|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
يا صديق
التحيات
شكرا يا اخي علي هذه الروائع التي تتحفنا بها.
( الحبيبته دقاقه) اثارت فيني كوامن دفينه، وقد ذكرتني جدتي رحمها الله التي كانت تدندن بها كثيرا خاصة في ( الهير) و ( خش الروب). اعادتني لايام خلت وجهجهتني تماما. مالك علي يا اخي ، نحن بلا زي ده ما حملانين!! البنقول فيه للحكومه انه ياساده نحن محتاجيين نلم تراثنا ( هنالك اشياء نعلمها نحن وحدنا ونحتاج الي جمعها) ما فيش خبير في الدنيا حا يعرفها خاصة التراث الشفاهي، ولكن طبعا الجماعه ما عندهم وقت وشغالين بدفن الليل اب كراعا بره. لكن ما يحصل إنشاء الله!
اشكرك وخليك علي اتصال
عسكوري
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
قلتا لى اثارت فيك كوامن دفينة هذه الأغنية يا عسكوري.. ما إنت براك .أتاريها عمل جنس عمل في ناس كتيرين غير مشتركين جاتني الإيملات بتاعتن.ذكرت الناس البلد وهم في السودان وبعضهم في السعودية طولوا ماسافروا وناس في النرويج وناس في امريكا.. ناس من البلد وناس من اطراف القبيلة الواسعة الشايقية وناس بديرية دهمشية..وهاك يا بكا وهاك يا دموع وهاك يارقيص وصفقة.. وناس قفلوا عليهم صالون البيت ويرقصوا كأسرة حتي الصباح.. وكمان في ناس من معجبي إيقاع الدليب عامة عملت فيهم جنس عمايل.. أنت عارف ياعسكوري الدفء الحنية الإرتباط بالمنطقة..مناسبات الأعراس الحصل حضرها الواحد في عمرو..ليالي القادرية والدراويش عندكم في (كبنة ) مثلاً و(عصمة) و(الكاب) و(الحيبة) كلها سماتها الفرح واللمة.. يمكن ناس الجزائر وبرتي وشري وشرري وسور يميلوا للطرب والرقص في الأفراح، وناس عصمة وكبنة والحيبة والسادي والسليمانية يمليوا للذكر وليالى المديح من أولاد حاج الماحي والدراويش عموماً...وكلها ليالى بي لمتها وأفراحها
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
العزيز منصورى...
انا طنبارى الهوى والهوية وفى رواية دليبى...يأثرنى ايقاع الدليب لا لشى
الا اننى نشات به وسوف اشيب عليه..رضعته مع حليب امى ولم افطم بعد...
يأخى هذا نبع اسطورى لاتكبر فيه الايام مهما ازدادت فى تعاقبها ولا يمسخ حتى
حين يكون الزمن ضاغطا....تلك مناحى عندى الان اشهى من الفردوس
وياحليل ايام... الصبح فى العرضى صلا ...ختت الضل فى كورتى جا القعود الفتو مو دا ...شفتو فى سوق التلاتا فوقو لبدى وتانى مخلا
او كما قال.
كم طربنا مع عيسى بروى فى فضاءات مركز مروى وهو يشدو بتلك الروائع
هذا تراث قادر على المشى طالما للارض دروب من تراب...وهل تهرم كلمات القلب...
واختم قولى بالصلاة مسلما ومدد يامنصورى مدد
فنحن تحاصرنا المنافى ويهددنا الغرق
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
عسكوري..كدة جبتها من الآخر...والله ماك ساهل إنتا جبتها من الآخر هى فعلاً كدة...(خمسة جنيه علوق الحاشى..تاني ام جيت بجيكم غاشي يا دهب الفرنسا الصافي.. أها أجيك انا كمان...هو صاحبها الأصلى...عريبي من عرب المناصير..ساكن بادية المناصير..(ساني) أو أبوسباع) أو الكربكان.. أو الهريوب..أو العرقوبي.. أو عربي كبانة من عرب وادي كبنه الذي قال عنه الفنان الشهير عبد الرحمن بلاص في كلمات منصورية( ود الأريل الفي وادي كبنة.. نجري ونجري لامن سال عرقنا والناس عزلوا الحلو في قصبنا) بعدين العريبي شاف البنت وقصدوا شريف طبعاً حاول يتزوجها بعد قصة تعلق طويلة وقصد شريف.. وأنتم تعلم الفوارق الطبقية حتى في مجتمعنا الشمالي.. عربي خلا منصوري برضو.. لكن غير مقبول في مجتمع البحر الناس العندهم السواقي والطين والجروف.. وقال عن ذلك حاج الماحي( عرب الرفف واهل الحلق) في مدحته..من عنا ليك وانسرق..ياام قلة دوب الحسارك لى حرق) عرب الرفف. الرفف يعني بيوتهم من البروش خيمة تسمي رفة مجموعها رفف... أهل الحلق..بفتح الحاء واللام.. حلق السواقي الحلقة الصغيرة والحلقة الكبيرة.. بعدين صاحبنا العريبي عايزين يدقوه وتطورت المسائل لغاية ما وصلت العمدة عثمان ودقمر في السلمات وفتحوا فيه قضية.. طبعاً الكلام دا قبل ما يلدونا أنا وانت ياعسكوري.. وأنا كمان ذكرتني امي رحمها الله وهي من الكبانة أصلاً.. كانت تسكن في النوي للغنم وتترنم بها وأنا ابن ست سنوات.. أها بعدين في أواخر الأربعينات الكلام دا.. بعدين العمدة غرموا خمسة جنيه ومنعوا من المرور حتي بالدرب الفوقاني للحلة.. فحب يشعر ويقول يعني خمسة جنيه علوق الحاشي أي الجمل أي لاتساوي شي حلوق الحاشي أو ضنيب الحاشي..