|
|
 السـاقطات
|
أحذركم منها في رمضان.. ويلاتها كثيرة.. أقلاها تلبك المعدة والإصابة بالنزلة الشعبية والإنفلونزا والإلتهاب.. وعسر الهضم والقبضة المعوية والمغص المفاجي
.............
نحن في السودان نقول موية ساقطة.. ماعارف كلمة ساقطة. أو صاقطة دي جبناها من وين.. المصرين يقولوا حاجة صاااءه.. صاقعة يعني تصقع في الدماغ.. معظم الصايمين وبالذات الناس اللى صحتهم كويسة تلقاهو خاتى كوز موية بارد مدنكل في الفريزر قريب لحظات الفطور جري قطعوا حتى يجي يشوف الباقي.. ودا أخطر من السرطان على المعدة.. المعدة طول نهارها فاضية ومولعة وساخنة.. تجي تديها حاجة عكس.. يعني زي الزجاجة التي تسخنها على نار وفجأة ترميها في كورية فيها تلج وماء.. ماذا يحدث لها .تتشقق.. كذلك المعدة .بس دى لأنها جبارة الكسور وحمالة التقيلة عيوب الخطأ فيها لاتظهر في اللحظة.. بس هى بالضبط زى الزجاجة الإتكسرت..
..........
كبارنا كان يوصونا بشرب شى دافي فى الأول.شوربة.. وغيرو.. كنا نخلط شوية حرجل مغلى في النار مع شوية تمرات..يصفوا ويوضعوا في براد مثل الشاي وتصب في الكبابي.لونها أحمر خفيف طعمها قريب من الحلو مر.. ويشبه العرق سوس..لازلت أحصد عافية هذا المشروب حتى الآن ولازلت مداوماً عليه..ناس تانيين عندنا تبل ( المحريب أو الحمريب في موية.. وتجي تغليهو وتصفي مويتو وتضيف ليهو السكر.. وتسخنوا عند الفطور تشرب منو قدر فنجان قهوة صغير.قبل كل شى، ثم تبدا في الرزع واللت والعجن بعد داك.. المصريين يسموا الحمريب أو المحريب..( حلفا بر).. ونبات الحلفا شى تاني عندنا في الشمالية وبعض مناطق السودان..
..........
هسه تجد معظم الناس في رمضان عندها نزلة شايلاها وحايمة بيها. وخطرها ماحق على الأطفال اللى بيحوموا بين رجلينا. وكل السبب الموية الباردة وهجمة المعدة في الأول بالشى البارد شديد...
...........
تصدق لو شربت جغمة مشروب ساخن او دافى. بعد شوية كان شربت بارد ما بيعمل ليك حاجة..
..........
الشفقة تطير ياجماعة والأكل ملحوق.سبتوا المعدة بي فنجان شى حار..
........
شوربة الدجاج الخفيفة كانت مناسبة لكن الناس خافت في الخليج من 0 انفلونزا الطيور والبلدية قفلت محلات بيع الدجاج الحي وحذرت منه.
........
لذلك أحذركم من الساقطات..
أنا عارفكم لو ما كتبنا ليكم العنوان دا.. ماكان حاتجوا تقروا الكلام الطبي دا.. عشان تستفيدوا..
عافية لكن أخواني واخواتي
|
|
 
|
|
|
|
|
|
|
|
Re: السـاقطات (Re: منصوري)
|
الساقطات عندنا في مائدة الإفطار السودانية.. أهمها..جك الابري الأحمر.. الحلومر وجك الآبري الأبيض. ودا غالباً بيكون عند السحور... وجك العرديب.. وجك القمردين.. وجك الليمون الأخضر...
بالله دي ما تبردوها شديد.. قدر ما لاقني سوداني أو سودانية او بعض العرب في مراكز التسوق أو المول. إلا شايلين نزلات بالكوم وحايمين بيها.. تفسد عليهم بهجة التسوق.. أنا شخصياً أكره النزلة في بلاد الخليج. أخير تتعمل ليك عملية ماتجيك نزلة.. لأنو البلد رطوبة.. والأكسجين الجيد الصافي مافي.. والنزلة تعولق الزول وتطول شهر كامل ماتروح من الزول.. وحكاية..
وكل السبب الساقطات..والواحد مايقدر يمسك نفسو..
| |
|
|
|
|
|
|
|
|
|
Re: السـاقطات (Re: منصوري)
|
العزيز منصوري المنصور باذن الله
Quote: لذلك أحذركم من الساقطات..
