|
|
 هل نحن شعب (مُبشتن)؟..دعوة للنقاش..
|
(البشتنة) عبارة موغلة في العامية السودانية وهل مصطلح واسع جداً..و(البشتنة) عادة ما تبدأ بالهندام لما له من تأثير واضح على الشخصية ومظهرها العام فيصبح الفرد (مُبهدل) اذما أهمل هذا الجانب وهى نقطة يجب التوقف عندها والنظر بإمعان عندما يتعلق الأمر بشعبنا..
جوانب كثيرة تنظم حياتنا نهملها...فتصيبنا البشتنة..
يعزى الكثيرين الأمر إلى أسباب اقتصادية – التي نهرول إليها كلما أردنا فض النقاش - ...فهل حقاً هي كذلك؟!
لا تخلو مواعيدنا، أدائنا للعمل، حتى ممارسة حقوقنا الشرعية و أعرافنا الاجتماعية. من ( بشتنة).
فهل نحن شعب (مُبشتن)..؟
|
|
 
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: عمر محمد عبد القادر)
|
العزيز ود الباوقة ..صباح الخير
تعرف يا ود الباوقة امبارح مشيت اعمل كروت الدعوة
لقيت سودانى فى المطبعة ..قلت كويس لو كده اعمل عندو الكروت
عينك ما تشوف الا النور:
أول حاجة ما التزم بالمواعيد ..تانى حاجةقال لى والله ( الكروكى)
ما جاهز ..طيب يا ابن الحلال انا كروت بدون كروركى اعمل بيها شنو؟!
اضطريت اقعد معاهو ساعة واساعدو بنفسى..وبعد ولادة متعثرة طلعت الكروت
واتفاجأت بانو الظروف ما بتتقفل كويس لو دخلنا الكرت والكروركى مع بعض..
تااانى قصينا شوية من الكروكى..يعنى بشتنة وعشكبة ما ليها حد
وبعد ده جاى يقول لى - بعد ما لقيت الظروف مكرفسة- (مالا هسع ما كده كويسة)!!!
السؤال يا ود الباوقة:
لو كان عملتها عند سورى او لبنانى كان حيحصل كده؟
شكراً للمرور ..وغايتولو جاك كرت مبشتن اعذر اخوك 
أرقد عافية
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
| Quote: شكراً للمرور ..وغايتولو جاك كرت مبشتن اعذر اخوك |
بس اوع يجيني ( معشكب ) البشتنة ساهلة ) عليك الله يا وليد طه شفت البشتنة الوقعت علينا يوم المناسبة ديك ..
تعرف يا وليد نحن موسم الحج الفات سوينا 400 بدلة للعمال مع الطباعة في يومين لو دا سوداني كان الحج الجاي ما سواهن .. يا ما تحت السواهي دواهي ...
ود الباوقة
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
العريس وليد طه
يا زول حمدا لله على السلامة ولازم اتصل على معتصم دفع الله يجي يسلم عليك أصلوا هو فاقدك كتير وشاكي من فقدك.
صحيح كلنا مبشتنين إلا (بورداب الأمارات) وإنت شخصياً.
بصراحة عجبتني الجلابية , يوم اتلاقينا في السفارة (ماشاء الله - الله يحفظ)
شوف عزيزي ,
البشتنة دي في السودانيين عندها علاقة بالتصوف والزهد ونحن (ربما) الشعب الوحيد الذي (يقدس) الذين يلبسون (المرقعـة) ويشربون من ماء (الركوة) وهم الذين يتوجه إليهم الناس بالاحترام ويطلبون دعواتهم الصالحات.
لكن , ومع ذلك وعند الأختلاط بأقوام آخرين لا يعرفون هذه القيم ولا هـم على استعداد للتوقف (نصف دقيقة) للسؤال عنها أو لسماع الشرح بالاسباب والمسببات , فعلينا أن (نحترم) أنفسنا بالمظهر الراقي الذي يناسب ولا يرمينا في سبة البشتنة , كما أسميتها.
لا أزال وحتى الأن أتألم غاية الألم من مهنيين سودانيين لا يجيدون لبس الهندام اللازم بالذات الزي الإفرنجي وتجد العمال الآسيويين في خدمة المكاتب أحياناً يلبسون أشيك وأكمل من لباس الاخوان المدراء والتنفيذيين السودانيين , وهي درجة من الإهمال لا يجوز أن ينحدر إليها هؤلاء
كما يسوءني جداً أن تجد الرجال السودانيين في المساجد بجلاليب مفتوحة الزراير أو بدون ملابس داخلية كافية أو بدون عمائم وشالات وهي لا تكلف شيئاً وتضيف المظهر اللازم (المكتمل) للرجل السوداني الذي يجب أن يشرف أسرته وبلاده وأخيراً نفسه بهذا المظهر.
مثل هذه المظاهر المبشتنة التي لا ينتبه إليها هؤلاء إلى تنزيل قيمة السوداني والاستخفاف به وعــده من المراتب التي يوضع في نصابها البسطاء من عمال الدول الفقيرة .
شكرا على الموضوع الأنيق
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: أحمد الشايقي)
|
العزيز احمد الشايقي..مساء النور
اولاً شكراً كتير على الإطراء ثانياً نعم اصبت كبد الحقيقة فى كل ما قلت..