وحاشي هو القعود..الجمل غير الكبير وحاشي ايضاً كلمة عربية فصحي...طبعاً ودنعوم وجعفر الحداد اضافوا عليها وأخرجوها من أضابير المجهول والنسيان... أنت تعلم يا عسكوري كيف ان قضايا حب مثلاً في منطقتنا من القضيايا البي تكون محرمة وممنوعة والعقاب فيها رادع جداً وقطعاً هو القتل.. أنت تعلم أن حوادث القتل تقع في اقل الأسباب في مجتمعنا.زهو مجتمع حنين وطيب ولكن لايتهاون حتي اليوم تقع حوادث القتلموش كدة حتي الفن والغناء وهو تعبير راقي لكن مجتمعنا لم يتقبله إلا قبل فترة وجيزة.. وكان يعتبر صعلكة وقلة ادب.. لا أحد ينسي فضل مدينة كريمة على مجتمعنا حيث الناس تقدر الفن وتفرق بين الصعلكة والفن وتحترم الفنان أو المادح.. الشاعر القديم على الشاعر.. أبو ابراهيم الشاعر خريج الجامعة الإسلامية شعره لم يجد رواجاً الا بعد أن ذهب الى كريمة في العشرينيات1920 ولما لحقوا أبوه عايز يجيبوا من هناك عشان يدور ساقيتو ويسوق المسور.. قال لى ابوهو بيتين شعر قال( أكان ما يقولوا المربي تربة...قعادي أنا في كريمة ولاهو غربة) وحتي الشاعر حمد ود ضقولي.. سنة سته لمان جوا الأنصار وكتلتهم والناس هربت من جيوش الأنصار الى كريمة وحمد ود ضقولي قعد هناك وشاف الحفلات والأعراس والجمال الخلاب الذي تتمتع به فتاة أو ابنة القبيلة الواسعة الشايقية.زقال يشعر( يا مشوا البقارة لى ديارنا رجعنا.. يا بقينا معاهن الشبال رشعنا.. حفيضن يضوي والشبال رشعنا.. دا حور الجني ياناس في سمعنا..حتي فنانين الحامداب الحديثين لم يجدوا الذيوع الكافي الا بعد ان ذهبوا الى كريمة... ومن عندنا عيسي بروي من شري لم يشتهر على نطاق السودان الأ بعد ان ذهب الى هناك.. وعادل السيدسليمان من شري لم يكن عنده مكانة إلا بعد ان ذهب الى كريمة وعاد .. وحتي الفنان الشهير الآن..( عبدالرحيم البركل)عبد الرحيم داطبعا معروف لديك هو من جنبكم من حلة ( العقيبة) عقيبة اللمين. الحلة القبل( عصمة) طبعاً أمو وأمي بنات خالات..وكذلك اخوه من قبل عبد الرحمن البركل.. عبد الرحمن دا ما قرا في شري..ولامن عمرو تجاوز الثلاثين قاعد في العقيبة...وقبل ذلك اخوهم احمد اخو ناس عبد الرحيم وعبد الرحمن كان صوته متفرد وأحسن منهم ولكنه ترك الغناء وتصوف.. أحمد هذا حضر النعام آدم الى عرسه بعقيبة اللمين والبلد اتلمت من مشرقا ولى مغربا.. والنعام رحمه الله كان يصرح مرارا ويقول انا خلافة الغناء اعطيتا احمدمحمد صالح.. اي اخو ناس عبد الرحيم البركل وهدي طمبوره الى أحمد.. أحمد طبعا وصل درجة رائد بالقوات المسلحة واظن تقاعد..كذلك شأن المداح عندنا عندنا منذ قديم الأزل ودي قصة تانية طويلة شوية.. المهم كل هذا يوضح لك بالرغم من اعتراف الناس بالفن ألا أن منطقتنا يادوب بدت تدخل شوية شوية هذه المسائل في حسبانها..
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
أخونا ابن النخيل.. جابتك المربوبة والله شنو.. شكرا لك على كلماتك الطيبات الراقيات.. والشعر القديم الرائع الذي ذكرته..ان شاء الله مدد الدين والدنيا يجيك واكفنا مرفوعة بالدعاء الصادق معك قلباً وقالباً..الله الله.. كورتي وفضاءات وليالى وحفلات مروي وأبدوم.. ومروي شرق ومروي وغرب.. الله الله..وكمان الدبة والزومة ومقاشي والقرير ديك عاد ما تتفات في الكلام دا.. وقوشابي ونوري والبركل والغابة وتنقاسي والمقل..والسقاي..والحفير..ومنصور كتي..وقوشابي..ونوري الجبل ونوري البلل والغريبة.. ولسه لسه.كتير. ذكراك لى فنانا عيسي بروي صاحب الصوت المتفرد.. نسأل الله له العافية وطول العمر ونرجو من ابناء المنطقة أن يزيدوا في تكريمه وتشريفه.. وغيرو وغيرو من الناس الساهموا في هذا المجال... وبرضو في المدد الروحي يا ابن النخيل يديك العافية سوف اعاود معك الحديث وياله من حديث ذو شجون عن الأفراح..جعل الله ايامك كلها افراح ياخي..