أنا عارفكم لو ما كتبنا ليكم العنوان دا.. ماكان حاتجوا تقروا الكلام الطبي دا.. عشان تستفيدوا..
|
والله انا الجابني الاسم ده منصوري
كل عام وانت والاسرة الكريمة بخير ...وعليك الله قول للمدام تكثر خبيز العيد عشان اجي اشيل جردلي
معزتي
| |
|
|
|
|
|
|
|
|
|
Re: السـاقطات (Re: منصوري)
|
سلام اخونا.نشأت الإمام.. معروفة عندي كلمة سقط في اللغة العربية.. وقديماً قال إمرؤ القيس( قفا نبك من ذكرى حبيب بمنزل...بسقط اللوى بين الدخول فحومل)... وبعدين انت قلت سقطت ركبنا.. والعبارة الماثورة عربياً( سقطت ركابنا).. ويقال سقطت الإبل أيمن الوادي..اي رتعت..ونزلت بأسفل الوادي... وبعدين برضو درسونا زمان في علم الهندسة الميكانيكية..الرسم الهندسى ..في الأيسومترك والأوبليك.نظام الإسقاط..كل هذا معروف.. لكن أنا أقصد إنو في اللهجة السودانية.اخذت مدلول خاص.. موش بمعني سقط ..وقع أو نزل او تدلى.. عندنا صارت تعنى الشئ الصاقط.الساقط المتلج..
شكراً أخونا نشأت الإمام على التداخل...
أما الأخ دكتور المشرف.. فقد ابي عليه التواضع إلا أن يقول بأمانة جابو العنوان.. ودا تواضع يصب في حسناته عندي.. الشي الذي لايقوله الآخرون.. يدخلوا ويمرقوا من غير ما يعترفوا..وقد قيل( إن للعلم سطوة تقود الى الإستعلاء والتكبر وإن التواضع هو اصل الخلق الرصين)..أما موضوع الخبيز.فحاضرين والله..
| |
|
|
|
|
|
|
|
|
|
Re: السـاقطات (Re: منصوري)
|
كل الفنانين غصباً عنهم ما بيشربوا الموية الباردة.زخاصة قريب موعد الحفلة..
...........
والموية الساقطة شديد تعمل( تهتك في غشاء الحلق) وتهري الحبال الصوتية للفنان
.........
معروف أن محمد وردي لايشرب موية باردة بل يشرب موية دافئة وحارة احياناً.. بالإضافة للملكات المودعة في وردي .. والتمارين .. هذا هو السر في بقاء صوته ردحاً من العمر..
..........
الموية الساقطة والحاجة الحلوة والسكر قريب ساعة الغناء الفنانين ما بيعاطوهم..
.........
حمد الريح قال انا غايتو بحب الكيك والجاتو والموية الساقطة ديل كان كتلوني مابخليهم؟ فجاهو تهتك في الحبال الصوتية فعمل عملية حبال صوتية.. وجاهو سكري بس محافظ..
..
أها شايفين اضرار الساقطات..
| |
|
|
|
|
|
|
|
|
|
Re: السـاقطات (Re: منصوري)
|
برضو من الساقطات البي يحبوها السودانيين في رمضان.. البطيخ.. نوصي بأكله بس مايكون بارد شديد وبرودته تفسد المتعة والإستلذاذ بأكله.. يغسل الكلي ويساعد في إدرار البول وبه بعض الألياف تزيل بعض الأشياء الغير مرغوب فيها من جهاز المعدة والجهاز الهضمي..
والبطيخة لما تكون حمراء بس غير( ملقية) ماعارف كلمة ملقية دي نحن السودانيين جبناها من وين.زلهجة خاصة موش.. ملقية يا اولاد الزمن دا ..أي نضجت حتي اضمحلت وصارت مهرودة من الداخل..
والبطيخة لما تكون كاربة وتلقا ليك مرة فنانة تقطعها صاح وتعمل ديسبلي في طريقة عرضها واخراجها لاتبدل بأي أكلة في رمضان أقصد تحلية.. كنا في هندسة هلتون وكان زملانا في المطبخ لهم فنون في تقطيع البطيخ والله يقطع ليك البطيخة دي بصورة غريبة لو ماعندك نفس تاكل تجيك شهية ونفس للأكل..حتي قشرتها الخارجية يعملا ليها اناء ويعمل ليها يد بالقشرة الخارجية من برة يخليها زي سبت حلاوة الماكنتوش.. وعندهم معدات وقوالب يرسموا ليها ويخرطوا قشرا دا بصورة تحير.. أمال هلتون خمسة نجوم ليه...
