|
|
|
 Re: الفكي احم ود عبدالملك يرثي الشريف عبدالله ودالريح (Re: زول ساكت)
|
مو منان ابو امنه الشريف وعفيف وخصب الساحه عبدالله الخريف والصيف
هيلا اب قدحاً سبيل للضيف
ياسابل الستر انت الحليم ولطيف وياواسع الرحاب عبدالله جاك ضعيف
قابلو بالكرم كلن عادتو يقري الضيف واقريه شهود زاتاً بلا تكييف
هيلا اب قدحاً سبيل للضيف
أمن روعو من هولاً مهيل ومخفيك وشرفو في جوارك غاية التشريف
سموك الكريم ضافك كريم وشريف واعطيه في الجنان حد العطا مايقيف
هيلا اب قدحاً سبيل للضيف
بيت الجود مصرف بالسخا مزروب وبذلاً بالوفر ماهو اللفا داب دوب
فيه كم حلّ شبكه وكم اغاث مكروب وفيه كم ريح الطالب من المطلوب
هيلا اب قدحاً سبيل للضيف
سجادة الشرف كرسي الكرم منصوب من الشوبلي للريح ود يعقوب
أحيا السكه عبدالله حجا المرقوب ودور قهوتو والشاي يجول بالكوب
هيلا اب قدحاً سبيل للضيف
من قومة الجهل عاقل شجيع واصم جاموس الوعر الشمّ ريحة الدم
يلزمني اليمين وعلي طلاق حرّم عن موجب العروض ابوامنه مابنضم
هيلا اب قدحاً سبيل للضيف
كوفية الكرم لاويها عمه وشال وحملك كان تقيل يابوامنه مابنشال
يالعد الروي المابقطفو النشال دابي ابكيده كرّ وفي الضرايب شال
هيلا اب قدحاً سبيل للضيف
مطروح الجبين لوبكش ولو كشار وجبارة الضعيف للقلبو خاف بشار
مونتات بي قعلو موفشار ومات فحل الهدوده وماصع ام بشار
هيلا اب قدحاً سبيل للضيف
ضيفان الالوف ماهمو لي بالو مورياد سعيتو ومو حبيب مالو
صارف همو في عرضو وستر حالو وقاسي اقروب نعالو الجلّ فصالو
هيلا اب قدحاً سبيل للضيف
ذي حاتم كريم زي ابن ابي صفر ويزيد والمهلب ونحرو بالشفره
جيداً كان يجود بالبيضا والصفرا وكان سوايا ايدو الكل خصيم ضافرا
هيلا اب قدحاً سبيل للضيف
فاق جيل الزمن خات بالو في يحي واولادو التلاته ومعنى ذو النهيه
كان في ايام حياتو الدنيا مزدهيه والمات في صنوف الجود عبدالله احياه
هيلا اب قدحاً سبيل للضيف
ياعرابة الزمن فعلك سمح محسون ولبنك كان كتير معدس مومسمون
كم ربيت يتامى وكم مليتا بطون وكم كسيت عرايا وكم طفيتا فتون
هيلا اب قدحاً سبيل للضيف
للضيفان فراشو اكليم وسجاده وشراب البن حرفتو وليهو صار عاده
علوق الدواب والعضره بي زياده وكل صبحاً جديد في السمته بتمادى
هيلا اب قدحاً سبيل للضيف
للضيفان يلاقي وتانيه يقدم ومتواضع بايدو يخدم ويخدّم
للعسرات يقيل الجاهو متندم وكم عمّر بناياً كان متهدم
هيلا اب قدحاً سبيل للضيف
حكم السيد رضا لاحولا لاقوه وحار فقد الشريف جرح الفؤاد جوه
كان طبخو القدور مو حليله موطوه وفانوسنا انطفأ واحمد يعيش ضوا
هيلا اب قدحاً سبيل للضيف
حار فقد الشريف اسقمنا وامرضنا وكدر عيشنا وفي الدنيا بغضنا
سلمنا الامر لله فوضنا ويتبارك شقيقو الفيهو عوضنا
هيلا اب قدحاً سبيل للضيف
يجبر كسرنا رب العباد الحي وبي الاشراف عموم والهندي سمح الزي
ياسليمان دسيسنا ياابن عبدالحي داركم عامره ديمه ان شاء الله يابن قصي
هيلا اب قدحاً سبيل للضيف
خدام جدكم عبدالملك اسمو خالد حبكم قلبو وضنا جسمو
قولوا مننا فوقو العرج وسمو دنيا وآخره حملو اتساعدو اتقسمو
هيلا اب قدحاً سبيل للضيف
رضوان الاله يملا الضريح نورو ومسك الرحمه فاح انشمّ كافورو
اغفر سيئات كل اليجي يزورو وفي الفردوس هناك شامخات علا قصورو
هيلا اب قدحاً سبيل للضيف
| |
 
|
|
|
|
|
|
|
|
Re: الفكي احم ود عبدالملك يرثي الشريف عبدالله ودالريح (Re: زول ساكت)
|
الفكي احمد ود عبدالملك