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
أخونا الموصلي.. دكتور الفن والموسيقي والأدب والتوزيع الموسيقي وصاحب التذوق الراقي..لك التحية والتقدير وسررنا والله لى مرورك بي جاي.. وفرحنا.. والله لايزال في النفس شي في زيارتك السابقة للخليج.بالرغم من أني جيت الحفل الساهر الذي اقامته على شرفكم الدكتورة البوردابية المتفردة دكتورة إيناس (زولة)اقامته بعيداً عن مستشفاها وفي ردهات أرقى المطاعم. اقامته هي وبوردابها .. بالرغم من أني جيت وشاركت بسبعة اعمال من إنشاد ومديح وغناء.. في النفس شئ لأني لم اكرر الزيارة لكم مرة اخري في ابوظبي ، وقد حاولت ذلك مراراً ولكن ظروف عملي البعيد عن ابوظبي والورديات دايماً تخذلني من لقاء الأحبة وبعض ليالي الأحباب، ولكن مكانتك في القلب عندنا كبيرة وسامية.زفهذا إعتذار المقل نحو إخوته.. أما هذا الفن يا موسيقار فن أهلك المناصير، أنت مدعو أيضاً للتنقيب فيه جولوجياً كما يفعل علماء الآثار العالميين الآن في منطقتنا وفي سباق مع الزمن لإنقاذ ما يمكن إنقاذه..واظنك ليس خالى الوفاق من فن هذه المنطقة، وأظن أن لك بعض بحث وإسهامات فيه.. ثم هذه بعض كلمات وصلتني من السودان من الأخ دكتور عجوبة.. وأنا بطبعي دايماً لا أنظر بالتفاريق وانظر على أن المنطقة واحدة والناس كلهم هنالك في هذه الرقعة من سوداننا الحبيب أهل ودم وصلة موصولة يا موصلي.. Quote: هذه الرسالة الكريمة وصلتني من استاذنا الكبير الدكتور مختار عجوبة.
الأستاذ عثمان ميرغني /تحية طيبة ....ولتقريب الصورة إليك: أقول : بأن الذي بين الشايقية والمناصير كالذي بين الجعليين والعبدلاب من أواصر واوشاج قربي- عددها دون حرج- شاعر الشايقية ومؤسس أغانيهم بضروبها المختلفة( الشاعر حسونة ) في وصفه لمعركة الدبة ، وبعد هزيمة الحلف الشايقي/المناصيري- مدح شيخ المناصير -أمانة يا نعمان ماك ولد -هد كبد القيقر رقد---وهجا شيوخ الشايقية (ود كنيش جضع المفضض)-- مصطلح الزورة لا صلة له بالتعالي العرقي -فالزورة هم البناءون من المناصير، والشايقية تعلموا منهم فن المعمار مثلما تعلموا منهم الشعر الغزلي وفن الطنبور الذي استمده الشايقية -أيضا- من المحس المراكبية--- ياحبذا لو أدلى عبد الرحمن بلاص بدلوه في هذا الصدد -صدد الفن الغنائي وأصوله في تلك المنطقة |
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
في قناة السودان يوم5/9/2005 في النشرة الثقافية..جابوا فلم مصور من اللجان الأثرية في المناصير وقالوا حتى الآن وجدنا 35موقعاً أثرياً.. والكلام لبعثات التنقيب العالمية.. وقالوا بلسان المذيع أن هذه الآثار والمومياءات البشرية سوف تعيد كتابة التاريخ في السودان كله حتى الآن لما لها من أهمية، بل وقد تعيد كتابة تاريخ ما قبل الديانات في العالم كله.. لو جينا لنقاش هادي من غير مزايدات.. لو تركونا في محلنا ماهجرونا وشافوا بديل تاني لهذه الكهرباء لتمكين مزيداً من البحث في منطقة شاسعة...ما كان أحسن.خاصة اننا أصبحنا دولة بترولية بفضل الله.. ممكن نستخرج الكهرباء عن طريق التوليد من الديزل أو الفيرنست أويل أو رواجع الزيوت..مثلاً...أو تعلية خزان سنار..أما يكفي بكاء الحلفاويين حتى الآن على حلفا..وهم يهتفون في الشوارع( حلفا دغيم ولاباريس..خشم القربة تطلع(.....) يا عبود..)
