|
|
 هاشم صديق ... ضمير وطن لا ينام ... ويبقى السؤال ياتو ورقا اتمضا ؟؟؟؟؟؟
|
ياتو ورقاً اتمضا؟؟؟؟؟؟؟؟؟
ياتو ورقاً
اتمضا
وكان دوانا
من الأذى؟!
ياتو ظُلماً
اتنسى
بس عشان
مكَّاً ضحك
أو عشان
سِيِداً عفا؟!
ياتو خُطباً
في إضينّا
جَملّت في عيونّا
شينه؟!
وياتو تلفاز
ياتو رادي
ياتو راوي
ياتو زينه
لَبسّت عريانّاتوب
وبدّلت طعم(السخينه)؟!
وياتو حلماً
في عصورنا
ما صبح باللّت عجينه؟!
وياتو مركب
في بحَرْنا
طاش صوابها
وهدهدت أعصابها
مينا؟!
وياتو راجلاً
بالبشارة
جانا
من أقصا
المدينه
و(بالبشاورة)
كان مسح
سبورة الرحلة
الحزينه
وكان غرس
في الليل
بشارات الرتينه
وشَفانا
من جوع
أو حفا؟!
ياتو مسرح
ابتدا
واسيادنا
ماكانوا الفوارس
ونحنا كومبارْس
الحوادث؟!
وياتو والي
في المنابر
ما خطب فينا
ونَهَر
مليون شهر
ونحنا قاعدين
في البنابر
قدامو
زي شُفَع مدارس؟!
وياتو دستور
ما صِبِح في راسنا
قمبور
وياتو اعلان
أو بيان
ما انْغرس
في حلوقنا أحزان
وياتو لحماً
للعضام
يوماً رجع
وياتو آذان
يا عسس (مالطا)
انسمع
وياتو صفاً
إنقسم
وعاد يتمم
وانجمع؟!
وياتو رُتبه
وياتو قُبه
ما بقت
في اللفّه كُبه
وياتو صوتاً
من وجع
دمدم هتف
ما انقطع حبلو
ونزف
وبالأوامر
والكوامر
اتنفا؟!
أحلام بتنقح
طول دبابيس
الليالي
ولما جمر الدنيا
يصبح
وما انجبر
يا دنيا خاتر
لسه لافّانا
المواجع
والصفافير
والمواتر
*************
سِيِداً مرق
سيداً رجع
مكَّاً دخل
مكَّاً طلع.
شيخاً لَبَد
شيخاً نَبَل.
سيفاً ضِحِك
كشّر كَتَل.
ورقاً جبل
ورقاً سَهَل.
صِدْقَاً أَفَل
كِضباً لمع.
صنماً وقف
صنماً وقع.
كفاً عصر
كفاً قلع.
************
والأماني
لسه في حال
(الصواني).
لقمه طاعمه
وبي كرامه.
حبة احساس
بالسلامه
رجعه لي قيف
الشهامه
مَرْقة
من (عصر)
القيامه
فرحة ما تكمل
ندامه.
لاها قصراً
أو دواير.
لاها بستان
أو مناظر
لاها (مول)
في (وادي شنقول)
وكبري طاير
في (القماير)
لاها أموال
في الخفا.
أعفونا
من كُتْر (التحالف)
و (التخالف)
والشراكه
والشياكه
والمواثيق
والتواثيق
والورق.
كم مره
أذَّنا الفَجُر
قبال نفيق
شَفَقُو انسرق.
كم مره
بشرتو الخُشوم
أكلت عديل
مُر الصفق.
كم مره
جربنا (البيان)
كم مره
جبناكم عيان
نِشِف البلد
قلبو انحرق
************
الشعب وين
يا مؤمنين
ودستورو
في حَله انسلق؟!
و (القسمه)
في ثروة منو
والشعب
بي جوعو انشرق؟
و(النسبه)
في سُلطة منو
و(سُكرنا زاد)
(بالنسبه)
في الدم انطلق.
........
انتو الفوارس
والمكوك.
الدايْر يبيع
تدوهو
(في جاهكم يلوك)
واللسّه
ماسك في الجَمُر
ياريتو بس
يلقى النبق
والجوع يقَطِّع
في الحشا
ألفين سنه.
أدونا بس
حق الصَبُر
خلونا
من غش الكلام
وعد الرخا
وليلة القَدُر.
خلونا
من كضب
البشاير
في القصايد
والجرايد.
أدونا بس
حق الفطور
أعفونا
من حق (العوايد)
و (النفايات)
والدوا
وكفايه
(فك عكس الهوا)
***************
يامؤمنين
الشعب وين؟
تاكلو الثمر
والشعب تدوهو
النوا؟!
خلونا
من حشد المواكب
بي أجاويد الجرايد
والإذاعه
والإشاعه
وبي مناشير
الوظيفة.
كم مره
دقيتو النحاس
في لمبه
طقّت وطرشقت
أو (زره) جاتكم
حتى لو كانت
خفيفة
أو (نِبْلَه) ناشت
باب جنابكم
وعطسه قَدّت
للرهيفه
أو هاجسه
مرقت
من عقول
عَسَس الخليفة.
**************
خلونا نمرق
من هدومنا
ونغلي نهتف
للكرامه
والشهامه
والحساب
الفي الكتاب
وللرغيفه
وللحليفه :
- مافي جُحراً
تاني بلسع.
ومافي عذراً
للفوارس
تاني بشفع.
ومافي ومضاً
في عقولنا الصاحيه
نلقاهو انطفا
ومافي رجعات
تاني للشوك
والحفا.
