كتب الكاتب الفاتح جبرا المتوفرة بمعرض الدوحة
|
|
 لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه توفي
|
استقبلت واستدبرت ما يجري في ساحتنا السياسية،فرأيت أمرا عجبا،كل احزابنا السياسية التقليدي منها وما يدعي الحداثة،يجثم علي صدرها رؤساء مدي الحياة،بلغوا السبعينيات وغازلوا الثمانينات،ولا زالوا يتمتعون بصحة جيدة..
الحزب الوطني الاتحادي،رئيسه منذ الستينيات هو السبط المبجل سيدي ،محمد عثمان الميرغني..وحتي اكون دقيقا ..(ما سيدي انا..سيد اهلي ..باقي انا عترة اتحاديين وبعض من ختمية)..منذ الستينات..لم تطاله يد التغيير،ولم يتزحزح من مكانه قيد انملة..لو كان المبرر لبقائه..انه صاحب سلطة روحية ..فليترك السلطة الزمنية للتعاور والتداول بين من ليست لهم قداسة..والغريب انه يتمتع بصحة جيدة ..لم تتناقل الأخبار يوما..انه مريض او المت به وعكة..لم يدخل اي دار للاستشفاء حتي نعاوده وندعوا له بالسلامة وطول العمر..
في الجانب الآخر..سيدي الحبيب الامام (وحتي اكون محددا سيد نسابتي)..السندكالي المستدام..ايضا هو رئيس لحزب الامة منذ الستينيات..ورغم انه من ادعياء ..لا قداسة مع السياسة..حين لم يكن له سبيلا للقداسة..بحياة عمه الهادي المهدي..وهو الآن يجمع ما بين السلطة الروحية والزمنية والعاطفية..فهو للاميين..رئيسا ،اماما وحبيبا..وما يدهش انه يتمتع بصحة جيدة..بل مائزة..رغم انه تجاوز السبعين خريفا..الا انه يركض كما الوحوش في الغابة..ويمتطي صهوات الجياد..وان خطا خطوة ..تخاله بعيرا من هولها ..وطول امدها..ولاحتجت (لجكة) ..للحاق به..لم يرو راو يوما ان السيد قد لزم سريرا ابيضا..او ان الملاريا قد داهمته..
هذا ما كان من شأن الاحزاب التقليدية او الطائفية..اما احزاب الحداثة ..فهي لا تعدو الا ان تكون وجها آخر من العملة..
سيدي محمد ابراهيم نقد..(سيد اصحابي)زعيما اوحدا للحزب الشيوعي بالسودان..منذ سبعينيات هذا القرن..لم تطاله يد التغيير..ويتمتع بصحة جيدة جدا جدا..ويمارس رياضة المشي..
سيدي(هسه دا سيد منو انا ما عارف) الشيخ حسن عبد الله دفع الله الترابي..زعيما اوحدا لحزبه منذ ستينيات هذا القرن..لم تطاله يد التغيير..الا بالانقسام الاخير..وايضا ظل يتمتع بزعامة من انقسموا معه..ايضا يتمتع الرجل بصحة جيدة..بأستسثناء حادثة كندا..لم يضاجع الرجل فرش المصحات..وعجبا لقد صرحت زوجته انه يمارس بعض التمرينات الرياضية..
اتساءل..لماذا لا يموت هؤلاء؟لماذا لا يمرضون؟لماذا لا يبارحون اماكنهم؟لماذا يتمتعون بصحة جيدة علي الدوام؟ هل الرئاسة هي سر هذا النعيم الذي هم فيه؟
من هم دونهم في العمر ..اصيبوا بارتفاع ضغط الدم..السكر..الفشل الكلوي..امراض القلب والشرايين..ومنهم من اصبحت حركته متعذرة..
