قال تعالى .. (وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلَا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ذَلِكُمْ وَصَّاكُمْ بِهِ لَعَلَّكُمْ تَتَّقُونَ) .. تخيل معي .. تكون في قلب مدينة .. وتحمل في يدك خريطة .. مدينة اخري .. مكتوب فيها اسم المدينة الاولي .. تخيل حجم المعاناة .. مهما الواحد كان مثابر .. وبفكر بأيجابية .. هل جهوده حتثمر .. البحصل .. أنه كل ما بتعب أكتر .. كل ما حا يوصل للمكان الخطأ بسرعة أكبر .. أخطر شيء .. انه الواحد يتوهم أنه ماشي في الطريق الصحيح .. في حين أنه .. بيبعد خطوة ورا خطوة .. عن هدفه .. ودا الحذرنا منه المولي عز وجل .. (قُلْ هَلْ نُنَبِّئُكُمْ بِالْأَخْسَرِينَ أَعْمَالًا _ الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا) .. الطريقة البننظر بيها للحياة .. والناس من حولنا .. هي البتشكل .. طريقة تفكيرنا .. وبالتالي طريقة تصرفنا .. وكل ما ذاد وعينا .. لأفكارنا وخرائطنا .. أوالنضارات البننظر من خلالها الى العالم.. كلما استشعرنا مسئولية اختيارها.. و مقارنتها بالواقع.. والإستماع الى الآخرين بصدق .. والإنفتاح على أفكارهم و تصوراتهم للأمور.. نحصل على صورة أوسع و رؤية موضوعية أشمل.. ودا الشيء الكان الرسول صلي الله عليه وسلم .. بعلمه لأصحابه ..وبوسع رؤيتنا للأشياء .. فنلاقيه .. صلي الله عليه وسلم .. يطرح علي الصحابة .. نظرتين عن الأفلاس والغني .. عن أبي هريرة أن رسول الله صلى الله عليه وسلم قال .. ((أتدرون ما المفلس)) قالوا: (( المفلس فينا من لا درهم له ولا متاع )).. دي الخريطة الموجودة عند الصحابة حاليا .. يقوم النبي بتوسيع المفهموم لديهم .. ((فقال إن المفلس من أمتي يأتي يوم القيامة بصلاة وصيام وزكاة ويأتي قد شتم هذا وقذف هذا وأكل مال هذا وسفك دم هذا وضرب هذا فيعطى هذا من حسناته وهذا من حسناته فإن فنيت حسناته قبل أن يقضى ما عليه أخذ من خطاياهم فطرحت عليه ثم طرح في النار )) .. نري هنا .. ان الصحابة كان لديهم مفهوم معين .. ومعتقدين أنه الصاح .. ويأتي الرسول صلي الله عليه وسلم .. ويعطيهم مفهوم أعمق للأمر ..
العاوز نصل ليهو .. أنه ليس بالضرورة انه افكارنا دايما صحيحة .. وان بدت في ظاهرها غير ذلك .. تعالى نشوف ده واضح جدا.. في جمل من أشهر و أغبى الجمل التي قيلت على مدار التاريخ.. واللي كانت في الوقت و الزمن اللي قيلت فيه تبدو منطقية.. و صحيحة..
