|
|
 للفطاحلة محمد على أبو قطاطى والمعز عمر بخيت أكاليل ورودى ..وهنا كان توقيعهم ..
|
تصدير
سياحة حرة، وسباحة سهلة داخل سطور الشاعرة الرقيقة الأديبة نادية عثمان مختار من خلال مطالعتي لمسودة ديوانها الجديد.
خرجت بانطباع مفاده: إنها شاعرة... شاعرة ناضجة بنسبة عالية... واضحة كل الوضوح في تناولها وترجمتها لمشاعرها إذ ليس هناك ما تخشاه من نقد وليس ثمة ما تطمع فيه من تقريظ .. تكتب شعرها بلا تردد وهي مقتنعة بما تكتب، تكتب قصائدها مباشرة وتقدمها في أطباق زاهية وشهية وأسلوب في التناول جميل. تملك من الجرأة والشجاعة قدراً كبيراً بحيث لا تبالي بما يقال عنها مدحاً أو ذماً وهي بذلك تتميز عن غيرها من بنات جنسها ممن لديهن الرغبة في نظم الشعر. دواخلها مشحونة بالمشاعر والأحاسيس وتقدمها شعراً كما هي في أسلوب واضح وكلمات مموسقة. استمع إلي صدق العاطفة ووضوح العبارات في قصيدة "ميلاد عصيب" وفي "حب وعذاب" أعجبتني جداً كلمة "قلبي الصِّغَيِّر" إمعاناً في التصغير. النداء الجهير المجلجل نسمعه في "سنين الشوق". نبكي معها ونندب الماضي ونناجي الأطلال حين نقرأ "الغياب ورنة الصدى". رقة الأسلوب وتدفق العاطفة نجدها في "الشوق بحر". وفي أبيات "حكاية حب" ما يلي:
يوم أحس حبك حقيقة بملك الكون بى يميني
ببقي ست الدنيا وحدي ببقي ملكة وأنت سيدي !!
و"حكاية حب" تصلح أن تكون عنواناً للديوان ورسالتها للبلد راعفة ونازفة وإحساس لدى كل مواطن وهي السياسية المدركة الواعية لما يجرى.
ما تقدم هو انطباعي عن ما خرجت به بعد قراءتي لشعر نادية عثمان مختار بلا تحيز أو محاباة. وأنا هنا لا أملك إلا أن أشد على يد الشاعرة وإلى الأمام "يا بت" مع صادق أمنياتي لك بالتوفيق والنجاح والله المستعان.
مقاطع :
مريت وجيبت راكبة السحاب
وضامة النجوم ضوايه زي لمع البروق
الليل مجنح ريش نعام سرجو الحرير
شايلني من فوق الطوابق للشروق
الشمس فوق راجياني فوق
شاربه المطر سكرانه ما بتدور تفوق.
حب نبيل :
ما نزعتك من حبابيبك .. وما قصدت أكون بديلة
وما في فكرت آخدك .. من عيالك والحليلة
***
ما في شيتاً مصبرني .. على الآلام سواك يازول
كلامك مر بعذبني .. وبتحمل مرار القول
ما بقدر أسيبو هواك .. بعد ما عشتو فوق للحول
محمد على أبو قطاطى
***** ******* ******
غرام الروح
يازبد البحر ماترغي في الفاضي
يا همس النسيم وشويشك الهادي
خَجَّل خَجَل صدفي البِكِر
يا صدفة ما أروع لَمَاك وعبقك النادي
يا لؤلؤة .. يا بضة .. آه
يا موجة ما تقِلِّى الأدب وكفاكي تتمادي
***
يازول أُجَاج هُوي يا بحر ....أحلف قسم إنك على الأسرار ولد
قول يا بحر إنك براك قادر تكون اللجة والطعم الكعب
وقادر تكون عسلا شهد
أحلف وكون صادق قسم ...واديني من عمقك مدد
قَدِّرني يا بحر الجلد
أصون جناي الاتولد
ما من سفاح لا.. يا بحر ..