الا يكون مستغربا..الا نسمع رسميا ..من ناطق رسمي ..او حتي ممن رفض ذكر اسمه..ان واحدا من هؤلاء السبعينيين..قد اصابته ملاريا..او المت به وعكة خفيفة..او علة الزمته سرير المستشفي..او علة لم تمهله قليلا؟؟
نعلم ان من يكون مرهقا او مهموما ..تنتاشه العلل..الا ان هؤلاء يتمتعون بالصحة الجيدة ..رغم انهم يزعمون التصدي لهموم عموم اهل السودان..ويزعمون انهم عانوا من طول الكفاح والنضال..
وبما انني مغرم بتمام الصحة وموفور العافية..وطامع في عمر مديد ..قررت ان اكون رئيسا لحزب ..شرطا ان تكون الرئاسة ..مدي الحياة..ولا خوف فأنا خطيب (لا افأفئ ولا اثأثئ)..وأنا ايضا حسيب نسيب(لو ما مصدقين ارجعوا لكتاب عون الشريف قاسم في هذا الشأن)..واعدكم انني سأكون رياضيا مطبوعا..خاصة ان لي خلفية في هذا الصدد ..اذ كنت العب كرة القدم ..ومنحني الاتحاد العام السوداني ..شهادة معترف بها في تدريب كرة القدم..واعدكم انني سأمارس ضربا جديدا من ضروب الرياضة لم يسبق لاحد من هؤلاء ممارسته..ركوب الهجن..ولي مزية ربما لم تكن لاحدهم..انني ماهر في استخدام الشوكة والسكين..(اها رايكم شنو؟؟)
سوء حظي ..(دايما ملازمني سوء الحظ دا..في الكبدة القي العضم..واي حاجة تعتر لي)..سوء حظي جعلني..اتخذ خيارا سياسيا خاطئا..فقد كنت ضمن حركة مؤتمر الطلاب المستقلين..وخرجنا بها من الجامعة لنؤسس حزب المؤتمر الوطني،الذي اصبح لاحقا حزب المؤتمر الوطني المعارض ،ثم مؤخرا المؤتمر السوداني..كنت من صقوره القدامي..من مؤسسيه..واكاد اكون صاحب قدح معلي في تأسيسه..الا ان الاخوة في المؤتمر ..سامحهم الله ..لم يختاروني رئيسا..واختاروا الاستاذ عبد المجيد امام..فأسررتها في نفسي..قلت محدثا نفسي..(يا ود اعمل العملو الترابي في الرشيد الطاهر ..والعملو ابو الصديق في عمامو الهادي واحمد)..يبدو ان اهل المؤتمر مكشوف عنهم الحجاب..فقد قرأوا ما يدور في صدري..فأصدروا فرمانا..يقضي بضرورة ..اختلاف الحزب عن غيره من الاحزاب الاخري لتكون الرئاسة موقوتة..(قلت يا ولد مافي مشكلة..البد لمن تمسك فيها..يعني اتمسكن لمن تتمكن.. وبعدين غير النظام الاساسي..ولضروارات المرحلة ولما تمر به البلاد من منعرجات خطيرة..مدد ولاية تانية وتالتة ورابعة..وبعدين الجماعة بصهينو بخلوك العمر كلو ..وبذا يكتب لك العمر المديد ..الصحة الجيدة..والسلطان المستدام)..حتي هذا الحلم ..ابت الاقدار الا ان توئده..فقد توفي رئيس الحزب الي رحمة مولاه(الله..دا شنو الحزب المنحوس دا..يوم واحد ما سمعنا لينا رئيس حزب مات الا حزب السجم دا..بيني وبينكم من يومها وانا خايف)..حدثت نفسي ..حديثا مطمئنا..كشاكلة الآجال بيد الله ..وكل نفس ذائقة الموت ..والي ما ذلك من تطمينات..بعد المرحوم عبد المجيد امام..جاء حافظ راشد..ودكتور الفاتح..والباشمهندس عبد الرحمن يوسف..واخيرا ابراهيم الشيخ ..ويبدو ان هؤلاء الفتية صادقون في دعواهم..ستكون الرئاسة موقوتة(اها شوفو حزب الجن دا)..يعني ليست لدي فرصة لرئاسة مستدامة..من اجل سلطان ،صحة وعمر مستدام..
