|
|
 دليل الفهلوة و الحركات ... فى كتابة البوستات .
|
1- ابدأ بالعنوان .. اختر عنوان مثيرا و ملفت .. فسايكولوجية المرور على بوستك تحكمها العناوين اولا .. ثم كاتب البوست .. و اخيرا عدد المتداخلين .. لكن اياك و الاستهبال ..
الاستهبال هو ان يكون العنوان بعيد كل البعد عن معنى البوست .. يعنى زى عناوين جريدة الدار .. بالصورة و القلم .. فلان يفجر قنبلة داوية .. و تلقاهو واحد غنمايتو راحت ..بعد ان تدفع خمسين دينار تلعن سنسفيل اجدادهم و برضو بكرة تمشى تشتريها .
2- اعلم ان بوستك يتدحرج نحو الاسفل بمعدل بوست كل ساعة تقريبا .. ناس الخليج ينوموا .. ناس امريكا يصحو .. ناس اوربا يمرقوا .. ناس الواق الواق يدخلوا ..(باستثناء الوطاويط الليلهم نهار و نهارهم ليل ) لذلك احرص ان تديهوا ( زقة ) بين الفينة و الفينة .. و لا تكثر الفينات .. لانو بعد فينتين تلاتة اذا مافى فايدة معناهو ما عندك موضوع اساسا . فخليهوا يفطس و يمشى صفحة البايتات و عشاهم .
3- كن مجاملا .. امشى اى مناسبة فى البورد ( عيد ميلاد .. مرض .. بكا .. ترحيب ) فهناك من قد تنفعك اراؤه لكن بيكون صاريها ليك ( ما جانا فى بوستنا بتاع الهناى داك عشان كدة يسمو ) و بعد ما كانت فى الكيبورد بتيقى فى وشك .
4- استعن بالكوت .. عشان ما تقطع من راسك .. و تقع فى لغم يبقاليك فى رقبتك .. و الجرسة ما بتحلك .
5- افرز كومك من قولة تيت .. فهنا ثلاثة مجموعات فقط : ظلامى .. نورى .. وغد ( و هم اقرب الى الظلاميين لكن ما عندهم صليح .. فيمكن ان يشووك حيا حتى لو كنت اوغدهم ) .
الظلاميين : ما كتار لكن فقريين .. كل واحد يجدعك للتانى ينشف ريقك .. و كل واحد ليهو تخصص .
النوريين : كتار لكن خشم بيوت .. و اول لقب ينالك منهم بانك ( كوز ) اصلى و بعداك يشوفوا الباقى .
6- الدقسة المصدرية :
احذرها ثم احذرها . يعنى تسمع ليك كلام فى و نسة .. تجى طاير تنزلوا .. يجيك واحد بى برود شديد : وين المصدر لو سمحت ؟ .. وتانى يحلك الحلا بلة .المصدر يعنى تخت ليك لينك سمييييينة تحت كلامك تورى الكلام دة جبتو من وين . و اسهل ليك تمشى تعمل ليك موقع للنك .. من الراجيك . فها انت قد صرت فريسة لباقى المعسكر .. ..الى ان تقول الروووب .
7- استعن بذخيرة لا باس منها من نوع ( الالق و الياسمين و العبق التخين ) لزوم ترقد شعرة المثقفاتية و الناس ابان نضما سمان .
... قد يتبع ... وقد لا .
|
|
 
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
برير ..
شفت اسمك حيلى لمن برد .. عاد عجاجتك لى هسة قايمة بى هناك ..
و قلت لى روحى الليلة جاك السم القدر عشاك يا ود تاج الدين ..
لكن اتاريك زول ونسة وضحك برضو و قعدات عصرية ( عصرية = شاى احمر و بس ) .
شكرا على المرور يا ذوق .