كان عليه رحمات ربي وبركاته من اساطين شعراء المديح في السودان
بل كان بيته بيت شعر
فزوجته ام برعه بت ود الفحل المشهوره صاحبة اغنية الشيخ سيرو
وابنه الشاعر عباس عبدالملك شاعر المديح والغناء والسياسه
ومما يجدر ذكره هنا ان الشريف يوسف الهندي المعروف بشعره الرصين وحبه للشعراء
قال لعباس عبدالملك
عايز اعرف شعرك دا جايبو من جاوي وجاي ولا انت شاعر صمميم
وطلب مجاراته فكان الشريف يقول المقطع ويرد عباس بنفس القافيه مع الالتزام بما لايلزم
فما كان من الشريف ان قال له انت ماك خاتي كان ابوك الصقر وامك الحديه في اشاره الي والديه الفكي احمد وام برعه
| |
|
|
|
|
|
|
|
|
|
Re: الفكي احم ود عبدالملك يرثي الشريف عبدالله ودالريح (Re: زول ساكت)
|
الزول العزيز
الزول الما ساكت
أول حاجة وقبل ما ننضم فى الشعر
تعرف أنا إتفاجأت والخلعة كتلتنى عديل
عارف ليه
لأنى لقيتك بتتكلم عن أهلى
عن ناس بيتنا عديل
تعرف "أم برعة بت الفحل" دى
تطلع فى الحساب حبوبتى
ما جيهة الوالد ومن جيهة الوالدة
أما الفكى ود أحمد فهو جدى
وأولاده، عثمان، هو زوج عمتى شقيقة الوالد
والصديق وأحمد وعلى هم أعمامى
وهى طبعا من منطقة ودراوة، وتحديدا من "السيال" وهو موطن أهل الوالد
والسيال دى الناس بقو يقولو ليها "سيال أم برعه"
بعدين أنا ما عارف ما انتبهت للبوست ده
الزحمة كتيرة جدا والله، ويا دوبك الزول يقدر يكتب ويرد
ولينا قعدة طويلة تانى
| |
|
|
|
|
|
|
|
|
|
Re: الفكي احم ود عبدالملك يرثي الشريف عبدالله ودالريح (Re: زول ساكت)
|
اليكم القصيده بعد ان قام استاذنا الفاضل ود قاسم بتشكيل حروفها مما يسهل على الكثيرين من الذين لم يعتادوا على هذا اللون من الشعر فهم مفرداتها فله مني اسمى ايات الشكر والعرفان والتقدير
مو منّان أبو آمنه الشريف وعفيف
وخصب الساحه عبدالله الخريف والصيف
هيلا اب قدحاً سبيل للضيف
ياسابل السِّتِر انت الحليم ولطيف
وياواسع الرِّحاب عبدالله جاكَ ضعيف
قابلو بي الكرم كان عادتو يقري الضيف
واقريه شهود زاتاً بلا تكييف
هيلا اب قدحاً سبيل للضيف
أمِّن روعو من هولاً مُهيل ومخيف
وشَرِّفو في جوارك غاية التشريف
سموك الكريم ضيفك كريم وشريف
واعطيه في الحنان حد العطا مايقيف
هيلا اب قدحاً سبيل للضيف
بيت الجود مَصَرّف بي السخا ومزروب
وبذلاً بي الوَفِر ماهو اللَّفَا داب دوب
فيه كم حلّ شِبْكَه وكم أغاث مكروب
وفيه كم رَيَّح الطالب من المطلوب
هيلا اب قدحاً سبيل للضيف
سجادة الشرف كرسي الكرم منصوب
من الشُوبَلي لي الرَيَّح ود يعقوب
أحيا السكة عبدالله حجا المرقوب
ودَوّر قَهَوْتُو والشاي يجول بالكوب
هيلا اب قدحاً سبيل للضيف
من قومة الجهل عاقل شجيع وأصم
جاموس الوعر الشّمََّ ريحةَ الدم
يلزمني اليمين وعلي طلاق حرّم
عن موجب العروض ابوامنه مابِنْضَم
هيلا اب قدحاً سبيل للضيف
كوفية الكرم لاويها عمه وشال
وحِملك كان تقيل يابوامنه مابِنْشال
ياالعِدْ الرَّوَى المابِقْطُفو النّشّال
دابي اب كيده كرَّ وفي الضرايب شال
هيلا اب قدحاً سبيل للضيف
مطروح الجبين لا بيكِش ولو كشار
وجُبَارةْ الضعيف لي القَلْبُو خاف بشّار
مو نتّات بي فِعْلُو مو فَشّار
ومات فحل الهدودوه وماصع ام بشار
هيلا اب قدحاً سبيل للضيف
ضيفان الالوف ماهَمّو لي بالو
مو ريَاد سَعِيْتُو ومو حبيب مالو
صارف هَمُّو فوق عرضو وسِتِر حالو
وقاسي اقروب نعالو الجلّ فَصّالو
هيلا اب قدحاً سبيل للضيف
ذي حاتم كريم زي ابن ابي صفرة
