يحكى ان احد المغتربين له اخ من تجار الدفع الاجل او الشيكات الكاشفة..فوقع فى ورطة دخل فيها السجن..فاتصل عليه والده ان اخوك الصغير مسجون ليه كم ويوم انتو ما سمعتو ولا شنو..طيب يابوى نسوى ليه شنو لازم تتصل على اخوك الفى دبى واخوك الفى امريكا عشان تدفعوا المبلغ دا بدل الزول المسكين دا يكون فى الحبس القروش طايرة لو مالقينها فى يوم زى دا تانى فائتها شنو الوالد دغدق مشاعر اينه الكبير فبعد محاولات ومجابدات استطاع ذلك المغترب ان يجمع المبلغ المطلوب لفك قيد ذلك الاسير المظلوم فى نظر والديه...هذه السالفة حكاها مغتربنا الاول لمستمه المغترب الثانى...وهو كان يستمع اليه بتعجب من هذه الحادثة التى لا تساوى عشر العشر من حادثة اخيه المدبرة... فقال له صاحبه الثانى فى العام الماضى نزلت اجازة السودان انا والعيال..ومعى 20 مليون جنيه ..ليس فى مخيلتى مشروع غير الاستمتاع بذلك المبلغ وسط الاسرة واهلنا الطيبين..وحين وصلت المطار تنسمت ريحة الوطن وزاد شوقى لابى وامى الذين لم اقابلهم ردحا من السنين..وحين دخلت حوش بيتنا وجدت امى تبكى وابى سلم على وطلع.. واخواتى وجههن يلعن قفاهن..فقلت فى تعجب واندهاش فى شنو ياجماعة قالو لى اخوك فى السجن..مالو يالله...قالو مسجون شايلو شيك من ناس فلان وجابو ليه البوليس امس ,فعشان اجازتى ما تكون مكدرة لازم هذا الاخ المدلل ان لا يبيت فى السجن. فذهبت الى قسم البوليس فعرفت ان المبلغ المطلوب 20 مليون هو نفس المبلغ الفى جيبى...فدفت لهم واخرجته عزيزا مكرما..من اول يوم دخلت فى ازمة مالية..وقطعت اجازتى ورجعت للمملكة...فبعد كم يوم اتصلت على اخت الصغيرة تسال من حالى ..وقالت لى ان اخوك كان مدبر ليك مكيدة عشان يشيل منك ذلك المبلغ فاتصلت عليه..وبعد جرجرة فى الكلام ومطاولة عرفت بانه كان مدبر تلك الحبكة فسالته لماذا يافلان تعمل كدا....قال لى امال قروش ناس السعودية دى يطلعوها منهم كيف.كان ما سوينا كدا .بس كان ياخوى ترجع لى 5 مليون عشان اكمل اجازتى..قال لي راحت عليك.المرة الجاية..فالتفت الى صاحبه الاول وقال ليه...اها ياخوى..اخوك دا مفروض كان تبنى عليه قـــــــبة... ولكم ودى ابقوتة_فى ساعات الدوام
مثل هذه الحكاوى وافظع منها للاسف اصبحت تتكرر كثيرا .. امال قروش ناس السعودية دى يطلعوها منهم كيف.كان ما سوينا كدا
الموضوع يبدو ان تغير فى اخلاق الناس عامة فمثل هذه الممارسات كانت من الاستحالة بمكان قديما بل كان الكل حينما تذهب فى الاجازة يحاول ان يوفر عليك عناء الصرف ويشعروك بانك تعانى فى الغربة ولا يجب ان تعانى هنا ايضا ويتبارى الكل فى اكرامك بما تستحق ولكن الان الصورة انقلبت رأسا على عقب ولست ادرى ...
الله المستعان وهى صورة حزينة ولا تمثل السودانى بأى حال من الاحوال
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
abuguta
قرشـــو
فيس بوك
تويتر
انستقرام
يوتيوب
بنتيريست