|
|
 ذات صباح خرطومي "عبقريه صباحية "
|
أولا عذرا لل د. ندي صاحبة العنوان
و لل د. سجيمان "صاحب الاسلوب "
أحيانا تصاب بوضوح شديد في الرؤية "عبقرية كدة بتنزل عليك من السما" صفاء ذهني الواحد ممكن بسهولة "يمسك بناصية النسبية و نظرية الكم" "يمكن بسبب الجو" حكاية وضوح الرؤية دي و انطلاق الطاقة الذهنية الكامنة.. المهم في الموضوع انو قررت استخدام الملكة دي في أي حاجة كدا و للأسف الموضوع دا هو الفرض نسفو علي: "ما تعرف ليه"
الساسة السودانيين المؤثرين في حركة "البلد" من 50 سنة تقريباً هم "الصادق المهدي" خريج اُكسفورد "مُش" حسن الترابي خريج "السربون" و الجماعة الإتحاديين برغم انو كبيرهم تقريباً خريج "خلاوي" لكين الحركة الإتحادية "لمت" كمية من المثقفين و البيتحسب ليهم جداً رفضهم للشغلانية بتاعة الطائفية دي، محمد ابراهيم نقد ما عارفو قرا وين لكين على الأقل الراجل فاهم الماركسية و قاري رأس المال و مشهورين الشيوعيين بالقراية و الثقافة،
الصادق المهدي عموما بيعيش "فصام" غريب بين تنظيرو الكتير دا " 1. (أ) I. أولا" و تعليمو الغربي دا و بين الشي السواهو و البيسوي فيهو، الترابي "براغماتيتو" هي المسقطة حجرو و سقط بيها حجرنا زيادة لانو ما قدر يتفك من إرتباطو بي أجندتو المفروض انها مرحلية "اتورط" بدليل انو الراجل دا كأنو معاهو زول تاني التقراهو ليهو في كتبو في جيهة و البيسوي فيهو أو السواهو في جيهة و عموما بعد مرق من هسي شكلو من كافوري لي التجاني الماحي عِدل، نقد من ما كنا في الجامعة بيوزع لينا في ورقة "الجمود في الماركسية" و لغاية هسي ما قدر "يسيِّح" حاجة و لا قدر يطور مفهوم أكثر معاصرة و نفاذ من الماركسية برغم الاجتهادات البكون مر عليها عند "لوكاش" و "ألتوسير" و غيرهم، الاتحاديين لغاية هسة متورطين في بعضهم و كل يومين واحد يقطع جزو من الحزب معاه زي 13 نفر و يعملو جناح..
طبعاً دي كلها مقدمة لأنو مع العبقرية الصباحية استغربت لانو الناس دي بتسوي في شنو لأنو الحل لمشاكل البلد لقيتو واضح قدامي "بتأثير العبقرية" و استغريت انو السادة الساسة القاعدين فوق ريسينا 50 سنة الواحد ما تكون مرت بيهو لحظات عبقرية زي دي في اي اتجاه، البلد الكبيرة دي و المنتوعة ناس و مناخات و غيرو الأساس فيها التنوع و الإختلاف عرقياً و دينياً حتي في اطار الاديان المختلفة و "أيديولوجيا" و "اي حاجة" صعب جداً انو خلال أي فترة نحاول نخلق من التنوع دا غير "خُشاف" (مُش يا نادر) الفكرة الأساسية انو نخلي التنوع دا في حالو تماماً و نبتعد من أي تأسيس وفق واحد من أركان التنوع دا نخلي كل اتجاه يعبر عن نفسو تماما و بي حرية تامة دا طبعاً "في إطار" شكل فيدرالي تام للأطراف يعني الإقليم "الولاية" تكون "شبه دولة" مستقلة بدستورها و برلمانا و شرطتها و جيشها و قوانينها و غيرو نموذج شبيه بالنموذج الأمريكي للتشابه الكبير في كم كبير من التفاصيل بين السودان و الولايات المتحدة... مشكلة اساسة ديل انهم خلاص موديلات انتهت out of CONTEXT تماماً و ما ممكن يقدموا شي جديد لكن المشكلة الأكبر انو مافي اجيال وسيطة قدرت تطلع من جلابيبهم لأنهم أساسا ما كانوا دايرين زول يضايقم،
