منذ مشاركتى الاولى فى البورد والتى يعود الفضل فيه للعزيزة امانى الجندرية وبعد الاستفاقة من الادمان الزمان داك بقينا فى معمعة البورد شى تعارف شى شكل شى نكت ناس حردانين وناس راضين وما اطول عليكم والعالم بقا قرية صغيرة ودى فرمالة من فرمالات الناس البيجو يتكلمو فى التلفزيون ودايرين يدو احساس انهم ناقشين المهم البوست دا ملاحظات على الطاير فى سلوك الاعضاء من خلال المشاركات وحنستمر تباعا فى ذكرهذه الملاحظات كان تبقى فى النهاية شى ممكن يتقرا لاحظت الحدة والعنف اللفظى وكان فى طريقة الواحد يطلع من الشاشة كان بقى اكتر من لفظى الناس اخلاقا فى نخرتا لكن من تجربتى مع بورداب الامارات كانوا فى الخارج وكلهم الطف وارق واكثر دماثة ولطفا فكرت ووصلت لاستنتاج انو السبب لمن الناس تتقابل فيستو فيس زى ما بيقولو بتكون فى مساحة واسعة للمجاملة لكن فى البورد كل واحد بيكتب وفى ذهنو جمهور عريض من القراء وفى اللحظة ديك تدخل اعتبارات كتيرة صحبى دا ما يزعل وناس حلتى ما ياخدوا فى خاطرن ورفقاء الفكر ما يقولو انحرف وهاك يا اعتبارات
12-07-2004, 07:19 AM
Raja
Raja
تاريخ التسجيل: 05-19-2002
مجموع المشاركات: 16054
الغالية رجاء انت ما عارفانى بهترش ساى البوست انا كاتبو وفيهو شى من الخفة يعنى مجرد ملاحظات يعنى ما فى زول يجى يقول حدد مصطلحك وكرب منهجك ولا وين جهازك المفهومى
بينى وبينك يعنى نوع ونسة فى التوصيلة بعد حفل تخرج فى المجال التانى مذكرة المجال التانى
12-07-2004, 08:16 AM
Raja
Raja
تاريخ التسجيل: 05-19-2002
مجموع المشاركات: 16054
العزيزة رجاء من الملاحظات فى المساهمات ظاهرة الانحيازات المسبقة والانحيازات اشكال والوان اولا انحيازات سياسية يعنى ناس كل حزب يكابرو بعض ويساندوا بعض مرات بالحق ومرات بالباطل تانى انحيازات الاصحاب والصاحبات تالت انحيازات للجنس اللطيف وطبعا تصنف كانحيازات حميدة ندعمها ونقف معها بشدة رابع انحيازات ناس الكورة ودى اكترها شعبوية
12-08-2004, 11:39 PM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8788
من السايكلوجيات البوردية ما طاب لى ان اسمية مشاركات المجادعة
نوع تعرف يا دلبلب ايوة يا قبربر ودا مصطلح مستلمن شفرة كوميديا الستينات بين ابوقبورة وابو دليبة ابودليبة يقنطر النكتة وقبربر يشوت الذ مثال مشهد جبل الرجاف فى النكتة المقنطرة كدا مشهد خوف قبربر خايف يرجف
ابودليبة ياقبرب اثبت اتبث قبربر انا ثابت دليبة يازول انت بترجف قبربر انا جبل دليبة جبل شنو يا قبربر قبربر انا جبل الرجاف ها ها ها هاه
اها فى بعض البوستات تتم كتابة سناريو المشهد شراكة فى الماسنجر وطبعا الكلام دا بين اصحاب بعدين الاخراج على البورد الاول يقنطر البوست فكرة ما والتانى يشوت والله ابداع والله كلامك صاح والله موضوعية
اها اية رايك يارجاء فى التحليل الفريد دا
12-09-2004, 00:04 AM
Raja
Raja
تاريخ التسجيل: 05-19-2002
مجموع المشاركات: 16054
من الملاحظات فى المساهمات ظاهرة الانحيازات المسبقة والانحيازات اشكال والوان اولا انحيازات سياسية يعنى ناس كل حزب يكابرو بعض ويساندوا بعض مرات بالحق ومرات بالباطل تانى انحيازات الاصحاب والصاحبات تالت انحيازات للجنس اللطيف وطبعا تصنف كانحيازات حميدة ندعمها ونقف معها بشدة رابع انحيازات ناس الكورة ودى اكترها شعبوية
لكن بتاع القنطرة ده ما قادرة أجيب مثال.. وبتخيل ان اي بوست بيتكتب لأسباب واضحة ومعلومة حتى ولو جا بعد حوار مع زميل.. وبالمناسبة دي كتير من الأفكار بتجي للزول من حوار مع الناس او ملاحظات مشاهدات قدامو.. او ممكن البوست وقع لي زول تاني في جرح ولقى فيهو البيفكر فيهو.. مش ممكن..
