كتب الكاتب الفاتح جبرا المتوفرة بمعرض الدوحة
|
|
 ... كل عام وانتم بخير والقابلة كدا علي امانيكم ... مفارقات ومقارنات ... اتفضل
|
الاخوة البورداب ... بدون فرز
كل عام وانتم بخير وكل عيد وانتو طيبين
وانشالله السنة الجاية كدا كل واحد فينا محقق معظم امانيهو ..
ويعم السلام جميع بقاع السودان الحبيب
دا الكرت...
وبعد الكرت ايه؟؟
بعد الكرت دايرين نتذكر الاعياد كانت كيف
والحاجات الكانت بتحصل فيها
والتجهيزات وهسي بقت كيف ووووووووو ..
وابدا ليكم انا:
كان واحد من اهم مناظر عيد الفطر زمان انو بتشوف شفع الحلة
كل واحد دارع ليهو صينية خبيز في راسو (طبعا بكون شايل معاهو قطعة
قماش لزوم شيل الصينية وهي سخنة)... اها الشفع تلقاهم دافرين علي
الطابونة كل زول راجي صينية خبيزو تنجض سريع عشان
يرجع يجيب اختها ... والوصيه دايما بتكون : "اوع تخليهو يحرق ليك الخبيز"، او "ما
تمشي تلعب تلعب لما تلقي حرق" ... وسيد الطابونة غالبا ما بكون بالو ضيييق
لي زحمة الشفع دي والنقة الكتيرة... فتلقي رد فعلو انو يا حمر ليك او نهرك او كمان
لو بالو ضييييييق شدييييييييد بيقول : ما بدخل لي صينيتك دي هسي ... عندنا عجنة
او يقول ليك الفرن سخن امشي وتعال بعدين.... وطبعا كان بكون برنامج لو
صينيتك اتحرقت...اووواوووو... زفة من شفع الحلة لغاية ما يوصلوك البيت
والزول كان بزعل بي الجد انو صينتو اتحرقت ... زي التقول كان ببيعها ... اذا مرت مرحلة الفرن عليك بسلام بعد كدا بتكون مؤهل لي انك تدخل برنامج اهم وادق
وهو برنامج اللصيق و التسكير... زمان كان الخبيز فيهو نوع بجيبو كورتين من العجين واحدة بنية(كاكاو) والتانية بيضا عاديه .. يدوك صحن مربة كدا وجوز هند
وتقعد تلصق الكورتين مع بعض وتديهم فجخه صغيرة كدا لزوم تطلع مربة بي
الجمبات عشان جوز الهند يتلصق فيها ويعمل ليك شرشر كدا ويكون المنظر جميل.... دا اللصيق... اما السكير دا فدا كان الخمج علي اصولو .. الكعك ترشو بي السكر بعد ما تاخد ليك كم سحبة كدا في السحان مع السكر ...اها تقوم تشيل الكعكة وتمردغها زييييييييين في الجردل او الحلة الفيها السكر المسحون .. وتقلبها كويس وتطلعا ترصها في الجردل... وتدخل يدك في السكر تاني وترش الكعك (بقولو عشان الكعك بشرب)... طبعا زمان كان السكر دا اخر حاجة ممكن تشيل ليها هم ..... لي درجة انوكان ببدلوبيهو العدة.. اي والله ... جردل سكر كامل كان ببدلو بي جك قزاز عجب....
ودا كان بدي العيد نكهه مميزة طبعا ... ما كل يوم بتتلم لمة الطابونة دي
ولا كل يوم بنفجخ في السكر والكعك كدا ... المهم دي كانت طقوس
ملازمة للعيد ما زي الايام دي ... ما عارف عشان الواحد كبر ولا
الحاجات اتغيرت بي الجد؟؟؟؟
سمعت قالو جردل الخبيز الايام دي وصل 100 الف جنية...
حولااااااااااااا.....
دا غير مساخة القروش ما بتضوق فيهو طعم الطابونة
ولا اللصيق ولا التسكير... يعني تدفع
100 الف جنية ولا تفجخ ولا تلصق ولا تلعب قي الطابونة...
زمن.......
نواصل
|
|
 
|
|
|
|
|
|
|
|
Re: ... كل عام وانتم بخير والقابلة كدا علي امانيكم ... مفارقات ومقارنات ... اتفضل (Re: Ahmed Mohammed Osman)
|
كنا في الحلة كشباب بننقسم الي مجموعات حرفية
ناس لي الجير
وديل تلقام لافين بي البرميل والفرش والسلالم
اي بيت عندو جير داير يضربو بنزلوهو ليك في يوم
وفي مجموعة تاني بتاعة
البوهيه والبوليش
وديل ناس ابواب وشبابيك وكراسي وسراير حوش
برضو في نفس الروت بلفو
اها البرامج دي بتدور قبل تلاتة اربعة يوم علي حسب الجدول
انت بتطلع علي حسب مجموعتك
ولما تنتهي ترجع تلاقي بيتكم كان انضرب بوهية ولا جير
المهم
بعد كدا تخش طبعا في الترزي يوم الوقفة بتكون بترازيهو من الغرب
تعال بعد ساعة..
ترجع تشوف حاجات البيت
وترجع ليهو تاني
الجلابية كمان مهمة
وترجع البيت تتشعلق في الستاير
وشاكوش في مسمار في جبص
والستارة ما مسكت
المهم... الستارة في النهاية بتتعلق
وتشيل رجلك وتمشي علي الترزي
نواصل
| |
|
|
|
|
|
|
| |
Ahmed Mohammed Osman
عبدالناصر معتصم
ناصر البطل
فيصل نوبي
فيس بوك
تويتر
انستقرام
يوتيوب
بنتيريست