البشتنة يا ابو احميد يظهر انها خلاص ضربت بجذورها فى واقعنا وبقت سمة من سمات السودانى ...حتى لو توفرت الماديات يكون بند تنظيم انفسنا وترتيب احوالنا فى ذيل القائمة...
خليك يا احمد من مسألة المظهر على المستوى الشخصى ...امشى شوف الدور الحكومية شوف المنظر ملفات مجدعة ..تلقى كرسى البلاستيك واحد خاتى عليهو مخدة وقاعد...تلقى امين الخزنة قاعد يعد فى القروش وكل ورقتين تلاتة عايز يبل يدو باللعاب..طيب ياخى اعمل زى بتاع البنك ..قطعة اسفنج مبلولة تغنيك عن وساخة القروش المهترية..و..و
المسألة يبدو لى ما خيالية مسألة الترتيب دى وما حتكلف كتير لو الواحد قال خير وبسم الله..
تخريمة يا ابو احميد:
بخصوص الجلابية تصدق فيها بقة زيت ما دايرة تطلع طبعاً الترزى فى غبيرة ولمن شفت البقعة قال لى : عادى دى بتطلع مع الغسيل ..وحاتك لحدى هسى ..مُش بشتنة بالله؟ J
سعدت بمرورك يا ابو احميد
أرقد عافية،،
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: أحمد الشايقي)
|
العزيز احمد الشايقي..مساء النور
اولاً شكراً كتير على الإطراء ثانياً نعم اصبت كبد الحقيقة فى كل ما قلت..
البشتنة يا ابو احميد يظهر انها خلاص ضربت بجذورها فى واقعنا وبقت سمة من سمات السودانى ...حتى لو توفرت الماديات يكون بند تنظيم انفسنا وترتيب احوالنا فى ذيل القائمة...
خليك يا احمد من مسألة المظهر على المستوى الشخصى ...امشى شوف الدور الحكومية شوف المنظر ملفات مجدعة ..تلقى كرسى البلاستيك واحد خاتى عليهو مخدة وقاعد...تلقى امين الخزنة قاعد يعد فى القروش وكل ورقتين تلاتة عايز يبل يدو باللعاب..طيب ياخى اعمل زى بتاع البنك ..قطعة اسفنج مبلولة تغنيك عن وساخة القروش المهترية..و..و
المسألة يبدو لى ما خيالية مسألة الترتيب دى وما حتكلف كتير لو الواحد قال خير وبسم الله..
تخريمة يا ابو احميد:
بخصوص الجلابية تصدق فيها بقة زيت ما دايرة تطلع طبعاً الترزى فى غبيرة ولمن شفت البقعة قال لى : عادى دى بتطلع مع الغسيل ..وحاتك لحدى هسى ..مُش بشتنة بالله؟ J
سعدت بمرورك يا ابو احميد
أرقد عافية،،
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
الأخ وليد؛؛؛ تحية لك...
تساءلت:
Quote: فهل نحن شعب (مُبشتن)..؟
|
وأنا بقول: أيوة نعم؛ نحنا شعب مبشتن ومبهدل وحالو بالبلا ووشّـو ينعـل قفاه!... والمقصود هو حالة اللامبالاة والكلفتة والإستسهال التي في ظني أنها من أكبر مصايبنا وأسباب تخلفنا عن العالم المتقدم كل يوم،؛ ضربت مثلا بالمواعيد وبأداء العمل، فنحنا أصبحت القاعدة عندنا هي عدم الإنضباط فيهما، حتى إذا رأينا أحد الذين أنعـم الله عليه يؤدي عمله بدقة نقول: دا عامل روحو خوّاجة!، وفي نفس الوقت ألاحظ أن أي عربية جديدة عندما تدخل عندنا المنطقة الصناعية لأول مرة، وبعد ما يبشتنوا حالها وينتزعوا منها كل ما حسُن من سير وسلوك، حتى يقولون: بالله شوف الخواجة البليد دا!!! أنظر إلى كل مشاريعـنا الإقتصادية والخدمية خاصة؛ أنظر إلى الشوارع الجديدة في الخرطوم؛ ما أن يتم رصف الطريق حتى تأتي سوداتيل في اليوم التالي لتقطيع أوصاله، ثم يليها ناس الموية وربما الكهربا قريبا وغيرهم، وفي نفس الوقت أنظر إلى سلوك السائقين في تلك الشوارع؛ أنظر (إن استطعـت) إلى برامج التلفزيون لترى كمية الفوضى والهبل والتخلف فيها؛الخ الخ...السلوك المتحضر والمنظم يا صديقي لا علاقة له بشماعة الإقتصاد أو الوضع السياسي...أحد أصدقائي يردد عبارة (إعادة صياغة الإنسان) كحل لكل مشاكل البلاد، بينما يرى الآخر أن الحل هو في تفريق التلاتين مليون سوداني على الدول المتحضرة وإحضار تلاتين مليون ياباني مكانهم، وبذلك فقط سنرى سودان مختلف!!، أنا أرى أننا نحتاج لسنين طويلة من سيادة لحكم القانون يعلم الناس ويفرض عليهم إحترام قوانين العمل والشارع، والعلاقات الإجتماعية... ولك وللجميع الود..
