|
الــــــــــــــــدّرت
|
هذه الأيام ومنذ أواخر نوفمبر ينطلق موسم الحصاد في الغالبية العظمى من مناطق الزراعة الواسعة في السودان ، في المشاريع الزراعية الكبرى و في مناطق الزراعة المطرية ... وهو موسم يطلق عليه غالبية أهل السودان اسم ( الدّرت ) . ولا أعلم إلى أي أصلٍ تنتمي كلمة الدّرت ، لكنها أصبحت كلمةً على لسان المزارعين وأبنائهم تعني لهم الحصاد ونتائجه ... يقول المزارعون أن الحر يشتد أول الدّرت ، وذلك لإتاحة الفرصة للمحاصيل لتأخذ طريقها للنضج ، ثم تنخفض درجات الحرارة تدريجيا لتتجه إلى الشتاء ، حيث تجنى المحاصيل ويتم جمعها في مكان واحد ، يسميه المزارعون ( التّقا ) ، وهناك تتم عمليات ( الدّق ) والتنظيف ( المذراة ) ، والتعبئة .. هذا وبعض المشاريع اتجهت إلى الحصاد الآلي . وموسم الحصاد هو موسم فرح غامر بين المزارعين وأسرهم ، يعد المزارعون له العدة ، ويشمرّون عن سواعدهم ، وتشحذ له الهمم ، وفي كثير من الأحيان يضطر المزارع وحده أو بكامل أسرته أو بعض منها للمبيت إلى جانب أجران الحصاد في ( التّقا ) . ويعقد الناس آمالاً عراضاً على الدّرت ، حيث ينتظر الأبناء والبنات مشروع زواج ، أو ينتظر الأسرة مشروع بناء بيت أو جزء منه ، أو يتم منه سداد دين ظل يؤرق الأسرة ، أو تستقطع منه كسوة جديدة ، أو أثاث منزلي ، وما إلى ذلك من التطلعات في حدود الممكن ...
ونواصل ....
|
|
|
|
|
|
|
|
Re: الــــــــــــــــدّرت (Re: ودقاسم)
|
الدرت هو كلمة الفرح والدعت اليخم الكيزان وذف البشاره لجني ثمار الكدح والان الحسه تخنق المزارع لان نصيبه من المحصول عطية مزيين بعد ان يصفي حساباته مع الحكومه وارجو ان نفسح مجال اوسع او على هذا البوست الجبار مساحه للتعرف على بعض المصطلحات الخاصه بالزراعه مثل الانقايه واب سته واب عشرين والجدعه والدعت وطبعا انت يا استاذ موسوعه لذلك وافضل ان اناديك باستاذي وافخر بذلك
ودي واحترامي لك
| |
|
|
|
|
|
|
Re: الــــــــــــــــدّرت (Re: احمد العربي)
|
Quote: والدعت اليخم الكيزان |
أمين ... كيفك أيها المبدع لابد أن الدّرت يثير أشجانك ، ويعيدك إلى سوق معتوق والطماطم الكتيرة ، والتي تباع بتراب الفلوس ،،، والعيش يملأ السوق ، شئ شوالات ، وشيء قُراف ، وشئ بهيل ، ويا حليل عمي المنى ، وعمي التان ، طبعا كبروا وما عادوا يديرون سوق العيش ،،، وهناك في الجزارة أفتقد ود درب القش ، وأفتقد كبدة الإبل ، وطبعا يا أبوحميد أنت لم تشهد زمان الإنداية ،،، يا زوووول داك كان زمان شبع عمرو ما يتكرر ... إن شاء الله أي زول أخطأ في حق السودان تجيهو دعتة وتريحنا منّو وهو نائم في نومتو ...
