|
|
 شيوعيين و اتحاديين و كيـــزان .... واخرون
|
المراقب للاحداث السياسية فى السودان لا يستطيع ان ينكر ان هنالك تخبطا واضحا من قبل قادة التنظيمات السياسية وغياب تام للخط السياسى الواضح والعمل بقاعدة (رزق اليوم باليوم) من كان معارضا للاتفاق امس اصبح مؤيدا اليوم ومن كان مؤيدا اصبح معارضا .. انتو الحاصل شنو بالضبط .. نسمع سكرتير الحزب الشيوعى بيقول انه ,(التجانى طيب قال لى التوقيع تم بضغط من الحكومة المصرية ) ونجد فى موقع الميدان ايضا (أكد نقد أن لجنة التفاوض من التجمع بذلت جهوداً كبيرة في إطار التفاوض، ولكن الوفد الحكومي لم يستجب لكل مطالبها بسبب تقيد الحكومة بتلك الاتفاقات. وأضاف ان الاتفاق (القاهرة) ليس له غطاء إقليمي أو دولي مثلما لنيفاشا، ولكن ستكون هناك لجنة ثنائية لمراقبة تنفيذ الاتفاق من الحكومة والتجمع.) ليس له غطاء اقليمى او دولى ده بيعنى انه ممكن نزوق منه .. ولا شنو
ده كلام نهائى ما مقبول من تنظيم بقامة الحزب الشيوعى لولا غياب الخط السياسى والمبدئية من قبل القادة الشيوعين لخرج الحزب الشيوعى من التجمع الوطنى دون ان يوقع على الاتفاقية وجعل معارضتة اليوم ممكنا .. ونجد ايضا ان السيد محمد عثمان الميرغنى اكد ان التجمع الديمقراطي المعارض في السودان الذي وقع اتفاق مصالحة مع الحكومة السودانية في القاهرة أنه لم يحسم بعد مشاركته في السلطة. كما قال ايضا أن التجمع سيعود إلى الداخل للمشاركة في الحياة السياسية.
كلام مبهم وما واضح .. المشاركة فى الحياة السياسية دى بتعنى شنو معارضة ولا حكومة ؟؟؟ وهنالك اطراف اخرى فى التجمع قالت الاتى .. (اتفاق القاهرة اتفاقا منقوصا وتوعدت باستخدام الحل العسكري للضغط على الحكومة السودانية) ديل خلاص حسموا موضوعهم على ما اظن ... اتمنى ان تكون لهم القدرة على ذلك ؟؟؟
هنالك طامة كبرى حيث قال وزير خارجية السودان ( الولد الممسح ده ) الاتى (وصف مصطفى عثمان إسماعيل حكومة أسمرا بأنها نظام "شاذ وشمولي وفاشستي لا تنفع معه مقولات حسن الجوار"،) قول واحد ..
(أوضح إسماعيل أن أعضاء بالكونغرس الأميركي إضافة إلى اللوبي الصهيوني يدفعون نظام إريتريا إلى التحرش بالسودان، وأرجع ذلك إلى موقف بلاده المبدئي من قضية التطبيع مع إسرائيل.) قول اثنين..
( ولوّح إسماعيل بإمكانية استخدام ورقة اللاجئين الإريتريين الذي قدر عددهم داخل السودان بنحو نصف مليون، وقال "لو سلحنا عشرة آلاف من اللاجئين الإريتريين المعارضين لدخلوا أسمرا" مشيرا إلى أن نظام إريتريا الحالي دخل إلى أسمرا على دبابات سودانية.) قول ثلاثة ... عليكم الله ياجماعة شوف الولد ده بيقول شنو ؟؟؟
1/ يعنى خلاص الجبهة الاسلامية هى لا شمولية ولا فاشـسـتية .. ياخى اخجل ياوزيرنا ؟
2/ طوالى نحنا فى حالة اللوبى الصهيونى ده يعنى زمان كان الحكومة كل ما تنضغط بتقول (الناس ديل قاصديننا فى دينا ده).. لكن الظاهر لى من شب على شيئ شاب عليه .. انت اللية فتى الامريكان المدلل يا وزيرنا يعنى الشيئ البتعمل فيه انت عشان خاطر امريكا مافى واحد قدمه قبلك انت ما السباق للخير ..
3/اما الاخيرة دى شكلها اعلان حرب يعنى كلام السياسة كمل .. تمام .. لكن ده وقته .. وبتفتخر بانه النظام الاريترى دخل اسمرا بدبابت سودانية .. انت نسيت نفسك انك وزير خارجية ولا شنو .. الكلام ده ممكن نسمعه من عبد الرحيم محمد حسين ولا من البشير لما يكون بيرقص فى عرس شهيد .. لانه ما بنندهش وبنقول دى حرارة جعليين ساى لكن لما يجى منك بنقول ليك الكلام ده بيشبه الجبهه الاسلاميه لكن ما بيشبه وزارتك
ارجو ان لا يظل الحال هكذا طويلا وان تنتبه التنظيمات لما هى عليه الان ..
الله يصبرك ياالشعب السودانى ...!!
دمتم
المصادر :- 1/ http://www.midan.net/
2/ http://www.aljazeera.net/NR/exeres/767066DE-78AD-484C-814E-21765EBF8818.htm
عـلاءالديــــــــــن
|
|
 
|
|
|
|
ala elfaki
حيدر حسن ميرغني
فيس بوك
تويتر
انستقرام
يوتيوب
بنتيريست