|
|
 الاسـماء ..دلالاتها ..معـانيها ..طرائـفها ..
|
*قبل فترة طويلة كتب احدهم ردا علي في هذا البورد ان أسمي - لؤي - يلمح الا انني من الهاربين من الخدمة الالزامية ...ومن اسمي لست ( زول حاره ) كما يفهم هو ..
*وخشية من الخطأ في اسمي - لا زالت بعض حبوباتي - يرددن اسم عليي (بكسر العين) كاسم دلع - بينما لازالت حبوبتي ام والدي رحمه الله - وهي حية - و اقتربت من الثمانين - تنطق اسمي صحيحا بلا اخطا .
* قبل سنوات عديدة اختارني احد اقاربي لعمل قرعة لتسمية مولودته الجديدة - وكان رجلا ديمقراطيا-رغم انه غير متعلم- اذ اختار نظام القرعة - بشرط ان الاسماء ستكون اربعة فقط - ولانه ديمقراطي !! فالاربعة اسماء سيختارها هو فقط - كان علي كتابتها وسحب الاسم - كانت الاسماء الاربعة فاطمة (امه ) آمنة (ام زوجته) نفيسة (اخته الصغرى) نهى (أخت زوجته الصغرى)- خرج قليلا وانا اكتب الاسماء فاستحلفتني زوجته واخواتها والنساء جميعا ان افعل المستحيل ان اسحب اسم نهى لانه الاحدث ولانه رفض كل الاسماء التي قدمت له وكانت على شاكلة لنا ولبنى ورانيا -الم اقل لكم انه ديمقراطي - عموما كتبت الاسماء الاربعة - وغششت قليلا في الورق وسحبت نهى - نهى الان ما شاء الله كبيرة في المدرسة ..ولازالت امها تقول لي اتخيل كان يعقده لي يسميها نفيسه مع الاسماء الجميلة الموجودة الان ..
..هذا البوست بحثا في الاسماء الجديد منها والقديم الجميل منها والحديث ..وضروبها ومشاكلها ومناسباتها وظروفها ..وهو مفتوح للجميع للمساهمة فيه ..
|
|
 
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
غاندي ..وجيفارا ...
من الاسماء السودانية التي مرت علي ..وتعرف عليهم ..
ولا غاندي الذي عرفته ...فيه رائحة من رائحة سيد الاسم ..
ولا جيفارا ..الذي عرفته ..فيه شيء من سيد الاسم ....
( ان شاء الله ما يكونوا سمعوا بسودانيز اونلاين دا كمان )
غاندي عندما سالته ...قال لي لو في طريقة بغيروا ..
وجيفارا ..سماه صديق ابوه ...
ياربي صديق ابوه دا (كوز) ولا شنو .. ؟؟
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
ناذر ...دا جديد علي
سمعت وعرفت بنزار والنزير ...لكن ناذر دا اظن اول مرة يمر علي .....
الغريبة في بعض الاسماء لها حاجات عجيبة
اي نزار بعرفوا ...زول بلعب كوره اكيد ولعاب كمان
واي نزير عرفتوا ..زول قراي وبتاع قراية وكتب بس
واي شهاب عرفتوا يا جماعة الخير ..زول فنان بعرف كم شهاب كلهم اما رسام او عازف
او خطاط ...او تشكيلي ..الحكاية شنو ..
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: أبوتقى)
|
اختيار اسماء المواليد في السودان تعبير عن ما هو سائد اجتماعيا
وسياسيا وثقافيا واقتصاديا
فسياسيا مثلا يطلق اسماء الرؤساء وغالبا في سنواتهم الاولي من الحكم وخاصة في الانظمة الكتاتورية
لذا نجد اسم مثل ابراهيم عبود اطلق على بعض المواليد والذين غالبا يكونون مواليد 19958-وحتي
1960
وكذلك اسم نميري اطلق في السنوات الاولي لحكم السفاح ومن ثم تناقص الاسم
لكن اسم مثل ازهري او المهدي او مبارك زروق يطلق علي المواليد حتي الان
وايضا اسم راشد وهو الاسم الحركي لعبدالخالق محجوب .
