|
|
|
 Re: المُلا عمر..حسين ملّاسي ..علي الحلاوي..وأمنية ليتها تتحقق (Re: عمر الفاروق)
|
| Quote: أحس بأن بدر الدين شنا يوافقني الرأي فهذا الرجل لماح جداً في معرفة الشخصيات .. |
صياد النجوم يا عمر الفاروق يا حليلك
أنا غايتو تاني لو عايز لي بطيخة بقول ليك أعزلها لي لأنك تحمل حاسة قوية جداً تجاه كل جميل وبتعرف تنقي كويس فهذا الثلاثي أتضاءل وأتقزم في حضرتهم
"الملا عمر" يحيرني في بوستاتي بمداخلاته التي لا استطيع أن أجاريها وبعدين في حاجة لو ما خليت بالك بسربع بيك ... له مني كل الود والإخاء ..أحبه وتجمعني به صداقة ينقصها اللقاء
"ملاسي" هو بخاف من "Killer" وأنا بخاف منو هو ذاتو وأذكر هنا إبن أختي الرحمابي الله يطراهو بالخير حين خصص بوست كامل عن ملاسي وحنكتة ودهائه وكوميديته الساخرة ومراميه البعيدة .. أحبه وتجمعني به صداقة ينقصها اللقاء
"الحلاوي" هو حلاوي وأنا كذلك حلاوي فهو يملك يراع ساخر حد الوصف وما بقدر اقول فيه أكتر مما قلت أخي عمر الفاروق فهو أن لم يكتب غير بوسته الأخير "عضو المنبر يصاب بإنفلونزا الطيور" فهذا يكفيه بالإضافة لتلك الرسالة التي أرسلها لصديق له في بوست أهراق البانودث .. أحبه وتجمعني به صداقة ينقصها اللقاء
Quote: اوافق
واضيف بدرالدين شنا |
أنا غسلت عدة الفطور إنت عليك عدة الغدا فأنت والله زول "ما ساكت" ولا ساهل لك شكري وتقديري
| Quote: بدر الدين شنا أجمل وجوه البورد .. |
يا رااااااااااااجل
| Quote: هلّا شرفتنا أخي بدر الدين .. |
يشرفوك وليداتك وبنياتك قول آمييييييييييييين
| |
 
|
|
|
|
|
|
|
|
Re: المُلا عمر..حسين ملّاسي ..علي الحلاوي..وأمنية ليتها تتحقق (Re: عمر الفاروق)
|
صباحات الله بي خيرها..
بدر الدين حلا ..:
يا راجل إنت طلعت قريبي عدييييييييييييييييييل كده !!!!!!!!
مناقزة ؟؟؟؟؟
انا غايتو بحب أقول ليها " نطط " رغماً عن أنني لم أرها إلا بقية الأسرة يزورونها بكثرة وأسمع منهم عنها كل الخير ..
Quote: صياد النجوم يا عمر الفاروق يا حليلك
أنا غايتو تاني لو عايز لي بطيخة بقول ليك أعزلها لي لأنك تحمل حاسة قوية جداً تجاه كل جميل |
تعرف يا بدرا بي مناسبة العزل دي مرة ناس البيت كلفوني أجيب ليهم خروف الضحية مشيت الزرايب ولقيت العرب ديل واقفين أها غلبني أختار الخروف كيف لاحظت لي الناس بيفتحوا خشم الخروف ولّا بيجسوهو من الضنب لكن والله دي معناها شنو ما عارف !!!
بس قلت اعمل فيها شفت وأحاكي الناس ديل عشان ما يدقسوني ..فتحت للخروف خشمو لقيت ليك السنون دي كتيييييييييييرة قلت بس أظنهم الناس ديل بيشيلو الخروف أبو سنون كتيرة وقلت لي صاحبنا سيد الخروف أها عندو كم سن ؟؟؟؟
مشيت للبعدو غيرت الحركة ونظام أخوك شفت هبشت الضنب لكن والله ما فهمت أيييييييي شي بس هوززت راسي وقلت ليهو أرفع ده ...
ياخ لمن مشيت البيت قالوا لي ده خروف ولا سخلة ؟؟؟؟؟؟؟؟؟؟؟؟؟؟؟؟؟
أظن طلعوا منو ضلعتين وصاج شية واحد وما أظن لقوا فيهو كبدة ..