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
هذه المنطقة يبدو فعلاً مؤثره فيمن حولها من الناس حتى الآن والخلف من السلف.... زي ما ذكرت حسب الإكتشافات الأثرية فإن ذلك قولاً واحد سوف يعيد كتابة التاريخ في السودان وربما العالم.حسب التقرير الوارد من اللجان الأثرية الدولية وحسب بث النشرة الثقافية في قناة السودان بالصوت والصورة.. هذه المنطفة بها حوالي 86 جزيرة خصبة يزرع فيها اللوبيا وتربي فيها الخراف وتباع في كريمة وعطبرة ويزرع بها اللوبيا والبرسيم ويباع في كريمة ويزرع فيها الشمار شمار المناصير المعروف في ام درمان الذي بوظ اسعار الشمار التاني من جهات السودان المختلفة لأنة مروي شديد وله رائحة نفاذة قوية ومغذي ومعالج... جزيرة ترج.. جزيرة أرج.. جزيرة امري الصغيرة جزيرة امري الكبيرة.. جزيرة دماج.جزيرة تبت.. جزيرة بوني.جزيرة سور.. جزيرة شري.. جزيرة شرري.. جزيرة كدر.. جزيرة القناويت.. وغيرها..
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
ودي رسالة اخري من أعزاء ارجو أن يكون لى بعض نصيب منها..Quote: الأخ الكريم مولانا وشيخنا وبلدياتنا صديق عبدالله.. أو كما يطيب له ان يسمي نفسه صديق المنصوري ومن يكون هنالك منصوري غيره إن لم يكن هو؟حسباً ونسباً وجاهاً وعلماً ومكانة في البلد من قبل والدكم ووالدكم الذي طور المنطقة وقدم خدمات جليلة ومشى على دربه أخوكم عمر.. وبعد الكلام كثير كتير كتير. ونحن فى هذه الغربة والبلاد البعيدة....أولاً بالتبادي دا شنو العملتو فينا دا ياخي حرام عليك، لااله الاالله محمد سيدنا رسول الله..أنا وأحمد اليد على الخد والدموع تسيل وننهف ونشيل ونقش وصندوق منديل الكلينكس جنبنا والقصيدة أو الأغنية مفتوحة أمامنا اربعة خمسة ساعات بهذه الطريقة،شوية شوية المسائل هدأت..اليوم التاني جارتنا من بنات مروي أبدوم..بس سمعت الصوت من خشم باب الشقة رقيص وبكاء كمان من قبل ما تسأل دا شنو ودا منو، بعد ما اتـفشت، قعدت.قالت دا منو ودا شنو،هى تجيد الرقيص على انغام الدليب بصورة لم اشهدها حتى في حفلات البلد، ولكنها لاترقص في الحفلات رفضت ترقص حتى في عرس أخوها، وهى حاجة مثلى 3مرات ..إنطباعها قالت بأمانه الأغنية عالجتني وروحنتني، قالت لى ولدكم دا بي صوتا دا مالو ما ظهر من زمان في التلفزيون.دا صوت غير عادي تماماً...قلت ليها يامة دا ولد شيوخ لايأكل من عداد الغناء.. وأبوهو زمان بفتكروا ملك وليس انسان.. ولو عرف انو بغني.ابوهو كان إنشقا كررر..قلت لها هو صوتو متفرد وطلع حفلات تلاتة اربعة مرات وتوقف وهو طالب في أولى ثانوي.. قلت لها اثنى عليه حسن الدابي ولم يفلح في جره لساحة الغناء.. صديق انا كمتخصصه صوت اعرف ابعاد صوتك وهي مساحة شاسعة ومترادفة فأرجوك حاول اجمع تراث هذه المنطقة.. أنا عارفاك لاتتكلم في السياسة كثيراً ولاتحب تأذى أحد مهما كان.وانت تنصف عدوك قبل صديقك..حتي اذا نقدت نقدك هادي.. أنت قلت لى في رسالتك السابقة لاتحب أن تغني.. ولكن هنا المسألة تختلف أنت أمام تراث اهلك وجامع التراث يجب ان يكون محايد ويقولو زي ماهو..زي الناس البي ينقبوا جيلوجيا في منطقتنا اي شى يجدوه ينثروه وهذه أمانة العلم..حكت لى مريم حكاية ونحن طبعاً غير معاصرين ليكم....دا موش معناها انتو كبار.. قالت كانت هنالك حفلة عرس وفي واحد من الفنانين الكبار جدا في المنطقة وكانت وقتها أغنية( الناسينا حبك في ربيع دنيانا شال نور) وكان الجمهور يرغم الفنان على غناها، وكان هذا الفنان الكبير مافي داعى لذكر الإسم كان ماعايز يغنيها... لأنو سلالم صوتو وتوقيع الطمبور ساعتها يختلف مع صوته.. خاصة عندما يجي للمقطع البيقول...بطراااك لمان الساقية التسوق فجراوي تتحسر..نواحا يزيد قليبي بكا وتقل لى بلاهو ما بتقدر...بطراك يوم قمحنا سنابلو لونا بيتقلب اصفر...ابكي على الديون الفوقي والغير في الحصاد فكر..بطراك لمان الشخلوب يخاف لصبيطو تتبعثر تضمو عليها بي تحنان حنان الأم كمان واكثر...عرف أن هذا الفنان إستنقذ بك لتأديها معه مشاركة... هي تشبه كلمات السر عثمان الطيب لكن الزمن طال والله ماعارفاها كلمات منو.. أنت في رسالتك السابقة قلتا لى هل يمكن ان انشر بعض رسايلك تحت باب هذه الأغنية.. واستأذنت مني. وأنا أقول.أنت بطبعك مهذب وياما الناس تنشر بغير استئذان...هذا كلام عادي ويمكن يقال في اي جريدة سيارة واذنك معاك...بأمانة انت اى شى تمسكوا تجضمو..كان مديح كان غناء كان كتابة. كان شعركان معاملة إنسانية رفيعة... ونختم بكلام ابن النخيل مدد يا شيخ صديق مدد.. أختكم دكتورة سامية..
|
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
الاخ صديق
ازيك واعلّك عافي
صدقني ما تقوم به عمل رائع وكبير ومقدر وارجو ان نسمع اخريات خاصة ( ليلنا الله اليل) وغيرها من تراثنا الذي تتامر الانقاذ علي دفنه حتي فبل ان يسمعه السودنيون.