وبعد اكتوبر انتشر اطلاق اسماء مناضلي اكتوبر على المواليد
فاطلق علي المواليد اسماء مثل الشفيع وقاسم امين وقرشي الطيب
واسم القرشي تيمنا بالشهيد الاكتوبري احمد القرشي طه
وبعد 19 يوليو 1971 انتشر اطلاق اسماء زعماء 19 يوليو على المواليد
فانتشر اسم هاشم وفاروق وجوزيف
وفي ذلك يقول عبدالله علي ابراهيم
في ما معناه
تقول الصحيفة ان فلان رزق بطفل او طفلة
والمشاورات جارية لاختيار الاسم
لكن منذ الان لم تعد لدينا مشكلة في
اختيار الاسماء
فخير الاسماء ما ( رشد) و(شفع) و(جزف)
و(سعد ).
الاخ لؤي
هل تعرف شخصا ما
اطلق اسم البشير او نافع او علي عثمان
او صلاح قوش على ابنه
او ابنته ؟
سأعود
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: salah elamin)
|
الاخ صلاح الامين تحياتي ....
مرحبا بك وبالاسماء الحمراء ..ايضا
الان مافي لا الازهري ولا المهدي ولا مبارك ولا الشفيع ولا القرشي...في اطفال اليوم او حتى
اطفال الامس القريب ...(مع احترامي بالطبع لهذه القامات السودانية)
حتى جعفر مافي او نادر ..وجعفر موجود فقط في جيل السبعينات .
في السنوات الاخيرة العشرة الماضية برزت في صفوف الصبيان بالذات اسماء مصعب ومهند
وعمرو وعمر ايضا (بس ما عمر البشير عشان ترتاح ياصلاح ) - ووليد - والبراء - اسلام
مجاهد - (ليس لهذه الاسماء صلة بالانقاذ ) - اظنها دلالة لتعلق السودانيين عموما وحبهم
وارتباطهم بقيم الدين .
ايضا يظل اسم محمد ( تيمنا بالرسول الكريم ) هو الاسم الابرز لدي معظم العائلات السودانية اليوم ..وخاصة العائلات المتزوجة حديثا ..حيث لاحظت ذلك ..
ولي عودة
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: نادية عثمان)
|
سلام للكل...
أذكر زميلة (تصغرني كثيراً)... عندما التحقت بمدرسة الراهبات بالخرطوم أعجبتني رقتها و الأكثر من ذلك إسمها المميز...
نبره...
أظن أنها عضو بالمنبر تحت إسم alin إن لم أخطئ...
التحيه لها إن كانت هي... و لمن أعطاها هذا الإسم المميز...
و هلا تفضلت بشرح معنى إسمها!!!
محبتي
سلمى
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
الاخ : لؤي لك التحية
اسمح لي في البداية بهذه النكتة بس ما تضحك كتير عشان ما تتورم .
كان في مجموعة من الاطفال يلعبون على الطريق في احد الاحياء المدنية والراقية واثناء اللعب ضرب احد الاطفال الاخر فذهب المضروب الي بيتهم جريا وهو يبكي فسالته امه لماذا تبكي يا حمادة فقال لها ضروبني الاولاد فقالت من هم الاولاد قل لي مع من كنت تلعب وما هي اسمائهم فبدأ طفلنا الصغير يعدد اسماء زملائه في اللعب قائلا هم وائل ولؤي وطلال وابكر عندها اوقفته والدته عن اتمام ذكر الاسماء قائلةبس بس بس لحظة ابكر ده هو على الاكيد ضربك .بالله عليكم الله ابكر ده الوداهو للاحياء الراقية دي شنو يدينو بسبب وبدون سبب . لذلك ان للاسم احيانا دلالة قد تكون او على الاكيد تكون بخلاف شخية المسى فلا دخل لنعومة الاسم او خشونته او حداثة الاسم او قدمه على سلوك المسمى فالاخ الذي قال لك انك يا اخي لؤي هربت من الخدمة الالزامية ده هو شخص انطباعي مثله مثل والدة حمادة التي حكمت على ابكر دون التاكد من انه فعلا قد ضرب ابنها ام لا .