الود حلال في قلبي شلتو وفى الصميم
وَهْنَا على وَهْن احتملت عذاب سنين
هَزّيت إلى الروح بالجِزِع وفرشت رمش العين مهد
وجاني الولد
***
نازل من الرحم العقيم ما كان بظن يلد الجنا
وبعد الرتابة وجور تصاريف الزمن يجد الهنا
يفرح يعيش الأمنيات والنشوة والحب والمنى
***
آه يا بحر .. جنايا ما كان من سفاح
ختاهو ربي في قلبي والحب ود حلال
جنايا مخلوق من معاني الرقة والكلم المهذب
والتعابير التجسِّد أسمى آيات الجمال
جنايا معجون من خصال الطيبة والأدب الحلو
وقريب مصافات الكمال
***
آه يا بحر .. صون سري أوعك تكشفو
خليهو في جوفك هناك مبلوع سمك
واحذر شباكك تعرفو
خليهو بكشفو يوم براي
ولو قلتو إنت غرامى حتما تنسفو
***
آه يابحر.. جواك ختيت سر غرامي ونشوتي
ورغم الأجاج جواك سيف الحب ندي
سيفي المهند دون جفير حاشاهو ماكان يوم صدىء
آه من غناهو وقول كدي
زولي المسالم والمصادم المشاكس والهدىء
آه من غرامو السرمدي
***
جد يا بحر.. ما من سفاح مولود جناي
بل من قناعتي ومن رضاي
فرحا مسح حزني وشقاي
أهزوجة بى أحرف غناي
خليك شاهد يا بحر .. هذا الولد مرجوع نِداي
ولدتو من أعماق حشاي
فارس من الزمن النبيل
خلقوني من ضلعو العديل
وربطوهو بالشريان معاي!!
**** **** ***
الشوق بحر
دَفَق شوقي البحر يا زول .. كِبِر واتعاظم الإحساس
كلامك لَيْ حلاة القول .. حروف يتغنُّوا بيها الناس
ده ريد اتجاوز المعقول .. واصبح في حياتي أساس
* * * *
لقيت فيك الحنان والريد .. والحِنِّيَّة من غير حد
بحبَّك همس ولمسة إيد .. بحر الشوق كتير المَد
هلاَّ الحب صباح العيد .. بريدك في الهِزَار والجد
* * * *
تعال ما تضيِّع الأيام .. بدورك مني دِيمَة قريب
بعيشك واقع الأحلام .. واضُمَّك في الحنايا حبيب
كفاية عليك شقا وآلام .. معاي تَلْقِى السعادة نصيب
***** ***** ****
فرعون زمانك
قلتَ عليكَ موسى .. وخاب انا ظني فيك .. يا فرعون زمانك
رَسَمتَ الحُب علَيَّا .. وغَمَرْتَنِي شاعريَّة .. وغرقتَ في زيف حنانك
يا مغرور وقاسي ..ولعهد غرامي ناسي..وينو نعيم جنانك؟؟
***
قلتَ عليكَ موسى وخاب أنا ظني فِيكْ .. وزاد المي وشقايا
نرجسي بي طبيعتك .. مفتون بي شبابك.. و مهموم بيك برايا
أهديتك عيوني .. وجميل شعري وفنوني .. وصدودك كان جزايا
***
قلتَ عليكَ موسى .. وخاب انا ظني فيك واتجرَّعت كأسك
سقيتَك عاطفة طاهرة .. دلائل حبي ظاهرة .. قطعتَ الحب بِفَاسَك
ما صُنتَ المحبَّة .. يا خاين الأحبَّة .. وخسرت الكون وناسك
***
قلتَ عليكَ موسى .. خاب أنا ظني فيك .. وشكيتك بس لربك
سماوات حبي عادلة .. تَكُب الرَّحمة نازلة .. تصب لعنات في قلبك
بطالب بالقَصَاص .. وبقول ليك لا مَنَاص .. لازم أسيبو حُبَّك
محال أرجع أحِبَّك!!