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: قرشـــو)
|
وليد
بعد ما قربت تعرس حتين فكرة في البشتنة؟..... زمان وين؟
يا اخوي الاسباب لا اقتصادية ولا حاجة.... الاسباب سلوكية...ودي ورثناها.. من جدودنا زمان وصونا علي الوطن.....نحن شعب في غالبة الاعم بدو....بدو..والبدو نسبة لحياة ترحالهم مابيكونو منظمين..ومنتظمين.....ومبشتنين....وسلامتك
انا شخصيا لبيّس ومهندم.. وفوق ذلك شرط....اسعل الموج
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: Shinteer)
|
وليد العريس وكل الناويين
اخباركم
مناظر بسيطة لبشتنتنا - ويمكن فى مكاتب العمل
- قميص ما مشكوك والجزمة مركوب
- زرارة مقطوعة وشرطة بالجنبة فى البنطلون وبرضو عادى
- جردل السفة تحت الطربيزة وسفة دقار فى الخشم والزبون قدامه يا لهوى
- الشعر خليه - فاكر تسريح الشعر للنسوان فقط وكان الشعر بقى صفيحة جبنة تقرا آية الكرسى
- اما المواعيد فأجارك الله وبعد ده يقول ليك والله الجماعة إتآمروا على رفدونى
- اخلاق نتشة وممكن يفكها فيك فى اى لحظة - شوية دبلوماسية يا جماعة
- الشغل كلفتة وشوية اخطاء ما بتقوم يوم القيامة شنو الهندمة الكتيرة الما عندها لزوم
- السودانى زول مهية شهرية ، طالما بياكل وبشرب وبرسل لى سكينة شوية قريشات نحمده
- فى المكتب يتكلم مع زملائه بكل سذاجة، ينبذ سلسفيل المدير واليوم الجابوهو ، والحيطان عند
اضان والرفدية تانى يوم
- كان عمل ليهو بزنس وبقيت سودانى داير تنفعه تشترى منه الله قال بى قولك
للاجانب بالسعر وللسودانى بالدبل مع حليفة طلاق بإنو ما كسبان منك اى شيىء ، وده ممكن
يكون موضوع براهو نتناقش فيه
ويمكن ارجع
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: سجيمان)
|
د.سجيمان التحية لك وياخى خليت الرياض خفيفة...
quoteبعد ما قربت تعرس حتين فكرة في البشتنة؟..... زمان وين؟
والله بس تقول شنو ؟ اصلى شامى لى ريحة بشتنة كده جاية فى الطريق ...اظنها غسيل العِدّة
ربك يستر من البشتنة والشرشحة .
تمام زى ما قلت المسألة سلوكية فى المقام الاول...
وكمان لو ملاحظ يا دكتور نحن فى فترة الستينات كنا انيقين لأبعد الحدود وده بيظهر واضح لمن تشوف ليك صورة قديمة...ناس فى غاية الوجاهة حتى حلاقة شعرهم تدل على الاهتمام بالمنظر ..مما يدل انو نحن بشتنتنا دى ما وراثية ولا حاجة ...
شكراً للمرور
ولا بشتن الله عزيزٌ لديك
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
اخوي وليد طه
سرن اقمندو
يا اخوي اليومين دول انت ما تتكلم عن البشتنه والعنكبة والسجمنة
انت يا اخوي تتكلم عن هجهجه والبسططه والحنكشه
وطيب الايام ذلك ايام العرس وايام العسل
واجري ابشر فوق اهلنا واحضن اصحابي اللطاف
وبعدين ترجع لشحطفة الروح وتويرت النفس
وعينك ما يشوف الا النور
الله يجعلك ايامك كلها عسل في عسل
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: Tabaldina)
|
تبلدية
يازول انت ما حتيت صفق الشجرة كله
معتز تورستكى وشيخ العرب شنتير
انتو ياراقين الدخلكم فى بوست البشتنة شنو ...
الجماعة ناس سعوديةساى...جنس بشتنة خلوها ساى
تعرف فى ناس حايمة بالعراقى والسروال فى شوارع الرياض
معليش فى السودان ممكن لكن هنا ياجماعة اخجلو..
امشى السفارة وشوف البشتنة..اشكال مكشرة..
مرة واقف جنب نائب القنصل عشان تاجيل الضرائب
واقف قدامى دكتور والله دكتور..كبير حبتين..فى المهنة دكتور وراعى فى اللبس
عاوز يجلو ليه الضرائب...للمرة الخامسة..ممكن عنده ظروف.ويستحق التاجيل
لكن البشتنة شنو
تعرف ياوليد مرة سافرت عن طريق مطار بومبى..رجعو من الطائرة
4 مسافرين..عشان لابسين سفنجات..
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
..
.
أبوقوته ,,,
والله ذكرتني الحالة ما حتيت الصفق كلو ..
البشتنه .. الدينية نسينها ..
وولسه الثقافية
والرياضية ..
وبشتنه الكشه مشه العزمو غدا جاي عشاء دى براها وأقصد
الرجرجة الهاجرت وتتقاطع لابسه السفنجات واقفه فى السفارات زى دكتوركم دا
العن ابوها دى دكتره .. اخير منها الواحد يفرش شوالات ..
بس خلي أمسك فى الدينية دى .. وبالامثلة يعنى فى أكبر المساجد او الجوامع .. ضحالة فى الخطب ما تتخيلها الأمام زاتو فى حد نفه مبشتن وجلابيته عجيبة ويقول لو ليك ظروف إقتصادية ..
ومافي ثقافة دينية ولا حفظ للقرآن ولا أستدلال بالأحاديث يعنى خطبة هبتلي ساااى ..