وليك كل الود..
12-09-2004, 01:59 AM
AnwarKing
AnwarKing
تاريخ التسجيل: 02-05-2003
مجموع المشاركات: 11481
العزيز محمد سيد أحمد... يا ترى متذكر ردك دا كان وين؟
Quote: الردود خشم بيوت يا ودعزة ياظريف بالنسبة لى الرد يعنى ان الموضوع المثار جذب الاهتمام واستحق الرد لاسباب مختلفة رد رغبة فى الاضافة واثراء الحوار والمعرفة ردود فيها شى من التواصل الانسانى لمن نحمل لهم الحب والمودة يعنى لو كتب محمد عبد الحميد ولا تراث ولا الجندرية ولا تماضر او اسامة الخواض وابومهيار احب ان اتحاور معهم ردود لكتابات موضوعية وجميلة مثل مساهمات شرنوبى ود عزة عطبراوى نصار ردود بانحيازات ثقافية لابناء الثقافات غير العربية وانا انتمى لها لشرنوبى وكوفى ودينق ودقنة اخيرا ردود لجماعة الضد انصار الحكومة وليد الكوز ومحور الشر الكيزانى
الغالية رجاء انا متفق معاك فى انوحوار والونسة مع الاصدقاء ممكن تكون مدخل لبوست لكن انا قصدت التنسيق الشرانى لافحام شخص ما وواصلى انا بجادعك
العزيز انور كينق مجادعتى مع رجاء تصنف فى سايكلوجية المحبة الخالصة
وعليك الله الكلام دا نكتو من وين مشكور يا الحبيب
والله ودعزة مشتاقين ليهو جدا نشوف طريقا نرجعو ونقول ليهو مردودا فى مسماها وانا بالجد لانى حلفاوى ما عارف الكلام دا معناهو شنو لكن تقول كدا لمن المرة يطلقوها ودايرين يرجعوها تانى العرب بيقولو مردودا فى مسماها
12-10-2004, 06:08 AM
Salah Abuhigill
Salah Abuhigill
تاريخ التسجيل: 11-27-2004
مجموع المشاركات: 240
استنى النسلم ونرد على أنور وأبو حجل وبرجع للسيكولوجيات..
ازيك يا أنور.. والبوست الجبتو شحمان زي ما بيقول منعمشوف.. ومرحب بيك في سيكولوجية المحبة..
أبو حجل العزيز.. منتظرينك في الون تو..
نرجع لمرجوعنا يا محمد.. اولا لازم اشير لحاجة مهمة خالص وهي ارتفاع الوعي عند معظم الزملاء.. يعني لو حسًو انو الموضوع فيهو شبهة مطاعنات أو خناقات ما بتلفتو عليهو خالص.. وان اكتفو بالمتاوقة وفي الاحوال دي تلاقي عدد الزوار بقى مليون كده.. حكاية الشلليات والأكوام دي عمرها ما دخلت راسي.. يعني انا قدر ما حاولت أصنًف رويحتي دي في اي كوم أو شلة ما قدرتا.. لأني ببساطة بتعامل مع البوست كبوست وموضوع واستمتع به.. وتلاقيني زي الدرويش بفتش في الصفحات البعيدة من الأولى عن المواضيع الشهيدة.. عشان أعرف لييه هي شهيدة وليه الناس ما مهتمة بيها.. لو قريت الموضوع ولقيتو حسب تقديري يستحق الاهتمام والتشجيع طوالي برفعو.. وساعات كتيرة بلاقي ان التفاعل مع البوست عالي فقط الناس ما مستعدة تفتش وتنقب.. بس بتنتظر الخمسة بوستات الفي راس الصفحة الأولى..
برجع ليك تاني وأكشف ليك حبة تكتيكات كنت مخبياها..
ليك الود..