**** **** ****
الغياب ورنَّة الصدى
مرَّيت وجيت من بابك المقفول على وعد الأمل والذكريات
جسمي ارتعش لمَّا النسيم جاب العبير حاضِن نُعاس الأمسيات
جبروت عَظَمْتَك وروعتك مشَّت إرادتي على خُطاك سَكَبَت رحيق الأمنيات
* * * *
مرَّيت وجيت راكبة السحاب وضامة النجوم ضواية زي لمع البروق
الليل مجنَّح ريش نعام وسَرْجُو الحرير شايِلْنِي من فوق الطوابق للشروق
الشمس فوق راجياني فوق
شاربة المطر سكرانة ما بتدور تفوق
* * * *
مرَّيت على الباب البِئِن وينادي بالبُكا والنحيب
تَرْباسُو مكسور الجناح.. وكيفن بيَجْبُر خاطر الزول الحبيب؟
العتبة ما عتبة قزاز.. والريح بشيش سحب البساط شان لو وقَعْتَ يكون نصيب!
مرَّيت عليك والانشراح لفلف تلافيف القلب.. ولفَّ الفؤاد
هنا عاش قريب زولي الحبيب.. مِرِقْ يسند الحيط بالقفا حجر الأساس للبيت عماد
حبيت لُمَض نايلو المكان.. صوت الضجيج والانزعاج غُبُش الجُحُور واللون رماد
* * * *
بمشي وأجِيك.. قُبَّال أجيك روحي بتجيك تفرش ظلالها في دُنيتَك
حتماً أجيك ساعة الصباح.. في الأمسيات ساعة الضُّحى وانبُش دواخل غُنيتَك
مِفتَاح تَرابِيسك مَعَاي.. ومعَاك مفاتيح فَرحَتِي أفتح شبابيك الغرام
طوِّل سنين السَّرمَدَة.. وَحْدَك مُنَاي هل يا حبيب أنا مُنيَتَك ؟؟
** ** **
مرَّيت وجيت من بابك المقفول على الجُرح النَّبَح.. وحزني القديم
خبَّطت ما طلّ الملاك.. ووجهو الضحوك باسِم نَضِر مُشرِق بهيج
زي مصحف الرَّب الرحيم
قلباً وِدِر بَعَدَك ونَُوسَر جُرحو مَكبُوب دَمُّو حار
دافِق هَدَر شلال شرخ قلب الأديم
* * * *
مرَّّّّّّيت وجيت والغُصَّة زي خنجر غَرَز.. خَازُوق وَقَف في الجوف عَرِض
لا الدمعة خففت الألم.. لا الصرخة برَّدَت الحشا لا داوت القلب المِرِض
باب الحبيب قُبة ومزار.. بخور ضريح وصلاة خشوع سُنّة وفَرِض
* * * *
مرَّيت وجيت من بابك الأبنوس مَطَعَّم بالدَّهَب.. وترباس جُمَان
خشبو المعفَّر بالتُّراب.. ريحتو المِسك بشذاها عبَّقت الزمان
يا باب حبيب وين الحبيب ؟؟.. لَهَبَك حريق يا قَسْوة تتوشح حنان
* * * *
مرَّيت وجيت من بابك المقفول على النغم الشجي
وموال فَرَح وليلاً هجع
اتشَقَّق الخشب الأصيل يوم فارقوا الزول الجميل
ولي دارو في الأوطان رجع
الباب بكى وترباسو من حلقو اتخلع
الحُمَّى هَرَّدَت العيون
وقلبي الوَجَف من قَفْلَة الباب ارتجف مات بالصَّرَع!!