اثارت فيني ايضا قصه الشمار وزراعته الكثير من الحزن والاسي وتذكرت كيف يصارع اهلنا الجلاميد من الصخور ليتنجوا الشمار وهم في صراعهم الطويل لا يشكون ولا يتراخون ولا يكلّون. وقد اتاحت لي حياتي الدراسيه والعمليه زيارة ( تقريبا) كل نواحي السودان ومناطقه، وغيض لي الله ايضا ان ازور العديد من البلدان في افريفيا وغيرها، لذلك اصبحت لديّ قناعه راسخه ان تلك الارض لا يمكن لقوم اخرون ان ينتجوا منها ما ينتجه اهلنا الان. ولو تستغل الارض في السودان بالصوره التي يستغل بها اهلنا ( حجارتهم وصخورهم) لاصبح السودان اغني بلاد الدنيا. فواقع الحال يقول اننا ننتج من الصخور محاصيل زراعيه ، حتي يكاد اهلنا ان يهزموا الفهم الثابت عن مقومات الزراعه التي تبداء بالارض الصالحه للزراعه وهي معدومه عندنا...
كتبت قصيد طويله بالانجليزيه عن صراع اهلنا مع الصخور وعن البئه متناهية القسوه ، وحاولت فيها ان افول ان الحجاره مهمه للغايه ويمكن للانسان ان يعيش ويعتمد عليها بل يستنبتها. فنحن قوم كما تعرف – ودون كل شعوب الارض نزرع ضمن ما نزع من محصولات – الحجاره نفسها . كما يوظفها اهلنا بصوره لا توجد عند اي قوم اخرين ...
كتبت القصيده وهي خليط بالانجليزيه بين النثر والشعر كرد علي احد وزراء الانقاذ الذي شتم ارضنا بدون سبب، وهو للاسف لم يرها في عمره ( والرجل من الخرطوم) ولا اعتقد انه قد زار حتي مدني في حياته وربما يكون قد زار لندن ودبي كثيرا ولكن لا اعتقد انه زار واحد او اثنين من اقاليم السودان، ولكنه بدلا من الاشاده باهلنا وتضحيتهم وصبرهم ومكابدتهم للحياه ذهب ليشتم ارضنا في محاوله سقيمه لتبرير فكرة الخزان. وقد حاولت في قصيدتي ان ابيّن له ولغيره مدي عمق ارتباطنا بارضنا وهو ما يجهله الرجل...
القصيده كتبتها قبل عامين وارجو ان اتمكن من نشرها هنا كهديه للاخ بكري ولاعضاء المنبر علي دعمهم لقضية المتثرين بالخزان.
مره اخري اشكرك واعيد عليك حديث الدكتوره ساميه لتنهض بما تقوم به من عمل رائع...
لك شكري عسكوري
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
عسكوري.. تعيش يا بلد وياقريب.. نشوف قصيدتك واسهاماتك متى ما توفرت..لك الشكر الكتير ..أما بخصوص كلام دكتورة سامية، فجمع التراث عمل كبير يحتاج لتضافر المهتمين كلهم.التراث الغنائي الثقافي الإجتماعي.. الفنون. البحث الجيلوجي البحث الإقتصادي..التكوين الفطري. الصفات المشرجة المشتركة..السمات الغالبة..التاريخ التطور النموء التواصل.. وقد كانت هنالك اسهامات منذ زمن سحيق.منهم خواجات في رحلات نيلية وباحثون وطنيون..وقد قرأت لهم كتاباتهم عن انسان هذه المنطقة... أختنا نهال كرار.. تحية الود والتقدير.. غايتو ابوك يا باحث يا من هذه المنطقة.. قلت ليك زمان الناس تناقش الحاجات دي بالبروفايل. لكن تقول شنو؟ يا أخت بكري وقفوا لإستغلال الناس له... ان شاء الله يكون فيكم عرق مناصير.. اسم كرار دا زاتو ما غريب علينا في المنطقة.. كتير كتير..بل في قرية تسمي الكوارير.. وناس تانيين كتيرين.. حمد ود ضقولى شاعر فذ.. وابناءه آخرهم توفي في الثمانينات.. وهو توفي في بواكير هذا القرن.. أبناءه عمرو شديد.منهم عثمان ودحمد ضقولي.. ومحمد خير حمد ضقولي ونعمان حمد ضقولي.. بقيت بنته الزينة مد الله في عمرها وهى إمرأة صالحة ولية من أولياء الله عندي..معظم شعره ضاع بالرغم من جودته وتربطنا به قرابة عمومة.. نقرأ لك كثيرا يا نهال وانت عضوة حديثة الإرتباط هنا لكن مجهوداتك وكتاباتك فاقت أعضاء قدامي لك الشكر على هذا المجهود الرائع سواء اختلفنا او اتفقنا احيانا.. بس كدي عرفيني بي قصة ابوك دا الشمار كتلني يا أستاذة..