دات كلو كدا زي فزلكة تاريخية كدا و تأسيس
الوضع الراهن الحيحصل شنو طيب
الحكومة الموجودة دي مع تحالفا اذا كان ممكن يتسمى تحالف مع الحركة الشعبية بعد اتفاقية السلام الخيارات و الإتجاهات برضو شديدة الصعوبة، طبعاً السودانيين مستبشرين بي جون قرنق جداً مع انو هو ما جاي من أورانيوس ولا نبتون أو جدو توماس جيفرسون و الكان بيسويهو في الحركة الشعبية و قاعد يسويهو مع ناس لام اكول و ريك مشار و غيرهم بعهد منتصف الثمانينات و في عقد التسعينات ممكن يكون مؤشر واضحخ عن منو جون قرنق و ممكن ننتظر منو شنو و هو مُخلص و منقذ ولا لأ... طبعاً دا ما تشاؤم لكين الناس التكون موضوعية شوية....
"الجماعة بتاعين الحكومة" عمر البشير دا طبعا بتتفقو معاي انو برضو out of CONTEXT برضو و بتبقي المشكلة ما مشكلة فكرة حزب الموتمر الوطني بتبقي حكاية رؤية علي عثمان اللي هو اكثر براغماتية من شيخو الكبير زي ما هو زاتو وضح ليهو و وراهو ليهو practically المشكلة انو هو بيبقي في ظل سياسية رزق اليوم باليوم الشغال بيها دي بعيد عن فهم المخاطر الممكن تواجه الوضع الموجود الشديد الحساسية دا و القابل للانفجار في أي لحظة و الممكن يؤدي لي خيارات ارهاصاتا واضحة جداً للمصاب بي عبقرية زي العندي دي، ما بعيد اصلاً الحصل في توريت في خمسينات القرن الماضي يتعاد تاني في ظل القهر و الغبن البحس بيهو الشعب الجنوبي "العادي دا" تجاه الشماليين تحديداً و دي واحدة زي ما قلت من اسباب تغليب واحدة من اتجاهات التنوع... انو الآخر زي ما تم أقصاؤو ما حيكون قدامو خيار غير الاقصاء المضاد و طبعاً السيناريوهات الموجودة حاليا في الساحة كلها مغرقة في التفاؤل "ما عارف الناس ديل ما استراتيجيين ليه" و السودانيين عموما حتى فكريا شغالين بي حكمة "رزق اليوم باليوم " و ياخي فال الله ولا فالك و كدة...
نواصل في حالة حدوث انبثاقات عبقرية لاحقاً
حكمة أخيرة قبل ما العبقرية تفك:
ابدأوا الديمقراطية من ذواتكم تجاه الآخر، و لنلبس "نظارات" نتظر للآخر دون اعتبارات عرقية او دينية او whatever و لا يمكن لشخ ص أو حزب غير ديمقراطي أن يمارس ديمقراطية صحيحة
ثم لندع للديمقراطية فرصتها فنحن علي الأقل لم قدمنا بني هذا الوطن قربانا لها موتاً و فقراً و فاقة
|
|
 
|
|
|
|
|
|
|
|
Re: ذات صباح خرطومي "عبقريه صباحية " (Re: Mohammed Elhaj)
|
قلت لي الخشاف والتنوع ؟؟ يا حليلك يا محمد ذكرتني أيام ويا لها من أيام هناك على ربا البلد الجميل ...
