|
|
 زوجة دكتور عمر محمود خالد تسطر اخطر رسالة / الدار
|
زوجة دكتور عمر محمود خالد تسطر اخطر رسالة
عن الدار
الاستاذة ناهد : هل تصدقوا ان البعض حضر لمنزلنا لاداء واجب العزاء في وفاة دكتور عمر واحد ابنائى انفجر باكيا بعد سماع شائعة الموت
في الأسابيع الماضية ترددت شائعة وفاة النجم التلفزيوني د. عمرمحمود خالد مقدم برنامج « صحة وعافية »فتركت هذه الشائعة أثراً نفسياً كبيراً على أسرته ..ذهبت « الدار» إلى منزله والتقت زوجته السيدة ناهد محمود وسألتها :
{ ماهو أثر الشائعة على أسرتك ؟
- شائعة وفاة زوجي سببت لنا ألم نفسي رهيب وعانينا من جرائها كثيراً والحمد لله هو بخير وصحته في تحسن مستمر ونحن معه نخفف عنه آلامه ، ونتمنى له الشفاءالكامل حتى يرجع إلينا فنحن في إنتظاره .
{ كيف تلقيت شائعة وفاة زوجك؟
- عندما سمعت هذا الخبر كنت أمارضه في المستشفى وانهالت علينا التلفونات تطمئن على حاله وتتساءل عن صحة موته .. وعندما ذهبت إلى المنزل لإحضار بعض الأغراض توقفت عربات أمام المنزل ونزل راكبوها لكي « يشيلوا» الفاتحة في وفاة د. عمر وفقاً للشائعة التي سمعوها ومن رحمة الله عليّ أنني حضرت قبل دقائق من المستشفى وأعلم أن زوجي بألف خير . وقبل ذلك اتصل أحد أبنائي باكياً ويتساءل عن صحة وفاة والده فهو سمع ذلك في المدرسة فقلت له هذه شائعة ووالدك بقربي وهكذا تركت هذه الشائعة أثراً كبيراً على نفسياتنا وعانينا كثيراً وكذلك الأهل والجيران
عندي رسالة لأهلي العزاز سلام عليكم يا أهل الحوش الكبير .. يا أهل المحنة والمحبة وأهل الكرم والجود سلام عليكم بطيبة خاطر .. يا أخواتي حوشنا فيه الأمان وبفقد الجعان ويكسي العريان وبجبر المظلوم ويواسي المهموم.
حوشنا فيه العفاف والأصالة والطاهرة.. عندي حاجة واجعاني دايرة أحكيها ليكم .. عانيت من الشائعات وكترة الكلام الفارغ وقالوا مات أبو الأولاد د. عمر ما هو ود الحوش ما هو طبيبكم وحبيبكم كانت عندو مواقف جميلة خلال ست سنوات قدم لكم فيها 330 حلقة من برنامجه « صحة وعافية » ساعد فيه الكثيرين .. عشان الإنسانية وطبعنا السوداني أقول لمروجي الشائعات أرحمونا..ياأخواني نحن أسرة هذا الرجل تعبنا وتألمنا من الكلام الجارح الما بشبه عاداتنا ولا تقاليدنا السمحة أرجوكم خلوا الحاجات الدخيلة ودعونا نتماسك .. أولادي قلوبهم انخلعت من هذه الشائعة عشان كده بقول ليكم حرام تنهدم بيوت ويتشردوا الأولاد والجفا يدخل الحوش .. عليكم الله خلوا الشعبة قوية والنفاج فاتح زي زمان .. انتو عارفين أول ضيف دخل علينا من النفاج منو ؟ ود خالتي مريم ربنا يطراها بالخير مبارك البلال ساعدنا وطايبنا « وتبتب » على الأولاد وقبل ما يقول ودعناكم الله دخل علينا الباشاب وبعد داك جانا د. المعز وحسن السر والتجاني حاج موسى ..ما قلت ليكم خلو النفاج فاتح ومن خشم الباب بسلم على ناس السلاح الطبي وبقول ليهم إن شاءالله ماتشوفوا الشين لأنهم شايلين هم المرضى وقبل ما أمشي دايره أسلم على أهلي من الأسرتين وكل الأصدقاء وحبايبنا وسلامي لأسرة د. نور الهدى وإن شاء الله العشم ما ينقطع ودايماً متواصلين والحوش يكون مفتوح ومستور والنفاج أصلو ما ينقفل ونارنا أصلها ما تنطفئ .. أها ياأخواني أبقوا عشرة على ناس الحوش وخلو النفاج فاتح ولكنا نطلب الشفاء لأبو الأولاد .. خليتكم عافية .
أم الشيخ .
|
|
 
|
|
|
|
ahmed haneen
فيس بوك
تويتر
انستقرام
يوتيوب
بنتيريست