كمان نكته اخونا في الهيلاهوب عن ابكر الذي عندما خير بين حبيبته الاثنتين حفصة وماريا اذا ما غرق بهم المركب وهم في عرض البحر فقال موجها الكلام الى حفصة انتي يا حفة قطع شك تعرفي تعومي فهو ايضا انطباعيا كون اسم حفة عنده يعتبر اكثر خشونة فهي بالضرورة ستعرف تعوم وتتمكن من تخليص نفسها اما ماريا فلابد لها من مساعد.
اما الاساء التي ربما تكون حديثة خذ هذه الكوكبة
بيان , ريان , رزان ,إمتثال , إفتكار , البراء ,
ورايكم شنو في الحديث القائل خير الاسماء ما حمد وعبد
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: عبدالعظيم عبدالله)
|
الاخ عبدالعظيم تحياتي
شكرا على المشاركة والمرور
بالطبع النكات التي اوردتها تدل على معاني الاسماء لدى العامة ..فعندما
يخشوشن الاسم قليلا باعتقاد البعض ..فهو رمزية للاخشوشان قليلا حتى ولو لم
يكن صاحب الاسم كذلك ..
اما بخصوص الحديث خير الاسماء ماحمد وعبد فوالله يا اخي عارف الناس الزمن
دا ما شغاله بيهو كتير ..بل حتى الناس تركوا اسماء الامهات والجدات وهي
اسماء في رأي جميلة ..فاسم مثل زينب اسم جميل ..لكن نادر ما تجد زينب
من الاناث الصغار اليوم ..
تشكر يا اخي على الاسماء الجميلة التي ذكرتها ..والمزيد ...
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: المكاشفي الخضر الطاهر)
|
أياً تكن معاني الأسماء ودلالاتها، ومهما كان تأثيرها على البشر، فإن الشيء الثابت ان هذه الأسماء تلتصق بأصحابها. تعيش معهم ويعيشون بها. ويكفي ان التلفظ بها يشير الى وجود حامليها، حين يلفظ أحدهم اسمك تشعر بأنه يتلفظ بك كلك. تشعر بتلك اللذة والدعة والاطمئنان الى ان وجودك لم يصب بعد بخلل، وان ثمة عنواناً لك وبريداً. وأكثر، تشعر بأنك موجود ليس في نفسك فحسب، وانما في الآخرين، في ذاكرة الآخرين التي تحفظ شكلك وشخصيتك أو كما تتخيلها، وان لك موطئ اسم في هذا العالم الذي يتضخم ويتسع ويتكاثر ويتناسل بالأسماء.
ناظم السيد - نقلا عن جريدة السفير اللبنانية - شكرا للملا عمر على الرابط ..
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
اهـــلنا اعــراب الباديه كثيرا ما قرنوا الاسماء بالدعاء للمنادي كنوع من السخرية المستحبة واضفاء روح الدعابة في اوقات الشدة
محمــــد الحمي اليوت من يشوفك يقول اخير امـــس
عبدالرازق الزرقة الضبانا يغطي عين الشمش
علي العلــلة الدكاتــرتا يتجـــارو
الصــديق الصــدقة الملاحا غت
وفي حالتك يا لؤي اللوايــــة الدواها عملية (تبري و تستبري)
نادي جــــدي احــــدي بناته لإطـــعام راعي غنمه
ها ســـايبه سويلك سايبه للسايب دا اليسويها في سايبتو يقوم علي السايبات ديــل
شكرا لؤي علي البوست
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: إسماعيل حميم)
|
مراحب
ما عارف ليه متخيلكم قاعدين تحت نيمة وجنبكم زير بارد !!!
شاب من جزيرة توتي : هاديء مهذب راقي كان يدرس بروسيــا
كان وما زال يحمل أغرب الأسماء التي مرت على حتى اليوم الصديق العزيز الذي فرقتنا عنه الأيام إسمه :
سيـّــان
التحية ليهو ولأهل توتي
وليكم كلكم
(عدل بواسطة filan on 08-17-2005, 02:58 AM)
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: إسماعيل حميم)
|
الاخ اسماعيل حميم تحية طيبة وتقدير ...
تحية لك وعلى ذكر الشاعر الكبير ابوامنه حامد واسم ولده جمال
فجمال فعلا برز في السبعينات بكثرة ..