موضوعك فعلاً ينم عن عبقرية ووضح رؤية ... بس تعرف كتبت قبل فترة في نفس الاتجاه ولا حياة لمن تنادي فووووو البوستات راحت القاع بوستين بدل واحد في نفس خيطك ده ... جيتني بموضوعك ده في (الزمن الأليم وقلبي مثخن بي جراحات الهوى .. وعمري ضايع في متاهات النعيم) وكترت في لساني برجع تاني وشوف مريم بي هناك فاتحة ليها موضوع قدر الليلة وأمبارح عندي فيهو نضم كتيييير وما قادر أمشي عليهو بي مهلة ... (بالي مشغول) اليومين ديل زيادة على اليوم البقة ممحوق وكمية الشغل ووووو المهم زحمة كده مبالغة ...
واصل عبقريتك وبجيك وممكن بالمناسبة نستعين بموضوع مريم داك في نفس خيطك ده ... شوف التركيبة حتكون فعّالة بالمناسبة ... بس هي شايته في اتجاه تاني فيما يخص اتفاقية السلام وعودة قرنق ... بالمناسبة بختلف معاك في حتة واحدة وهي
Quote: لكن المشكلة الأكبر انو مافي اجيال وسيطة قدرت تطلع من جلابيبهم لأنهم أساسا ما كانوا دايرين زول يضايقم،
|
دي ما مشكلة كبيرة، وده ما بعني اننا نقيف فيها، هم أصلاً ما كانوا نافعين بالتالي البطلع منهم ما بيكون نافع، وهم في الأساس يلبسون قناعات بالية ما بتنفع مع عصر العولمة النحنا عايشين فيهو ده ... الحكومات في الدول بقت بتعتمد على شركات استشارات في كل المجالات ودونك دول الإمارات وقطر وغيرها من الدول المنطلقة بصورة واعية ومدروسة ووفق أسس علمية ... ديل نحنه كل العايزنو منهم ياخدوا راحة اجازة طويييلة والله في عقول شابة طموحة وواعية وفاهمة قضية البلد بدون تعقيدات الكهنوت ديل ... ببساطة الشباب الإندرش في الحقبة الماضية دي ممكن مع غرس قيم العمل فيهو ومن خلال المرارات التي تذوقها يعمل لبناء البلد ...
القضية يا محمد انو مافي زول عايز يعرف انو البحصل ده حلقة من حلقات المؤامرة الممتدة ضد هذا الشعب .. مرحلة انتقالية (وشوفها طويلة قدر شنو) تعتبر في رأيي هدنة للمؤسسة العسكرية عشان انقلاب جديد أو أي مفاجأة من المفاجآت الاتعود عليها الشعب المسكين والصابر ده ...
أؤمن على ما ذكرت في شأن الديمقراطية ...
Quote: ابدأوا الديمقراطية من ذواتكم تجاه الآخر، و لنلبس "نظارات" نتظر للآخر دون اعتبارات عرقية او دينية او whatever و لا يمكن لشخ ص أو حزب غير ديمقراطي أن يمارس ديمقراطية صحيحة
ثم لندع للديمقراطية فرصتها فنحن علي الأقل لم قدمنا بني هذا الوطن قربانا لها موتاً و فقراً و فاقة |
سؤال ... المثلث (البشير/قرنق/علي عثمان) لو حدث أن ألقت الديمقراطية بهم أو على الأقل بأحدهم خارج الحلبة، هل نتوقع رد فعل ينم عن إيمان بحق احتكام الشعب لصناديق الإقتراع والانصياع للخيار الديمقراطي ؟؟؟ حتشوفوا لو حصل الكلام ده .. ده ما (شعب معلم) متأزم وعايش تحت ويلات صفعات تأريخية بس واعي جداً ...
