كتب الكاتب الفاتح جبرا المتوفرة بمعرض الدوحة
|
|
 سلاااااااااااااااااااامن كثيرن
|
وقفت كثيراً مفكرة في عنوان مناسب لهذا البوست كما ينبغي له (هسه كما ينبغي له هنا علاقتها شنو بالموضوع؟)
مللت من التفكير وقررت أن اتركها لظروف عقلي ذو الاتجاهات المتعددة (وهذه ليست ميزة إن امعن الواحد فيكم التفكير جيداً)
قبل كم يوم،،،قررت المشاركة،، فبحثت عن بوستاتي القديمة لأنني في الواقع مصابة بالزهايمر مصابة به ،، لكن في بعض أوقات يطفر الزهايمر (ذي بلاعة جيرانا الفلبينيين) فيزيد عن حده فأحكي قصة مثلاً الساعة العاشرة صباحاً،، وأكررها عشرة ونص ناسية أنني (قبل شوية بس) قد قلت (نفس الكلام)
هذا ما يسمونه في الغرب الزهايمر،، ونناديه نحن إحتراماً (الدروشة) ويؤكد على مسمى (غبيانة) أخي،، أما ترباس فيقطع بالشك أنه (عامل السن)،، وأمي تجزم أنه (طرطشة)
حاولت أن اجنبكم حديثي الملل في كثير من الأحوال فلقيتني كثيرا في حروفكم.
في غمرة بحثي عن مشاركاتي السابقة،، لقيتني والله ما هينة ،، كثير منكم تذكرني،، سأل عني،، وكمان ناداني،،وأنتم في ذلك قد لا تدركون كما أنا (خفيفة ولفيفة) ،، وإن كانت الظروف قد سمحت لي بالقراءة فيما سبق،، من أول (بت قضيم) كنت (نطيت) تماما كما (الرقشة الزرقا) ،، في كل تحت طوبة تلقاها.
جد والله
أنكسفت،، وكما ذكرت سابقاً فأنا كسوفي من نوع فريد،، ذاك النوع العوييييير،، حيث تمد البت العويرة المكسوفة راسها كيف كيف،، فتمطه لتبتسم ابتسامة بلهاء،، ترافقها طوال أسبوع إن سرح فيها أحدهم،، حتى لو كان سرح في كيفية تحزب خصل شعرها المتمردة،، المهم هو سرح،، فترافقها طوال الأسبوع هذه الابتسامة العذبة البلهاء
رافقني هذا النوع من الابتسام،، مع كبر راس هو في الأصل مقودس خلقة،، وما انتبهت لدقستي هذه إلا بتعليق أخي الظريف (يا بت معسمة كده مالك،، قام عليك دسك في رقبتك)
اكتشفت وقتها أني جد عويرة ،، عويرة معسمة وليس عويرة فقط لاحظو الفرق
كما أنني لأول مرة أدرك أن الدسك ده ممكن يقوم في الراس وليس الظهر فقط.
قررت أن اكتب فيكم شعراً ،، كلام كده ذي حق ريل،،،
مع دوقيست الراس،، والعسيمة،، ودسك الرقبة،، وجدت أن ذاك الكلام من ذاك النوع،، حقيقي (شعراً ما لينا ليه رقبة) مع أني الغريبة (للمعلومية يعني) امتلك خاصية (الرقبة الممكن يركب فيها حتى شعر سندي كرافورد لكن يلعن ظروف التصحر)
بعد تفكير عميق،، وشوف عيني لبعض من كنت اظنهم (بي لوري اندروس وكيلو ليمون ما يهضموني) بسألوا عني،، وجدت أنني (منكم وليكم) ،، أنكم (أحسن مني ) إذ تذكرتوني في غيابي ،، ووجدت أنه لا داعي اتجمل،، لا اساسا اقدر اتلبس،، لا مهم اتلملم (دي جاية من نكشة الشعر)،، لا اقدر اتحنكش لا اقدر أكون غير بت قضيم (بكلابها وغنمها وهلم كوشة) وفي الحتة دي بالذات نشكر المعلم علي حسن سلوكة،، والكلام ليك يا المنطط عينيك.