* "ليس هناك داعٍ لأي شخص أن يمتلك جهاز كمبيوتر في منزله" كينيت أولسن. رئيس و مؤسس شركة Digital Equipment Corporation.. قيلت عام 1977 * "الطائرات ماهي الا ألعاب مسلية و لكن ليس لها قيمة عسكرية" مارشال فرديناند فوتش، واضع استراتيجيات حربية فرنسي، و قائد القوات الفرنسية مستقبلاً في الحرب العالمية الأولى ، قيلت عام 1911 *"(الإنسان لن يصل أبداً الى القمر) بغض النظر عن التقدمات العلمية المستقبلية". د. لي دي فورست .. مخترع الصمام الإلكتروني المفرغ. و أبو الراديو، قيلت في 25 فبراير عام 1967 * (التلفزيون) لن يستطيع الحفاظ على أي قطاع بجدية بعد أول ستة أشهر . سوف يشعر الناس بالإرهاق بسرعة من التحديق في صندوق من الخشب كل ليلة" داريل اف. زانوك . رئيس شركة 20th Century Fox. قيلت في عام 1946. * "بالنسبة لمعظم الناس، استخدام التبغ له أثر مفيد" د. أبان جي. ماكدونالد. طبيب جراح من لوس انجلوس ، كما صرح في مجلة النيوز ويك عدد 18 نوفمبر 1969 * "إن هذا الإختراع المسمى بـ"الهاتف" يحتوي على الكثير جدا من العيوب بحيث لا يمكن التفكير فيه بجدية كوسيلة اتصال . هذا الجهاز لا قيمة له بالنسبة لنا" مذكرة داخلية في شركة ويسترن يونيون Western Union عام 1876 * "الأرض هي مركز الكون" بطليموس، عالم الفلك المصري العظيم في القرن الثاني. * "لم يحدث أي شئ ذو أهمية اليوم" كتبها الملك الإنجليزي جورج الثالث ملك انجلترا في الرابع من يوليو 1776 يوم اعلان استقلال الولايات المتحدة. *"كل شئ يمكن اختراعه ، تم اختراعه بالفعل" شارلز اتش، دويل، مندوب الولايات المتحدة لبراءات الإختراعات في 1899.
اها .. رأيكم شنو في الكلام دا .. نحنا اليوم في منتصف سنة 2004 ..
هل الكمبيوتر فعلا ماليهو لازمة في البيوت؟ هل الطيارات مجرد لعب و ما ليها اي قيمةعسكرية؟ هل الإنسان فعلا ما حا يوصل للقمر أبدا؟ هل فشل التلفزيون كاختراع؟ هل التدخين مفيد للصحة؟ هل فشل التليفون كاختراع؟ هل الأرض مركز الكون؟ و هل فعلا كل شئ يمكن اختراعه تم اختراعه بالفعل؟ ..
رأيكم شنو .. كلام فارغ مش كدا .. طيب نحن ذاتنا .. عندنا أفكار ذي دي .. نبقي مؤمنين بيها .. وفاكرين أنها حقيقة .. وهي ما صحيحة أساسا .. ما سمعت واحد بقول قبل كدا .. "انا فاشل اساسا " .. " يا زول دراسات عليا شنو .. انا يا دوب أعدي الجامعة " .. " والله ما في فايدة .. أنا وأبوي ما ممكن نتفاهم " .. " الدكتور في الجامعة قاصدني .. المادة دي ما بنجح فيها " " شغل شنو .. البلد دي ما فيها شغل .. العمرة وطوالي " ..
كل دي مفاهيم وقناعات .. ما صحيحة .. و لكن لأن أصحابها مقتنعين بيها.. أصبحت زي القيد في رقابهم. سدود و حدود بتعوقهم.. في مثل مصري بقول .. "اللي يخاف من العفريت .. يطلعله".. القناعات و المعتقدات ماشية زي المثل ده بالظبط.. لو كنت مقتنع بمفهوم معين.. تأكد انه لا شعوريا حا تعمل المستحيل عشان تحول القناعة دي لحقيقة.. يعني المقتنع انه فاشل في دراسته.. حايعمل المستحيل عشان يثبت انه فاشل.. و اللي مقتنع انه لا يمكن يتفاهم مع والده مثلا.. لا شعوريا.. حا يلاقي تصرفاته كلها بتسعى لزيادة الفرقة و الخلاف بينه و بين والده.. زي ماقلنا.. القناعات دي.. أو "الخرائط".. عاملة زي النضارات.. المقتنع بمفهوم غير صحيح .. عامل بالظبط زي واحد مقاس نظره 3/6 .. و لابس نضارة مقاس 5/6.. نضارة غلط.. فطبعا شايف كل حاجة غلط.. بس متهيأ ليهو انها صح.. لكن لو لابس نضارة صح.. حا تلاقي الدنيا بتتغير تماما..