برجع تاني أكيد ودعوتك
| |
|
|
|
|
|
|
|
|
|
Re: ذات صباح خرطومي "عبقريه صباحية " (Re: نادر)
|
نادر
تحية طيبة
تُشبه هذا الصباح الخريفي الندي
( بعدين طمنا عليك انت كيفك ؟؟)
طبعاً ذكرتك أيام خُشاف سماسم مُش و الشباب "الجعان"، (بالمناسبة ناصر ضرب لي قبل فترة و سألني إذا عزمت الموجود هنا من أصحابو و لما عرف، قلت ليهو بضرب لي ابو "الزوز" لقيتو باع موبايلو و شكلو الزول داك اتقدّ من موضوع التلفونات البتجي ليهو دي، و "عوض شمارات" "مقفول" في شيكات ناصر قال لي" (أنا شكلي كنت مصاحب لي عصابة))
الموضوع الاتكلمت عنو ما لاقاني اديني في البوست دا لينك ليهو أو اسمو علي الأقل
نمشي لي موضوعنا مع انو العبقرية قلت شوية من الصباح
طبعاً اشارتك لي موضوع مريم ذكية جداً و الاتساق بينها و بين الموضوع دا وثيق، بس أولاً خليني أرد علي نقاط:
قصدت بحكاية القيادات الوسيطة دي عملية التغيير من داخل الأحزاب الموجودة نفسها يعني نفس العملية المقصود تحصل في البلد مفروض تحصل في الأحزاب دي أول يا نادر، تبقي مشكلتنا انو لسة في شباب بيكرسوا للمفاهيم الموجودة و السائدة حالياً بقبولهم لشكل الأحزاب الحالي مع أنهم يمنحون هذه الأحزاب شرعية بوجودهم فيها كأعضاء و بإيمانهم بهذه الشخوص، دا طبعاً بيجي من التأكيد علي أهمية (الأحزاب) طبعاً بقصد الحزب كمؤسسة ما الحواكير الهسي دي، و انت عارف شكل الأجيال الموجودة هسي عامل كيف، و ممكن يأثروا و شكل التأثير الجاي منهم ممكن يكون عامل كيف!!! و الكلام هنا بيرتبط برضو بي كلام قلتو أنا في بوست قبل فترة، دي المشكلة مين الوريث للساسة الموجودين " لأنو هم هسي أساساً خارج دائرة التأثير و مصيرم برضو يكونوا خارج السجل المدني كمان بفعل ديالكتيك الطبيعة،
Quote: مرحلة انتقالية (وشوفها طويلة قدر شنو) تعتبر في رأيي هدنة للمؤسسة العسكرية عشان انقلاب جديد أو أي مفاجأة من المفاجآت الاتعود عليها الشعب المسكين والصابر ده ...
|
طبعاً موضوع الإنقلاب دا متوقع جداً
و الحاصل هسة برضو في الجنوب من قبل الفصائل الكانت متحالفة مع الحكومة قبل الاتفاقية بيهدد بإنو كأننا يا عمرو لا رحنا و لا جينا...
دا الى جانب سيناريو طرحو واحد من مراكز البحوث الاستراتيجية التارعة لي الحكومة الأمريكية "حافتشو و أجيبو هنا" بيتكلم عن انو السلام الحالي دا "هش" و الناتج منو اما دولتين في حالة حرب أو دولة زي الصومال كدا او اسوأ
| Quote: سؤال ... المثلث (البشير/قرنق/علي عثمان) لو حدث أن ألقت الديمقراطية بهم أو على الأقل بأحدهم خارج الحلبة، هل نتوقع رد فعل ينم عن إيمان بحق احتكام الشعب لصناديق الإقتراع والانصياع للخيار الديمقراطي |
طبعاً إذا وصلنا مرحلة الانتخابات دي "السنة الرابعة" بدون ما يحصل واحد من السيناريوهات السابقة دي بيكون في مشكلة كبيرة
البديل
طبعاً فليذهبوا الى المزبلة من هم يحكمون الآن لكن من سينتخب الشعب
من هم البدلاء
البديل
تحياتي
| |
|
|
|
|
|
|
| |
Mohammed Elhaj
فيس بوك
تويتر
انستقرام
يوتيوب
بنتيريست