*********** ****** ****
ضجــة
قلبي في بُعدك اتعذَّب... وبين أضلاعو ارتجا
ليلي الساهر يحلم بيك... يعدّد في النجوم ويرجا
رافض يصدق الواقع... عامل في الصميم ضجَّة
* * * *
سمايْ في نهارها بتنوِّر... وقمراً في الهجير فجّة
ما تقول ليَّا صبراً يشُر... حبالو في عمري يتْمدَّا
فراقك باقي لي علقم... بعدك حَِيلي إتهدّأ
* * * *
تَقِيد شمعة حُزن جُوَّاي... شمعة فرحي تحتجَّ
غرقت في بحرك الرجاف... عميق بحرين هواك لُجّة
نِشِفْ ورد العروق والروح... رحل نبض الوريد هَجَّا
* * * *
أكيد في يوم تعود تاني... وكت ما الكون عليك يفضا
تعود ترجع لِتَحْنَانِي... وَكِت صمت السكون يهْدأ
وأحلف ليك بتلقاني
بحبك واصطفيك يا زول.. ومهما طالت المدة
**** ****** *****
حكاية حب غريب في النوع
الله كاتب لي أشوفَك.. شان هو عالم بي دواخلي
واشتعال الوجد ونارك
دايرة أطالع إبتسامتك.. وأملأ عيني بنور وسامتك
ساعة في الأحضان أضُمَّك.. يا أريج عمري واشُمَّك
ريحة الحب فايحة منَّك.. وقلبي سابح في مدارَك
* * * *
دايرة أقالدَك.. وأبكي بين إيديك وأحلف إنو حُبَّك ما بإيدي
كلُّ ما حاولتَ أهرُب.. وأكُتل الريد جوَّة روحي
ألقى إنَّي بحبك أكتر.. وبتجري زي دمَّي في وريدي
ووكت أحس حُبك حقيقة.. بملك الكون بيميني
ببقى ست الدنيا وحدي.. أبقى ملكة وأنت سيدي
* * * *
إنت يازول أصلو رائع.. بالبراهين والوقائع
زول حِنَيِّن ماك صعب.. أغلى من مال الخزائن
وتبري زي لون الدهب
زول حِلو وشكلك وسيم.. فيك عيون كتَّال بَرِيقها
ورِمْشَها الجنة الوريقة
والشفايف يا حبيبي.. قايدة في جواي حريقة
* * * *
جد بَحِبَّك حتى لو حاولت أنْكُر.. أو أغالط نفسي في حُبَّك ثواني
أنتَ حُلمي واغلى من كل الأماني
الله جابك لَيْ هدية.. في زمن بالحيل شقاني
ماني جانيَه.. ومَاكَ جاني !
إلاَّ حُبَّنا كان مقدَّر.. في الأزل مكتوب مُسطَّر
قلبي من أول دقيقة.. وعقلي فيك يا غالي فكَّر
أصلك أنت حبيبي سُكَّر
* * * *
ما قلعتك من حَبايبَك .. وما قصدتَ أكون بديلة
وما في يوم فكرتَ آخدك .. من عيالك والحليلة
إلاَّ بس برضيني حَيِّز .. جوَّة في أعماق فؤادك
أبقى وكت الهم شريكتك .. وفي المِحَن عُدَّة وعتادك
أبْقَى ساعة الشينة حلوة .. ولقمة وكت الجوعة زادك
* * * *
كُلْ حبابيك هم حبايبي .. وببقو لي في الناس أهل
كيف هويتك ماني عارفة .. وكان مِتين أنا ماني عارفة
إلاَّ بس حُبك حصل !!
حب حصل ماليهو تاريخ .. يوم غَزَاني زي الصواريخ
* * * *
شِلت قلبي في كفي جيتك .. شان تبارك حب وليد
كان بيصرخ في حشايا .. وأنتَ مَدَّيت ليهو إيد
جد بحبك .. حتى لو أزماني تنذر بالشدائد والوعيد
ما بي إيدي ولا بإيدك .. أنسج الفرحة في حياتك
وتبقى لي أيامي عِيد
وتبقى لَيْ حُبِّي الوحيد .. والزمن أشتر عنيد
لا بيسامح .. لا بيصالح
لا بيفهم إنو رابِطْنَا الهُو أقوى من الوثائق والحديد
نحنا بينَّا غرام شديد
* * * *
أنا بحبك يا حبيبي .. أنت في الناس زول وَحِيدي
وجد صديقي..
مرة تبقى أبوي أحبك
ووكت احِسَّك أخوي بريدك..