يلا .. بدل النضارة مع القاعد جنبك ..
06-17-2004, 02:58 AM
تولوس تولوس
تاريخ التسجيل: 06-06-2004
مجموع المشاركات: 4132
Quote: تخيل معي .. تكون في قلب مدينة .. وتحمل في يدك خريطة .. مدينة اخري .. مكتوب فيها اسم المدينة الاولي .. تخيل حجم المعاناة ..
حميدة أخي الحبيب دائما اشتاق إلي كتاباتك والي أعمالك الرائعة .. وحقيقة تدهشي برويتك الصافية للفكرة وسلامة التعبير عنها وإيصالها ناصعة ونقية ومنسابة ...
أخي اتفق معك تماما في ان الروية السليمة هي أعظم وسيلة لبلوغ الأهداف.. وكثير منا تختلط لديه الأفكار ويتوه في طرق التنفيذ ..
وفي نظري المتواضع إن الرجوع إلي من لهم الخبرة والدراية وسؤالهم والاستفادة من علمهم وخبرتهم خير طريق لفك الارتباط بين الفكرة والأحلام.. وبين الواقع والإقدام... وما خاب من استشار
أشكرك أخي الكريم لهذه اللوحة الرائعة ...ومزيد من الإبداع
06-18-2004, 05:03 AM
humida humida
تاريخ التسجيل: 11-06-2003
مجموع المشاركات: 9806
عزيزي طولس لك الله .. وحاجات كتارات كدا .. لا حدود لها
التساؤل البطرح نفسه دايماً ياتري .. معتقداتك عن نفسك شنو بتساعدك .. ولا بتعوقك .. وفكرتك عن نفسك شنو .. يا ترى بتقول لنفسك شنو .. أنا غبي.. انا فاشل.. انا مكروه.. انا ما منظم.. انا ما مكن ربنا يتوب علي انا عصبي.. انا خلقي ضيق ..الخ وهل الكلام دا صحيح كل دي نضارات .. بمقاسات غلط دي أفكار محتاجة تغيير .. لانه طول ما انت مقتنع بالافكار دي حتتصرف بناءاً عليها What you see.. is what you get أحكي ليك أمثلة بسيطة .. اعرف واحد كان بحكي لي .. كيف انه كان خجول جدا ومنطوي جدا .. والسبب شنو انه حاسي انه زول شين جدا ومفتكر أحدب نوتردام .. بالنسبة ليهو في قمة الوسامة عشان كدا كان بتحاشى التجمعات والرحلات البتضم الجنسين في يوم كان ماشي الجامعة مع زميل ليهو وقعد يشتكي ليهو .. انه ما قادر يتعرف علي واحدة لانه شكله مش ولا بد .. وكدا فأخونا رد عليهو ياسلام .. هو من غير ما تعرف بنات يعني الدنيا وقفت خليك اكبر من كدا ففكرته عن نفسه اتغيرت .. وقلع النضارة القعر كباية و اختلفت حياته بعد كده تماما.. راح الخجل.. و الإنطواء لأن السبب اللي كان بيعوقه .. اختفى وعلي قول عادل الامام .. مين الولع النور فكرة.. ممكن تغير حياتك كلها.. فياترى.. هل أفكارك عن نفسك.. بتقيدك.. بتعوقك.. ولا بتديك دفعة للأمام ؟ لأن زي ما أفكارنا السلبية بتبقى عاملة زي القيد في رقبتنا أفكارنا الإيجابية بتفجر أفضل مافينا من طاقات