ومعظم جمال - الموجود الان هم جيل بداية السبعينات
طبعا للقادة مكانة عند العامة فغير جمال اسم فيصل كان تيمنا بالملك فيصل
حينها ..والان اسم صدام وهو عند عدد محدود من الاطفال ...
اسم الحسين والحسن ايضا ...سبطي الرسول صلى الله عليه وسلم
ومرحب بعودتك مرة اخرى ...
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: Ibrahim Adlan)
|
ابراهيم عدلان تحياتي
والله اضحكتني يا اخي ..وبعدين لويتني لويه شديده 
اصلا معظم الاسماء ولها ..القرين ..المناسب كما قلت
بعدين ما اجمل هذا الشعب ..اذا كجن ..شخصا ..
فلدى هؤلاء الناس القدرة ...على تكجين الاسم وتكسيره ومرمطته في الارض
اشكر ابراهيم على هذا المرور الجميل ...والمعبر ..
| |
|
|
|
|
|
|
|
|
 Re: الاسـماء ..دلالاتها ..معـانيها ..طرائـفها .. (Re: luai)
|
اخوي لؤي ...
الموضوع جميل وذكرني بتسميتي انا زاتي  والدي الله يرحمه كان مواليد 1909 يعني لما انا اتولدت سنة 1988  كان قريب الثمانين (بهزر لكن تاريخ ميلادي سر عسكري خطير ليس للنشر)..مع ذلك كان زول بالجد ديموقراطي .. ولما اخواتي من ابوي اتشاكلو علي (من سماحتي طبعا) وعلى اسمي،وبما انو ماشاء الله اخواتي الكبار حبوبات، ادو الدفة لبناتهم وقرروا انهم يقترحوا اسامي .. والدي اختار (عزاز) و(هاجر) على اسم امه .. بنت اختي اقترحت (زينب) والتانية (غادة) وخالتي اقترحت (صافورا) وماما (هانم) على اسمه حبوبتي .. المهم اسمي كان معضلة زي الدستور العراقي اللي ما قادرين يكملوه ...
بعد مداولات و واجتماعات مغلقة ... بنت اختي جات وسحبت الاسم وطلع (عزاز)
بابا ارتاااح واريحيته اتمددت وامر بذبح العتوت وتوزيع الحلويات والبلح الناشف اللي كان على ايامي زي شيكولاته (باتشي) و (ماكنتوش) حسي ....
طبعا الاسم ده وتاريخ الميلاد اتسجل بعد الهنا بسنة بحكم انو انا اتولدت في اقصى الشمال وبيني وبين عبري المدينة سكة ساعتين ... ودي قصة تانية خلتني اعيش الـ 18 سنة الفاتت من عمري فاكره روحي من برج (جوزاء) واكتشفت انو اني من برج(الثور) السنة الفاتت  ! لانو اهلي سجلوني بعد 40 يوم لما صادف يكون في مشوار للسوق! شفتو الحقارة دي!؟!
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: عزاز شامي)
|
الأخ لؤي،
شكراً على البوست الظريف،
اسمي ايضاً له قصة. فقد كان ابي رحمه الله رجلاً ديمقراطياًعلى طريقة قريبك! وقد رأي ان يكون اسمي "فاطمة" على اسم حبوبتي، وبطريقة ديمقراطية أيضاًلم يستمع لاستغاثات أمي وأخواني الكبار بأن هذا اسم قديم ولا يتماشي مع الموضة، ولكنه مع ذلك سالهم ما هي إذن اقتراحاتكم، وحينها أجابه اخي الحبيب بأن "يمنى" هو اسم جميل لماذا لا يلقبونني به، ولكنه بديمقرطية أبي المعهودة "طيب الله ثراه" قد رفض المقترح جملة وتفصيلاً. إلي ان تدخلت إحدى صديقات والدتي وهتفت قائلة "وحاة الله ما يسموها إلا اميرة على اسم بتي"، ويبدو أن والدي قد راق له الاسم بالفعل فأجابهاقائلاً وكأنه لا يبالي "أميرة .. أميرة، خلاص كويس" ! بالطبع هذه القصة نقلت إلي "بعد مولدي" وبذلك تصبح العهدة على الرواي !!