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
الله.. الله.. يا نهال.. أتاريني قلتا البت البي تجضم الناس هنا دي منو؟ لازم دي منصورية.. دي شجاعة المناصير والله..هو موش تجضيم لكن كلام واضح وصدق.وصبر وطولة بال على الذين يخالفونك الراي..إنت عارفة المناصير ديل نحن ما بنحمل فيهم كلو كلو..ديل أهل تقيلة... اها ياعسكوري ويا ود الباوقة ويا عبد الله ويا ابن النخيل ويا الحليلة ويا القرير.. ويا الشايقي ويا غيرو وغيرو وغيرو..من الليلة دي اي كلام تقولو نهال دي صاح.. نوريك الفنجرة..حتي لو غلط برضو صاح.. وحجتي معاى، وإذا سالني واحد من أهل العلم واليقين بقول ليهو ايوه صاح كلامها صاح( لأنو مافي باطل في الوجود) دا على اقل تقدير.. وكمان صداقاتك في المنبر مع أختنا بت الأحفاد سررنا بيها، موش لشى لكن لأنها إمرأة جادة وصادقة.إذا اتفقت معاك الله أداك وإذا اختلفت معاك تحترم رايك. ودايما تختم كلامها بي لااله إلا الله محمد رسول الله في امان الله.. احسن من كدة وين..أول الناس لو كلهم متفقين وعلى قلب رجل واحد كان الحياة دي مشت تمام.لكن الإختلاف لابد يجي شوية شوية الناس تمشى لى مرحلة متقدمة.. والحديث يقول( إن لم تخطئوا وتستغفروا سيأتي الله بقوم يخطئون ويستغفرون فيغفر لهم).وبعدين الأخت بنت الأحفاد دايماً تعمل بوستات للمساهمة في كذا.. ومساعدة كذا وجمع مساهمات خيرية لكذا... وتصبر على أذى الناس المعاندين في البورد دا.. وما زي البنات البي تقول خلاص يا جماعة البورد دا كلام فارغ دي نهاية تعاملى معاهو..لا تثور وتصبر وتظل تواصل على أمل إصلاح الخطأ.. وتعليم الناس إنو المرأة موش قارورة.. هي مفكرة وعالمة وصاحبة حجة وصاحبة قضية ومنطق..شوفي هسه البوست بتاعها دا الإعتذرت فيهو لهوبفل بكل صدق وشجاعة وصراحة إعتذرت دجي رجال ليهم شنبات هنا ما بيعملوها.زيقيفوا مع نفسهم ومع غرورهم.. لكن هي شوفي شجاعتها إعتذرت على رؤوس الأشهاد.. أنت عارفة حكاية اي كلام تقوليه صاح دي زي حكاية الهدندوي بتاع الشرق في النكته..اللوري كان ماشي سريع وقلب الناس وماتوا، وطلع سالم واحد عربي. سواق اللوري جاهو قال ليهو.. ادروب اسمع.بكرة بي يعملوا لينا محكمة وحا يجيبوك شاهد..أنا حا أديك مئة جنيه الكلام دا كان في الستينات.. انت تعرفي ثلث قبيلة المناصير في كسلا والسواقي ووقر وغيرا...أها الهدندوي قال للسواق. إنتا تجيب مائة جنيه.اقول للقاضى ( اللوري دا كان واقف واتقلب) لاماشي ولا حاجة...؟ بكرة جوا عند القاضي. طبعاً قبل ما تقول اي كلمة القاضي بي يطلع ليك المصحف، أقول الحق ولاشي غير الحق.. الهدندوي خاف وطبعاً أهلنا الهدندوة يحبوا المصحف لدرجة التقديس.. الراجل قال: لا لا مصحف أعوذ بالله.. اصبر أصبر يا هضرة القاضي..خليني ادى السواق دا المائة جنيه بتاعو بعدين احلف صادق.. القاضي عرف والسواق اتفضح... أها الهدندوي بدأ يتكلم..