واغلب الأحيان بَحِسَّك
فرحتي.. وفالي وجديدي
زول صِغَيِّر دايرة الولي.. أشيلو في حُضني وأبوسو
ووكت يروح أطلع أكوسو
أخاف عليه لو غاب عَلَيَّ .. وكيف بلاهو أكون هَنَيَّة ؟؟
زول وجيه ما ليهُ مثيل .. متَّزِن ديمة وعديل
* * * *
لو بِعد عن عيني لحظة .. قلبي يتلهَّف ويحِن
ولو يَعَرْفُوا الناس غرامي .. كان أكيد وصفوهو جِن
إلاَّ حُبَّك جن لذيذ .. وأنت لي أنبل عزيز
* * * *
نورك الساطع مِرَاية .. مِنَّك انت الريد بديتو
سرمدي وما ليهُ نهاية
البخور حَرَقوهو لَيَّ .. وشاربة من شيخي المِحايا
قلبي قالْ لِي دَه زول بِحِبِّك .. وحبُّو في الأعماق حِكَايَة
وقلت بس ما دايرة أكتر .. زولي دون الناس كِفَايَة
جد بريدك زي عيوني .. ولو تريدني يكون كَفَايا!!
**** ***** ******
طاقة وخيل ونجماية
تِدَّسَّا روح ..
ما بين طقاطيق السَّما المفتوح
وينقح بالألم قلب العشم مجروح
صِدْق الوجيع.. وَجَع الصديق.. يضحك سنونو سواد
ولو مرة يبكي عليك.. عيونو دامعة تنوح
* * * *
شلعت بيارق الضو.. لمَّت خيوط النور
ضحكت نجوم الليل.. ووجمت أماسي البوح
تعشق صَبِيَّة ولد.. جوَّة الوريد وردة
يبقى الحِلم شاطح.. خيلاً لِجَامو جموح
يرقص وهج مجنون.. أهزوجة تملأ الكون
درب السديم تَوَهَان.. شمسك غموضها وضوح
كم طاقة وِلْدَت نور.. كَوَّةْ فرح مغرور
تبقى الحقيقة الزور.. ولون الوهم مفضوح
كل النجوم عاهرات.. والقمرة عريانة
لامَّة الغيوم في البيت.. فستان زفافها برِق
وخزاز مطر.. وجروح
* * * *
عشق المدينة جنون.. بَعْشَق مجون دنياك
صدر السما السكران.. لو تحضنو زنابق
بتشُم عبير مطرو.. من خشمو ريحتو تفوح
تدَّسَّا روح الروح
وطاقة سماي مفتوح
ينقح ألم قلبي
ويبقى العشم مجروح!!
***** ***** ****
إلي شاعرة من نخل وبرق وتحدي
يعذبني سحرك يا امرأة تختار حديقة نبض القلب مقراً وتحوم بكل شرايين الإبداع.
ما أجمل أن تخرج من رحم حنين الصدق شاعرة تتوهج في أعلى قمم الشوق بتاريخ الغليان الحق.
تمسح من زخم الغيب حنايا تكوين العشق الأعمى ثم تطل بنافذة العصيان المشرق في بدن الليل.
كلماتك في هذا الصرح الطالع للناس سماحاً مثل العرس تمنح النغم عافية التثني، وتمنح الرياض حقل التمني، لينهار صمود تحدي سوسنة ما فتأت ترتكب معصية الهجران، وتبعد عن عصب الممكن والمألوف. يقترن بها في مخيلة التكوين حلم القارئ والعاشق للشعر حين تتأوه وجدانه بمثل هذا الألق الرحيق ليرحل وجده كدخان من زيت وجراح، حمل النشوة في دمه ثم تلاشى.
عندما أقرأ أي حرف لنادية عثمان مختار تداعبني موجة عذراء على شواطئ القصيدة ، لكنها هنا عندما تجمعت أحرفها في هذا الديوان تفجرت بحاراً أخرى سكنتها شاعريتها قبل الماء وقبل الطوفان فكان تدفقها على شواطئ الأناقة والجمال برداً وسلاماً على كل رمال الإلفة والمحبة.