في فرنسا خُلع الملك لويس السادس عشر عن العرش .. و سُجن و الخلعوه عن العرش .. أخدوا ابنه .. الأمير و ولي العهد .. و هو لسه غلام صغير قالوا احنا نبوظ أخلاقه .. نربيه بحيث يطلع انسان منحط .. بحيث لما يكبر ما ينفع أنه يطالب بعرش أبوه .. و فعلا.. أخدوه لبلد تانية .. و عرضوه لكل الشهوات و الفواحش و البذاءات التخطر في بالك عاش في وسطها.. و اتربى في وسطها.. و كبر في وسطها كان محاط يوميا .. 24 ساعة بكل ما يمكن أن يجعله أحط انسان ممكن تتخيله كل شئ متاح و تحت أمره و فضل على الحال ده 6 شهور متواصلة و لكن العجيب و الأدهش أعداء الملك .. ان الشاب الصغير ده ما اتأثر نهائيا بالجو الختوه فيهو لم ينحن و لو مرة واحدة تحت ضغوط الشهوات دي كلها فسألوه كيف ده .. انت شاب صغير.. و كان قدامك كل المتع و الشهوات اللي يحلم بيها اي شاب فكان رده " ما بقدر أعمل البتطلبوه مني .. لأني اتولدت عشان اكون ملك" اتربى على المعنى ده .. انه حايكون ملك.. فعاش ملك .. فكرة ده معتقده عن نفسه.. دي النضارة اللابسها
و ليه نجيب امثلة من الغرب ؟ محمد الفاتح شخصية جبارة كانت بدايته كيف بفكرة زرعها فيهو معلمه كان بيروي ليهو حديث النبي " لتفتحن القسطنطينية.. فنعم الأمير أميرها.. و لنعم الجيش جيشها" و يقول ليهو .. ليه ماتكون انت الأمير ده ؟ و فعلا بدأ الحلم يكبر معاهو .. و بدأ يفجر طاقاته و بدأ محمد الفاتح.. الطفل .. ياخد فرسه كل يوم و يقيف على شاطئ البحر و ينظر الى أسوار القسطنطينية.. و كأنه يقول "أنا هو يا رسول الله" و يرجع .. يتعلم فأتقن 6 لغات .. و درس فنون الإدارة و القيادة و الحرب و القتال و التاريخ والجغرافيا و الرياضيات كان علامة عايش .. و هدفه قدامه .. و حلمه بيكبر يوم بعد يوم و لما بقى عنده 21 سنة .. فتح القسطنطينية فتحها محمد الفاتح.. محمد الفاتح.. لما مات بابا روما أقام الأعياد و الإحتفالات وأمر الكنيسة أن تقام صلوات الشكر لمدة 3 أيام
و ارجع تاني و اسألك فكرتك شنو عن نفسك ؟؟ طيب ما تعمل زي محمد الفاتح غير النضارة البس نضارة بعدسات مكتوب عليها " أنا ناجح " " أنا خليفة الله في الأرض " .. " أنا حفيد ولد آدم ".." أنا مسلم " لو غيرت قناعاتك السلبية عن نفسك صدقني حا تتفاجئ بأن حياتك اتغيرت 180 درجة
و هنا اكيد بتسألني.. كيف اغير قناعاتي السلبية عن نفسي ؟؟ بسيطة ابعد عن الناس البتحاول تكسر مجاديفك ما شرط تقاطعهم .. لكن اي شخص تحس انه دايما يثبط من عزيمتك ما تحكي ليهو عن نفسك و عن مشاريعك أبدا لأنه حا يحبطك ابحث دايما عن الأشخاص البؤمنوا بيك.. يشجعوك و ده ممكن يكون أخ .. او صديق .. أو أب .. أو أم .. أو واحد قريبك أكيد فيه زول في حياتك بيؤمن بيك اكيد في زول في حياتك .. شايف فيك الانت ما شايفه فتش على الشخص ده احرص انك تحكي ليهو عن نفسك .. عن أحلامك .. عن طموحاتك.. حا تلاقيهو دايما .. بياخد النضارة .. ينضف ليك عدساتها .. و يلبسها ليك تاني بس اديهو فرصة هو كمان يحكي ليك عن نفسه.. و ما بضر برضو لو شجعته أما اذا ضاقت بيك الدنيا و مالقيت زول فما تقلق
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
humida
تولوس
فيس بوك
تويتر
انستقرام
يوتيوب
بنتيريست