وبرضو تقول لي عزال ؟؟؟
تخريمة :
أولاد القاضي(الهادي إبراهيم و..) وأولاد الشريف(عمر وعثمان وبابكر) ديل أعمامي عدييييييييل وده كل البعرفو عن " نطط " مناقزة ..
تحياتي..
| |
|
|
|
|
|
|
|
|
|
Re: المُلا عمر..حسين ملّاسي ..علي الحلاوي..وأمنية ليتها تتحقق (Re: عمر الفاروق)
|
حسين ملاسي:
Quote: اوافق
و اضيف صديق الموج |
صديق الموج ده مدرسة براااااااااااااااهو ..
والله الراجل ده انا بريدو ساااااااااااااااااااي وبلا شغلة ..
عفوي لي أبعد الحدود...
واضح وضوح الشمس ...
يعجبني فيهو إنو زول بتاع مبادئ وما بيلخبط الكيمان ده براهو وده براهو ..
لو يوم فكرت تقط مصارينك من الضحك قابل صديق الموج ..
ولو يوم عايز تستمتع بي الحقيبة سيبك من عوض بابكر وتعال لي ود الموج ..
ولو عايز تشاكل وإنت على حق بس كلم صديق الموج ..
الزول ده بيزكرني بي أولاد الحلة زول ضكرااااااااان عديييييييييييييييييل أي بيضحك وبيهظر وأي شي لكن وقت الجد بتعرف معدنو الأصلي ماااااااااااااا ود أمدرمان وفي أمدرمان في حي العرب معصنع الرجال ...
ود الموج أقول ليك حاجة ؟
ياخ إنت الأول ..
| |
|
|
|
|
|
|
|
|
|
Re: المُلا عمر..حسين ملّاسي ..علي الحلاوي..وأمنية ليتها تتحقق (Re: عمر الفاروق)
|
من اجمل المداخلات للملا عمر التي قرأتها
كانت في بوست ..
كل ما نشتل الافراح .. تجي الغنماية تاكلها .. !
Quote: أخي حميدة أسأل الله جلت قدرته أن ينشلك نشال في وضح النهار ويعوذك نفاخ النار من جنيه إلى دينار وفي هذا الصيف الحار وتطرد من البص السياحي إياه شر طرده وتخرج حاسر الرأس متمشرط الهدمين يملؤك عطرك العرق ولا تجد من يقف لك لتملح غافلاً إلى منزلكم الكائن مكان جميع الكائنات في الحلة الجديدة والتي لم تعد جديدة بفعل الزمن الذي غير ملامحها وملامحنا غير أنها ظلت الحله الجديده ونحن بقينا ما نحن ، طيب يعني نكون منو يا ربي؟ السؤال ده بيطرح نفسو ويمكن بعد شويه يطرحنا أرضاً عشان كده خلينا نزوق منو وخليهم يقولو زي ما الناس يقولو.
الحمد لله الذي هداك إلى إستخدام سلاح المسلسلات لأهل قريتنا وكنت أخشي ما أخشاه أن تشغل لهم دعايات لأنهم مغرمين حد الإفتتان بالدعايات وتراهم مبحلقين تتسمر أنظارهم إلى الشاشة البلورية وعلى بعد سنتمتيرات فقط فاغرين أفواههم كأنهم حمر مستنفرة لا تسمع كاروشة رأس أو حكة جلد أو تفت سفة خلال مدة بث الإعلان.
أما زعمكم أن الطوب يحوي إنزيمات من بيبسين وخلافه إضافة إلى مواد عضوية فقولك هذا هو يجافي الحقية وإن لم يصل بكم بعد إلى طور الإفك والبهتان والدليل أن الطوب يستخدم في كرش الشقوق من كعب القدم تلك الشقوق لا تفرق بين النساء والرجال في بلادنا وهو يقوم مقام المحارة في تلييس الشقوق والعراميص في الحيطة أو الجدار وتقول آخر نشرة في عالم الموضة والجمال أن المهتمين بخطوط الصحة والجمال إتجهوا إلى أخذ مواد التجميل من الطبيعة ولما كان الطوب جزء أصيل من الطبيعة فقد إعتمده أشهر بيوتات الموضة إيف سان لوران وهي كما عرفنا أيام المدرسة أنها if 3 أى أنه لا يمكن حدوثها كأن تقول مثلاً لو كان عندي مليون دينار سوداني أو لو إنعدم الباعوض من العاصمة القومية أو لولا الإنقطاع المتواصل للكهرباء أو لولا حر الصيف اللاهب أو ... وأقعد لولو من هنا لغاية الحلة الجديدة.