فهيا نتنفس معها عبق الصمت والصهيل.
معز عمر بخيت - المنامة
11 يوليو 2004
|
|
 
|
|
|
|
|
|
|
|
Re: للفطاحلة محمد على أبو قطاطى والمعز عمر بخيت أكاليل ورودى ..وهنا كان توقيعهم .. (Re: نادية عثمان)
|
ناديه انت وفيه لهؤلاء الاحباب الاوفياء
وعلي فكره قصتي مع ابوقطاطي لذيذه مباشره وغير مباشره
فالمباشره انني قد لحنت له نصين الاول غنيته في شريطي حبايبنا
وهي من كلماته وهي للمعلوميه اول اغنية راب سودانيه
ثم لحنت له لي زمن بتمني لتغنيها بلابلنا المغرده
في
شريطهن القادم
اما غير المباشر فهو ان الشاعر صلاح احمد عبد الفتاح كتب الاماني السندسيه حبا في الاماني العذبه وذهب بها الي خليل اسماعيل لتلحينها وغنائها
ولكن الخليل يبدو انه شبع من الاماني فارشد صلاح للولد بتاع المعهد داك
وهو شخصي حينذاك فكانت الاماني السندسيه
وما اجمل التفاؤل في الاغنيتين
هنيئا لك بكل من دمعز وابوقطاطي
| |
|
|
|
|
|
|
|
|
|
Re: للفطاحلة محمد على أبو قطاطى والمعز عمر بخيت أكاليل ورودى ..وهنا كان توقيعهم .. (Re: Dr. Moiz Bakhiet)
|
الشاعر الرقيق ..الشاعر الطبيب ..البروفسير معز عمر بخيت
تتوارى حروفى خجلا كعادتها أمام رائعات كلماتك الأنيقة
معز يامنصف القوارير ..ياصديق الفراشات ..ياانسان بكل معانى الانسانية فى جلالها وجمالها ..
شهادتك لى وتوقيعك بأحرف من نور فوق بعض نبضى ..وبعض دمى ..ووجعى ..وكل جنونى ..يظل اكليلا من الماس اضعه فوق رأسى مادام فى العروق يهمس صوت الحياة
معز الرجل المعافى من كل أمراض الانسانية ..هكذا عرفتك طيبا ..نقيا ..جميل الروح والقلب واللسان ..
كن نورسا محلقا فى فضاءات الابداع دوما ..وتيقن انك هاهنا فى قلوب كل عشاق الخير والجمال مقيما ابدا ..
هذا مع خالص تقديرى ..وموفور احتراماتى
| |
|
|
|
|
|
|
|
|
|
Re: للفطاحلة محمد على أبو قطاطى والمعز عمر بخيت أكاليل ورودى ..وهنا كان توقيعهم .. (Re: Elmosley)
|
الموسيقار الرائع
يوسف الموصلى
بشيل نار الصبر جواى ..واستناك فى الطرقات
فى الزمن الحضر مافات ..الفرح السكت سنوات
فى دنيا العشق فارس ..فى الحلم الحيا ومامات
***** **** ****
بستناك جوّة الروح .. فى المعنى الحميم والبوح
فى كل المنافى بقيف ..من دون لا وجع لاجروح
بعد كل السفن جايات ..متحدات معاك يانوح
*** **** ***
عشمى الطلة ياوضاح ..فى الليل الهجيع شمسة
ياالجوّة العصب ضهبان ..شرايين قلبى ليك ممشى
ياالفوق الحواجب عين ..وياالتحت العيون رمشة !!
يايوسف الذى راودنى عن حرفى ..فاستجاب له نبض شعرى ..ومنحته من روحى نبيذ القصيد فسكب فى كلماتى لحن الخلود ..لك احتراماتى وكن سعيدا
| |
|
|
|
|
|
|
|
|
|
Re: للفطاحلة محمد على أبو قطاطى والمعز عمر بخيت أكاليل ورودى ..وهنا كان توقيعهم .. (Re: مبيوع)
|
الفنان الرائع ياسر مبيوع
انا كنت قلت ليك بكتب ليك نص شعرى فى بوست منفصل وبعد حيرة فى الاختيار لقيت انو الاحسن انزل البوست ده وفيهو كم من النصوص عشان تختار على رااااحتك
طاقة وخيل ونجماية مبرووووووك عليك واى نص تانى تحس انه اقتحم روحك وعشعش فى خيالاتك
يلا بس اثبت للمدام انك حفاااااظ واحفظ النص قوااام
لكن ماكنت عارفة انك ملحن كبير كمان ...!!