| Quote: الا انني اتمني ان يتغير هذا الوضع و هذه و الله دعوة صادقة |
آمييييييييييييييييييييييييين يا برير
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
الاخ برهان
قبل ما تكتب تفكر
تمشى لى اقرب فقير فى الحله جنبك
ليك يكتب كم محايه
شان يجوك ناس القرايه
وكل واحد ليك يكتب
حتى لو من غير درايه
الحروف فى البورد هامله
والمصادر ما حكايه
بس عليك يا فرده واجب
المجامله فى القضايه
ما مهم نوع القضيه
عرسه او حفلة سمايه
المهم انك تبشر
وتبقى راكز للنهايه
بعدين اعمل حسابك ما تقع فى خشم سجيمان دا .باقى لوام بالحيل
تحياتى
كمال اوسـلى
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
و الله يا برهان يا اخوي انا زول مسالم ساي و اعوذ بالله من قولة انا, قالوا شكار نفسه ابليس, و نحن يا زول ناس قري ساي و ما عندنا شيء لباكر و الاعوج منقول ليه اعوج قدام رقبتو و بدون اي مجاملة هذا البوست يلخص مايدور هناو ربما ما يدور فى اماكن اخري فى السودن, يعني يا برهان يا خوي (سودان مصغر/او تجمع مصغر/حكومة مصغرة) , ما عادت فارقة معانا, و لكن يا برهان لماذا تريد ان تحرمنا من شاي العصر باللبن؟ ان شاء الله يا زول نزيده مويه ما مشكلة. و اخيرا نقول لك لا تشتغل بالعجاجة دي كتير , فهي حقا عجاجة نحاول فيها معرفة اين الحقيقة؟ لان الحقيقة يا برهان يا اخوي وسط ركام هذه العجاجة و سنعرفها ان شاء الله , لذلك صابرين !!
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
سجيمان ..
سويتها مداخلة واحدة ..!؟
امانتن فى ذمتك ما جيتك يوم كرامة ممكونة خالتك فى سودانيات .؟
لكن ديل ما مشكلة ..
قرط لى على التوقيع .. ود عبد العاطى دة ما معروف ... يقوم يلحقنا السمحين
فى البورد العضويتو بقت زى رخصة السواقة فى دبى ده .
و هسة زاتو قالو بقت زى رخصة الطيارة .
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
| Quote: من اول يوم طلعتا خازووووووووق |
منو القاليك اول يوم .. ولا اول اسبوع حتى ؟
خازوق لى منو فى اضلاع المثلث ؟
وين المصدر ؟ بى سرعة
شمهروش احسنلييييييك .
Quote: بتشجع تحرر المراة
بتدافع عن الدين الاسلامي. |
الاتنين .. فى مانع ؟ 
داير تجرجرنى عشان تصنفنى .. كان ليك ..
شهر شمار يا شمهروش و بعداك نشوف الحاصل .
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برير اسماعيل يوسف)
|
سى سى يا يمة وحات ابوى العضو الجديد دا جاى بسينيناتو
اسمعنى يا عشاى انا قعدت 6 شهور ليل نهار حتى فرزت الكبمان وحدودها و الكبمان الصديقة و العدوة..( أنظر كومى وكومك وكومو فى ارشيف 2003)
بدور اقوليك انا خالتك بيان الساحرة الشريرة و العجوز الشمطاء الظلامية الهاكرة.. اها وعندنا كوم اسمو كوم من لا كوم لهم
تعال اتلمى علينا.. عشان لما الدواس الكى بوردى يبدأ بدور ليك زول
يقنطر وانت تشوت...
لو شكرتنى حيجيك كم تلفون كدا و وكم اضافة فى ماسنجر الهوت ميل لزوم حنيك واقناع
وتلقى عندك كوم يغطى عين الشمس لا يدك لا كراعك اوعى من الدقسة.. فأحذر انك تشكرنى.. وكان شتمتنى عاد بجيك انجضك وتبقى اشهر زول فى النت باقى انا حائط الشهرة..
فوتناك بعافيةوالله يحفظك من عين الحسود
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
الليييييييلة ..
خالتو بيان ذااااتها
يبرى يا يمة هوت ميلى .
كيفن عاد ما عندك كوم .. ظلاميةدوت كوم.... واركان حرب كمان .
عندما جمعت ناس الحلة كجزء من ممارساتنا الديموقراطية و اخبرتهم بانى انوى الترشح لتمثيلهم فى سودانيز اون لاين و يجب ان يوافقوا بالاجماع السكوتى و الما عاجبو الباب يفوت ديناصور .. انهالت التبريكات ما عدا واحدا منهم .. اخذ يطنطن.. و عندما استفسرته متابطا شرى ... اخبرنى انه يخشى على من منهم .. اذ تناهى الى سمعه انه يوجد بينهم اناس .. اجعص هوت ميل لا ياخذ معهم 5 دقايق .. ثم ذكر اسمك ( تحت تحت ) ..
كان فيها استقطاب بالمسنجر .. انا اخو البنيات ..و بالذات كان استقطاب ناااعم و جندرى . وشغال بتوقيت جرينتش ,,
و الى ان يبدا الدواس .. دعينى استمتع بحميمتكم .
مرحب بيك .. وحاشاك الهكر ..