لذا ادعوكم مخلصا..ان تكونوا حزبا جديدا..وتعقدوا لي لواء رئاسته مدي الحياة..هذا من اجل ابنائي(اريد ان احضر جديدهم)..(ليكم علي لا بهش ولا بنش..الدايرنو يتقال اكتبوا لي في ورقة.. انا بقولو من غير تغيير..واصرح وقت الطلب..واعمل تحت الارض..واصالح اي عسكري يقلب الحكومة..ما بقصر في شي وما بودر ليكم عوجة..بس انا داير لقب رئيس حزب ..عشان الصحة ..والنجاة من الامراض..وطولة العمر)..ارجو مخلصا ..ان تبحثوا هذا الامر..ربما لم اتمكن من التداخل معكم في هذه الفترة..اذ انني سأكون في اجازة لمدة شهرين..سأكون فيها بعيدا عن الجهاز..
لكم مودتي
|
|
 
|
|
|
|
|
|
|
|
Re: لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه (Re: saif khalil)
|
العزيز سيف سلامات ...
الواحد واقف قريب ساعة داير ليهو كلمة يخاطبك بيها ما لقي (ريس مابتشبهنا)(شيخ ما بتلقاها عندنا) عموما كان كايس السكري والضغط تعال أبقي رئيس حزب المؤتمر السوداني لأنو إنت عارف نحنا قاعدين نعرض في كل البلاوي القاعدة في البلد دي وبدون غطغطة مما سيسبب لك هذه الامراض وفوق ده معاك ناس لا بيرضيها العجب ولا الصيام في رجب يورك الويل وسهر الليل كل كلمة عندهم بمقدار وفوق ده النحدثك في المؤتمر العام السابق البقي فيهو إبراهيم الشيخ رئيس كان المرشح معاه للرئاسة نضال حسن حسين يعني كان ما الدورة الجاية البعدها رئيسنا مرة تهز وترز ......
وعمر مديد وصحة مستدامة
| |
|
|
|
|
|
|
|
|
|
Re: لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه (Re: بشري الطيب)
|
الماجد بشري الطيب
تحياتي
يا زول انا رئاستكم تب ما دايرها..انتو يا خوي اول رئيس ليكم انتقل الي رحمة مولاه..تاني رئيس افلس..تالت رئيس شاب راسه وشاربه ولحيته.. للرشرش عينو الشيب ضربو..وعبد الرحمن يوسف الله يكون في عونو..وما عارفين الجاي لابراهيم الشيخ شنو..انا جني وجن المرض،الشيب ،الفلس وكان لقيتلي بلدا ما فيها موت اها ديك بلدي..يا خوي انا تب رئاستكم ما دايرها..هسه اتو اتجاوزتوني كم مرة..شوف حتي ابراهيم الشيخ ..جا ورا وحجز الضرا..لا قلتو الزول مؤسس..ولا قلتو الزول دا اتسجن عشانا..ولا قلتو الزول دا كتب لينا..ولا اتكلم باسمنا..ولا اي حاجة ..كلو خليتو غادي..وجبتو الناس الجو بعدنا..هسه بذمتكم انا ..كان كنت في حزبن تاني ما كان بقيت حاجة اكبر من رئيس دي ..كان بقيت راعي،امام،مولانا،رفيق،مناضل،امام،ويمكن اكون بقيت حبيب ذاتو..اها شوفو ضيعت عمري معاكم كيفن..والبوجع بالجد ..انو رئاستكم الواحد ما بتهني بيها ..يومين تلاتة وتجو تقولو للواحد عايزين نغير..سنة الحياة..تجديد الدماء..الدورة انتهت..اتاحة الفرصة..تجديد الوجوه..وهسه شوف جنس ناس نضال حسن حسين دي الواحد يسوي معاها شنو؟
دا طبعا..غير كلامكم الكتير وعدم تقديسكم للزعامات..الواحد يجي الليلة للحزب بكرة يمسك ليهو واحد عمرو في الحزب خمسة وعشرين سنة..وحتي الرئيس ذاتو يمسكو..وهاك يا تلتلة ..الفوضك منو؟انت ما رجعت للمجلس الفلاني..انت ما اجتمعت باللجنة الفرتكانية..والكلام دا ما مجاز..القروش دي جبتوها من وين..سبحان الله مفالسة ما دايرين الغنا..