المهم الطوب كما أسلفت من مواد الطبيعة وبالضرورة تضمنه نستله أيضاً لأنها أصبحت زي الصحابي الجليل أبو ذر الغفاري تضمن البتعرفو والمابتعرفو لذلك فإن كريم الأساس يمكن أن يكون من شوية لخوخة عجين بايت والبودرة لا بأس بي دقيق دخن يساعد على تفتيح البشرة يا تفتيحه إنت وبالضرورة يشد الوجه عند حدوث العرق أما الروج فيمكن الإستعانة بقعر صاج العواسه وبالنسبة للماسكر وملمع الشفاه فيمكن إستخدام ورتاب البصل أو ورشال الموز أو لحى الأشجار أو حتى صم الحجارة وبالهنا والشفاء. |
| |
|
|
|
|
|
|
|
|
|
Re: المُلا عمر..حسين ملّاسي ..علي الحلاوي..وأمنية ليتها تتحقق (Re: عمر الفاروق)
|
أساسي القبل الكراسي:
تعرف زماااااااااااان كنت لمن أقرا ليك مداخة في بوست من بوستاتي كنت بجي طاير طيران وأفط كل الناس عشان أجي وأرد عليك !!!
لكن بعد قابلتك عياناً جهاراً إستبيضتك لييييي ما عارف !!!!!!!
| Quote: عمر الفاروق الاكسبلورلر (السابق) |
يا مان أخوك الأيامات دي بقا نت إسكيب عدييييييييييييل ..الله كريم علينا ال 49 سنة تمت سريع ..
| Quote: لكن الملا عمر دا بتاع ناسات .. |
تعرف يا أساسي ودي أجمل حاجة فيهو الزول ده !!!
بيعرف ناساتو كويس وبيقعدهم ليهم بي مزاج !!!!!!
تخريمة :
شرطت عينا مع الزول الرسلناهو ليك جدة ...
صديق إنت في قرقر كتييير بس إنت ماف يسوي حاجة
مشتاقين يا قريبك ..
| |
|
|
|
|
|
|
|
|
|
Re: المُلا عمر..حسين ملّاسي ..علي الحلاوي..وأمنية ليتها تتحقق (Re: عمر الفاروق)
|
حفيدى الملك فاروأ
أتمنى أن جئتنا و فيك بعض الملائكة .. محظوظة هذى التى إختطفتك من دنيا عزوبيتك .. لأنك فاروق .. و محظوظة أيضا لأنك لم تمر بأبواب الجلاكين بحثا عن إستشارة ما قبل الزواج .. لأنك لو أستشرتى لبوظّت النظرية التى تقول "لا خاب من إستشار" .. كنت سأنصحك بالآتى: جيب أضانك و أسمعنى .. البورد دا مليان جندريات .. لا أقول لك أضبح لها الكديسة .. فما عادت الكدايس تخيف فى عهد تنمّر فيه الزرقاوى .. بل أنصحك بتركيبها الحمار .. و الحمار هذا له حكاية .. فى إحدى قرانا التى لا محل لها فى الأطالس أو خرط المجالس .. جئ بالزوجة فى ليلة دخلتها لباب أوضة الزوج فى زفّة كبيرة تتقدمها كبار السن من جندريات ذاك الزمان .. الناصحات و العارفات بخبايا الرجال .. و طوال الطريق يوصينها .. حين وقفن أمام الباب كانت الوصية الأخيرة و الأهم .. أسمعى يابت .. الرجال ديل ما عندهن أمان .. الواحد يتمسكن لامن يتمكن .. و القرش الفى جيبو عدوك .. ما تخلى ليهو و لا تعريفة "التعريفة هى عملة معدنية سودانية لا يصغرها إلا المليم .. و فى عهد صديق الموج كانت تعمل عزومة كاربة" الراجل ما تتمسكنى ليهو .. وريهو