كترت طلبات حوا على ادم ، ادم عليك الله انا داير لي حجر جديد عشان اقطع بيهو اللحمه ، عايزه لي خشبه اعمله مفراكه العندي دي بقت ما بتفرك عليك الله ورقه التوت الانا لابساها دي قدمت ولونه بهت ، وانا شايفه فلانه لابسه ليها ورقه عنب خضرا حلوه ، عليك الله عايزه لي شبشب جلد نمر بدل جلد البقر الانا لاحفاه ده
ادم ، مشغول بترتيب اوضاع الانسانيه
تزعل حوا وتبتدي تطنطن... يتلفت ادم ويبدا الحنك حوا انت عارفه انا بريدك قدر شنو وانا زى ما وعدتك حخليك اسعد انسانه في الدنيا دي، ، انت عارفه انو يدك دي طاعمه وانو احلى اكل اكلت في حياتي دي كلها هو اكلك انت يعني حتي لو ما قطعتي اللحمه زاتو، اكلك طاعم ورهيب وبعدين انت عارفه فلان داك سالنى قبل كم يوم وقال لي انت جبت ورقه التوت دي من وين لي حوا لانها عاجبه مرتي وقالت عايزه واحده زيها، انا قلت ليهو دي زيها ما تفتش انا جبتها ليها من الصين في عيد زواجنا والله يا حوا انا بريدك وانت كده،.. بي كل حاجاتك الحلوه دي وانا حقيقه محظوظ بيك الحنك يمشي في حوا ، وراسا يتنفخ زى الكوره، تنسي الحجر والمفراكه و ورقه التوت ، وتقول لى نفسها، ماصلو الحاجات دي زاته انا كنت عايزها عشان راحتو هو، ومادام كده بريدني و مرتاح خلاص طيب و بي بسمه خفيفه كده قالت في سرها انا زاتي محظوظه بيك يا ادم
الامور ماشه كده لغاية ما جا يوم والجن ركب حوا، اكتشفت انو كل ما تقول دايره حاجه ادم يدور الحنك وياكل ليها راسه وينسيها الموضوع ووصلت حوا لى نتيجه انو نقطة ضعفها هي اضانه ، وبدون ما تشاور اي زول تقوم بي عود تقد اضانه، وتلفها بي شويه قش واعشاب متسلقه ولما وعت بي انها عملت شنو الخوف قتلها وقعدت منتظره ادم يرجع من الشغل
دخل ادم من الشغل ، شاف حوا انبهر ـ حقيقه كانت فائقه الجمال رهيبه العيون كبيره ( من الخوف ) مع ربطه القش الحول راسه ديك كانت ملاك بس حضنا ادم وبدا يهمس ليها، طبعا هي ما سامعه حاجه لكن شايفه وحاسه الاعجاب والحب من ابوالديم
من اليوم داك حوا كل يوم تغير في ربطه اضانه المقدوده، مره ورده ومره تعمل ليها نجمه من الطين، ولغاية اليوم نلاقي بنات حوا بقدوا اضانم بغيروا كل يوم حلق جديد
اها يا شباب ؟ انا حكيت ليكم قصه تطور الحلق البنشوفوا في اضنين جميلاتنا هسه.. منو العارف الغوايش والحجل ديل قصتهم شنو؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست