|
|
 ... حــاجه ( مهله ) ... دافي .. بوست في الذاكره ...
|
لم..يكن..بطاطس بوسطة الخرطوم..أفضل حالا من عدس الداخليه..
كان لزجا...وباهتا...ولو اني حملته..كل معاني الهلاميه..لاحتملها..
يملؤك..عصام الدين ببشاشة اللحظه..حتي لتشعر انك..ما خسرت شيئا.....وتنسي لسعات الشمس..الحارقه..وهي تلهب راسك بسياطها وانت في طريقك من ميدان ابو جنزير الي مكتب البريد بشارع النيل..
طلب البطاطس..هو بنده الرئيسي..في قائمة بنود اكرام الضيف
والبند الاجمل....تعريفك..بي موظفات المكتب
ده اخو..دكتور كمال صاحبنا..يا سميه..-
عليك الله!!!!؟-
حلااااااااتو.-
تقولها سميه...بطريقه..تفهمها انت.....وتتبعها بنظره..تعمق فيك ذاك الاحساس
عصام الدين..لا يفهم مثل هذه الاشياء
او لعله يفهمها..ويتاجهلها
كان غريبا..في مثاليته.....
قطعه من ابوه الله يرحمه...-
كثيرا ما قال لي ..ابي هذا الكلام..كلما سالته...
انت يا ابوي..كيف تنوم..وعصام ده بيتونس معاك!!!!؟
يا ولدي..عصام ده..مخلوق من طينه..خاليه من الزعل-
كان عصيا علي الاحزان....رجلا في منتهي الابتسام...او مبتدا الضحك
قريب الي القلب..كقرب الشك من الظن....وكما عرف ابي..من اين اتي عصام..بسماحته تلك..عرفت انا..من اين اتي بطول البال...
امه..الحاجه مهله..
كانما عرف ابوها طباعها وهي في الخدر...سماها مهله
السلام عليكم..ناس البيت
....اصيح داخلا دون استئذان
اهلا ابوي...ياتيك صوتها
اعوام..وهي في بساطتها تلك...
فتح..قال عايز يمشي الخرتوم كمان-
هكذا تنادي ابنها الكبير..تخفي ياءه المنقوصه
كانت امراه..من نسيج غريب....عركتها الدنيا..فما خلفت منها..الا صبرا..وطول احتمال...
لذلك..كان خبر اغتراب عصام...مهول الوقع لدي.....
لا بد وانا حادثا عظيما الم بالوطن...مثله..لا يغترب ابدا..وقد ارضعته هذه الانثي....
يدخل علينا..في منزلنا المتهالك بابي روف..يسحب الموتر خلفه..ويضحك
ده شنو يا زول!!!!؟؟؟
الله الموتر اتعطل بي جمب منتزه المورده..وجيت كاريهو من هناك تصدق!!؟ ثم يضحك
طيب ما كان توديهو لي اي زول بتاع مواتر في الشهداء يصلحوا ليك!!؟
واجيب ليهو قروش التصليح من وين..هاهاهاهاهاهاهاها..خليهو احسن هنا معاكم..بصلحو براي
يضحك..هاهاهاها
مثله..لا يغترب
يسحب دراجته..دراجته في رابعة النهار..ويصلحها بيديه.....ياكل البطاطس الهلامي ..كل يوم....ويضحك..
ذهب الي قريبه..المترف في وكالته العقاريه....ذات ليله...فدعاه الي عشاء ..جيد الملامح
اكل..هو وابناء عمه..وحين فرغوا...جاء الساقي..بيانع الشراب ..
اشرب يا عصام..قالها قريبه المترف
وعصام ود حاجه مهله..لا يشرب
اشرب يا ولد
والله بصراحه يا عم فلان..انا ابوي..موصيني..اعمل اي حاجه ولا اشرب خمره
براءته..مضحكه
طيب تعال هنا...قالها واخذه بيده الي خارج الدكان
شايف الجامع داااااااك!!!؟
ايوه
ده بناه..ابوي..وكان موصيني ما اشرب..وبرررررضو بشرب..يلا ارح اشرب سيب امورك الوهم دي
ضحك السمار..ولم يشرب عصام...لكنه شاركههم الضحك..هكذا علمته حاجه مهله...يشارك الفرحه..ويحب الناس...ويخفي احزانه...يتحمل الالم
باركته..بطيب كلامها..فاصبح لا يري..الا فرجا بعد كل ضائقه...