كان كده الموصلى حايتعب معاك شديييد والله
ولاشنو ياود الخال ؟
| |
|
|
|
|
|
|
|
|
|
Re: للفطاحلة محمد على أبو قطاطى والمعز عمر بخيت أكاليل ورودى ..وهنا كان توقيعهم .. (Re: Dr. Moiz Bakhiet)
|
الشاعر الطبيب ..البروفسير معز عمر بخيت
كن هاهنا ياايها الرجل الحنون حديثه ....كن جانبى يامنصف القارورة المحزون قلبها بالحريق ..
كن جانبى ياأيها الرجل الربيعى المزاج ....ياصاحب النجمات والزهرات والفجر الشقيق
كن يامعز المرأة الاشراقة ....تصدح بالقصيد الحر والقول المنمق والرقيق
كن هاهنا ياابن الحكيم بخيت ..... مهما كان هذا العالم المجنون وقح أو صفيق !!
كن دائما وسط المذابح وردة ......كن يامعز مهما حدث .. ذلك الرجل الأنيق !!
| |
|
|
|
|
|
|
|
|
|
Re: للفطاحلة محمد على أبو قطاطى والمعز عمر بخيت أكاليل ورودى ..وهنا كان توقيعهم .. (Re: نادية عثمان)
|
نادية،
أيتها المرأة المشرقة كنهار الفرح المتدفق من ذاكرة الشوق ينبوعاً من الصفاء..
تتغلغل كلماتك في صحو الأمسيات همساً من عذوبتك
ودفئاً من شجن يتمدد فيك ويتناثر حولى فراشات ضوئية
تحتفي بك ساعة المغيب
فتتحول كل الأشياء أمامي إلى كرات من لهيب اللهث لقوافيك الجميلة..
نحن نبتسم لأن في الدنيا من هو مثلك
ولا نأبه لعواء الذئاب
ولا نهرب من ظلام المدينة
وما أجمل ان تكون في حياتك امرأة جميلة تقرؤها الآن..
فتحيلك عند الصباح إلى سنبلة..
معز
| |
|
|
|
|
|
|
|
|
|
Re: للفطاحلة محمد على أبو قطاطى والمعز عمر بخيت أكاليل ورودى ..وهنا كان توقيعهم .. (Re: مبيوع)
|
دنيا الولِف
طلَّ الحبيب في ليالي صيف .. زار المدينة خفيف خفيف
أسعد قلوبنا واختفى
لا قال سلام .. لا سمعنا منو كتير كلام
زي الندى السكن الورود .. ضاق العبير بس واكتفى
الوحشة كاتلانا وأكيد .. كاتْلَه الحبيب
أصلو البِحِب طبعو الوفا
* * * *
يمكِن يكون زولنا الجميل .. لا جانا أصلاً لا مشى!!
جنا القمر عشق الغزال .. زفَُّو القماري مع الرشا
أحلام تفرّح للقلوب .. وأنا قلبي بالوهم انتشا
* * * *
يا نَغَمَة يا زولنا الطروب .. عاشق جمال وهج الحَرِف
حبيتنا ما تَنكُر هواك .. قول أحكي ريدنا واعترف
قَبْلَك كتير في الدنيا ناس .. انهزموا في دنيا الولِف
| |
|
|
|
|
|
|
| |
Elmosley
Dr. Moiz Bakhiet
وليد محمد المبارك
sharnobi
sara fadul
مبيوع
HAMZA SULIMAN
لؤى
فيس بوك
تويتر
انستقرام
يوتيوب
بنتيريست