ورونا كيف
ننسى الكوارث
يا فوارس؟
الإنكسار
الإنشطار
الإنحسار
الذِلّه لي ناساً
كِرام
موت العُروض
دك الفروض
بلْع الحرام.
ورونا كيف
بس لينا يوم
(بعتوا الترام)؟!
ورونا كيف
لمعت وشوش
كبرت كروش
وأنحنا ناس
ربط الحزام؟!
كَسَر الخراب
مِرْق البلد
حتى النفوس
صبحت حطام.
أدونا بس
فَرْق العُمُر
سووا المعاش
حبة لحم
فوق العضام.
أوضحكه
من جوه القَلِب
أو لمبه
في جوف الضلام
ولو أصلو موت
أدونا موت
حق الكِرام
**************
خلونا
من جنس التخاريف
في الثقافه
ومهرجانات السخافه
أدونا بس
حبة (كُنافه)
***************
ياتو حرفاً
يوم هتف
بي غُبنو
أو صادم وقف
أشّر
على حق (اتلهف)
أو على خَطْف
الشَرَف
أو غَنّا
للناس والشَمِس
واتحدى للظلمه
وعزف
وما اتخنق صوتو
ونَزَف؟!
***************
حريه وين
يا مؤمنين؟!
صوتنا وين
يا موحدين؟
الشعب وين
في السُلطه
يا أُمة محمد
ويا يسوع؟!
(القسمه)
في المال والحُكُم
ولاّ المظالم
والدموع؟!
**************
يا شراكه
يا تحالف
يا (تخالف)
يا شياكه
يا قِباب
يا رهاب
يا خطابه
يا شيوخ
يا شلوخ
يا مهابه :
- انتو الفوارس
في المسارح
ونحنا كومبارْس
الغلابه.
انتو أبطال
القصص
نحنا التلاميذ
في الحصص
انتو الأكابر
في المنابر
ونحنا
حُراس المقابر
بِتْصَدِقوا
أو تضحكوا؟!
قسماً عديل
يا نبقى
نحنا الساده
والحق والقياده
وانتو خُدامنا
وزياده
نطلع نكون
نحنا المنابر
والإمامه
أو تقوم بينّا
القيامه.
الشعب ما ضحكه
وقمامه
والصَنّه
ما بر السلامه.
***********
يا ناس كفايه
من خراب
نُبل الضماير
والهواجس
في البشاير
ومن طلاسم
جايه باكر
ومن تعاويذ
(الولاده)
ومن كضب
يوم السمايه
ومن تهاليل
البدايه
ومن عويل
خط النهايه
ومن صراع
كل الديوك
للكراسي
وللولايه.
يا (مبيور)
ويا (جَلاّبه)
انحنا الشعب
سَدْرَنا ولّع
وكَرْكَرْ تَب.
حتفاوضونا؟!
ولاّ نولِّع
ونبدا حرابه
نَخُش الغابه؟!
ياتو ورقاً
اتمضا
وكان دوانا
من الأذى؟!
وياتو ظُلماً
اتنسى
بس عشان
مكَّاً ضحك
أو عشان سِيِداً عفا؟!
هاشم صديق
10/7/2005م
(نقلا عن سودانيل 16/7/2005) http://www.sudaneseonline.com
|
|
 
|
|
|
|
|
|
|
 Re: هاشم صديق ... ضمير وطن لا ينام ... ويبقى السؤال ياتو ورقا اتمضا ؟؟؟؟؟؟ (Re: NAZIM IBRAHIM ALI)
|
ناظم
ياقريبي ...
التحايا العاطرات لك وللاسرة والشوق
هاشم
ضمير امة ، يتكلم لغتها ويحكي وجعتها .. انه المعدن الصافي لشاعر بنطق بلسان حال الشعب لا تكسره المهانات ولا يقف بين بين ... الكلمات والخطاب السياسي العالي تعبير عن ازمة وطن ما بفهموها الا القلبهم فعلا على السودان وشعبه زي هاشم صديق ..
قصيدته دي موقف ... ما ادس عليك لو قلت ليك خلتني اراجع مواقفي من احلام جميلة لي واقع لزم الانتباه ...
شكرا عزيزي لمرورك الغالي
ويبقى السؤال ياتو ورقا اتمضا ؟؟؟؟؟؟؟؟؟؟؟؟؟؟؟؟؟؟؟؟؟؟
| |
|
|
|
|
|
|
|
|
|
Re: هاشم صديق ... ضمير وطن لا ينام ... ويبقى السؤال ياتو ورقا اتمضا ؟؟؟؟؟؟ (Re: زهرة حيدر ادريس)
|
زهرة ..
التحايا والشكر الجزيل لمرورك الرائع..
من منا لم يعشق كلمات هاشم صديق ويرددها ... انه صادق جدا في كلماته التي يدهشك نظمه لا ببراعة المدرك لاحساسه وقيمة كلماته التي يكتب ...
زي ما قلت انه واحد من اولئك الذين لم تحمل اكفهم غبار ...
ساحاول ان اجعل من هذه المساحة نافذة للحديث عن شعر هاشم ولنشر بعض القصائد الجميلة لهوالدعوة لك ولكل الناس لتطوير الصفحة بكل ما هو رائع لهاشم ...
مع تقديري
أيمـن
| |
|
|
|
|
|
|
| |
Aymen Tabir
NAZIM IBRAHIM ALI
زهرة حيدر ادريس
فيس بوك
تويتر
انستقرام
يوتيوب
بنتيريست