-----------------------------------
شكرا مرة اخرى يا برير على رفع البوست
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
برهان ازيك ياخوي
في الاول انا عاوز اسعلك رحبت بيك ولا لا
وكما رحبت بيك اهو انت في بيتك والبيت بيتك وبيت اخوانك كمان وما تصرها لي... وبالمناسبة شكلك كوز كبير اصلو النوع البعاين ليك من وراء النضارة يكون ناقشك من فوق لي تحت.. واقل حركة او كشكشة بكون عمل قفلك علي طول
علي اي حال نحن منتظرين المزيد من الكلام البداوي وعلي قولة اخونا شنتير المضاد للعولمة
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: Esameldin Abdelrahman)
|
اهلييين عصام ..
كرامة شنو يا خوى .. دة كان يوم الشمطة مع جنابو فى البوست بتاع صلاح الشيخ ..
عارف الجماعة كلهم رجعوا لى ورا خلونا انا و انت نتراجل .. انا ذاتى بقيت حجاز فى النهاية ( معليش اخوك عشان منزل اسمو و صورتوا ..تقول شنو فى الشلاقة ) ..
لاكن الايوبى طلع راقى .. و انت ذاتك كمان .
مع تحياتى و شكرى لمرورك .. " عليك الله خليك قريب طوالى " .
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
تولوس .. ازيك ..
طبعا يا تولوس اخوك جا خاشى يتلبت براحة .. و ابيت اعمل لى بوست ترحيب .. عشان ما كلو ما افتح خشمى يقولو لى ( عان دة .. انت ود متين يا خوى جاى تتفاصح )
لكن و الله العظيم اكثر ما افتقدته هو ترحيبك .. عارف ليه .. عشان البتاعة بتاعتك البتولع و تطفى دى .. البتعملها للناس الجداد .. عاجبانى بالحيل ..
اهه الرسول كان ما سويتا هسة .
شكرى وودى .
| |
|
|
|
|
|
|
|
|
 Re: دليل الفهلوة و الحركات ... فى كتابة البوستات . (Re: تولوس)
|
قلتا يا وليدى قرنتش عديل كدى.. عاد البيشوفك تنزل فى الاغانى والكروت ما كضب..
ناس حلتكم يتباركو الرشحوك لكن دقسوك عديل جاى بصورتك .. اسع الناس فى اى فراش بكا ولا طهورة ولا عرس ولا نفاس حيقولو يا يمة الخلا عليه برهان ود تاج الدين شتموه جنس شتيمة.. وقالو شنو وشنو.. ويلاقو امك يقولو ليها الله يصلح الحال يا بت امى لكن ولدك اتلوم فى بيان..اها شوفتا كيف جبتا النبيشة لاهلك لا يدهم لا كراعهم.. بعدين
برضو حتكون خواف ومؤدب شديد... الله يجازى النصحك بالاسم الاصلى والصورة اسع يحنكك السنين دا كنت بقيت راس حربة فى الدواس الكىبوردى
فأعمد يا فتى الى اسمك وغيره عشان نشوف المواهب المدفونة
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: bayan)
|
صدقينى يا خالة كنت عاوز اتنكر .. لكن بكرى ابوبكر قال لى تلقاها عند الغافل .. اسمك بى سرعة ولا اتطلب الله .
اها المشكلة ما ناس الحلة .. المشكلة ناس الجمارك .. قالو عمر البشير جا دور معاهم شكلة عشان البوست بتاعى بتاع الجمارك .. و قاليهم احرجتونا .. قالو ليه تمام سعادتك ح نعمل اللازم ..
و سمعت انهم تحت تحت طبعوا صورتى .. و العميد قال للعقيد ( غايتو اخينا ده تانى الا يمرق بى مطار الفاشر )
شوفى ليك جنس شقاوة .
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
الحبيب برهان سلامات ومراحب
مشيت البروفايل بتاعك لقيتو ناشف ومعدّم المعلومة؛بعدين صورتك دي زاتا عندي فيها راي انت اتصورتها بالليل ولا بالنهار ؟؟باقي مزغلله عيوني وماقادر أركّز فيها.بعدين تعال هنا الحنك دا جايبو من وين؟ تكون من خرجين روسيا ياربي؟
يازول غايتو مرحب بيك وبكل زول ظريف في البورد الناشف دا.
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
فوق لانه يا برهان يا اخوي انت ما زول ساهل, الواحد احسن يخلي حركات تهليل و تكبير دي و ينبطح تمشيا مع النظام الدولي الجديد!! و ما فيش داعي للحركات, فناس تهليل و تكبير و نأكل مما نزرع و نلبس مما نصنع خلو هذه الحركات التهليلية و يمكنك ملا حظة ذلك فى (اللقاءات الجماهيرية) , فنادرا ما يلجأون اليها بصوت فيه بحة الشهادة لله!! فيا اخوي اعطينا الامان!!