( يا هضرة القاضى، اللوري دا كان ماشى بسرعة إنتا ذاتو ما بتقدر تتخيلو.. أنا أقولك نهنا ماشين قريب هط السكة حديد. عمود بتاع تلفون تشوف.. التاني ماتشوف.. شجر النيم تشوف زي الجرجير.. الله أعلم اللوري دا كان ما اتقلب في سنكات كان توش راه يدخل في البحر في بورسودان مافي شى يوقفوا.... أها يا جماعة ورابطة اصدقاء المناصير بالمنبر البت دي بتنا من الليلة ونحنا بناتنا ما بنلعب فيهن.. لأنهن شويات وغاليات ونادرات ويناطحن الحجر. دحين من يوم الليلة دي أي كلام تقولوا نهال دي صاح وكان ماصاح صاح... طبعاً يا استاذة نهال يا ريت الوالد لو عندو حاجة من التراث او كتب يساهم معانا ونحنا تراثنا غالي ونادر.. اقول ليك والله امس هاتفني رجل نادر صادق باحث من أمريكا ساعدته الظروف أن يجمع شى كثير من تراث المناصير اسمه عبد الرحيم محمد صالح. قعد مخصوص في المناصير قبل مدة ولاقي أهلنا وجمه بالكتابة والتصوير والتسجيل.. بل صار معجب بالمناصير حتي النخاع.. سوف أكتب عنه وعن ما جمعه، يحدثني عن البلد بصورة تفصيلية اذهلتني تماماً..بالجد فلته.زسوف اكتب باسهاب.. ليصير ذلك مشروع كتاب كبير عن تاريخ المناصير.زكما كتب هو ايضا كتابين عن المناصير باللغة الإنجليزية... ويا عسكوري أظك تعرفوا.. هو التقي بمعظم ابناءنا في الخرطوم.. وهو برضو زول شمالية عشان كدة كتب بمعرفة دقيقة وصادقة.ز الكلمات كانت تخرج صادقة حارة من فيه وهو يكالمني عبر الهاتف ياله من رجل.هو بيفتكر هسه حقة نهتم بالتراث بدرجة أولى دا الواجب المباشر الآن.. قلتا ليك يا بنتنا نهال.. طبعاً خلاص طالما عرفنا انك بنتنا دا كافي وانا لا أطالبك بمعلومات زيادة في المنبر. ربما كان الإسم مختصر عندك.. وهذا من حقك.. لكن اكيد ابوك بيعرفنا.. وطالما قلتي ينشرح لشعر حمد ود ضقولي معناهو دا من اهلنا.. ناس كرار ديل متزوجين بت عمتنا جارة الخير وهي والدة المقدم عز الدين..وتاني متزوجين في كسلا زهرة.. وتاني ناس أم الحسن بت كرار..هذا من الكرارير من جهتنا. أما الكرارير من جهة زوجتي.. ديل ناس كرار بتاع الكرارير جنب حلة السجني.. وتاني ناس كرار بتاعين وقر وناس شاويش محمد حمد باشا.. وناس كرار احمودة في شري.. واقربانا في الكاب من جهة ابونا.. ناس على كرار وعلى كرار..ديل اهلنا..المهم كلهم ناس يملوا العين نامن تفضل..وناس محمد عثمان كرار ديل من جزيرة سور برضو.. الله يديهم حظ ويديك من كلمة كرار دي. وكرار هو أحد الغاب سيدنا على رضى الله عنه..وارضاه.. طيب نرجع لموضوعنا الأساسي وهو جمع التراث من غير ما نتطاول على احد او نشتم احد.. أو نسيس الموضوع والبي يختازوا لينا ربنا كلو كويس.. ودي قسمتنا ودا قدرنا والله موجود.. والخيار المحلي موجود بعد الناس يخادوا حقوقن ممكن يعمروا المنطقة وما راح تغرق كلها. وهسه البترول ظهر عندنا في منطقة الدغفيلي .. وجبالنا طلعت ذهب ومعادن في صحراء العتمور.. والخير جاي..الصبر الصبر وطولة البال والهداوة..نحن هنا ناس جمع تراث.. يا نهال .بعدين برضو تراثنا الديني اهم شى..الفقرة والدقيساب.. والفريعاب.. وقباب الأولياء.. زول جمع التراث لازم يكون محايد..وليس بحكم.زحتي اختلفت الشياء مع قناعاتو لازم يجمعا غذا كان ما بتضر بغرض معين...سلام وتحايا للوالد..الى أن نلتقي.. والبلد اظنكم نازحين منها يعني تمشوا وتجوها زينا كدة... خير ختام سلام تقدير ومحبة وإخلاص..زادك الله من علمه الواسع. اخوك صديق عبدالله على ابوحنة المنصوري..