أعتقد ان اسمي هو انعكاس لأزمة طبقية حين يتطلع قطاع عامة الشعب "الذي تنمتي له أسرتي" إلي أن يحمل ألقاباً تعويضية يظن أنها قد تأخذ به لمصاف الأميرات والملكات، قس على ذلك أسما مثل "باشا"، "المدير"، "الأفندي"، "العمدة" وغيرها. أما أكثر ما يعجبني في هذا الاسم "اميرة" هو سهولة نطق الجميع له بما فيهم من لا ينطقون العربية مما يؤهل الاسم لأن يرقى لمرتبة العالمية لسهولة تداوله
خالص محبتي للجميع،
أميـــرة
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: Amira Ahmed)
|
اميرة تحياتي
اما ان اسمك انعكاس لازمة طبقية ..فهذا قد يكون حقيقة ..اظن ان الاميرة في الوجدان
شيء حالم ومميز وعالي ..ايضا اسم ملكة ..لا اعرف ما المقصود به ؟ اظنه ينتمي لنفس كلامك
لكن تعجبني الديمقراطية المنبسطة مثل التي طبقها ابوك - رحمه الله - وهو اشراكه الجميع في قول مالديهم من اسماء على ان يختار هو ..هذه ديمقراطية محكمة وتعجبني ..يعني انت الان مدينة باسمك دا لجارتكم ..ما انبل اهلنا اهل السودان ...
الغريبة يا اميرة الان الناس بقوا - دكتاتوريين في الاسماء مافي فرصة لجار او قريب والاسم يكون جاهز قبل فترة اذا ولد كذا واذا بنت كذا ..وغالبا الاسم الان بين الزوجين فقط ..هذا اذا لم يمارس الرجل سلطاته كسي السيد الابدي ...
تشكري اميرة على هذه المشاركة المميزة ...وبالطبع اسمك سهل كاسم ساره الذي ايضا يتداول بسهولة في كل مكان ...
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: عزاز شامي)
|
عزاز مرحب بيك ..
اولا بالجد اسمك دا اسه محجوز لزوله جايه ( بس حقوق الملكية محفوظة لك )
والاسم معبر وجميل ...
والله يا عزاز اسمك مااداني فرصة اخمن انت مواليد كم - بالرغم من انو تاريخ الميلاد - عارف زي القاعدة العسكرية الدخول ليه ..مستحيل ..بس الزول الاداك الاسم اداك فرصة انو الناس ما حتخمن التاريخ الصحيح ..
ثانيا احب الاسماء التي تاتي بعد ولادة عسيرة - مثلما فعل والدك - رحمه الله - وادا الناس
فرصة التصويت - يعني انحنا في القواعد ديمقراطيين في اي حاجة - بس الناس الفوق ديل ما عارف مالهم ...ما بدونا فرصة ..
اسم زينب الذي اقترح لك من الاسماء التي تعجبني جدا ..
اما انو الجماعة سجلوك بعد اربعين يوم والله احسن ليك ..انا لو منك بخصمها من الميلاد يعني اسه انت ناقص اربعين ..طيب دي ما كويسه معاك ..بالجد في حد لاقي ينقص من عمره يومين خليه اربعين ..
تشكري على المرور وتعريفنا بالاسم المميز ..والمعبر ..
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: بلدى يا حبوب)
|
بلدي يا حبوب تحياتي
شكرا على المرور والله بالجد هناك اسماء سودانية والقاب اكيد ما اطلقت ساكت
والسودانيين ديل يبدو لي ما بقولوا حاجة ساكت ....
ابورجيلة دا ...لسه موجود وابو حوا كمان ...لكن ابو حوا دا اظن الزول المجنون
ولا انا غلطان ...
الالقاب التي تطلق على الناس ومناسباتها تحتاج لبوست كامل ..اذ معظم ابناء حينا
لهم القاب ولا يعرفوا بغيرها مثل
ضبه ..الجتار ...وغيره
لك تحياتي
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
والله يا لؤي دا موضوع جميل جدا ....
Quote: ناذر ...دا جديد علي
سمعت وعرفت بنزار والنزير ...لكن ناذر دا اظن اول مرة يمر علي .....
|
أها أقول ليك حاجة ...