ويزيد والمهلب ونحرو بي الشفره
جِيداً كان يجود بالبيضا والصفرا
وكان سوّايا ايدو لي كل خصيم ضافرا
هيلا اب قدحاً سبيل للضيف
فاق جيل الزمن خات بالو في يحي
واولادو التلاته ومعنى ذو النهيه
كان في ايام حياتو الدنيا مزدهيه
والمات في صنوف الجود عبدالله احياه
هيلا اب قدحاً سبيل للضيف
ياعرابة الزمن فعلك سمح محسون
ولبنك كان كتير معدس مو مسمون
كم ربيت يتامى وكم مليتا بطون
وكم كسيت عرايا وكم طفيتا فتون
هيلا اب قدحاً سبيل للضيف
للضيفان فراشو اكليم وسجاده
وشراب اللبن حرفتو وليهو صار عاده
علوق الدواب والعضره بي زياده
وكل صبحاً جديد في السّمْته بتمادى
هيلا اب قدحاً سبيل للضيف
للضيفان يلاقي وتانيه يتقدم
ومتواضع بايدو يخدم ويخدّم
للعسرات يقيل الجاهو متندم
وكم عمّر بناياً كان متهدم
هيلا اب قدحاً سبيل للضيف
حكم السيد رضا لاحولا لاقوه
وحار فقد الشريف جرح الفؤاد جُوّه
كان طبخو القدور مو حليله مو طوه
وفانوسنا انطفأ واحمد يعيش ضوا
هيلا اب قدحاً سبيل للضيف
حار فقد الشريف اسقمنا وامرضنا
وكدّر عيشنا وفي الدنيا بَغّضنا
سلمنا الامر لله فوضنا
ويتبارك شقيقو الفيهو عَوّضنا
هيلا اب قدحاً سبيل للضيف
يجبر كسرنا رب العباد الحي
وبي الاشراف عموم والهندي سمح الزي
ياسليمان دسيسنا ياابن عبدالحي
داركم عامره ديمه ان شاء الله يابن قصي
هيلا اب قدحاً سبيل للضيف
خدام جدكم عبدالملك اسمو
خالد حبكم قلبو وضنا جسمو
قولوا منّنا فوقو العرج وسمو
دنيا وآخره حملو اتساعدو اتقسمو
هيلا اب قدحاً سبيل للضيف
رضوان الاله يملا الضريح نورو
ومسك الرحمه فاح انشمّ كافورو
اغفر سيئات كلّ اليجي يزورو
وفي الفردوس هناك شامخات عُلا قصورو
هيلا اب قدحاً سبيل للضيف
| |
|
|
|
|
|
|
|
|
|
Re: الفكي احم ود عبدالملك يرثي الشريف عبدالله ودالريح (Re: زول ساكت)
|
إذن الشعر ( تركة ) يا أبوذر ، المسألة ليست ركوب سرجا ليس لك ! والله عجيب ،،، ولماذا تسكت على كل هذا الجمال والكرم والأصالة ،،، لماذا تريدنا أن نتعامل معك هكذا بكل عادية الأشياء ، وإنت أتاريك حبوبتك أم برعة بت الفحل وجدك أحمد و عبد الملك ؟
حقيقة القصيدة ترقى إلى أن تكون من عيون الشعر السوداني الذي كتبه شعراء العامية السودانية ، وليت الأخ أبوذر يورد لنا بعض أشعار أهله ولو على سبيل التوثيق ، فحرام أن يضيع تراث مثل هذا ...
لك الشكر الجزيل وأطيب التحايا زول ساكت ،،، ومن زمان أنا قلت عليك إنت ما زول ساكت ،،،
| |
|
|
|
|
|
|
|
|
|
Re: الفكي احم ود عبدالملك يرثي الشريف عبدالله ودالريح (Re: زول ساكت)
|
الأعزاء
زول ساكت
ود قاسم
أسكت ساى يا ود قاسم
الزول أتاريهو هيلنا تب
على بالإيمان لحم ودم
الفرع العندنا ده طبعا كلهم حيران البادراب
وكلهم حفظة قرآن صم، والله يا ود قاسم الشافع منهم كان نضم معاك ساى
يقول ليك شعر، ناس عجيبين جدا
وأقول مفاجأة تانى كمان يا ود قاسم
الشيخ حياتى شاعر المديح النبوى المعروف
وإسمه طبعا حياتى ود الشيخ حمد العربى
هو وجدى، جد الوالدة، وإسمه محمد ود على ود الضو
هو والشيخ حياتى وأخوه الشيخ المبارك
اخوان من الأم، يعنى أمهم واحدة من ودراوة
والشيخ حياتى ابوه طبعا من الصقيعة غرب رفاعة وباقى الأهل فى الهلالية والحضور
يعنى الزول كان داير يخلى مكابسة الشعر دى
ما يلقى ليهو طريقة، محاوطنك الجماعة من بى جاى وبى جاى
وتحايا وود
| |
|
|
|
|
|
|
| |
زول ساكت
أبوذر بابكر
ودقاسم
فيس بوك
تويتر
انستقرام
يوتيوب
بنتيريست