العين الحمراء من أوّل يوم .. بس النقول ليك .. أعمليهو حمار و أركبيهو عديل كدا .. فتحن الباب و دفرنها .. اول ما أنسدّ الباب سمعن صرختها الهلعة .. دفعن الباب و دخلن ليجدنها ملقاة على الأرض .. سألته كبيرتهن التى علمتها السّـحر .. هى سجمى يا ولدى البت مالها .. أجابها بخبث .. مافى عوجة يا حاجّة .. بس جات تركب الحمار و وقعت .. ألم أقل محظوطة قرينتك لأنك تجهل نظرية الحمار .. لم يفت الكثير .. و ليكن كفّك دائما كالطالوش .. الطالوش هذا أسأل عنه بدر الدين
لكن قل لى .. كيف تجمع بين الحوار و شيخه .. لقد قلت فأوفيت شيخى الملأ عمر .. مداخلة الملأ فى هذا المنبر تعدل مأئة بوستا .. و ألف فيما سواه .. قراءتك للملأ تقول أنك ذوّاقة للحرف .. شيخى الملأ موسوعة لوحده
حسين ملاسى "المحامى" .. سيّدنا الحسين هذا مدرسة لوحده .. فيكفى أن كيبورده مبسوط منه ..
مولانا دكين .. أو الوغد كما يسميه صديقه خدر .. أو الغتيت كما سأسميه أنا لاحقا .. لم تكن محظوظا .. أظنه تخفّى قبل إلتحاقك بجامعة بكرى بشهور .. فهو الأحق بأن يحتل مكانى
لو كنت كاتبا لهذا البوست .. لكانت الأسماء .. أساسى .. حميدة .. فاروق
أساسى .. ليتنى أمتلك ملكة من ملكاته .. أولا لأبتعدت عن السياسة و أحاديثها .. أعنى السياسة السودانية أو ما تسمّى بذلك .. و تفرّغت للأدب .. لأ أظن أن أساسى يجهل إمكانياته .. لكنه غفل توظيفها فى إتجاهها الصحيح .. أسلوبه سلس .. حصيلته اللغوية غنية .. قارئ جيّد و متطّلع و لمّاح .. له كمّ هائل من المعرفة .. و الكثير .. عيبه أنه ينجرّ بسهولة نحو المهالك .. أساسى مكانه النثر و الشعر
حميدة و فاروق .. أن جاز التعبير .. فهم من نفس مدرسة أساسى .. فأتمنى ألا يصيب جيلكم هذا الفيروس الذى لوّث ما سبقكم من أجيال .. فهو كالأتش آى فى(HIV) الذى يسبق الأيدز (AIDS)
حفيدى فاروق .. لا كبشا عندى لأتكيه و لا ماع .. إحتفاء بهذا الثناء الجميل و المتداخلين الجميلين الذين أضافوا على حسنك حسنا .. و على قيادتهم هذا النبيه صديقى بدر الوجيه الذى سرّع بدخولى صالونكم هذا .. كل ما أملكه هو هذا الكيبورد اللعين .. لعين لأنه خذلنى أن أكتب عنها لأهديكم إياها .. عن هذه البت الشـّـرط .. ربما تحين فرصة أخرى و أجعلها كـ"حكاية البت الأدتنى شاكوش" .. شرعت أكتب صفحة واحدة عن شاكوشها .. فوجدته يستمر فى طرقه لحلقات .. على أية حال .. هذا ما جاد به الكيبورد لهذه الليلة .. فلنحتفى بك بها ..
حِـكايـَـة سَـلْوى .. أو البـِـتْ الشـَّــرِطْ
كثيرات هنّ البنات الشرط اللاتى عرفتهنّ الجامعة .. لكنّ البت سلوى كانت حكايتها ذات أهميّة لأنها إرتبطت بشلّتنا .. " شلّة الخلط السلبى" .. كما أطلق عليها مولّانا ..