سلمتم كلكم للسؤال،، لا كنت حردانة البورد،، لا في زول عبرني قدر يلقى لو حتة دم يزعلني بيها،، لا أي شئ من هذا القبيل ،،ذاتي مكسوفة أقول ليكم اني كنت فقط في إجازة في جزر هاواي المشرقة.
يعني بالواضح والواضح ما فاضح،، ليس لدي أي حجة غياب إلا إذا اعتبرنا الزهللة في حد زاتها حجة مقنعة
فعذراً لهذا الغياب
وشكرا لهذه الأخوة
وسلمتم لهذه الأريحية
يخليكم الله
يجزيكم عني (كوووووووووووووووووووووووووووولكم) كل الحب
ووحاااااااااااااااااااااااااااااااااة الله بريدكم
|
|
 
|
|
|
|
|
|
|
|
Re: سلاااااااااااااااااااامن كثيرن (Re: بت قضيم)
|
الأخت بت قضيم مراحب
منورة ... وهكذا الأيام .. تشغل ناس عن ناس وتجمع ناس بناس .. والحصيلة = صوم
صوم عن كل أصناف الكلام.. ذي الشجون وأبو نقطة وأبو الهضربة والبووح الخمسة نجوم
ثم صوم شهر الفضيل الذي من بشائره أن أهداكي وهداكي سبيل العودة
تفضلي يا أستاذة ... ورمضان كريم
العنوان خطييير جداً يستاهل التعب
| |
|
|
|
|
|
|
|
|
|
Re: سلاااااااااااااااااااامن كثيرن (Re: filan)
|
بت قضيم
المدروشة
الغبيانة
المطرطشة
العاملة سن
الخفيفة اللفيفة
الكسوفة
العويرة
البلهاء
المقودسة
المعسمة
المدوسكة
فى الليلة الظلماء يفتقد البدر
كانت ماضى ليالى المنبر ظلام دامس .. دامس هذى ربما أصلها من الفول المدمس .. كنا بالجد محتاجين لكلابك و غنمك وكوشتك وبعض طرطشتك .. الكلاب لننهش بها غنمنا .. و الكوشة لنكوش بها على ماتبقى من كلمات جميلات .. نتمنى أن تكون هاواى قد فكّت تعسمك و أنهت تعنتك لتبهلى لنا كل دروشتك و هضرباتك ذات المذاق الخاص .. نرديك أن تبقى هنا على طول و لو دقيتى وتد يكون أفضل .. لا أن نراك كزكاة خراجها فى العام .. و لا أن تأتين و تقولى وااااه ثم تتبخرين .. لا تتبخرى بل تبخترى فى هذا البنبر ودثرينا بحروفك
| |
|
|
|
|
|
|
|
|
|
Re: سلاااااااااااااااااااامن كثيرن (Re: بت قضيم)
|
الاخت الغالية بت قضيم
اهــــــــــلا بيك ونورتي البورد بعودتك الجميلة الباهية ،، وينك ياخي كل الزمن ده نسال عليك طوب الارض ( قصدي زلط الارض لان السعودية لكها زلط ) كم اشتقنا اليك وتلفتنا يمين وشمال ولا وراء ولا قدام وقدر ما عاينا ليك انت والشقية شــــــــيري ما هببتو لين لا ظهرتو لا حتى رسلتو رسالة ،،
كان عرفنا جيهتك في جــدة كان ختفنا كراعنا وجينا اصلها ماها بعيدة بس والله ماعارفين ليك جيهة
مرحبا بيك وبي طلتك الرائعة وكلامك المنمق الدارجي من ماركة مندقس وغبيانة وغيرها
الجابك يا بت قضــــيم يجيب رفيقتك شـــيري كمان ولك التحايا
ولتعلمي اننا نحن برضو بنحبك زي ما انت
وشكري
شرووم
| |
|
|
|
|
|
|
|
|
|
Re: سلاااااااااااااااااااامن كثيرن (Re: Abomihyar)
|
اول حاجة مرحب بالعودة بعد غياب وعليه عقاب