وبالمثال فى اكبر مسجد السيدة سنهوري والزبير محمد صالح .. في ظاهرة بتاعت بشتنه غريبة
اولا ما اختلفنا المسجد متلقي للجيران والمصليين لكن من الصلاة تنتهي .. بس 5 دقايق تشوف الناس قامت سلام شديد وونسة ومواضيع وقرقرة ..
وما عندهم حاجة أسمها الباقيات الصالحات يعني قدر حق الجمعة وبس .. يلخموك ويشتتوا تركيزك .. ولا أكون أنا أيمانياتي زايدة عشان جاى من السعودية ..
بس برضو برضو ناس ما بتستحي يعنى فى لزوم للونسة جوه المسجد حتى لو صلاة جمعة أو مغرب
ياخي اعزمو البيت بلا كلام فارغ معاكم .. ناس كبار ما بخجلوا .. بشتنو حرمه المسجد الله يبشتنن .
بجي تاني .. أصلي بكره البشتنه>>
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
شكرا اخونا وليد علي هذا الموضوع والذي يناقش واحده من اهم قضايانا
ذات الاهميه في مجتمعنا السوداني
البشتنه والعشتنه من المصطلحات السودانيه الخالصه ولم تصادفنا هذه الكلمات في اي من العربيه العربيه واعتقد بانها سودانيه خالصه كمثل العشكبه والحنكشه والبوبار وغيرها من الكلمات
والمقصود بالكلمه والله اعلم ان الشي ليس في مكانه الصحيح او ان هناك امر مشين في شي من المفترض ان يكون سوي كما ذكر الاخوه في الامثله السابقه سواء في الهندام او مجال العمل او الحياه اليوميه او في السلوك العام.
نحن السودانيون لاسباب غير مفهومه لا نحب التقيد بالنظام ولانحب المظهر الجميل وخاصه بالنسبه للرجال ونعتبر ذلك من اهم صفات الرجوله وهو شي اساء لسمعتنا في الدول الاخري
اعتقد ان الحل للمشكله في اعاده تريبه اجيالنا القادمه علي تقويم السلبيات الاخري
وقبلها علينا نحن بتغير انفسنا
ولك الود
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
انا بقى حأتكلم عن ظاهره احنا بنعمل عنها فلم في البيت كل ما نرجع من الإجازة.. وهي ظاهرة "البزيغ"... معليش على الكلمة.. لكن مالقيت وصف حلو.. لأنها ظاهره شديدة القرف .. شديدة البشتنه.. والعجب كان سبقتها سيمفونيه عشان تسلّك الحلق وتنظفه... وخااااااااع توف... مازن أخوي لما جا من السودان قبل أسبوعين بحكي لينا عن تطور مهارات "التفاف".. وكيف انه السودانيين أصبحوا خبراء في كيفية اخراجه .. يعني بتكون طويله ملتفه.. زي كورة كابتن ماجد... العجب كان معاها التنباك.... وب علي انا.. بقوم أسيب المكان فوراً...
احنا شعب مبشتن وسخان وفاكيها في روحو... زمان كنا شعب فاهم.. لكن دي زاتها بقت مافيشه... فينا تواضع المتصوفه.. ده شيء صحيح.. لكن الوسخ ده شيء آخر ما ممكن يتسكت عنّه... أهم مظاهر بشتنتنا بتكمن في إننا ما بنتفاعل مع البيئة بصورة حضارية... يعني انا بخجل أرمي ورقة في الواطه حتى لو صغيييييييييره... ولو وشوفتوا شنطي .. كلها ورق عشان لو ما لقيت مكان أرمي فيه الورقه.. بختها في شنطتي...
بعدين زي ما قال نادر.. مسألة عمى الألوان دي ظاهره عجيبه... يعني نادراً تلقى ليك زول قاشرها كده.. وما قاشرها بمعنى انه لابس ملابس غاليه.. بس يا جماعة البنفسجي والأحمر ما بمشوا مع بعض.. والأخضر والأزرق (يا خضر  ) ما بجوا مع بعض... بعدين لو لبسته القميص مخطط... بكون جميل لو لبسته البنطلون ساده.. ويا حلاة الجلابيه لما يكون معاها عمّه أو طاقية.. والسفنجه دي .. حتى في البيوت خلّوها... والله العظيم سافر معانا انا وامي مرّه (دكتور) .. أيوه (دكتور) في الجامعة.. وزميل للجاح... وجارنا... ودرّسني ماده.. وجبته فيها امتياز.. وسوداني.. وسافر معانا بي جلابيه وعمّه.. وسفنجه.... شوف عيني!!
البشتنات أنواع.. يعني البشتنه المن النوع الآخر وهي حب السودانيات للتزيّت.. يعني الواحده تبيت مدهنه راسها بي دهن ... التقول صحن فول... تصحى الصباح.. وتسرحه وتمرق.. وبلدنا ما لوكسمبورج... يعني درجة الحرارة عندنا بتصل فوق الأربعين مرّات.. مع العرق والدهن ... الرائحه بتتعتق بصورة مزعجه.. طبعاً اختراع آخر ما بيؤمن بيهو الشعب السوداني.. وهو مزيلات العرق.. والريحه الجميله.. رغم انه أكتر شعب بستحمى!!
نحنا شعب مبشتن جداً يا وليد.. وده شي مافي اتنين بختلفوا عليه... أكثر بشتنه مشهورين بيها السودانيين في الخليج هي عشقهم للعربيات التعبانه .. يعني لو لقيت ليك عربيه (بتعرج) قطع شك، ياسوداني يا باكستاني... بحبوا انه السيارة تكون كعبه.. وتتعبهم.. وكل مره تقيف ليهم في نص الشارع.. ويلزوها.. ويحنسوها عشان تمشي... مديري المصري كان بقول لي لما كانوا عايزين يشتروا لي سيارة في الشركة.. قال لي خلي بالك من يشتروا ليك سيارة كعبه (المسؤول عن عملية الشراء سوداني)... وواصل المدير قوله.. "لأني اكتشفته انه السوداني ممكن يكون شغال مدير عام الدنيا، وسايق سيارة داتسون موديل 80" ومعاه حق!
أحّي.. فترته...
بنت الحسني
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
اما المواعيد فأجارك الله وبعد ده يقول ليك والله الجماعة إتآمروا على رفدونى
- اخلاق نتشة وممكن يفكها فيك فى اى لحظة - شوية دبلوماسية يا جماعة
- الشغل كلفتة وشوية اخطاء ما بتقوم يوم القيامة شنو الهندمة الكتيرة الما عندها لزوم
- السودانى زول مهية شهرية ، طالما بياكل وبشرب وبرسل لى سكينة شوية قريشات نحمده
- فى المكتب يتكلم مع زملائه بكل سذاجة، ينبذ سلسفيل المدير واليوم الجابوهو ، والحيطان عند
اضان والرفدية تانى يوم
والله الخ ترهاقا
وصف السوداني في الغربه الوصف الدقيق
انا شخصيا في العمل بكلم اي سوداني بشوفو في عوج وبقوله ليه بالواضح لو رضي او زعل وخاصه السفه وعدم لبس الكرفته او عدم شكة القميص
والبتلاقيه جاي الدوام بي شبشب الله دي طبعا مساله تانيه
ولا الماشي الصلاه بالعراقي والسروال فقط
ولا النسوان البيمشو الحدائق ويترقدن فيها والشافع لو غاب عن نظره دقيقه تكورك وتلم البلد كلها
الله يعين بس
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: abas)
|
Quote: أحّي.. فترته...
بنت الحسني |
والله صحى فترتى حتى اسم عمى ما قادرة تتميه الله يكون فى عونك..يامريم
تعرفى ظاهرة السيارات دى..بجد بشتنة قبل شهر يابت امى عندى سيارة كرسيدا 88 عارضها للبيع
قلت اغير شوية من البشتنة دى والشهر الدبل دا اغير به سيارتى اطلع الى اخر التسعينات
لو ما الفين..كتبت على السيارة للبيع وجوالى عليها...وسوقتها لقريبى مندوب مبيعات خاص
اذا به جوالى يصير من اشهر الجوالات...على راس كل نصف ساعة يجينى اتصال..ويسئلون عن السيارة
اغرب المتصلين دكتور ومش دكتور اى كلام..دكتور فى الهندسة....
هلو.. مرحبا...
معاك الدكتور ع .م .ر
مرحبا يادكتور زارتنا البركة
انت صاحب الكريسدا 88
ايوة يادكتور...ياولدى انا زهجت من سيارتى القديمة وعاوز اغير شوية
وسيارتك موديل كم يرد كريسيدا 80 لكن ياولدى سيارة مخلصة خلاص اشتريتها من لبنانى
سنة 82 وانا عريس جديد والله ياولدى الى اللحظة ما فكيت مكنتها ولا غيرت ليها ليها شمبر
ولا تعطلت فى الشارع...ياريتها سيارتى ياعمو...
طيب عاوز تغيرها ليه...ياولدى بنتى الصغيرة البنات بقن يضحكن عليها لما اجى اوصلها
لكن الكبار كانن فاهمات لما مشن الجامعة ما طالبنى بسيارة جديدة
لكن ياعمو الاخلاص دا كله ترميه فى الزبالة...لا شوف لى ليها زبون لو تلقى
وانت بايع سيارتك ليه اوعى يكون فيها عيب
انا بايعها ياعمو عشان خطيبتى قالت لى لازم تغير سيارتك لموديل جديد..
والا الشكلة حتحصل..
ياولد هوووووى نوع البنات ديل اختاهن..من اسى كمان عاوزة تسيطر عليك
خليك رجل قوى وسودانى اصيل كمان تسمع كلام المطلوقة دى من اسى..
بتقرب ليك...لا ياعمو .بس تعارفنا على الجات ومنها شخصيا واسريا وشبكت
انت ياولدى من وين..من ابقوتة...ياولد ابقوتة مكان الناس الرجال..وبلد البقر والغنم
ايوة ياعمو...ياولدى انت كان كدا فكيت درب ابواتك...
لكن لو عاوز مرة صاح بتى الكبيرة دى قاعدة.. خريجة تحاليل وشغالة فى مستوصف
وبساعدك فى دفع عجلة الحياة...
كدى ياعمو خلينا فى السيارة..وبعدين نجى للبت
انت شفت السيارة ياعمو ..قال لى شفتها عجبتنى خلاص...وكمان مازال مقاعدها جديدة
وكل شىء فيها وكالة..واكتر حاجة عجبتنى فيها شريط محمد احمد عوض
والله ياولدى جبتو ايام عرسى..كان صوتو زى الجرس..
ياعمو ببيعها ليك لكن الشريط دا مو تبعها ..يازول بدون الشريط ما بشتريها ولا حاجة
الشريط دا تبع الزول السايقها ياعمو...
اسى خلينا فى السيارة انت بتدفع كم..فيها..بدفع ليك فيها( 7 الاف ) ياولدى عمك زول محمول وابو بنات وطالبات...ياعمو السيارة دى وكالة وخرشة ما فيها..خلاص بزيدك 500
بعد ما زهجت منه..اسى ياعمو سيارتك الهكرة دى عاوز فيها كم..
هكرة ياقليل ادب..دى سيارة رجال خدمتنى واخلصت معاى كتير
ياعمو داير فيها كم..قال لى 5 الاف ياعمو ..وسيارتى 7 اللاف..الفرق بين سيارتى
وسيارت 8 موديلات...اسى عاوز تبيع لى ام لا...بكم ياعمو ب7500
افتح الله وشكرا على اتصالك...طيب اسى كلفتنى رسوم اتصال فى الفاضى
وما عاوز تبيع لى..سعرك دا ما بتناسب معاى ياعمو..خليك فى هكرتك دى احسن
خلاص خلاص خلاص مع السلامة
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: abuguta)
|
بشتنتنا مردها الاساسي الاستهتار.. نحن حتى الان لا نعطي كثير من الأشياء مقدار ما تحمله من أهميه.. الزمن.. الزي.. التعامل.. حاجاتنا كلها ماشه بالبركه.. عشان كده البركه في (بورداب الامارات) القالو ما مبشتنيين
| |
|
|
|
|
|
|
|
|
 Re: هل نحن شعب (مُبشتن)؟..دعوة للنقاش.. (Re: walid taha)
|
Quote: لكن لو عاوز مرة صاح بتى الكبيرة دى قاعدة.. خريجة تحاليل وشغالة فى مستوصف
وبساعدك فى دفع عجلة الحياة...
|
اها ده الكلام البغيظ بالجد ... عليك الله عان ده.. هي البت دي ببيعوها تبع العربية... يا جماعة احنا بقينا سنة 2005 .. والدكتور ده داير يبيعك الpackage!!!! ...
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
سلام يا شباب
وشكراً وليد مرة أخرى على هذا البوست
في بشتنة شينة جداً
اسمها البصاق أو التفات
مرة مشيت مع واحد زميلنا لصلاة العيد في أحد المدن المجاورة
وقررنا نمشي بالمواصلات رفقاً بالسيارة وصعوبة وجود مكان للوقوف
المهم صاحبنا دا كان سافي أي والله سافي في صباح العيد
وكل ثانية كان يبصق في الأرض ونحن ماشين أنا بطني طمت خالص
قلت ليهو: يا أخي إنت ماشي الصلاة وسافي
قال :طيب مالو السفة بتبطل الوضو
فلم أرد عليه خوفاً من الدخول في نقاش ليس هذا وقته
المهم وصلنا محطة البص الذي انتظرناه حوالي خمسة دقائق
في هذه الفتر كانت كل المساحة تحت أقدام صديقي قد ابتلت بالبصاق أمّا أنا فقد وقفت بعيداً منه عند لوحة مواعيد الرحلات ولحسن الحظ لم يكن في المحطة أحد أهل البلد ليرى هذه الفيضانات التي تخرج على دفعات متقاربات من فم هذا الزميل صاحب الشفاة المتورمة من أثر السفة خلفها
ركبنا البص وحمدت الله بأن التفاف سيتوقف أثناء الرحلة ولكنه كان مجرد حلم تمنيت لو هدت أدراجي ولكنها صلاة عيد
المهم بطريقة أو بأخرى وصلنا الجامع وصلينا وبعد الصلاة قلت له أنت أذهب لحالك وأنا سأذهب لحالي
قلتها بكل دوبلماسية مطلوبة في مثل هذا اليوم
أخ تووووف
من البشتنة
أسف يا شباب طممت بطنكم بالكلام دا لكنها بجد مشكلة ذوق وبشتنة زيادة من اللزوم
تحياتي
فرانكلي
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
..
.
أنت يا مريم
بطلي صلبطه ..
كلام الدكتور دا ما فيهو شئ ..
ما سمعت باخطب لبتك وما تخطب لولدك ..
الراجل استوسم فى أبوقوتة خــيراً .. وقدم ليه عرض ..
وعرض مغري بالجد .. بس برضو شورة البنية واجبة .. ويمكن توافق ولا كيف ..
كدا انت شوفي بشتنكن انتن .. الواحدة عندها رأي فى البسوي وما بسوي ..
ياخى دا موظف كحيان ؟؟
والله دا عروبي ساااى !!
انا مالي ومال البشتنه والله كن ما مرتاح ومروق ما برتبط بيهو ؟؟
والقطر عييييييييييييييك طلع فى جبل موية ..
وبعد شوية تبدا الشلهتة والمغابضة وان شاء الله راجيل مرتين ومرات راجل اختى ..
والله الزمن بقي يطلب ايد فى ايد تجدع بعيد .. وابنى عشك قشة قشة غير كدا
نشيل ونعبي فى القطارة ..
وذكرتني نكته الحنكوشة .. القطرة صفر خلاااااااااااص
قامت مشت للفكي يشوف ليها الخيرة .. والعريس والعرس
اليوم التاني جات للفكي من دقش الرحمن ..
اها يا شخينا ان شاء الله خير
والله خير يا بتى بجيك عريس مغترب من الأمارات ومرتاح وبريحك
البنية .. هيييى ..هيييييى ..قاعدها تبكى والدموع يجرجرن ..
يا بتى مالك الببكيك شنو ؟؟ ما يهو سعدك جاييك بأذن الله ..
والله يا عمو الشيخ .. ولادة الغربة ما بقدر عليها ..
Gir,,Gir,,Gir
خارج الإطار :
بالمناسبة جزمتك دى كريستال ؟؟
Salam
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: Tabaldina)
|
الاخ الفاضل/ وليد طه
بعد التحية
السؤال المطروح كان موضوع نقاش بين الاخوة السودانيين المتواجدين في سريلانكاالتي اعمل واعيش فيها
وكان محور النقاش يتعلق بظاهرة استقدام العديد من الشركات في السودان عمالتها من سريلانكا،
بالاضافة لاعلانات الصحف السريلانكية عن فرص عمل للسريلانكيين في السودان،اخر اعلان كان عن شركة
اتصالات سودانية شريكة مع اخرى اماراتية ترغب في استقدام مهندسي وفنيي اتصالات برواتب تتدرج من
اربعة الاف الى الف وخمسمائة دولار(بامكاني ارسال الاعلان المقصود اذا اردت)
اتفق معظمهم ان هذه الظاهرة تعود (للبشتنة) التي تعتري المواطن السوداني ولعدم قناعة اصحاب
الشركات (سودانية ام اجنبية) في توظيفهم خشية الخسارة والافلاس
بينما راى اخرون عكس ذلك ، وكانت حجتهم ان سمعتنا في دول الخليج تكفي من حيث تفانينا في العمل
وان الخليجيين يفضلوننا عن غيرنا من الجنسيات الاخرى ..
....
حكى احد اخواننا ان مدير الانتاج بشركة سودانية توفت جدة جاره .. مكث في الفراش يومين .. تم فصله
واستبداله باجنبي ...
يا رعاك الله الشغلة مستفحلة والامثلة لاتحصى والنكات الرائجة في هذا المفهوم على قفا من يشيل، ولن
تقوم لنا قايمة حتى نفهم معنى (نحنا اولاد بلد نقعد نقوم على كيفنا)
دمتم ودام السودان
حيدر حنين
سريلانكا
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
..
.
حيــدر حنين
أو حيدر حسن ميرغني ..
أنت يا زول حيدر حنين بتاع الزقازيق ..
طلعت فى سيرلانكا .. آها شوف البشتنه دى كيف ؟؟
من أرض الكنانه لسيرلانكا !!
كدى الندي بوست عصام دهب بتاع الزقازيق طله ونجيك ..
تحياتي وشوق مطر
كن أنت ولا ما أنت ،،،
دمت
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
الاخ وليد
السلام عليكم
اشكرك على هذا البوست
يا اخوى البشتنة كتيرة بتاعة السودانيين كدى عرفنا الجوة السودان تعال شوف
السودانيين خارج السودان والبشتنة والله يا وليد تخجل ليهم عديل كدا
اقول ليك قصة صغيرة مثال للبشتة بس فى اللبس :
هنالك شباب سودانيين فى عمر الزهور قالوا الحال فى مالطا مش تمام عاوزين يمشوا
احدى الدول الاوربية ومشاء الله اشتروا ملابس لزوم السفر وعينك ما تشوف الا النور
كل الوان الطيف من الاحمر والاخضر تراه فى ملابسهم والعجب ان القميص بدون كم
لقد تم اعادتهم فى نفس الطائرة لاشكالهم المريبة بحجة ان ليس معهم مبالغة كافية
وليس هنالك جهة ستستقبلهم .
فى بشتنة اكتر من كدا
انتصار
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: بلدى يا حبوب)
|
وليد كيفك
يا وليد نحن شعب مبشتن بس؟
نحن مبشتنين
ومعولقين
ومجلفطين
ومزبرقين
ومكعوجين
ومعشكبين
ومبهدلين
وناشفين
ومعقدين
وصعبين
وكسلانين
وفقيرين
وجعانين
وفقريين
وبقينا كذابين
ومستهبلين
.
.
.
والحكايه ما بتخلص ...
لكن .....
احمد ربى لانى كنت من هؤلاء السودانيين
لانهم
طيبين
وودودين
وشهمين
وحميمين
وانا احبهم جميعا جنوبيين وشرقيين
وغربيين وشماليين....
وليد ..
دعنى ومن خلال بوستك الجميل هذا اعيد السؤال مرة اخرى
هل نحن نحتاج الى اعادة صياغه؟؟؟؟؟؟؟
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
الاخ المحترم وليد طه
صباح الخير
موضوع جيد رغم اسلوبك فى عرضه...
واقصد تناوله من محور البشتنه..
نعم ,,,,
الشعب السودانى مبشتن واليك الاسباب..
الكم الهائل من الضغوط اليومية التى لا تمنح هدوء البال لاحترام المواعيد
واحترام المظهر...
الحالة النفسية العامة التى تتألاجح دوما بين اليأس من حكوماتنا الكذابة المجرمة
الى الامل اليومى فى ذهاب الكابوس..
