات سائلة اصبحت تصيب الاسفلت بالكدمات والاتواء وووو وانت مغادر السوق توقع وقوف الحافلة وبداية نوبة تفتيش جديدة ما عليك الا الاحتفاظ ببطاقة الهوية معروضات وان كنت لا تحمل هذا وذالك فما عليك الا الانضمام الى شتات الشمارات واليوم بعد هذه الكشات البولوجيشية مجلس شمارات البلوف شتت يعنى مافى شمارات
نواصل
| |
|
|
|
|
|
|
| |
بلدى يا حبوب
نصار
يازولyazoalيازول
سجيمان
فيس بوك
تويتر
انستقرام
يوتيوب
بنتيريست