تاني حاجة ارجعي فتشي شوفي الناس حلقا نشف من السؤال عليك
اظنك اشتغلتي سمسارة بطاقات سوا لانوا فيها ملايين عمولة
انتي مطالبة ببدل غياب واعملي حساب اللغة بقي في تصحيح وكدا
تاني برجع ليك لانوا المكتب بداء يعج بالسعوديين
| |
|
|
|
|
|
|
|
|
|
Re: سلاااااااااااااااااااامن كثيرن (Re: ايهاب)
|
أم حقين آسف اقصد ام قضيم لا بت قضيم
حمد لله على السلامة وتصومي وتفطري على خير بس ما تكوني جهزتي الكشف للدكتور شي ضغط وشي سكري وشي هازمير ولا هزامير ولا ههرازمير موش قالو اسم اعجمي اهو ضقلنا بيهو كمان
| |
|
|
|
|
|
|
|
|
|
Re: سلاااااااااااااااااااامن كثيرن (Re: بت قضيم)
|
على شاكلة عنوان سعادتكم أقول ليك "جيدن جيتي" وأتمنى أن تكون عودتك الطوعية لهذا المنبر تحمل الكثير من الأفكار والمقالات خاصة تلك المتعلقة بالكوش والبالوعات والكلاب الضالة والغنم وبعض إفرازات الحضارة من برجر وهوت دوج ودوج سعران وأكياس النايلون وكل ما يدخل تحت مظلة البيئة وحمايتها ودمارها ، خاصة وأن جائزة نوبل للسلام لهذا العام منحت للكينية ونغاري ماتاي مؤسسة "حركة الحزام الاخضر" التي تشكل اهم مشروع للتشجير في افريقيا بهدف تشجيع التنوع البيولوجي مع ايجاد فرص عمل للنساء وتحسين صورتهن في المجتمع.
اتلتحية لونغاري ماي والتحية لبت قضيم بمناسبة عودتها
| |
|
|
|
|
|
|
|
|
|
Re: سلاااااااااااااااااااامن كثيرن (Re: Raja)
|
Quote: العزيزة بت قضيم
والله وما طالبانى حليفة
لقد ازرى بنا الدهر بعدكم
خليتينا الناس يحقروا بينا
بصراحة مرات اقول الحمد لله الكنتى غايبة ومرات اقول يا حليلها والله كان هسع بقت لينا سند ..
|
بس زي ما قال اخوي الكاشف
| |
|
|
|
|
|
|
|
|
|
Re: سلاااااااااااااااااااامن كثيرن (Re: بت قضيم)
|
وكان من أجمل التعابير التي سمعتها (عصافير البورد) فتخيلتني عصفورة،، وبحثت في كافة أنواع الطيور (حتى النعام) لأصنفني معها،، ما استطعت
صباح الخير للجميع
سلمتم جميعا
يا ست البنيات
ما تشوفي وحش إن شاء الله،،وتصومي وتفطري على ألف خير،، المهم تتجلي،، رمضان والصوم يجي الجسد فيتفرغ المخ لعمله الأساسي ،، التفكير ،، والكتابة الجميلة كما تفعلين دوماً،، ولو انه الأيام دي لا السوبرماكتات متفرغة لا التلفزيون مدينا فرصة نطبق رمضان كما ينبغي له (بالجد ما عارفة كما ينبغي له دي شنو اليومين ديل)
ويا فيلان ،، كأني أعرفك من زمان،، تخيلت لو الواحد صام عن الكلام ،،، ماذا كان حال الناس من هدوء وسلام،، لكن لو سكتنا كلنا شوية بكري بحرد البورد زاتو ودقيقة نهرش علي ده
علي انا اقول على نفسي اللستة الظريفة دي انت لا،، شان ما نتخابط عارفني ممتازة في الدافوري
يعني انا اقول عني عويرة انت تقول ست العقل والفهم،، مشي حالك وحالي الله بديك أجر ترفع من معنويات واحدة منكوشة.
بعدين الظلام الدامس جاية في الأصل من دومس مدومس دمسن شديدن،، قادي عربي انت
ثم أنا ما جاية كزكاة انا جاية القط الزكاة ذي جماعة السعودية ديك اصحابنا
ثم اني في رمضان ده حتحنكش،، سأترك الكلاب والغنم جانباً والتفت للزهور والوردي الشتلوها جوا قلبي،، نشوف بنفع والكوش أهي قاعدة ما طايرة بنرجع ليها انا والكاشف اخوي داك لو دور الحنكشة ما نفع.
شرووم
على فكرة بمناسبة زلط السعودية،، زمان كان الواحد يسب الواحد يقول ليه (راسك طوبة)،،، دلالة على النشفان،، واكتشفت أنه كم جميلاً أن تكون طوبة لو الواحد عرف سعر الطوب في السودان
سأتفضل من الآن فصاعداً بقبول صفة (الطوب) فالطوب لا هو هين ولا هو حصحاصاً لين.
سمعت أن شيري تزوجت،،، عقبال كل الحبايب واموووووووووووت واشوف هذه الشخصية بفستان زفاف عروس عاقلة حلاتها ساكتة،، خيالي الجامح لا يصل لتلك المنطقة فاتخيلها دائماً بفستان زفاف من الجينز
الله يطمنا عليها وعلى الجميع
صديقي ابومهيار
شكري وتقديري ونفختي بهذه الطلة الجميلة
يخليك الله إن شاء الله
مهاجر أنت بالذات خجلتني
تكتب بت قضيم أون لاين ؟؟!!!
يلعن أبو السرئة زاتو،،، اقصد يلعن الشهرة ياخ
أنا فعلا شغالة في بطاقات سوا لان الواحد لو ما قال كل سنة وانتوا طيبين لناس السودان وحتى غنم الجيران ما ينفع،، الوالدة تصر على عيدية أي كائن نعرفه في السودان،، ناس سوا حقيقي مستفيدين مني والمفروض يرسلوا لي جواب شكر
| |
|
|
|
|
|
|
|
|
|
Re: سلاااااااااااااااااااامن كثيرن (Re: بت قضيم)
|
| Quote: في غمرة بحثي عن مشاركاتي السابقة،، لقيتني والله ما هينة ،، كثير منكم تذكرني،، سأل عني،، وكمان ناداني |
بت قضيم :
اهلا وسهلا.. وحمد لله علي السلامة..
في انتظارك ..وانتظار قلمك ..الما هين..
تحياتي.. ورمضان كريم,,,
| |
|
|
|
|
|
|
|
|
|
Re: سلاااااااااااااااااااامن كثيرن (Re: Ishraga Mustafa)
|
أنا هسه فاغرة فاهي زي سلمى حايك في صورتها أعلاه تحت اسم تمبس بسبب رؤيتي لهذا البوست المفاجيء . لكن لأني أنتهج الحذر في الغالب تأكدت من تاريخ البوست عشان ما يطلع من سنة ستة وانط أنا في الكلام والسلام والتعليق وابدو زي الاطرش في الزفة .. المهم التاريخ ما طلع بعيد نسبيا ولذلك الشهقة والترحيب والهيصة برضو لسه في مكانها
سلام بالكوم ورمضان كريم باثر رجعي والعيد مبارك عليك باعتبار ما سيكون واتمنى انك تكوني مبسوطة ومهيصة وفي اكمل عافية. طبعاالبورد جميل بالناس الجداد، بضم الجيم، لكنه أجمل بقدامي المحاربين ورؤيتهم في البورد لا زالت تدخل الراحة في القلوب
لك التحية والمودة ولكل من حياك في هذا البوست
| |
|
|
|
|
|
|
| |
بت قضيم
filan
شرووم
Abomihyar
مهاجر
قرشـــو
samo
اساسي
ايهاب
almulaomar
اسامة الخاتم
Habib_bldo
Rawia
بلدى يا حبوب
Raja
garjah
zola123
Tumadir
Ehab Eltayeb
معتصم دفع الله
tmbis
Ishraga Mustafa
rummana
AnwarKing
ABUHUSSEIN
حبيب نورة
Hussein Mallasi
فيس بوك
تويتر
انستقرام
يوتيوب
بنتيريست