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: 7abib_alkul)
|
برهان
انا عاوز االمك مع كوميى ايه رايك كومى طبعا فيه
المطر وشتات...عشان الشعر
دكين وابوامنة وسجيمان
وليد طه زالشريف شلبى اولاد الهند
بنات العباس لزوم التطعيم
بنات قوتة.....لزوم النك نيم
اساسى وهوب فل لزوم الظلامية
عشان انا بكره النور الكتير
الخالة الفوق دى ما ماسك فى توبا
طبعا الفردة هشام يازول
والمشورة الخال ودقاسم
معتصم حمزاوى...اخر حب بداوى
العمدة وحنين
كومى هوى ياكومى
برهان تاج الدين
هشام شيخ الدين
كومى هووووووو ديلاك جن
بصحك انت جديد
لكن على الطلاق كنت متصفح قديم اكثر من 3 سنوات وما لقيتلك زول زكاك
الى ان جاءت الانتفاضة...وجاءت حكومة الرجل العاتى عادل عبد العاطى وكل يوم شايف
فى 10 جداد...عشان كدا قلت الطلبة الجداد ديل ما دام شلة خليهم يتكومو براهم
لكن ياخوى مالكم ياكافى البلا جايننا عذابة ولا جكسوية واحدة ما جبتوها
كان اسى اتلمينا فيها زى النحل
الا هبى بوستك وافريحنا
ولا تزرى حبات الاسبرينا
اذا بلغ البورداب لنا اسبوعا
كتب فى السياسة والفنونا
واذا بلغت البوردابة لنا يوما
بوستاتها مرفوعة كل حينا
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: abuguta)
|
ابقوته ..
قالوا فى واحد حلفاوى ولدوا اسمو محمد مشى امريكا و قطع الخبر .. عمك بعد تلاتة سنين قطع تذكرتوا و سافر امريكا يفتش ليهو .. لاقاهوا واحد بلدياتو فى المطار ..قاليهو محمد ولدك دة بقى حاجة تانية ارح اوديك ليهوا .. محمد مكتبو فى اخر طابق فى ناطحة سحاب .. اها الاسانسير قزاز و طالع و طالع عمك بقى يشوف الناس يصغروا و العربات تصغر .. اتلفت على الراجل قاليهو:
صالح .. انت تقصد ياتو محمد ؟
كان ده كومك معاك تب . بس انت تقصد ياتو ظلاميين ؟
دكين قالو جاى يفش غبينتو من طرف .. لا فارز قديم ولا جديد .. كدى النمشى على بوست خدر نكفرليهو قبال ما يجى صاد ..
اساسى و هوبفول الايامات دى ما براهم .. كلام دقاق و شعر ..لكن الواحد برضوا احسن ما ياخد راحتو .. مااااااا مضمونين
حكاية البنات دى كنت عاوز اوريك السبب .. لكن سماح ادريس و اشراقة الايامات دى سمهم فاير .. خليهم يروقوا شوية .. بعدين نتفاهم .
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
سلام يا برهان
وكله سنة ونحن جداد
هناك فلسفة اللعلعه في الفارغة والمليانة ، يعني في ناس كدة ممكن الواحدة يشاكل ضلو لو مالقي ليهو بوست يخربوا ويعكر صفاهو ، عندنا هنا مقولة لم تكون سائق في الشارع الكبير ده ، يجيب واحدة طائر من من وراء تقول محصل ليهو جنازة ، يشبكك بوري لمن اضنيك يصنن ، نزح يمين ونقولوا ( أه أن شاء الله تجي الأول ) بعد تجي الأشارة تلقاهو واقف ولم يستفيد من جريهو وبوريهو أي شي سوى تبديد الصمت ولعانات الناس ؟
أها في ناس في البورد ده ( الواحد قائل نفسو بجي الأول لو شاكل أي زول ) وبفتكر أنو زول مشهور وزائع الصيت لو أصبح على لسان كل الناس بالسمح والشين.
لكن لو حبيت تصنف نفسك من شلة أو جماعة معينة فأنت الخسران فكأنك تقفز من سفينة محترقة الى بحر هائج !!!