مرة في الجامعة..في انتخابات الاتحاد..شفنا الناس دعاياتهم بأوراق المانيلا..الورق المطبوع والمصقول..الفيديو..والبروشورات..قلنا نقادرهم شوية..بدل ورق الجلاد الاصفر داك..مشينا جبنا لينا مانيلا..ولفينا لينا كتيبات بالرونيو..الاسس والمرتكزات..البرنامج الانتخابي..هي طبعا ما زي بروشورات الاخوان..
اها جماعتنا بدل يشكرو قيادتهم ويقولو لينا بارك الله فيكم..دعو لاجتماع قاعدة..وهاك يا زرزرة القروش دي جبتوها من وين..
حقيقة الامر ان القروش ..كانت مالا خالصا للاخ الماجد حافظ بابكر راشد..الذي كان يمارس تجارة المحصول..وقد ذهبت معه لزريبة العيش الي ان اخذ ذلك المال..
لم نستطع الاجابة..لا ن حافظ يكره ان يقول انه قد دعم التنظيم ..فقد كان حساسا تجاه ذلك..ونحن ممتنعين عن الاجابة ..وبعض منا ..يقول تبرعات..آخرين دعم الخريجين..
الجماعة حسبوها لقوها ما لافقة..بعضهم بدا في الكلام الما ياهو..انتو بعتو التنظيم..انتو في جهة خارجية بتدعمكم..
اها ..باقي الكلام الما ياهو ..ما بعجبني..قلت لهم بطلو قلة الادب القروش دي حقت حافظ وانا مشيت جبتها معاه..وهي (لو لم تخني الذاكرة 400 جنيه او 4000 ).. لو رافضنها هسه ختو الختة ورجعوها لي سيدا..واللا اسكتو..اها جماعتك حط الطير علي رؤوسهم(باقي هم عندهم شوية اعتبار لحافظ لانه يعتبر المؤسس)..وقعدو في الاعتذار..وكان تكلمونا ..وكان..وكان..قلنا ليهم الراجل فاعل خير..ما داير يحبط عملو..وما داير يحس انو سيد التنظيم..
يا خوي رئاستكم تب ما دايرها..اها عشان كدي انا ناشدت البورداب يسولي حزبن اتسنجك في رئاستو مدي الحياة...
| |
|
|
|
|
|
|
|
|
|
Re: لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه (Re: saif khalil)
|
الاخ الماجد سيف
لك التحايا
تعرف يا سيف المعادله واضحه جدا
بى هناك الزعامات بى تقتل القواعد
اما بى هنا القواعد بى تقتل الزعامات او على الاقل تحل عليهم
اللعنات والامراض حماهم وحمانا الله
واظنك ولى ثقتى العاليه جدا فى فطنتك تعرف السبب شنو ؟
على العموم لوبقيت عايز الزعامه نحن ما عندنا مانع نجيبك ليها جرى
لكن شيل شيلتك
كدى انظر ليها من وجهت تخيب الظن يمكن تقدر تصل لى حاجه
ولو وصلت لى نتيجه اتفقت معاى فيها بالله عليك ورينا العمل يكون
كيف ... باقى انا ذاتى بحلم لى بى رئاسه
| |
|
|
|
|
|
|
|
|
|
Re: لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه (Re: mohamed elshiekh)
|
الماجد/ود الشيخ
حبابك الف
يا خوي انا شبعت تب من ديمقراطيتكم الفايتة الحد دي..خلوها معقولة كدي..شايلين الهم بالجد بالجد..والجماعة نص نص..وتراهم سمان وامان..آخر رياضة..والواحد راسو ما بوجعو ..وكمان واصلين للحكم ..في الانتخابات بالاشارة..وفي الدكتاتوريات بالمصالحة..وتوضيحاتها..
ياخوي زعامتكم دي تب ماني دايرها..الفلس ما بحملو ..الشيب مكجنو..المرض بيني وبينو الله..والموت داك ما تجيب لي طاري..اها رؤساكم دا حالهم فلس،شيب،مرض وموت..البجيبني لزعامتكم شنو؟
وكمان حكاية الزعامة الموقوتة دي ما نافعة معاي..قبال ما اتهني تجو تقولو لي دورتك انتهت وعايزين نجدد الوجوه..لا يا خوي..اها بعدين ابقي رئيس حزب بالمعاش ولا شنو؟
وكمان حكاية المزاحمة دي ما بتنفع معاي..يعني ناس نضال ديل البمسكن مني منو؟
هسة سمعتو يوم واحد..في زول اتطاول وقال عايز يترشح مع ابو هاشم..ولا ابو الصديق..ولا الترابي ..وحاج نقد..
لو حلمان ليك برئاسة في مؤتمر الجن دا اقنع منها..وفي حزب البورداب دا ..لا تزاحمني..يا زول انا كايس طولة العمر ..
| |
|
|
|
|
|
|
|
|
|
Re: لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه (Re: saif khalil)
|
الماجد جد جد سيف
كيفنك
أها جاك الزول السابقك فى التنظيم ..
ولا سيرتو جات فى لسته ولا فى ونسة ..
مش نكران .. لكن لا زعامة ..
عارف عندى واحد صاحبى ( اسماعيل الصافى ) حزب امة ..
ترك القضاء وداير أجندوا .. أول شرط قال للى: " دار حزب رئاستو متداولة"
اها قلت ليهو وصلت :
أنت تجى تكوس ليك رئاسة مستديمة ..
ونحن الرئاسة عندنا " بتفلّس .. وما بتحنّس ولا بتعرّس"
بتقتل الزول عديل ..
وبتشيّب ..
وما فيها تفويض ..
وأنا من قريت كلامك
"..(دايما ملازمني سوء الحظ دا..في الكبدة القي العضم..واي حاجة تعتر لي)..
عرفتك تصلح للرئاسة بتاعة حزب المؤتمر السودانى ..
وسبب تانى
المؤتمر السودانى " خيار معافى "
يعنى رئيسه ما شرط يكون بى عافية .. باذن الله ..يمرض ويموت ويأكل الفول ويفلس ..ويتغدا مروحة ..( يعنى يفتح المروحة .. لو فى كهرباء ويضرب النوم " مش يضرب "الكوم"
بعدين انت قاصد ابراهيم الشيخ دا ولا شنو ؟
الزول لى أسع ما ضاق الا ما يضوقه المؤمن المصاب ..
| |
|
|
|
|
|
|
|
|
|
Re: لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه (Re: معتصم الطاهر)
|
الماجد معتصم
تحياتي
جاك كلامي ..شفت الجماعة طنشوك وطنشو حامد عوض ..وطنشوني انا..وجابو الوليدات الصغار..
وانا يا معتصم يا خوي رئاسة ماني دايرها..وزمان ما كت بفكر فيها..الا شفت الجماعة البتريضو ديل سمان ومكان..الواحد فيهم زي جكسا شئ بوقفو مافي..يجي في الخمسين وهو ماشي..وفي الستين وهو ماشي..وفي السبعين وهو ماشي..الله يكضب الشينة ما يعدو التمانين دي..ناس نضيفين وسمحين ..والواحد النزلة دي ما بتمسكو..حالهم زين بلحليل..عجبني عشان كدي طمعت في حكاية الرئاسة دي..
بمناسبة المروحة ..ذكرتني ايام الطلب ..كنا نمشي للاماجد في جامعة ام درمان الاسلامية ناس ود كوكو..اب حراب ..حيدر المكاشفي..طه عبد الله يسن..محمد لطيف ..عبدالقيوم..عمر حمد النيل..عبد الرحيم الربع..توفيق..عماد خليفة..والاجتماع يدور وعصافير البطن تزغزغ..يا ناس غداكم شنو؟..يقولو مروحة..وكان الحال متيسر يقولو..الليلة نضبح ليكم طماطم..
هي يا خوي..ابراهيم الشيخ نقصد لي شنو..الفلس المحمدو..واللا الشيب البدا..والله يحفظو من الباقيات..شوف عيني قريب دا تسمع بي داير يغترب!!
| |
|
|
|
|
|
|
|
|
|
Re: لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه (Re: saif khalil)
|
العزيز سيف
قريت بوستك دا اول ما نزل
و ما (حالا رديت) لانك قولت انك ما بتهببوا للبرد عليك لانك ماشي اجازة شهرين تقضيها في (جزيرة البجع) _ تحديد المكان دا من عندي لسبين:
الاول أني لقيتك زول يمكن الافتراء عليه و الحال من بعضه و ان مكضبني شوف بروفايلي يأتيك اليقين.
و التاني يتماشا مع طوحاتك _البتشبه احلام ظعوط حسب ما جنته يداك_ و ان مكضبنا و ما مصدقنا أسال العنبة _او النبته القايمة فوق القصر الجمهور ايام سيرة البجع_.
ما اتداخلت و قلت انتظرك تأتينا بالخبر اليقين مصدقا او مكذبا لخبر سير البجع علي قدم و مشي ود نفاش علي اربع اذا ما ضرب علي الطبول.
اها ان بقيت في بنجيك و ان بقيت مافي بنرجاك
ارقد عافية
| |
|
|
|
|
|
|
|
|
|
Re: لعمر مديد وسلطان مستدام،اريد ان اكون رئيسا لحزب سوداني،انتميت الي حزب رئاسته موقوتة،ورئيسه (Re: saif khalil)
|
بما اني ذاهب الي جزيرة البجع كما يقول اخونا نصار..فلربما تعذر علي التعامل مع تكنلوجيا الالفية الثالثة..وربما حدث انقطاع اسفيري بيني وبينكم..لذا تركت فيكم هذا البوست عهدة..(يعني بالفصيح كدي ..في ظمتكم)..
ما هو مطروح في هذا البوست امر حيوي..وفي اعتقادي هو المشكل الاساسي لاهل السودان..طرحته أملا في ان يناقش بصورة موضوعية وهادفة..ونرجو مشاركة الذين ينضوون تحت الاحزاب ذات الرئاسات الابدية والسرمدية..فهذا قدرنا ..كجيل..لا بد ان نتمرد ونخرج من اسار الماضي..
في غيابي آمل ان اري الاماجد..مهدي محمد خير،معتصم الطاهر،عبد المنعم عمر،سامي صلاح،ود الشيخ،بشري الطيب،مجدي شبندر،دكتور ابكر..آمل ان اراهم هنا ..في هذا البوست فأني ملهوف لسماع رأيهم ..والاستمتاع بأضافاتهم النيرة..ارفعوا الراية الي حين عود احمد ان شاء الله..
اترككم في رعاية الله وعونه..آملا ان اجد سبيلا للتواصل معكم خلال هذين الشهرين..يلا دعواتكم.
| |
|
|
|
|
|
|
| |
saif khalil
بشري الطيب
mohamed elshiekh
معتصم الطاهر
نصار
Elawad Eltayeb
lana mahdi
فيس بوك
تويتر
انستقرام
يوتيوب
بنتيريست