|
|
|
 Re: والله يا جماعة ماني فاهم الكلام ده, كده اشرحو لي!!!!!!! (Re: aosman)
|
أخونا عثمان
نشرح عساك تفهم، الحرق والقتل والنهب عقوبتهم في السودان كالآتي:
إذا كنت من اعضاء الدفاع الشعبي العقوبة ملايين الجنيهات كتعويض ليك من اموال الشعب السوداني
اذا كنت من الجنجويد عربة لاندكرزور
إذا كنت من طلبة المؤتمر الوطني وحرقت وقتلت في جامعة ام درمان الاهلية، العقوبة الإشادة بيك من رئيس المؤتمر الوطني
إذا كنت في الاستخبارات العسكرية وقتلت الأسري والمواطنين في شرق وجنوب وغرب السودان فالعقوبة الترقية الإستتثنائية لرتبتين
وإذا كنت عمر البشير وقتلت ليك 28 ضابط العقوبة الترقية لرتبة مشير
وإذا كنت ابراهيم شمس الدين ومسكت ليك قرية كاملة وحرقتها بنسوانا واطفالها لانو الحرس بتاعك كان بيسكر في الحلة وقتلوهو فإنت العقوبة بتاعتك الجنة عديل كدة.
لكن اوع ما تقع في الغلط يا عثمان وتقوم تعمل الحاجات الكعبة دي ناس قتل وحرق ونهب وما تكون من انصار الحكومة أو من أنصار (حملات تفريغ العاصمة)
ففي الحالة دي بتكون العقوبة تلاتة شهور، ودا ذاتوا تطور، لأنو يا سعادتك نحن عملنا مع الناس ديل سلام، فقصة نقتلهم ونحرقهم دي تاني ما بتنفع، وبعدين الحكم دا برضو حكم شديد، عارف ليه ساعتك يعني هم قتلوا ليهم كم زول قول مية، يا خي نحن قتلنا منهم 2 مليون فبرضو نحن الكسبانين.
وكان ما فهمت يا عثمان يا اخوي نحن قاعدين برة في امريكا بلد العلم عشان أي زول عندو مشكلة بتاعةفهم في الحصل في الخرطوم نخليهو يفهم.
أها يا عثمان قصرنا معاك.
صادق
| |
 
|
|
|
|
|
|
|
|
Re: والله يا جماعة ماني فاهم الكلام ده, كده اشرحو لي!!!!!!! (Re: الصادق اسماعيل)
|
عثمان أخوي
أها كمان عشان تفهم زيادة، أنا إتصلت بالخرطوم هسه، وان عندي لسه باقي كيزان من زمن الجامعة كنت بداقرم في اركان النقاش ومناظرات وحاجات بالشكل دا، المهم ربك رب الخير لميت في واحد منهم، وقلت ليهو عن كلامك دا، وإنك ما فاهم، اها قال لي زولك دا قول ليهو الناس ديل نحن حكمنا عليهم بتلاتة شهور ودي كفاية والناس دي ماعملت اي حاجة غلط، يعني زي ما قال لي زولي الكوز دا (وما أفضِلو عليك) قال يا خي الناس ديل أولاً ما جدعوا حجر في (عفراء) ما حرقوا ليهم عربية من عربات المسؤولين ولا ناس الامن ولا الوزراء ولا الكيزان، تتصور يا عثمان يا خوي زولي الكوز دا قال من جملة 15 الف عربية خاصة بتاعت ناس الحكومة ولا عربية ما حصلت ليها حاجة، نقوم كمان بعد دا كلوا نحكم عليهم با كثر من تلاتة شهور الشريعة ذاتا ما قالت كدا.
لكن قايلني خليتو ليك يا عثمان ( عليك امان الله تلاتة كروت امات خمسة دولار يا عثمان انا أعتل في امريكا النهار كلوا عشان الم القروش دي) قلت ليهو طيب المواطنين ديل ذنبم شنو، قال لي يازول ديل ما في خوف عليهم، وهسه كواريكم دي عشان الكلام دا جاهم في الخرطوم، ماياهو كلو يوم حاصل في دارفور وازرط من دا سمعتهم قالوا بِغِم، وهسه الامور خلاص هِدت تاني قطع شك ما في زول بجننكم بي متل اسئلة عثمان صاحبك دا.
اها دا الحصل يا عثمان يا اخوي وإن شاء تكون فهمت.
| |
|
|
|
|
|
|
|
|
|
Re: والله يا جماعة ماني فاهم الكلام ده, كده اشرحو لي!!!!!!! (Re: aosman)
|
Quote: يا عثمان وتقوم تعمل الحاجات الكعبة دي ناس قتل وحرق ونهب وما تكون من انصار الحكومة أو من أنصار (حملات تفريغ العاصمة)
ففي الحالة دي بتكون العقوبة تلاتة شهور، ودا ذاتوا تطور، لأنو يا سعادتك نحن عملنا مع الناس ديل سلام، فقصة نقتلهم ونحرقهم دي تاني ما بتنفع، وبعدين الحكم دا برضو حكم شديد، عارف ليه ساعتك يعني هم قتلوا ليهم كم زول قول مية، يا خي نحن قتلنا منهم 2 مليون فبرضو نحن الكسبانين.
وكان ما فهمت يا عثمان يا اخوي نحن قاعدين برة في امريكا بلد العلم عشان أي زول عندو مشكلة بتاعةفهم في الحصل في الخرطوم نخليهو يفهم.
أها يا عثمان قصرنا معاك.
صادق |
الاخ العزيز الصادق
اشكرك كتير وما قصرت ابدا لكن يا اخوي زمان كان عندي عدم فهم هسي انت كمان لخبطي لي راسي عديييييييل كده اعمل شنو
قصة تحير والله
| |
|
|
|
|
|
|
| |
aosman
الصادق اسماعيل
فيس بوك
تويتر
انستقرام
يوتيوب
بنتيريست