أن شاء الله البرالمة الجداد ديل زينا يكون فيهم فائدة وما ينجروا وراء قدامي المحاربين ، ودمت بالبوست الظريف المعافي من تجاعيد الاحزان
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: Sidig Rahama Elnour)
|
السودانيين شرانيين بى طيبة شديدة جدا جدا
دى مقولة قالها لى صديق ولقيتها موافقه معاى تماما
اها لما البوست يبدا...كل زول يرد بشوف ليه "كورنه" لمسح الاخر بالارض
الطريقة دى بتجيب خش كبير جدا
والباقيين "كوم الزول" يعملو دور مشجع المصارعة الحرة " اديلو" " ما تخاف منه"
اها البوستات الزى دى ابدا بيها هى ...
بتديك "اوه" زى does فى القوملة الانقليزية المصرية ... بتمنحها أووة ...يعنى قوة "مصرية" بحتة
واتوكل على الله والادمن
| |
|
|
|
|
|
|
|
|
|
Re: دليل الفهلوة و الحركات ... فى كتابة البوستات . (Re: برهان تاج الدين)
|
برهان وحبيب الكل
سلام ومليون سلام لابوقوتة
والف سلام ل امام حسن
ويازوول والله قعادك في دكة الاحتياطي خسارة كبيرة للتيم
حبيب الكل شغلك والله نضيف وعاجبني بالحيل
برهان
ازيك ياخي
والله جد انت اضافة مميزة وحلوة...اوعك تنضم لي شلة بعدين ما بتحلق تلم في الناس الحولك ديل
خليك بعيد واحزرك من شلة ابو قوته وناس دكين دي شلة خطرية
ديل ناس همبتة ساكت
شعر وشعراء وكمبيوتراط
واجاويد
وهكر
وبتاعين جكس كمان
الليلة الواحد فيهم مسكين ساكت
بكرة تلقاه رئيس مجلس سيادة او مصيبة زمان او حتي عضو مجلس حكماء
يازوول ابعد عنهم وغيلهم من من الشرفات
| |
|
|
|
|
|
|
|
|
 Re: دليل الفهلوة و الحركات ... فى كتابة البوستات . (Re: شمهروش)
|
برهان:
Quote: مرحب بيك يا امام ..
مشكلت الصورة انها بتحد من بعض ملكاتك فى الكلام .. و بتحميك تتفشى فى الناس .. لكن بما انو اخوك قرر يتنازل عن هذه الملكات .. مؤقتا .. فما ما فى مشكلة .
ممكن اوريك الصورة بنزلوها كيف بشرط انك تورينى البال توك ده شنو .. سالت بكرى ابوبكر لخصنى ليك تلخيصة عدوك .
لى قدام ... فى انتظار قصتك مع بكرى فى السفارة |
حبيبنا برهان
أشكرك و أعتذر لعدم اطلاعي على ردك إلا الأن للمشغولية...
حكايتي مع بكري في السفارة الأمريكية ...أنا حاسي إنو الحكلية دي ممكن تزعل أولاد العم سام و تجيب لي الكتاحة...أوعدك إنو أفرد ليها بوست كامل..لكن بحكيها بعد ما أدق التأشيرة يا فردة..
البالتوك... و الله ألحس المكوة -زي ما بتقول- لو فاهم فيهو حاجة... كل الفهمتو إنو موقع فيهو غرف للمحادثة كتابة و صوتا..و فيه غرفة للسودانيين، لكن محتاج تنزل برمجيات software معينةمن الشبكة وتدخل الغرفة بطريقة معينة ...يعني زي الميرك mIRC لكن معقد شوية. (النصيحة ياخوي: قبل حوالي العشرة شهور دورت بوستات لشرح طريقة التسجيل و الدخول(بالعربي كدة: دروس عصر)، حقيقة أنا ما اهتميت بالموضوع في وقته، لكن من الأسئلة و الردود حسيت إنو إما الموضوع ده صعب جدا زي ال rocket science ،ولا إنو في فرق كبير جدا بين الشباب الجاضمة الموضوع و المسطحيين زيي... أرجو من الناس الناقشة تورينا...
على أي حال ممكن ترجع لأرشيف 2003 أو بداية 2004
بعدين: إنتو صحي ليييييييه جايين عزابة كدة؟ براااااكم عايزين الهوا مع الجنادرة و الجندريات ...
ياولد داير تنسيني الداير أقولو مالك: وين باقي دليل الفهلوة؟؟
| |
|
|
|
|
|
|
| |
برهان تاج الدين
برير اسماعيل يوسف
سجيمان
osly2
شمهروش
bayan
تولوس
ود حماد
Emam Hassan
7abib_alkul
abuguta
Sidig Rahama Elnour
Tumadir
Kostawi
زول ساكت
فيس بوك
تويتر
انستقرام
يوتيوب
بنتيريست