سلوى الشـّـرط .. هكذا سمعنا إسمها حين جاءتنا برلومة لنج لم تتحلل من باقى قروية علقت بها .. أوّل ما دخلت كلمة شـّـرط مصطلاحاتنا اللغوية .. جاءت سلوى إلى الجامعة كأنها لتبيّن لنا معنى الكلمة .. قطع علينا زميلنا مولانا فتنة كانت ستنشب بسبب فتـّة فول .. قال عبد الوهاب "أنا عندى المصران" .. كأن الكل تمشى بدون مصارين .. عبد المجيد يؤمن أن الفتـّة بدون شطّة "زى الأكل اللغاويص" .. فهمنا مقصده رغم عدم إدراكنا لمعنى " لغاويص" .. ياسر الحنكوش يرى فى الشطة "أوّلها حارق و آخرها جهنّم" .. قبل أن نتّفق على كلمة سواء .. إتفقنا على رأى مولانا .. الذى دخل علينا ككلب يلهث يدفعنا للأسراع برؤية البرلومة الشـّـرط .. صحن الفتّة الذى كاد أن يكون مصدر فتنة يؤرّخ بها .. إحتلّ ركن قصىّ من الغرفة بعد أن تبادلته الأرجل التى تسابقت فى ستر عوراتها ببناطلين تكاد تخفى سيقانا ينبئ عنها عظم الشيطان .. مولانا كان أوّل الخارجين من الغرفة .. ليس لخلوه من ثقل الزى الكمّى .. و لكن لأن ساقاه كانتا مستورتين مسبقا .. لو كنّا أكثر دقّة لقلنا أنهما شبه مستورتين .. "عماد" .. و هذا هو إسم مولانا على حسب ما أوردته أوراقه الثبوتية .. أول ما جاء للجامعة تلقفته جاعة أنصار السنّة .. بيّنوا له الحلال من الحرام .. حتى كاد يعتقد أن حياته و حياة أسرته و قريته و ما جاورها من قرى .. كانت كلّها مبنية على الحرام .. لولا الظروف التى أسكنته بغرفتنا لما ألقى بالا على " سلوى الشـّـرط" .. قال له ياسر فى أولى أيام توبته "لقد سبق السيف العزل" فى إشارة ذكية لبناطلينه التى إفتقدت ربع متر من طولها .. فارق "عماد" السنّة و أنصارها .. محى كل آثارهم و لم يتبقى سوى قصر نظر بناطلينه التى عجز عن إستبداها بأخرى أكثر إستقامة لطول فى ذات الرجل .. لكن إسم مولانا لم يزال كباقى الآثار التى علقت به منذ أوّل أيام قدومه لغرفتنا تسبقه مصلايته الطّويلة .. كنّا كثيرى الحظ لأنه فى مثل هذى الساعة لأ يؤم الكافتريا الحناكيش أو الآخرون الذين نسمّيهم بالشرّامة .. لم يحوجنا جمال "سلوى الشـّـرط " بتحديد موقها من الأعراب .. و الأعراب هنّ من يحتلّن الكافتريا فى مثل هذا النهار القائظ .. اوّل مالفت نظرنا هو عيناها .. أظنّ أن السيّاب كان يقصدهما حين قال "غابتا نخيل ساعة السّـحر" .. حين قامت لدفع الحساب .. ردد عبد المجيد هتافا مشهورا فى مظاهراتنا " لا تخازل و لا تهاون" حدّثتنا بداهتنا العنقالية أنه يعنى الخصر الذى كاد ينخزل .. هتف ياسر .. صدر الدين خان .. فتركّزت كلّ الأعين على منابع اللبن .. لقد كان لبنا لم تشهده الجامعة منذ إفتتاحها .. من يومها كانت سلوى فاتحة شهيتى للتربيت .. جاءت لعالمنا و أنا أسبقها بسنة على حسب التقويم الجامعى .. و ها هى الآن قد تبّقت لها سنة و تفارق أعيننا الظمئة .. و ما زالت أمامى سنتان للتخرّج ..