دا عكس لما يكون بطيخ مكوم في شارع الشنقيطي كبري النص. يا داب نزلو لوري لواحد عريبي.ز كدة يبيع ومركب سكينو في ضراعو ويقول ليك حرم على السكين ارطا ليك هسه.. وهو بلطجي وفهلوي لايعرف عن اساس البطيخ شى..
أخونا دالى الله يطراهو بالخير.. رجل متدين ومرح
مرة بعد الغداء في الثورة.طلعوا اتنين يجيبوا بطيخة ..واحد مهندس زراعي خريج جامعة الخرطوم.إختار بطيخة وقال البطيخة دي حلوة.شيلوها.. لأنو نسبة الكلورفيل في قشرتها كدة.. ونسبة البياض في خارجها كدة.. وتماسك الصدفة الخارجية كدة. واحد تاني اخونا زول من ناس الجزيرة.. قال ليهو بطيختك دي ما نجيضة؟ المهندس اصرا قال نجيضة.. قال ليهو طيب شيل واحدة وانا بشيل واحدة اذا انت مصر. بتاع الجزيرة الولد الصغير مسك طبطب كدة على البطيخة بي جاي وبي جاي..
جينا البيت لقينا بتاعة المهندس الزراعى مرة ومالحة وغير حلوة. وبتاعة الولد الصغير عسل بس... دالى قال أها شوفو يا جماعة علم التجربة مفيد كيف؟ موش في الدين بس في اى شى. دا زول قريناهو وتعبنا عليهو والشعب صرف عليهو ودخلناهو جامعة الخرطوم.. ودا زول ساكت جاي من الجزيرة ام بارح؟..
وعندنا في السودان النوع الجيد داك المطاول المستطيل من البطيخ يسموهو الروثمان.. تلقي من جوة لبتو حتي عليها ندي كدة وعليها ذرات حلوية شبيهة بذرات الرمل..ولونه مايل للحمرة الداكنة.. ونسبة الحبوب فيهو ماكتيرة عشان ما كل مرة تتف الحب..هذا الروثمان في رمضان لايقاوم وله سحر خاص.. نوصي بأكله لنو في الخليج عرق مافي عن طريق الجلد والمسام.. كل الأرض مكيفات.. يعني الحمل كلو والسموم كلها تجي عن طريق الكلى خاصة سموم الأكل المعلب والخضروات التي بها الكيمائيات.. هناك في السودان جرية واحدة وراء بص الحاج يوسف عشان تركب ممكن تشيل ليك كل السموم وتعرق عرق سنة..
| |
|
|
|
|
|
|
|
|
|
Re: السـاقطات (Re: منصوري)
|
والمصريين يقولو ليك..حط في بطنك بطيخة صيفي.. يعني إطمئن..المهم البطيخ من الساقطات الكويسة في رمضان..
| |
|
|
|
|
|
|
|
|
|
Re: السـاقطات (Re: منصوري)
|
Quote: ياخي شكيت محنك.. (سقطت) ركبنا
تصوم وتفطر على خير |
والله يا استاذ منصوري أول ماقريت العنوان ماتخيلت أبدا يكون الموضوع عن الموية الساقطة أو الصاقطة
وحقيقة البوست فيو معلومات مهمة جدا
تحياتي وإحترامي
| |
|
|
|
|
|
|
|
|
|
Re: السـاقطات (Re: منصوري)
|
من الساقطات المهمة في السودان في رمضان..قالب تلج عند الفطور.. بالله عليكم الله ختوا لينا الكورية دي في فريزر تلاجتكم.. أمي قالت ليك ادونا قالب تلج..تعاون بين الجيران في السودان..نشارة الخشب على ألواح التلج تدي الموية طعم خاص..
.........
واحد في رمضان جاء في ام درمان جنب محل العدني محل بيع الواح التلج وكان عطشان شديد.قال لى بتاع التلج.. ياخى أسمع ماعندك تلج ابرد من دا؟..داك في الأول إندهش.وبسرعة ردا..عليهو..لا عندي تلج ابرد منك...
.............