12-10-2004, 01:08 PM
عاطف عمر
عاطف عمر
تاريخ التسجيل: 11-26-2004
مجموع المشاركات: 11152
استوقفتني جملتك ( لكن من تجربتى مع بورداب الامارات كانوا فى الخارج وكلهم الطف وارق واكثر دماثة ولطفا) فعادت بي لذكري سنين مضت كنت في إجازة في السودان أحاول شراء قطعة أرض 400 متر مربع في المليون ميل مربع . أخذني أصحابي لأحد السماسرة المتمكنين وأخذ يعددوا له في ( ميزاتي ) و أني زول مغترب و قروشي حاضرة ووووووووو لكن ما أدهشني هو رد عمنا السمسار فقد سأل ببرود يحسده عليه الخواجات ( إنت ياولدى مغترب في السعودية و لا في الإمارات ؟ ) استغربت للسؤال وأجبته بسؤال ( دي بتفرق في شنو ؟ ) فأجاب عمنا لا يا ولدي بتفرفق كتير . أخذني حب الإستطلاع كل مأخذ و نسيت قطعة الأرض و أصررت على معرفة الفرق . فأجابني الرجل ( يا ولدي نحن في السوق عندنا مفهومية للناس . مغتربين السعودية ديل ناس القروش الحاضرة لكين مغتربين الإمارات ديل نا سغافة ساكت ) طبعاً يقصد ثقافة
غايتو زي ما بيقولو أهلنا الصيت و لا الغنى
تحياتي
معزتي
12-11-2004, 06:11 AM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8788
رجاء العزيزة وقع لى كلامك ومنظر الكشف عن التكتيكات
ابوحجل انا من نشوة اقيس محاسنك بمن من الفنان الحبشى لسا ما فقتا
عاطف عمر شوف الحظ نحنالمن اغتربنا كمان ما مشينا محل القروش رواتبنا هنا كلها رايحة فى معرض الكتاب ومهرجان المسرح وبينالى الشارقة
من سايكلوجيات المشاركة المبادرة واللفحى البوست قبل ما يهجس فى الارض ينط زول ويرد ليك رد يعمل انحراف معيارى وتجى طايرة الردود على المشاركة الاولى وليس على البوست الاصلى وبتفق معاك وبختلف معاك تفتش لفكرتك الكتبتها ما تلقاها
12-11-2004, 01:46 PM
Raja
Raja
تاريخ التسجيل: 05-19-2002
مجموع المشاركات: 16054
اوافقك في السيكولوجية الأخيرة.. لكن الدور هنا على صاحب البوست اللازم يرجع الدفة للمكان القاصدو من الأول..
اها في سيكولوجية تاني وهي فتح بوستات رد فعل لبوستات.. في الغالب بتكون ردود عايزين يميزوها.. لكن في ناحية بتاعت خالف تعرف.. يعني في نوع ما بيكون عندو موضوع في راسو.. لكنه مصر يكتب الليلة.. يقوم يقرأ الصفحة الأولى لغاية الموضوع التاسع كده.. ويمسك ليهو موضوع يبقى الهدف.. فيفتح ليهو بوست ضد البوست ده تحديدا.. والحكاية دي ما مضرة.. لأنو لو عندو حجة ومنطق اقنع بيهو الناس حيتجاوبو معاهو.. لكن لو ما كان عندو موضوعو حيغتس براااهو..
حأرجع للتكتيكات.. وسيكولوجية الكلام المغتغت.. او في رواية أخرى "المطاعنات"..
ودي..
12-11-2004, 02:19 PM
خضر عطا المنان
خضر عطا المنان
تاريخ التسجيل: 06-14-2004
مجموع المشاركات: 5191
لا شك أن من الصعوبة بمكان تحديد سايكلوجية بعينها يعول عليها او تشكل مرجعيةلمن يودمعرفة تلك السايكلوجية الخاصة بهذا الفضاء السايبيري الوطن .. وكما تعلم ـ وأنا أحمد الله على ذلك ـ أنك أحد الذين كثيرا ما قرؤوني منذ سنين ويعرفون كم أنني لا أخشي في قول الحق لومة لائم !! . لذا سأقول وجهة نظري بكل صدق وبعيدا عن اي مؤثرات خارجيةأو الأقلال من مقام اي أحد هنا او هناك او تبخيس عطاء أي واحدهنا في هذاالمنبر ,, ولكنك بماأنك طرحت موضوع سايكلوجية هذا المنبر ـ وتلكم فكرة تشكر عليها أجزل الشكر ـ على الكل هنا ,, فأنني أقول لك بأن من ملامح تلك السايكلوجية ( ثقافة منبرية جديدة !!!!!)على الأقل لأمثالي من دافعي ضريبة مواقفهم الموثقة ومعروفة كما تعلم .. وأعني بها تحديدا( ثقافة : اللول !!! والوجوه الضاحكة !!!!!والشمارات !!!!!! الى آخر ما يعج به قاموس أهله ومستخدموه معروفون بيننا !!!!!!.. كل ذلك فضلا عن سجل حافل من كلمات الشتائم ,, وهي شتائم كثيرا ماتأتيك من أناس ـ في حقيقة الأمرـ هم أقزام لم تسمع بهم من قبل أو من اولئك الساقطين في دروب الحياة ومدعي الثقافة والعلم والمعرفة والتجربة!!!!!. وكلها أمور بأعتقادي تحط بالطبع من قدر الثقافة التي ننشدها جميعا للرقي باسلوب الحوار وطرق الاختلاف أو الائتلاف وللسمو بمفردات تلك الحوارات لا جعلها مرتعا لمن لا يعرفون لك قيمة .. أو اولئك الذين يعيشون صغارا ولكنهم يسعون لأن يكونوا كبارا عبرك !!! وهؤلاء كثيرا من يستخدمون (طرقاالتفافية!!!!!) قد تخفي عن الأخرين ولكنها قطعا لا تخفي على الكثيرين من أمثالي .
