|
|
 بص الثورة بالنص...وساعدونا بالفكة يا جماعة...
|
أها يا جماعة عثمان شاسيه السواق طالع من المحطة الوسطي بالسوق العربي والبص مستف والدنيا حر ولا حقين الكبري قبل ما ينزحم والناس دي زهجانة وأخلاقا ضايقة والشايل ليهو طبقين بيض في إيدو والشايل ليهو جريدة والنسوان الشايلة ليها جردل وجواهو عدة جديدة مشترياها والشايلا ليها عمود فيهو غدا ماشة بيهو السلاح الطبي..يا جماعة حجة آمنة دي شايلا القفة التقيلة دي وعندها الرطوبة ما عيب عليكم يا جماعة تخلوها واقفه ..يا ابشنب بالله أرجع لي وراء شوية وإنت هناك يا اللابس الصديري دا بالله شوالك الشايلو دا عامل لينا ضيق شوف ليهو محل ..
حجة آمنة واحد من الشباب الفيهم بركة وقف ليها .. وقعدت وبالله قبل ما تاخد نفسها فتحت باب شمارات تقيل مع البنية الجنبها ..
حجة آمنة : هيا بتي مسعولة من الخير العساكر ديل بعد السلام القالوا سووهو دا شين فايدتم
البنية : ياخالة ديل ما بحرسوا لينا البلد من أي عدو يجينا
حجة آمنة : عدو شنو البجينا .. أنا غايتو شايفة ما في ليهم لازمة بعد دا حقو يشوفو ليهم شغلة تانية بدل القعاد ساي برا مشغلة
البنية : اها يا خالة ساكت لو قامو الناس ديل رجعوا في كلامهم بتاع السلام دا نرجع تاني نفتش للعساكر عشان يحرسوا لينا البلد
وفي ونستم ديك يقوم الكمساري ينادي المعدية في نازل .. مافي زول ردا ..طوالي
أها يا جماعة المحطات ماتنسونا المحطات ولو فطينا لينا محطة ذكرونا .. الناس البدوروا الونسة كل واحد مسك الجنبو وفتح ليهو موضوع ..اما الزهجانين وقافلة معاهم الواحد فيهم تلقاهو تكل راسوا علي المقعد القدامو وضرب النوم..
المنتزه في نازل ... أيوه .. والكمساري صفر .. وعثمان شاسيه ما عارف الحاصل ليهو شنو ..قبض ليك فرامل قويه شوية .. لحدي ما الجماعة هاجوا ليك فيهو .. يا زول إنت شايل ليك فحم .. والبقول ليهو .. إنت بتتعلم في السواقة جديد وصاحبنا ما سلم من زهجة الناس .. قالوا يفرقوها فيهو .. وواحد من الشماشة منحشر في نص الناس نزل ليك .. المنتزه .. وبرضوا ما ريحوهو .. دي مواعيد منتزه .. الناس ماشة علي بيوتا .. وانت ماشي المنتزه .. وجماعتنا ناسيين إنو الشماشي دا مسكين ما عندو بيت يمشي يقيل فيهو .. ونازل يفتش ليهو ضل شجرة يتكل فيهو شويه ..
وبرجع ليكم بس يا جماعة كان فطيت لي محطة ذكروني.. ومحطتنا الجاية عشرين طبعا (قصر الشباب والأطفال)
يا جماعة البص دا أي زول بركب لازم يشاركنا في الونسة ويدفع كمان والطلبة طبعا نص التذكرة بس خلوا بطاقاتكم بره ...
أها عشرين في زول نازل .. المره شايلها عمودا ومتحركة على الباب يا جماعة أفتحوا ليها السكة والعسكري دا ظنيتوا نازل كمان وبطلوا النقة الكتيرة .. عارفين الدنيا حر وحاج عبد الله لافي عمتو وشايل عصايتو وخاتي سفتو بي مزاج وقاعد ليها جنب الشباك وما ساعل في أي زول مع المقعد والهنبريب ما ظنيتو بنزل غير آخر محطة ..البص وقف في قصر الشباب والأطفال والنازل نزل وواصل البص مسيرته ..
المحطة الجاية وين؟؟؟
المؤتمر .. في نازل .. طوالي ..
عمنا ودالعجب متحكر في المقعد الوراني وقاعد يحكي لي الشاب الجنبو أيام الإنجليز .. ويا حليل أيامهم الدنيا كانت بي خير لا في زحمة ولا حر زي دا .. العربات الكتيرة والمكيفات والحضارة الدخلت علينا دي هي البوظت البلد .. والله زمان تركب حمارك من البوستة ولي الفتيحاب .. كان في فاتحة تشيلا .. وكان عنك شغلانة تقضيها وبنزينك كلوا للمشاوير دي ربطة برسيم بي تلاتة ملالين للحمار وكمان لا في غيار زيت ولا لستك بنشر .. والعندو عشرة جنيه دا ما ساعل في صلاح إدريس وتلقاهو في بيت العرس فاسحين ليهو المجال يتكلم براهو والناس كلها تلقاها بتسمع في كلامو .. ولو مشى بيت عزاء فاتحتو مميزة .. لو عاوز تكلم ناس توتي بي خبر موت بالليل تقيف في القيفة وتكورك يا ناس توتي هوي الطيب ود عمر مات .. والغريبة بيسمعوك .. لا موباتل ولا سوداتل .. وما شفت الجواب البشيلوهو في القصبة يحومو بيهو الحلة كلها عشان يلقوا ليهم زول يقراهو ..
عمنا ودالعجب بنادي للكمساري يا ولد هوي بعدين المستشفى ماتنسى ..
الكمساري : الموردة نازل ..
البنية السمحة بت الموردة المن ما ركبت البص الناس كلها تعاين ليها بالله عايزين ياكلوها بعيونهم .. البنية قامت ولمن قالت أيوه .. بالله حتى عمنا ود العجب شهق وقطع الكلام وبقي يعاين للبنية .. لحدي مانزلت .. وهو مستاء من نزولها قال بصوت منخفض : الله يحفظك يا بتي .. والوليد الجنبو دا ما قصر قام طوالي قال : آميييييين .. الجماعة بالل بدوروا ينزلوا مع البنية وطبعا البص كلوا شيعها بالنظرات لحدي ما قطعت الشارع .. اها المحطة الجاية الدايات والراجل فيكم اليقول نازل ...
|
|
 
|
|
|
|
صديق الموج
فيس بوك
تويتر
انستقرام
يوتيوب
بنتيريست