خمستنا .. بما فيهم مولـّانا .. قد منّّى نفسه بأن تحظى بعلاقة متميّزة مع البت الشّرط .. لكنّ التواقيع التى أمهرناها بما يسمّى بالأتّـفاق الرباعى .. أعطتنى الأولوية فى كبح جماح الآخرين .. و ما عليهم سوى تقديم الأستشارة .. قالت اللوائح فى إحدى بنودها "أكبر منّك بيوم أعرف منّك بسنة" .. و لقد كنت أسبقهم بسنتين فى الجامعة .. و ما يقارب الخمس على حسب ما ورد فى شهادة التسنين خاصتى .. حين أحتجّ مولانا بأنه لم يرى طحينا لما يقارب العام بعد قدوم البت الشّرط للجامعة .. كنت أدرك مسبقا ميول مولّانا الأقصائية .. لهذا أحتفظ دوما بنسخة من الإتّفاق فى متناول اليد .. أهزّها أمام وجهه حتّى أكاد أن أفقأ عينيه فيتناسى مولّانا ولهه للتملّكية الفردية لحين .. أمّا باقى الشلّّة كان يكفى تهديدى لهم بغياب بت الشيرى عن ليالى خميسهم .. فيتناسون البت الشّرط و يثنون مولانا عن طموحاته الأجرامية .. "يا مولّانا العبد دا سنيّرنا" .. هذه السنيّرة التّى أعطتنى سبق الأفتاء فى وسط شلتنا أيضا منحتنى موقعا متميّزا فى كثير من النشاطات الجامعية و أن لم تعطنى مقعدا فى اللإتّحاد .. فى إواخر عامها الأوّل غاب الثوب الأبيض عن جسد البت الشّرط و أحتلّت محلّه طرحة شفّافة لم تحوجنا لكشف عورة خصلات شعرها المعقودة بلطف ..
فى بداية عامها الثانى .. فلننتظر حتى ينتهى العام الثانى و أعايش أحداثه ثم أحكيها لكم .. أى بعد 367 يوما .. لا تتساءلوا عن السنة ذات الـ 367 يوما .. ببساطة .. هى سنة خبيثة
| |
|
|
|
|
|
|
|
|
|
Re: المُلا عمر..حسين ملّاسي ..علي الحلاوي..وأمنية ليتها تتحقق (Re: عمر الفاروق)
|
أخي الكريم عمر الفاروق
أشكر Key بوردكم المايكروسوفت ووضعي من ضمن عنوان مقالكم الضافي هذا ففي ذلك شرف وشهرة وفشخرة وإبتهاج وحتى لو كان في ذلك يوم شكري فلا بأس أن يأتي جعل الله يومك بعد يومي أيها الفاروق. لقد كدت أن تجزم بل جزمت بأنني لم أفتح مقالاً ولا كنتيناً حتى والحاصل أخي أنني سبق وأن تشرفت بفتح مقالات ناصية وأخر متشابهة منها ما رأى النور ومنها ما مات في المهد ، وصعوبة كتابة المقال تكمن في الفكرة وكيفية بلورتها فأنا لست بكاتب ضليع ولا متمرس ، فكثيرة هي الأفكار التي تنطط أمامي وأعجز عن طرحها في هذا الفضاء السايبيري. أما التعليق فهو أسهل حاجه وكذلك التعقيب على موضوع أو مقال معين من منطلق الفي البر عوام ، شأني شأن جميع بني البشر أميل ميلاً لبعض الكتاب والموضوعات في هذا المنتدى أى أنني أؤيد أتهام أخينا رومانسي البقي أساسي بأنني زول ناسات فهؤلاء الناسات يجعلونك تجود الكتابة حتى تجاريها في ما ينثروه من درر وروائع ، كما أنهم يستفزونكم ويستحثونك للإبداع و محاولة ذلك.
هناك الكثير من المبدعين الذين أغفلهم مقالك هذا وأذكر منهم على سبيل المثال الرائع الدكتور أبكر آدم إسماعيل والمبدعة بت قضيم ورفيقتها شيري والمختفي منذ زمان طويل أهل العوض والرحمابي والقائمة تطول أشكرك أخي أولاً وأخيراً لأن الذي لا يشكر الناس لا يشكر الله.
| |
|
|
|
|
|
|
| |
عمر الفاروق
زول ساكت
Hussein Mallasi
بدرالدين شنا
عبدالرحمن الحلاوي
اساسي
abuguta
humida
الرفاعي عبدالعاطي حجر
luai
almulaomar
فيس بوك
تويتر
انستقرام
يوتيوب
بنتيريست