كان صوته..غريبا..امس
الو-
اهلااااااان عصام..كيفك يا زول-
تمام والله..والبركه فيكم-
في منو!!!!لا اله الا الله-
والله امبارح..الوالده..مهله.كان اصابتها طلقه طايشه..وربنا يرحمها اتوفت!!
!!!طلقه طايشه!!!؟ وين!!!؟؟؟-
في البيت في كسلا-
لا حول ولا قوة الا بالله..البركه فيكم ياخ-
الله يبارك فيك..كل نفس ذائقة الموت-
.
.
ماتت حاجه مهله
طللقه طائشه...اصابتها..لا يعرف مصدرها
كانت تجلس في ذات البمبر..في منزلها..والدنيا صباحيه...حين اصابتها الطلقه
ذات الطلقه التي استعصي علي عصام احتمال..جرحها..فهاجر
تري..من اين نستقي صبرنا بعدك..يا حاجه مهله!!؟
ومن حمل السلاح ضدك..يا امي...من اتي..بالكلاشنكوف..الي شوارعنا..وبيوتنا..ليغتال رحيق الحياة فينا!!!؟؟.
.عزيزي..عمر البشير
شكرا لك...فقد انقذتنا..بما فيه الكفايه
باسم حاجه مهله..وابتسامتها الوضيئه التي خمدت
اشكرك
باسم كل من ذهب
وكل من سيذهب
اشكرك
شكرا..يا امير المؤمنين
|
|
 
|
|
|
|
|
|
|
 Re: ... حــاجه ( مهله ) ... دافي .. بوست في الذاكره ... (Re: tmbis)
|
حيجيبو البوست ده يا تمبس حيجيبو
قبيل سألت منو في بوست الغياب بتاع رجا , وتمنينا طلتو ولو هنيهة
ليته يأتي بلا تمنّع كأنسياب كلماته ودفق حنّه وكل جميل الصفات التي تأسر وتأثر , رغم إنو صنع الشاشة البتنقل ليك أشواقي ليهو , زيّو زيك وزيّي زيّو , زيّنا زي بعض , بس ربطنا بيهو إحساس إلفة لي زولية الأغبش مكرر سمة الحن .
حيجي وحيجيب بوستيك ناس تاني غابوا في نفس بلاد الهجير , صارعت الظروف باهي حضورهم وغلبت , كلهم يشتاقونه ذو الحن والدفء
أرجع شوف بواقي كلامو المشتت في أراشيف ودهاليز سوانيزاونلاين , هناك حتلاقي شي من الأسى عليها البوستات , شوف القاش وفيوضو بي عيونو وحكي علاء الصغير ليهو , فتّشو مع المفكلب دكين الما جادي .
دي بساطة الكلمة عندهم ومنهم , ما بزيفوها بي رتوش القول والتشبيه , يسوقوك لي وين ما دايرين وزي ما دايرين , وتتبعهم وانت راضي .
إختار كغيرو زيّنا منافي قسر , وما طل وما ظهر ولا قال عنّها أمانيهو حالا كيف أو ظروف حرنن وقوف , محلّك سر .
أيها الدافي حنينا
لك الشكر تمبس لهذي الذاكرة الساكنة في هذا البوست , ذاك الإنسان
أبنوسي
| |
|
|
|
|
|
|
|
|
|
Re: ... حــاجه ( مهله ) ... دافي .. بوست في الذاكره ... (Re: tabaldy)
|
الابنوسي الجميل ..
جبتك انت زاتك ..
واصطدت معاك الزمن الجميل .. وباقي تفاصيل حميمه ..لسه بتخربش في الجوه
لما كان الزمن اجمل من كده ..
يلفحك هذا الشقي .. بكلمتين وبرضو يضحك ويتالم زيي زيك .. غربه وفراق اصحاب وتفاصيل صغيره واصدقاء كالانبياء يقتالو الذاكره ..
نكشت كتير وبفتش في بوست رايح علي ..
بغتس تاني وبقلع بيهو ..
| |
|
|
|
|
|
|
|
|
|
Re: ... حــاجه ( مهله ) ... دافي .. بوست في الذاكره ... (Re: الجندرية)
|
اماني..
ما اصلو الرادارات دي مشربكه مع بعض .. سلك هنا وسلك هناك
وبتلقط بي هبشه بس وما بتفوووت..
اها شوفي الرادارات دي اشتغلت كيف .. تبلدي قال مشي سأل عليهو بي هناك في بوست رجاء . وانا ختفت البوست من كيبوردك
بلاهي سلمي عليهو وخليهو يلاقيني ..