وتلكم ـ جميعها اخي الفاضل محمد ـ تظل ثقافة دخيلة علينا ولا تقدم خدمة لقضية وطنية كانت ام حتى توجيهية تربوية أو اجتماعية سائدة .. ولكنها تقودـ في نهاية المطاف ـ الى تفتيت عضدنا وتبعثر لحمتنا .. فيروح كل منا يهيم في صحاريه الجديبة!!!!!!.
لازم اي زول فينا يعرف انه البشر المعاهو ديل جايين من مناطق وبيئات وخلفيات اجتماعية وسياسية واقتصادية ودينية مختلفة من الجاي منها هو.. عشان كده لما يلاقي ليهو زول هاجمو ولا مكشًر ليهو ولا لابد ليهو ما يقلق.. ويرجعها كلها للسيكولوجيكال ماتر.. عشان كده تلاقي أسلم طريقة للتعامل مع البوستات هي التعامل العلمي البحت.. وفي كتير من الأحايين تجاهلها يكون الحل المفيد.. وتجاهل أصحابها.. خاصة لو كانوا من النوع البيقعد الأنا بتاعتو معاهو في الكرسي جنبو.. .. ولسة ارجع واقول.. الناس هنا أكتر من واعية..
لغاية بكرة وتكتيكات جديدة.. لووووووووووووول..
12-11-2004, 04:10 PM
atbarawi
atbarawi
تاريخ التسجيل: 11-22-2002
مجموع المشاركات: 987
الاخ العزيز محمد سيد احمد سلامات أنا في رأي أنه السبب يرجع ذهنية المشافهة التي تسيطر على غالبية أهل البورد- وسوف اقوم بتفصيل ذلك في بوست قريب- واخالفك الراي أنهم في هذه الحالة يضعون حساب للقاريء0 لأن وضع حساب للقاريء من صميم المثاقفة الحقة - أي شروط ثقافة الكتابة0 بمعنى المنهجية والموضوعية0 وانت لا تفعل ذلك الا لأن شبح القاريء تطاردك لحظة شروعك في الكتابة0 ولكن الحاصل هنا القاريء غائب تماما0 ولذلك فلا حرج من الانزلاق في الاسفاف0
لكن حقيقة ما عارف دي ياتو سايكولوجية لووووووووووووول
لكم الود
12-14-2004, 07:13 AM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8788
خضر عطبراوى رجاء سوف اعود للرد بس فى واحدة من السايكو وقفالى فى حلقى
سايكولوجية(النفس اللوامه)ودى مصطلح يعود الفضل فيه للصديق عباس محمود عضو البورديستخدمة فى الاشارة للزول كتير الشكوى فى البورد فى نفر قليل اصحاب سايكو النفس اللوامه يعنى نوع قصدونى نبذونى داير يحطمونى شكوى كتيرة ومرات تكون ما عندها اى اساس موضوعى يعنى لو مجموعة من المشاركات جاءت عكس ما يتمنى الكاتب طوالى تصور ان هناك مؤامرة وهناك ترصد وتبدا الحروب الدنكوشتية
حقوق استخدام المصطلح محفوظة
12-14-2004, 07:14 AM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8788
خضر عطبراوى رجاء سوف اعود للرد بس فى واحدة من السايكو وقفالى فى حلقى
سايكولوجية(النفس اللوامه)ودى مصطلح يعود الفضل فيه للصديق عباس محمود عضو البورديستخدمة فى الاشارة للزول كتير الشكوى فى البورد فى نفر قليل اصحاب سايكو النفس اللوامه يعنى نوع قصدونى نبذونى داير يحطمونى شكوى كتيرة ومرات تكون ما عندها اى اساس موضوعى يعنى لو مجموعة من المشاركات جاءت عكس ما يتمنى الكاتب طوالى تصور ان هناك مؤامرة وهناك ترصد وتبدا الحروب الدنكوشتية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة