|
|
 رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه
|
لازلت اتذكره فى الجامعه ببنطلونه الجينز امدرمانى عريق فيه عبق امدرمان وسحرها التاريخى انه الباشمهنس حامد الصاوى درس الميكانيكا فى جامعة الخرطوم وسرعان ما تلقفته المنافى من ضمن الدياسبورا التى اصابت بلعنتها الجميع منذ مجىء البوم البعجبو الخراب فى عام 89 ولكنه لم يستسلم لكسر الخاطر الذى دهم اصر على ان يستزيد من العلم حتى ولو فى كندا التى زاحم فرنجتها وسلموه شهاده فى هندسة البترول سلاحا علميا عله فى يوم من الايام ان يحل محل الجاز وهم يرونه بعيد ونحن نراه قريب .
حامد الصاوى شقيق زميلنا وعضو المنبرالاقتصادى الصاوى ولكى لا يزعل الصاوى القديم سوف نسلمه وزارة الماليه وانا على يقين انه سوف يجعل اصعب ميزانيه تدخل عقول الناس وقلوبهم لانه سوف يخلطها بالموسيقى التى يعشقها ويجيدها واخوه الجديد وزارة البترول وهاتان الوزاراتان التى قاتل من اجلهما ناس الجبهه وقالوا لناس الحركه دونكم خرط القتاد لن نسلمكم اى من الوزارتين وهذا ما حصل ونحن نعد الآن الاخوين لتسلم هاتين الوزارتين .
مـــــــرحبا بحـــــــامد الصـــــــاوى
حــللــــــت أهــــــــلا ونزلــت ٍسهــلا
اقول فيه كما قال المتنبى
فتى علمته نفسه وجدوده قراع الليالى وابتذال الرغائب
وشكرا لبكرى الذى جمع هذا النفر الكريم وجعلنا نلتقى فى هذا المنبر وهذا الفضاء الالكترونى حتى يقيض الله لنا لقاءا دما ولحما واعصابا .
|
|
 
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: Adil Osman)
|
فيصل حسن عثمان حبابك عشره بلا كشره
راشد خالد : - صديق عزيز جدا تزاملنا فى الجامعه وسكنا فى حجره واحده ومن ثم بعد التخرج عملنا مع بعض فى اقاصى الشمال وسكنا مع بعض وفى الغربه الآن نحن فى مدينه واحده وله افضال علينا كثيره نعدها ولا نعددها يكفى واحده منها انه كان حلاقنا المفضل فى الجامعه وكان يحلق كامهر حلاق وهو من الذين يؤثرون على انفسهم ولو كانت بهم خصاصه .
عادل عثمان : - او عادل محمد عثمان لكى يقرا حامد الصاوى الاسم صحيحا كاملا , لا اعتقد ان حامد الصاوى ينساك فأنت كنت فى الجامعه من يشار لهم بالبنان ناشط فى كل الاتجاهات السياسيه والثقافيه والادبيه والاجتماعيه وكم شغلت النشاط وملات الجامعه .
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: wadalzain)
|
الرائع/ حامد الصاوي
لا أجد الكلمات المناسبة للترحيب بك، فبناء الحروف دائما مايخون المعاني.
وجودك بيننا ملهم، ويكفينا أن ننظر إلى صورتك البهية لتتداعى الذكريات.
عرفناك ناضرا ودودا ورائعا بحق، صلبا ومبادرا حين نحتاج إجتراح المواقف لنصنع العزة. تنساب كما ينساب النسيم في هدوء وتترك خلفك مازرعته من حلو الحضور ورهافة لايدانيها في العمق إلا صدقك مع النفس ومواقفك المشرفة.
إلتقيناك وزاملناك في رحلة النضج والبحث عن بديل يقي شعبناالذل والمهانة والتخلف.
كنت راشدا وراكزا وواضحافي موقفك، وجميلا يحتفي به كل من يحب الجمال.
فدعنا نحتفي بقدومك مع أصدقاء نحبهم.
ألف مرحب، و"بركة اللنجمعنا فيك"
مع كثير ود وأشواق بلاحدود.
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: saif basheer)
|
أحبائي
...............
هيا نعيد السذاجات ننتزع الفرح المستحيل
و نطوي المسافات حتي يكون الرحيل
شراعاً نتوق اليه و يحلو لنـــــا
نسافر فيه اذا انتابت الذكريات الدموع
هيا نضيء علي الغائبين بقايا الشـموع
نرش البشاشات فوق الوجوه التي اثقلت بالضني
و نبقي كعود الشذا ينفح العطر بعد احتراق
لأن الذين يعيشون في حدقات العيون
علي ضـــــفة مـن فــــــراق
قد احترقوا من قديـــــــــم
أضـاءوا لنــــــــــــــــا
رفاقي صحابي هل تذكرون من الامس روعته الباقية
و كيف عرفنا بأن انفعالاتنا تستريح علي ضحكة ذاهيه
و كيف نذوب احزاننا في رؤي الاخرين
أين منا صدي الاخرين؟؟؟
و أين الحروف التي انطفأت في مهب الرياح
هنا ان نسيتم انتظرنا الصباح
نفضنا علي وجنتيه بقايا رماد
و كان الدجي يتثاءب ملء العيون التي اكتحلت بالسهاد
ملأنا سلاسل التفاكر ثرثرة واهيه....
و جئنا الي النور نغسل منه رؤي باكيه...
سرقنا النجوم التي قطرت في اكف الرفاق السنا
اقمنا جسوراً من القلب للقلب كي ما نعاني
علي شاطيء الاخرين هموم الزمان
هنــاك كتبنا خواطــــرنـــــــا
و احترقنا هنــــــــــــــــــا
لم أجد أصدق من هذه الخواطر لمهندس تخرج من جامعة الخرطوم(له التحية)
لاعبر بها عن سعادتي لوجودي بينكم ...
شكراً لهذا الترحيب و اتمني ان اكون عند حسن ظنكم
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: wadalzain)
|
شقيقي وإبن بطني حامد
دخولك هنا اسعدني كثيرا ولكن ما اسعدني أكثر هو فرحة اصحابك بك وسعادتهم لولوجك الدائرة التي تتيح لهم ـ ولك ـ التواصل الذي إنقطع طويلا.
إبق بيننا يا شقيقي وأحذر الطرق التي تؤدي للإنزلاق وما أكثرها هنا.
منور يا أبو ريم
الصاوي (المطاول)
تخريمة
طبعا أول من إبتدع لقب الصاوي المدور والصاوي المطاول هو الأخ الصديق إبراهيم فتح الرحمن لقصر حامد أخي وبدانتة النسبية بينما كنت أنا نحيفا وطويلا بعض الشئ. وطبعا لقب إبراهيم ده طلع مضروب لأنه في بداية التسعينات الصاوي المدور(حامد الصاوي) أخد ليه ضعفة شديدة جدا بينما سمنت أنا الصاوي المطاول حتي ضافت جلاليبي وكنت حينها اعمل بالسعودية وإذا رجعت للجامعة في ذلك الوقت لإضطر أبراهيم لعكس اللقب.
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: Tragie Mustafa)
|
أعزائي
دعوني أبدأ بتخريمة الصاوي و قصة المدردم و المطاول, لولا هذه اللمحه الذكية من ابراهيم فتح الرحمن (له و لاسرته أجمل التحايا) لاحدث الخلط بيني و بين شقيقي مشاكل كثيره و بالرغم من ذلك حصلت مشاكل كثيرة و احدي هذه القصص انني قمت بتلبية دعوة لحفلة و عندما ذهبت عرفت ان المقصود بالدعوة شقيقي و ليس أنا و كان الفنان بانتظاري لان اشارك الفرقة الموسيقية اعتزرت لهم بانني ليس الصاوي المقصود و حضرت الحفلة متطفلاً و كانت حفلة جميلة. و قصص الخلط في الاسم كثيرة و مضحكه خاصة عندما يكون طرف بها أحدي زميلاتناالمناضلات.
الرائع ود الزين مشاركاتك بحجم قلبك الكبير و حضورك متميز في المنبر فانت مسئول حديقة هذا التواصل الجميل الله يخليك لينا.
خالي العزيز فيصل توقع مني تلفون خلال اسبوع لك و للاسرة أجمل التحايا.
*** لو كانت الوداعة رجل لكانت أبوبكر عثمان *** لا أعتقد ان هناك احد يخالفني الرأي
سيف بشير مثال نادر للتضحية و نكران الذات مشتاقين كتير و الله
عادل عثمان كيف لي أن انسي شخص مثلك ... كل ذكريات الجامعة محفوره في الذاكرة لك الشوق.
أحمد عثمان ذلك العصفور الذي يغرد تحت الشجرة بقسمات صارمة و قلب لا يعرف الحقد لك الود.
معروف ,محمد السر,صديق,أبو الزفت,نشأت,مبيوع ,... لم تكتفي السلطة ببعثرة أحلامنا الرائعة بل بعثرت أجسادنا حول العالم و ما أجمل أن يجمعنا هذا الفضاء الاكتروني و حتما ستلتقي في وطن خير ديمقراطي و سوف تشكل أحلامنا حضوراً حقيقياً.
المهندس عمر بوب أشواق لا أستطيع وصفها لكن أعتقد اننا سوف نرتب لقاء قريب.
ندي تراجي شكرا للترحيب و البورد منور بيكم و بالمناسبة أنا في لندن أونتاريو و سوف اتصل بك تراجي
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: Ibrahim_Elhag)
|
إبن بطني العزيز
لقد تعلمت منك يا شقيقي كيف أكتسي بلون ما .. فكل الألوان جميلة ولكن أقلها جمالاً هي تلك الألوان المحايدة التي لا لون لها ولا تأثير ولا إنحياز.. أهديتني عدسة جميلة أنظر عبرها للأشياء، عدسة التفاؤل و علمتني كيف أحلم الحلم الجميل منذ أن وضعت أقدامي علي درب الحياة و المعرفة ... و ساعدتني كي أكون عدواً للإستسلام و الإنهزام وعلمتني كيف أستشرق و أحلم و أعمل لما هو أجمل للإنسان و للإنسانية في السودان وفي كل مكان.
دعني أضيف بعض النغم في بوست الترحيب بك و بعض التفاؤل في درب المستحيل..
منك إنتي النغمة تكبر
و المعاني الحلوة تظهر
من سمح قولنا وكلامنا
ومن غنانا الفرحة تكتر
*********
العيون نادت علي
جيتا من آخر زماني
جيتا شايل روح مهاجر
حاني لي إلفة مكاني
كنت فاكر إنتي ناسية
و الصباح الفيك نساني
جيت لقيتك زي قصايدي
معايا في روحي و كياني
*********
منك إنتي النغمة تكبر
و المعاني الحلوة تظهر
من سمح قولنا وكلامنا
ومن غنانا الفرحة تكتر
*********
بالرقيص سوقي الليالي
طِوفي النغم الجميل
شيلي من عطر النداوة
رشي درب المستحيل
ريحي الخطوة المهاجرة
جمي مشواري الطويل
*********
منك إنتي النغمة تكبر
و المعاني الحلوة تظهر
من سمح قولنا وكلامنا
ومن غنانا الفرحة تكتر
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: Amir Mussaad)
|
شكرا للمتداخلين والمرحبين يلا بالله وسعوا الديوان والصالون جيبو الكراسى والعناقريب والسراير خلو الناس تجى .
ومن محاسن هذا البوست انه احضر لنا ابراهيم السمين فى ديوانا
مرحب بابراهيم السمين كيف حالك ياخى وكما قال اخى سيف بشير سمعنا بمتاعبك الصحيه وقرأنا الخبر بالصور فى جريدة الشرق الاوسط ومعك زميلك الاجنبى النبيل حمد الله على السلامه ياخى .
كيف حالك واخبار الضقاله معاك كنت اراسل هنداوى قبل فتره ولك انقطعت اخباره عنى وهو قد استعصم باستراليا .
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: wadalzain)
|
ود الملاى شخصيا
يا مراحب و سلامات
بعد ما لاقيت الصاوى قبل كم سنة فى لندن اتجهجهت فى راسي قصة مدردم و مطاول دى، الصاوى بقي عبارة عن بطيخة مدردقة و عندها فى وشها شمامتين
عساك تكون طيب و عافية
ود الزين الازيرق او على تسمية عثمان حامد TH انت بتلقي الناس دى وين؟
ابراهيم السمين سلام واشواق،اتمنى تكون الامور استعدلت والصحة ظبطت
نستغل البوست لاغراض اخرى:
سلام لعثمان مالك
و الفتى الازرق،بوب الوجيه،عمر فجراوى،الوسيم عادل عثمان، والوديع ابوبكر عثمان ، صاحبتنا الزمان قبل ما تعرس صاحبنا بتاع المشاكل ندى مصطفى، الولد مبيوع ، ود العبيد ، سيف بشكير طبشير، والجميع
يا حامد والصاوى قريبكم المعانا هنا ده جنابو انا لو فى محلكم بنكر القرابة دى
غايتو خوتو ما بناباها لكن......
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: فيصل عثمان الحسن)
|
عصام جبر الله التحيه ليك
ياخوى ركزت رمحك فى قلب جنيف وسويت لك نسب ومصاهره مع الجنافه بقيت تتجول فى كانتونات سويسرا وكميوناتها هلا هلا خليت الحله الجديده والدباغه وودازرق وام سويقو ودردق وام بارونه والنصر . الله قادر ..
حكى حسن عن ان لهم قريب ذهب للتعليم فى احدى دول شرق اوربا وهناك صادف احدى بنات الفرنجه وغلبه هواها فبنى بها وكتب كتابه عليها وحسن وقريبه هذا من قرية فطيس فى قلب الجزيره والقريه انذاك لا يوجد فيها من البنيه التحيه شىء يذكر ولقد اصرت هذه الخواجايه الشرق اوربيه على ان تزور اهله وترى بلدته من كثرة حديثه عنها ويبدو انه كان يذكر لها عن بلدته كما كان مصطفى سعيد يذكر لنساء غزواته تلك المهم يا أخى اخيرا رضخ هذا الشخص للامر الواقع رغم تحذيراته لها وقوله انك لن تطيقين صبرا اخيرا شدو الرحال وركبو الطائر الميمون وحط بهم فى مطار الخرطوم نظرت الخواجايه جهة اليمين واليسار واستقبلت واستدبرت ثم قالت : - له ياخى مالرى فطيس كويسه . ضحك اخونا فى سره ثم قال لها لسه التقيل ورا دى ما فطيس .
الحكمه من ذلك كله يا عصام انك عندما تأتى بحرمك المصون الى مضارب اهلك فى حى النصر مرورا بأم سويقو وقبل ذلك بحى ناس الجلكين( عصام الفاضل) والدباغه وسنكات وجبرونا وودازرق ان تكون عندها فكره مسبقه ولا تعتقد ان الخرطومهى ودمدنى لأن البنيه التحتيه فى ودمدنى متأخره شويه عن جنيف والسلام .
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: فيصل عثمان الحسن)
|
Quote: ( خوتو مابناباها لكن) لكن شنو يا عصام, عاوز تبوظ سمعتى
مع اولاد اختى ,ما كفاية لعنة ابو الحسن المباريانا لى يوم
الليلة. |
انت اللعنة تفوتك تمشي وين،كلما اتذكر قصصكم انت و ياسر سعيد بتاعة "عصر" الكلب و لا لستك التركتر الداهم الناس وقت الغداء اقول "ديل شفع ديل بالله "
يا فيصل سيبك من ابو الحسن وغيرو ، البقت بقت، اما اولاد اختك ديل خليهم ساكت، انا زولى كان الصاوى ده،حامد كان مركز او مسهى فى حتات تانية
لما نتلاقى المرة الجاية بفتو ليك
| |
|
|
|
|
|
|
|
|
|
Re: رحـــبــــــوا مــعــى بالمهــندس حــامــد الصــاوى عضوا جديدا بالمنبر واضافه نوعــيه (Re: saif basheer)
|
الاعزاء المرحبين لكم كل الود و رمضان كريم
و انا اقراء هذه الترحيبات تذكرت قصة في كتاب الاستاذ شوقي بدري (حكاوي امدرمان) ولا باس بأن أحكي تلك القصة وهي ان احد ابناء امدرمان ذهب لكاتب عرض حالات لكي يكتب له قصة الظلم الذي وقع عليه و بعد ان سمع الكاتب القصة قام بكتابتها و بعد ان انتهي من الكتابة بدأ في قراءة القصة للرجل حتي يتأكد من انه لم ينسي شيء و في اثناء القرايه بدأ الرجل في البكاء و النحيب و عندما ابدي الكاتب دهشته قال له الرجل والله انا ما كنت قايل روحي مظلوم قدر ده.
و أنا بعد هذا الترحيب أقول ليكم انا ما كنت قايل روحي مهم كده ....
لكم أروع الامنيات صديق الموج,ابراهيم السمين,خالد العبيد,بهاء بكري ,عثمان مالك,عمر ادريس,سلوي صيام,أمير مساعد,اسماعيل حميم,أبوقصي ,عصام جبر الله و محمد عبدالرحمن.
| |
|
|
|
|
|
|
| |
wadalzain
Marouf Sanad
Siddig A. Omer
أبوالزفت
Omar Bob
nada ali
مبيوع
Adil Osman
nashaat elemam
Hamid Elsawi
أحمد عثمان عمر
saif basheer
elsawi
Tragie Mustafa
صديق الموج
Ibrahim_Elhag
خالد العبيد
بهاء بكري
عمر ادريس محمد
إسماعيل حميم
ABU QUSAI
محمد عبدالرحمن
hanadi yousif
Abuobaida Elmahi
فيس بوك
تويتر
انستقرام
يوتيوب
بنتيريست