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
الأستاذ منصوري تحياتي
Quote: من الليلة دي اي كلام تقولو نهال دي صاح.. نوريك الفنجرة..حتي لو غلط برضو صاح.. وحجتي معاى، وإذا سالني واحد من أهل العلم واليقين بقول ليهو ايوه صاح كلامها صاح( لأنو مافي باطل في الوجود) دا على اقل تقدير.. |
أنا بعد دا بقى عندي ضهر قوي
Quote: وكمان صداقاتك في المنبر مع أختنا بت الأحفاد سررنا بيها، موش لشى لكن لأنها إمرأة جادة وصادقة.إذا اتفقت معاك الله أداك وإذا اختلفت معاك تحترم رايك. ودايما تختم كلامها بي لااله إلا الله محمد رسول الله في امان الله.. احسن من كدة وين..أول الناس لو كلهم متفقين وعلى قلب رجل واحد كان الحياة دي مشت تمام.لكن الإختلاف لابد يجي شوية شوية الناس تمشى لى مرحلة متقدمة.. والحديث يقول( إن لم تخطئوا وتستغفروا سيأتي الله بقوم يخطئون ويستغفرون فيغفر لهم).وبعدين الأخت بنت الأحفاد دايماً تعمل بوستات للمساهمة في كذا.. ومساعدة كذا وجمع مساهمات خيرية لكذا... وتصبر على أذى الناس المعاندين في البورد دا.. وما زي البنات البي تقول خلاص يا جماعة البورد دا كلام فارغ دي نهاية تعاملى معاهو..لا تثور وتصبر وتظل تواصل على أمل إصلاح الخطأ.. وتعليم الناس إنو المرأة موش قارورة.. هي مفكرة وعالمة وصاحبة حجة وصاحبة قضية ومنطق..شوفي هسه البوست بتاعها دا الإعتذرت فيهو لهوبفل بكل صدق وشجاعة وصراحة إعتذرت دجي رجال ليهم شنبات هنا ما بيعملوها.زيقيفوا مع نفسهم ومع غرورهم.. لكن هي شوفي شجاعتها إعتذرت على رؤوس الأشهاد.. |
ياسلاااااام , وينك يا بت الأحفاد تعالي أقري الكلام دا حقيقة كل كلمة كلتها صاح , بت الأحفاد انسانة رائعة بمعنى الكلمة
Quote: أها يا جماعة ورابطة اصدقاء المناصير بالمنبر البت دي بتنا من الليلة ونحنا بناتنا ما بنلعب فيهن.. لأنهن شويات وغاليات ونادرات ويناطحن الحجر. دحين من يوم الليلة دي أي كلام تقولوا نهال دي صاح وكان ماصاح صاح... |
Quote: طبعاً يا استاذة نهال يا ريت الوالد لو عندو حاجة من التراث او كتب يساهم معانا ونحنا تراثنا غالي ونادر. |
أكيد , إن شاءالله
Quote: طبعاً خلاص طالما عرفنا انك بنتنا دا كافي وانا لا أطالبك بمعلومات زيادة في المنبر. |
زمان كنت بقول لي أبوي , ليه المناصير كلهم بعرفوا بعض !!! بعكس كل القبايل التانية هسي بديت أعرف السبب , نحن قبيلة صغيرة جدا جدا جدا لدرجة انك بتعرف اهلي تماما
ولو كان في مسنجر داخلي لكنت شرحت أكتر وحددت
Quote: سلام وتحايا للوالد..الى أن نلتقي.. والبلد اظنكم نازحين منها يعني تمشوا وتجوها زينا كدة... خير ختام سلام تقدير ومحبة وإخلاص..زادك الله من علمه الواسع |
ووالدي أيضا يرسل لك سلامه وتحياته
ولك كل الإحترام والتقدير
| |
|
|
|
|
|
|
Re: كدي أسمعوا الأغنيةدي من تراث المنـاصيرالقديم قبل ماتغرق في بحيرةسدمروي(الحامداب) (Re: منصوري)
|
الباحث الجامعي الأستاذ عبد الرحيم محمد صالح.الذي سجل كتاباته من المناصير وعن المناصير وجاب المنطقة زهاء العام والنصف وزار عربها ووديانها يقول : وجدت من الوثائق ما يؤكد توكيداً وتأكيداً جازماً أن هذه المنطقة مؤثرة فيمن حولها بصورة واضحة.. ومظلومة في تاريخها ظلم الحسن والحسين وذلك بفعل فاعل وهو الأتراك والإنجليز... وقد إكتشف هذا الباحث الهمام هذا قبل أن تكتشفه البعثات الأثرية الآن.. هذه المنطقة مسروقة الأشعار..مسروقة التراث.. مسروقةالتاريخ ولكن حصحص الحق الآن..إطمئن عليه شيوخ المناصير أمثال (ودكرم الله) في قرية برتي.. وأعطوه النسخ الأصلية مخطوطة عن صلح المناصير والحسانية.. ومخطوطات بيع أراضي وفيافي وقطع زراعية وبعض السيوف الشهيرة في المعارك التاريخية.. ووصاهم على باقي المغتنيات والممتلكات الأثمن من ذلك أن لايعطوها لأى حد ولو بذهب الدنيا كله..نتمني أن تؤخذ للمتحف القومي السوداني بعد كتابات نبذ عنها... من ضمن الوثائق المدونة مع الأخ الأستاذ الباحث عبد الرحيم محمد صالح..( أن مائة وخمسين فارساً مسلحاً من المناصير صدوا كتيبة النهر البريطانية المشهورة في الفتح الثنائى ورجعت القهقري وكبدوها خسائر فادحة في الأرواح ولم تتماسك هذه الكتيبة إلا بعد أن عادت وعززت دفاعاتها وحرقت معظم قري المناصير بعد ان فر معظم السكان والمجاهدين واشتغلوا معهم حرب عصابات فعلت في الإنجليز الأفاعيل التي ترسخت في ذهنم.. وبعد أن حكم الإنجليز السودان.. صدر قرار من الحاكم العام البريطاني كردة فعل.. يمنع اي منصوري من التعيين في الكلية الحربية ولا جيش السودان ولا الشرطة.. ويمنع من العمل في السكة حديد منعاً باتاً.. ولم تفك هذه القرارات إلا بعد وساطات مستميتة من بعض كبار شيوخ الجعليين وبعض الوظائف القيادية في الدولة سنة 1940م..لقد جاب الأستاذ الجامعي الباحث عبد الرحيم محمد صالح بعربته الخاصة.. وأجر الجمال والدواب لقطع الفيافي الصعبة لتكميل مهمته الصعبة والشاقة..له من أهله المناصير كل تقدير ولم من تاريخنا سنامه وذروته على هذا البحث القيم .
| |
|
|
|
|
|
|
|