أنا برررررررررضو !!!!!!!!!!!!!!!!!!!
جاييك بي رواقة عشان احكي ليك قصة الإسم وقصة المواقف المحرجة بسببا
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: ناذر محمد الخليفة)
|
ناذر تحياتي ..
اكيد لك طرائف ..بخصوص اسمك ..كما الكثيرين من ذوي الاسماء النادرة
اذ لا ينده اسمي في اي مكان حتى يقرن باسم هيثم ..وتعرف هيثم في الاسماء
السودانية مثال لماذا ؟
* في معسكر الخدمة الالزامية ..صاح العسكري فينا ..بالمساء في جلسة ونسة
صاح احد التعلمجية اي واحد اسمه هيثم يقوم فوق ...قاموا اتنين ..
اي واحد اسمو لؤي يقوم فوق ..قمت ومعي اخر ...من اولاد شمبات ..
قال ما دام معانافي المعسكر دا اربعة 2 لؤي و 2 هيثم ..السودان دا بقى بخير ...اقعدوا
(قعدنا يا ناذر بلا ذنب سوى اسماءنا )
* في الصف السادس الابتدائي على مااذكر كنا في الكنبة الاولى ..والفصل مزدحم جدا - ناس الكنبة الاولى الناس القلال جسميا - وناس الكنبة الاخيرة الناس العراض شويه - في كنبتنا كنت انا ومرتضى ومعتز ومحمد - ثلاثتنا في حجم واحد - جابوا لينا واحد منقول اسمه مزمل الله يذكرهم جميعا بالخير - كان عريضا وطويلا - جاء منقولا - فجاء واختار كنبتنا وجلس معنا - اول ما دخل ابو الفصل - قال ليه انت البقعدك هنا شنو دا مرتضى ودا معتز ودا محمد ودا لؤي وانت مزمل..ارجع خط مية غرب اخر الفصل مع ناس داؤود هناك ...وانفجر الفصل ضاحكا..
اواصل ..
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
المغتربين ايضا لم ينسونا من الاسماء فنفحونا بالاسماء القادمة من الخليج العربي
طلال - الوليد - بدر - مشعل ..
ومن الاناث ..ريم ...
من مصر جاءتنا اسماء ...سوزان ..مديحة ...عصمت ...هالة ...سهير ...شيرين ..شيريهان
من الاسماء الفارسية الموجودة ومنتشرة ...شيراز ...وشاهيناز ..الخ ..
وفي انتظار اطلالة لبنان قريبا
نانسي - وهيفاء ...وغيرهن ...
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
لؤي تاني جيتك ...
لقيت واحد من أصحابي مرسل لي إيميل ولقيتو معلق على البوست بتاعك دا وطلب مني إنو ادرج إسمو هنا لغرابتو وإحتمال لي ندرتو .............
صاحبي إسمو المعتد .......
ويا ريت لو تقدر تجيب لينا يالؤي معلوماتك عن إسم المعتد دا من حيث الندرة والخلفية وكدي ..
أنا شخصيا ما قابلني واحد بالإسم دا .. لكن صحبي دا معتد بي نفسو شدييد
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
مثلما لعبت الشلوخ دورا تعريفيا بشخصية حاملها دون سؤاله او التحقق منه كذلك لعبت الاسماء دورا في تحديد المنطقة و الطريقة الصوفية وربما القبيلة فالحسن وتاج السر والختم و سرالختم و ميرغني ومحمد عثمان وعلوية و نفيسة اسماء من شمال السودان الاوسط و ربما شرقه واصحابها ذو علاقة ما بالطريقة الختمية
اما دفع الله ومقبل و يوسف و عبدالباقي والعركي وابوعاقلة والطريفي اسماء خاصة باهلنا العركيين بشقيهم السناري و الابوحرازي
بانقا و التوم وهجو و يعقوب وموسي اسماء اهلنا اليعقوباب
الطيب و ابوصالح والبشير و عبدالمحمود وقريب الله وفضل الله والسماني اسماء اهلنا السمانية بمختلف مشيخاتهم
حمد و خوجلي و الشريف بعض اسماء محس الوسط بينما محمد صالح وعبدالكريم ومحمد عثمان وعبده اسماء اقصي الشمال
منطقة شرق النيل الشيخ و الصديق والعبيد و الطيب والشيخ ادريس
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
تذكرت صديقا لي درس معي في مدرسة الخرطوم الثانوية إسمه منتجب !!!!!