| |
|
|
|
|
|
|
Re: الــــــــــــــــدّرت (Re: ودقاسم)
|
الخال مسكاقمي Quote: وهو موسم يطلق عليه غالبية أهل السودان اسم ( الدّرت ) |
العنوان طبعا لفت نظري وقلت الحاصل شنو الناس دي اكلت في العشا ايه
الدرت نحن الغير ناطقين بها لمن نسمعها من الزول العربي نزح من بعضنا
| |
|
|
|
|
|
|
Re: الــــــــــــــــدّرت (Re: حمزاوي)
|
اهلي ناس الجزيرة
الدرت احلى حاجة فيهو اكل القنقر بعد الشوي وملاح الويكاب القصب راقد والبهايم ضرعها مليان باللبن راتعه صباح ومساء في الخلا وبين البيوت من الخشخاشة والحنتوت وما تنسو الموليته ،، هذه الاسماء عصية على غير الناطقين بها والعارفين لبواطنها من غير أهل العوض
تستحضرني هنا ترنيمة للاستاذ محمد عبدالرحمن العقلي (عميد مدارس الجالية السودانية بدولة قطر) وهو من شيوخ العقليين في الجزيرة يقول فيها:
الليلة يانسام المطر الجايي من جيهتة الصعيد ذكرتني أيام الجهل وأنا في خيالي بعيد ريحتك دعاش ترد الروح بعد المويه والغميد ذكرتني فوق حفير الحله وكت زغبرنا وقلنا ور ياوريرة ور المابجينا ود الشيخ الاعور وطاردنا ود الجاك وكت صاح شلكم بي أنا نسيت كر البهم فاتح ما لعبكم مابي ونادت ام احمد تعال آجنى الغنم باهلات ماصريتن طروني الجماعة حمير أبوي والله ما عشيتن وفي الدغش صوت خالي فوق غنمو فركع داير السربة تور عبورو ام كركورة وقرجم كبشو قدر الضربة تورن ونش ليهن وصفر داير يشبعن قبل الحمار مايصفر طالب تروساً ورا الحله دايماً بور اهلن خلوهن وقامو للباجور حنتوتتن تعزم علي رقبتا مخالته للتربا تقول الفته شبعن وليهن للعقلة حربس ونام واتوسد ضهر الترس وفي الدغش حس السعن من نومك يصحيك ويسعد أيامك ويبارك فيك وقامت أمي للسمن بتسيح وهو البشبع وهو البنصح وبيهو مع ملاح الروب اتغدينا دا قليل من حياتنا الليها مانسينا
| |
|
|
|
|
|
|
Re: الــــــــــــــــدّرت (Re: ودقاسم)
|
وفي الجزيرة حيث عشت هناك ، وسعدت لسنوات طويلة بالدّرت ، تجد للدّرت طعما مميزا ، فالجزيرة تمتاز بتنوع المحاصيل ، فتجد المزارع يحصد في وقت واحد ، الذرة ، والفول ، واللوبيا ، وفي نفس الفترة يبدأ جني القطن ، وحين ندلف قليلا إلى نهايات الدّرت تكون الطماطم وكثير من الخضروات في قمة إنتاجها وتدفقها .. لهذا السبب لا تجد أحداً يشتكي من جوع أو فاقة ، في موسم الدّرت . كل الناس سعداء ، وكلهم شبعون .. وفي الغالب تبدأ دورة العمل اليومي في التراجع ، فتجد الصبية والشباب في القرى يلعبون الكرة ، ويتسامرون في جلساتهم في الدواوين والأندية والساحات المفتوحة .. وتأتي الطيور المهاجرة مثل الزرزور ، والقطا ، والجرول ، والفرّة ، فيكون موسما لاصطياد الطيور والاستمتاع بلحومها ... وفي بدايات الدرت يكون الفريك شهيا ، وينضج ( السينات )، وتشبع السائمة ، وترى الصحة والعافية في كل شئ ...
| |
|
|
|
|
|
|
Re: الــــــــــــــــدّرت (Re: ودقاسم)
|
العزيز ود قاسم
Quote: ويعقد الناس آمالاً عراضاً على الدّرت ، حيث ينتظر الأبناء والبنات مشروع زواج ، أو ينتظر الأسرة مشروع بناء بيت أو جزء منه ، أو يتم منه سداد دين ظل يؤرق الأسرة ، أو تستقطع منه كسوة جديدة ، أو أثاث منزلي ، وما إلى ذلك من التطلعات في حدود الممكن ...
|
دا كان زمان !!!!!
| |
|
|
|
|
|
|
Re: الــــــــــــــــدّرت (Re: حمزاوي)
|
ود قاسم
سلام
يازول مالك الليلة علينا, الدرت اهم حاجة فيه طهور الاولاد عندنا , القطع كان بي الجملة الطهار يطلق عليه اسم العريس الزول ده في كل درت بقطع ليهو اربعة خمسة شفع, بتذكر شكل الزول ده كان رجل ضخم وليهو شنب كبير والله لما ينفخ يرجع ليك الشغلة نص متر لي وراء عشان يقطع, الجماعة برسلوا ليهو قبل اسبوع اها الشفع يومو داك بكبو الزوغة
| |
|
|
|
|
|
|
Re: الــــــــــــــــدّرت (Re: حمزاوي)
|
المجــالـس بالأمـانـة والخــويدم مي عارفانـا اتفرقـوا عـرب البقانـة خلوا حجاج في الضمانـة المجالس داجة ديمـــة والغريب ماليهو قيمــة اتفرقوا عرب اللميمــة وخلوا حجاج أبو حليمـة عمارنا بقوا بـلاش وما فيهم من يسكت للكـراع إن داش رفاقاتي مالقيت فيهم أخو الفشفــاش كضيبات الدرت ما بتلقن في رشـاش إتكرفسـت الأيام وإدمر الحــراش1 طـرني زمـان الدرقـة والتركـاش فاقد ود أخوى ابو رِسوة إيد القــاش موجـوع لي على زولاً هِنا وغشـاش هذا من بعض ما اشتمل على الدرت
| |
|
|
|
|
|
|
|