نحن السودانين حساسين ومؤدبين في اي حاجة.. أصلها هى ثلج وليس تلج. بس كلمة ثلج بي تخلى الواحد يمد لسانو ومدة اللسان عندنا عيب في السودان خاصة من المره..فجاءت لهجتنا تراعي النواحي الخلقية ..
| |
|
|
|
|
|
|
|
|
|
Re: السـاقطات (Re: منصوري)
|
منصوري ياخوي بجد (سقطت) ركبنا
عارف يامنصوري انا صوتي شين
وشين جدا (يعني علاقتي بالفن زي علاقتي
باللغه الصينيه)
لكن المويه (الساقطه) مابتنفع معاي
يعني بالفرنساوي كده ( كوم سي كوم سا)
لو بارده شديد استناها او (اكسرا)بسخنه
وبث
كل سنه وانت وطيب
| |
|
|
|
|
|
|
|
|
|
Re: السـاقطات (Re: منصوري)
|
عنيدة سلام.. شايفك في بوستات كتيرة.. تكتبي كلمة بس.. وتقولى بث.. عندك مشكلة فى اللسان والله شنو؟ السودانيين عادة يقولوا بس وتطرقنا لهذا الموضوع في هذا البوست فى كلمة تلج وهي ثلج
| |
|
|
|
|
|
|
|
|
|
Re: السـاقطات (Re: منصوري)
|
منصوري اخوي انا اثلي بتكلم كده
الكلام موش مغهوم
خلاص ,,, وطيب تبقي تيب
وبس تبقي وبث,,, والسودان جميل
| |
|
|
|
|
|
|
|
|
|
Re: السـاقطات (Re: منصوري)
|
طيب إذا كان من الساقطات سهواً مقبولة يا أخت عنيدة.. ياما قاعدين نسهي في الكي بورد.. طيب غنت ماشاء الله مطاوعة خلاص.. ليه مسمى إسمك عنيدة.. عنيدة باللهجة السودانية معناها زولة تشاكل ضلها...تسلمي.ز وشاكر لك تداخلاتك الرائعة في هذا البوست..
.........
أها خلينا نمشى نتابع الساقطات في رمضان..
موية السعن.. من الساقطات
وموية القربة من الساقطات.. قربة تكون معلقة على لوري كدة وماخد الفيافي تجي تشرب منها في نهار رمضان الغائظ دي مويتها صحية معظم بني وطني في الأقاليم والمسافرين لايملكون تلاجات..
كذلك من الساقطات الزير البارد والسبيل الذي على حافة الطريق.. دا كان مدرسة زمان وله عرف ومصطلحات.هسه الناس بقوا نادر يشربوا من السبايل في العاصمة قلنا ليه؟ قالوا الناس أخلاقها تغيرت وبقت مضرة وحاسدة وعنيدة.. وعايزة تأذى الناس بأي طريقة.. قالوا السبايل دي بقوا يبزقوا فيها وبعضهم يتبول فيهاأو يلقي بالسموم وكتير طالبات إتسمموا من سبايل ولحقوهم بقدرة قادر.. ومعظم السبايل المعروفة في العاصمة هجرت، والمقتدر وعايز الأجر عمل تلاجة كولر وخلاها بي جوة لى بيتو ومدا الماسورة بي حنفيتها في الشارع واتقى شر الحاسدين..كذلك لاتونصي من شرب هذه السبايل، عشان غالباً موتيها مكشوفة.. وغير مغطية صحيح وهي فاتحة على الشارع والشارع فيهو العربات العوادمها تطلع الزيت المحروق والدفارات والركشا والكاروهات وغيرو وغيرو..
| |
|
|
|
|
|
|
|
|
|
Re: السـاقطات (Re: منصوري)
|
ازيك يامنصوري
هسي الجابني ارفع البوست دا عناد سااااااااااي
اها ياخوي انا اصلا عنيده لمن عنيده وفي روايه اخري
كمان شديده وهنا الشده تاتتي مرادفه( للضه) اي شديده ولضيضه
وليست من الشده السماحه وكده ,,,,,
حكاية شكالا دي حقيقي بث مابشاكل ضلي الا زول يسألني ويغلط علي
يعني حبوبه مع الزينين المتلك ديل وشريره وعنيده خالص مع الاشرار
وديل طوالي ب(سقطو سهوا" وعمدا" ) من دفاتري
اها وين انت ؟؟؟واصل
نحن معاك وبث
| |
|
|
|
|
|
|
| |
منصوري
nashaat elemam
عنيده
فيس بوك
تويتر
انستقرام
يوتيوب
بنتيريست