واعتقد أن هذا الإسم أيضا من الأسماء النادرة !!!!
وصادفت مرة شخصا إسمه ميزر !!!!!
ومن الغرائب أنني أعرف شخصا بإسم جيفارا أطلقه عليه والده المناضل القديم .. ولكن جيفارا لا يعلم لماذا أسماه والده بهذا الإسم وهو ليس من ذات مدرسة والده !!!
ترى هل يبيح قانون المواليد في السودان حق تغيير الأسماء للضرر المعنوئي أو الإنتمائي !!
تصوروا معي شخصا إسمه جيفارا وهو عضو في الحركة الإسلامية !!
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: نادية عثمان)
|
نادية تحية مرة ثانية
قلت ود الموصلي اسمه شوبان ..اكيد عشان ابوه موسيقي ..وشوبان دا معروف في الموسيقى
اظنه موسيقار الماني ..لا اعرف ..عشان كده الموصلي سماه عليه ..
بس يا ريت ما يكون شوبار زي اسم الدلع بتاعه ..لانه الشوبار دا اظنه الفضولي
اظن ان للمرحوم على المك بنت اسمها كارمن ...والله اسم عاجبني عديل كده وساكت كدا ..
لك وللموسيقار الموصلى واسرته و(شوبار) ...التحية
| |
|
|
|
|
|
|
|
|
 Re: الاسـماء ..دلالاتها ..معـانيها ..طرائـفها .. (Re: luai)
|
شكرا انك تطرقت للموضوع ده لانى بالجد عاوزة اعرف معنى اسمى لانو ليهو معانى مختلفه مرة بيقولو لى انو على هضبه نجد فى السعودية وصديقتى مرة معاى فى المدرسه قالت لقت معناهو فى مجله إنو اسم من اسماء الحمير فإتحسست من الموضوع شديد وفتشت لى فى معجم للغه العربيه لقيت انو معناهو المرأة الحسناء العاقله فا يا جمااااااعه انتو فى رايكم يكون معناهو شنو
طبعا نسيت اديكم الاسم ( نجود)
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: نجود حسن عبد الرحمن)
|
نجود حسن تحياتي وتقديري ،،،
نجود بالرجوع لمعاني الاسماء في الانترنت ..وجدت ان نجود جمع نجد وهو المكان المرتفع ..وبالرغم من انني اقيم بنجد ..الا ان نجد كلها مافيها مكان مرتفع ..
اظن ان اسم نجود منتشر الان واحسب ان جيل اسمك هو جيل اواخر السبعينات ..فاعرف نجوديتين واحد 78 وواحده 80 .
على العموم المكان المرتفع دا كويس معاك ..يمكن نجاح ويمكن منصب ويمكن قروش ( لو بقت الاخيرة دي ما تنسيني ) لك تقديري واحترامي ...
| |
|
|
|
|
|
|
|
|
|
Re: الاسـماء ..دلالاتها ..معـانيها ..طرائـفها .. (Re: luai)
|
تحياتي لي ود شندي ولؤي ..
Quote: ..تعرف ناذر دا لو شال النقطة من حرف ذ بس كان ارتاح
|
أها وأخوي الكبير الإسمو نادر .. يسموهو عبد الغفار ولا شنو !!
الشغلة بتاعتنا بالذات عندها علاقة بي أول الحرف ونهايتو أخواني أساميهم كلها بتبدا بي حرف النون زي ناذر ... ناصر.. نادر .. ناجي ... ناظم ...
وبالمناسبة .....
حبوبتي الله يرحما كان إسمها نفيسة
| |
|
|
|
|
|
|
| |
luai
salah elamin
almulaomar
عبدالعظيم عبدالله
المكاشفي الخضر الطاهر
إسماعيل حميم
filan
بلدى يا حبوب
ناذر محمد الخليفة
Osman M Salih
فيس بوك
تويتر
انستقرام
يوتيوب
بنتيريست