قولي ليهو عندي ليك حاجه حلووة
ابنوسي ..
شوف ده كمان .. واستمتع لي معاك..
دائما..يحدث شيئ ما
كلما اوغلت في النفس الحسرات..وهاجت اشجانها...يحدث شيئ ما..يجعلك تسلم قلبك لنبض الاحتمال الاجمل..
ما زلت اذكر تلك الليله...
كانت نفسي منقبضه..تتثاقل خطواتي ..وانا اتبع شلة العزابه التعساء..في شوارع ابوروف..في طريقنا الي فوال ود ارو....نقاشهم يصيبني بالغثيان
ما كان لي..انا المثقف ابن المثقف ..ان اتبع قوما ..اقصي ما تطاله حواراتهم ..ايهما افضل في الجنس..القصيره الممتلئه ام الطويله الرفيعه!!!!؟؟؟
يتكالب عادم بخارات السيارات..والغبار الذي تثيره عجلاتها..مع ضحكات سائقيها المترفين علي تحفيز كوامن الغبن في
كان جدي الكبير..يسوق ابناءه السته علي متون الجياد من طرف جبل الختميه الي سوق كسلا الكبير..فتتشابي جداتهن..بائعات الهوي في حي الضريسه..لرؤيتهم ..أبناء ال......علوا في الارض..واحتوانا سافلها نحن الاكرمين ابناء الاكرمين!!
حدثتني نفسي في الصفيقه!
تقف شابه ..مياسة القد..علي طرف الشارع. لتعبر الطريق الي جانبه الاخر..ما اعارتني عيناه الواسعتين انتباها حين صادفتا عيني..
ناعمه بنت اللذين!!!لو انها..عرفت كيف ..تتمني ظبيات آداب قربي..ما رفعت حاجباه دهشة لصفاقتي ..وانا اسبل جفني لعينيها الجميلتين..او لو انها جلست الي جانبي في المواصلات..لعرفت كيف ادمغ دهشة لا تنسي في عقلها الصغير!!!!
عاودت نفسي..نرجسيتها
ما زلت اذكر تلك الليله
صحن الفول..بحضوره الذي لا تخفي تفاصيله علي احشائ ولا حاستي الذوقيه
ورفقائي بنقاشهم السمج الخاوي...
ماذا يريد..هذا الاهطل!!؟؟؟!!!
امشي يا زول..صاح احدهم في وجهه بغلظه
لا يااااااخ!!!ما تنهرو...افقت من وجومي..كالملدوغ...
تعال هنا...اقعد
جلس الشاب ..بجلبابه المتسخ..الي جواري..مسكين..ماذا يسمونه...الهبل المغولي..او المنغولي..لا يهمني..لكني اتعاطف معهم بشده.لانهم صامتون اغلب الوقت...
اقعد ..اكل..
جلس ياكل..ونظرات الرفقاء..المستنكره..تسربلت بصمتهم الذي اراحني كثيرا
داير حليب!!!؟
لم يجبني..لكنه احتساه دفعة واحده..حين امسك بزجاجة اللبن
اشرب..منعول ابوها..الدنيا الفقر دي
ما زلت اذكر تلك الليله
ما كنت لاذكرها..لولا ان شيئا ما قد حدث في ليلة اخري
شهران مرا..او ثلاث..وانا في صومعة احزاني..احتسي اسفي علي وطن..يذبح ابناءه قربانا..لفجر ..لا ياتي
المكان ذات المكان
فول تافه والرفقاء..حديثهم الممجوج..يبدا من حيث انتهي..لينتهي الي حيث بدا
دنيا تافهه
زمن حقير
و
و
حدث شيئ ما
اضاءت..
ابتسامته
مستني..كتيار كهربائي خفيف
برقت عيناه لي في حنان غريب
هو نفسه
اي والله
عنقه المحني..الممتلئ
تعال
ناديته
لكنه ابتعد..والابتسامه تملا ارجائي قبل شفتيه المسبلتان
يا الله
ما هذا!!!؟
أهنا..تضع جمالك يا ربي!!؟
سكنت روحي...بعد شحوبها..وحفني سلام عجيب...
اهكذا تسمو النفوس!!!؟ ..لا ادري..لكنني.. ادركت ساعتها...ضآلة الدنيا..امام ابتسامته..ذلك المغولي الاهبل
| |
|
|
|
|
|
|
| |
tmbis
الجندرية
فيس بوك
تويتر
انستقرام
يوتيوب
بنتيريست