|
|
 الهناك الذى أنا ..!!
|
كان يعني إيه تكبر
وتلقى موظفين الروح على بعد إنتظار شهقة
محل نفسك يشل جسدك
وتتمسح بخيط النور
كان يعني إيه في النسوة نون النسوة
وفي مسدك رجل مبهور
ومتورط إلى أبدك
مجندل بالاغاني الضو
وبالشجر الحفي الممهور
تبق من تاني يا آسف
ومخنوق بالخلا العتمور
أنا آسف
تعال أرجع معاي يا قبيل
يا وكتين ركبت الغيم بلا سأله
يا فاتحني في الزول الشفيف جداً
وغامض حد مسافة النور
وكانت في الخيال طيرة
وفي الليل لما تتسحر بتطفي النور
وتقعد جمبك البكره
كان يعني إيه تكبر؟
إذا دلوقت إنت سبقتو ..!
قبل السور يعدي معاك
ياساتر عليك ياقلب
يا فكرة
بلا ساحل ولا ذكرى سوى الذكرى
كفاك تكِل
شوية من الغياب تكفي
أنا ببكي
وببكي لأنو ما ممكن أطفي النور
الدنيا وحشة
إذا ما الليل بخوِّن في حماقاتو
ويدلق ذاتو من ذاتو
أبيت وين ياجداول الضو
وأي طريق حامشي لوين
متين ما شفت جوا النار
أزغرد: حوّا ولادة
أزغرد لو كأني أنا
مرقت من القميص للتو
وحارسك ياجداول الضو
وكالعادة
أمرقي ياخالة غناي فيني
عارفك ما بتعرفيني
وعارف انو أتعابك معاي
وثمة لا فكاك مني
أمرقي ، خليني الأواسيني
مدام الرؤيا خلابة
مدام لازم تكوني أنا
وأكون اللازم العادة
أمرقي لأني متخم بيك
الى حد الجريمة وإنعدام الوزن
أمرقي مرق حصان وقتك
على القبلة .. سلكنى وراك.......
القاهرة /3/8/2005
ذات أصدقاء وريفون/عمر أحمد/عبدالله داش/ عبدالقادر ميكال
|
|
 
|
|
|
|
عثمان البشرى
فيس بوك
تويتر
انستقرام
يوتيوب
بنتيريست