كثيرا ما يذهب الكابوس ولكن دائما وابدا ياتينا من هو اسوأ من الكابوس..
الاحساس بالظلم والقهر وانتزاع الحقوق وضياعها يقتل فى شعب السودان اى احساس بالاهتمام
بنواحى حياتية مهمة تصبح هامشية بالنسبة اليه...
الجرى الدائم وراء لقمة العيش والتحرك الدائم مع الالم الذى قد يكون عضويا او نفسيا او
ذهنيا...
الاحساس بالظلم الفادح حينما يرون فئة ترفل فى الثراء الفاحش فيما يعانى الاخرين من لقمة
العيش ومن كل ابجديات الحياة..
الاعلام المضلل الكاذب..
ففيما يرى المرء حاله البائس وحال اهله يستمر التلفزيون والاذاعة فى بث كل ما هو كاذب
وخادع...
جبروت الحكومات وقسوتها وقدرتها على اذلال المواطنين دائما وابدا...
عيب الشعب السودانى الاساسى فى رايى هو الطيبة المفرطة التى تذهب الى حد اعفاء المجرم من العقاب والتنازل عن كل الحقوق ونسيان الظلم عملا بمبدأ عفا الله عما سلف...
لو ان سودانيا واحدا قام باغتيال اى من هؤلاء القتلة لغير كثيرا فى السياسة السودانية..
تقول لى بشتنه؟!
الما بجيب البشتنه شنو؟!
نهارك سعيد
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: nour tawir)
|
العزيز تبلدينا
تحية طيبة
نعم انا حيدر حسن الزقازيقي
اعمل في سفارة دولة قطر بكولومبو
متزوج من سريلانكية ولدي ولد و بنت
مريت على العديد من مداخلاتك الحلوة في بوست اخونا عصام دهب وكان لي اكثر من
مداخلة
بالله اطلع من وراء التبلدية دي ووريني انت منو ... يعني اسمك الكريم ..
لكن سبق ان خمنت ان تكون انت صالح عبد الرحمن الولد الشقي بتاع الزقازيق
كذلك .. اذا كنت صالح او لو تكن .. لك التحايا والود
حنين
| |
|
|
|
|
|
|
|
|
 Re: هل نحن شعب (مُبشتن)؟..دعوة للنقاش.. (Re: nour tawir)
|
يا وليد ياخوي مالك ومال البشتنة
اليومين دي حالتك صعبة وتحنن
وما جابك البورد الايامات دي الا الشديد القوى ،، البشتنه دي ما حاصلة من زمان
ما تشوفه الا اليومين دي؟؟
الأخوة الحضور الدعوة موجهه لكم لمناسبة زواج الوجيه وليد طه ،، ادناه الكروكي الخاص بالموقع والبقدر يشاركنا مرحبتين بيهو ومليون مرحب
يا وليد.. انا عامل دائره فوق بي قلم الرصاص على جملة محددة ..وصلتني مع الفاكس .. ومن الزول الرسلو لي وان عارفو وما لي يد فيها قلت ليهو انا بمسحه شان ما تعمل هلع للزول ده.. اصر انهاتوصلك بكامل بشتنتها
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
اخوتى المتداخلون
شكرا ومبرك للعريس وليد
وانشاء الله بيت مال وعيال
تغلبها بالمال وتغلبك بالعيال.
الموضوع الذى طرقتوه موضوع مهم ....مهم.....مهم جدا.
وشكرا لكم.
الجميل فى الموضوع ادانة هذا الكم من البورداب للظاهره.
ورقم قلتنا بعد لكنى فرحه ان السودان فى تطور.
انا شخصيا بشتنة السودانيين ودتنى بعيد وطفشتنى
لعالم ثانى.
حقيقة ورغم معرفتى ان التعميم خطأ لكنها ظاهره
تفوق الوصف.
انا ارجعها زى ما قال سجيمان للبداوه
ربما لكن هنالك خلل فى التنشئه
المهم اى بيت سودانى
(فى كندا) لو ضايعه منه بعرفه
بحديقته المبهدله!!!!!!!
واذا كان موسم ثلج بعرفه بثلجه المكوم
هنا نظافه او ازالة الثلج اجبارى
لانه لو تزحلق اى مواطن اما بيتك
لانك لم تزيل الثلج يمكنه مقاضاتك.
لكن السودانيين ساتر معاهم الله ساى.
ولو ذهبتوا لبوست كان فتحوا ود قاسم
انا كتبت نفسى ابقى مشرفه على مسؤليننا السودانيين
ومن حسه بقول ليكم العايز يبقى ولده وزير لازم يهتم
بتقويم اسنانه لانه زى اسنان الطيب سيخه دى لاذم تبقى ماضى.
نرجع لملاحظة تبلدينا
وهى اكثر من مأساة فى السودان ,كرهت لاجلها سفر الباصات
فى طريق بورتسودان الخرطوم ,يقف السائق فى ارض جرداء جرداء
بمعنى الكلمه شجره ما فيها ويقول يلا العايز يقضى حاجه يتفضل
يموت السؤال فى شفافى كل مره (وين عايز الناس تقضى حاجتها؟)
فى كندا تحتج الحركات النسويه ان الدوله تمارس تمييزا ضد
النساء ويستندوا لعدد الحمامات المخصصه للنساء اقل دوما
من المخصصه للرجال!!!!!!!!!!!
ونحن نساء السودان نضحك فى سرنا من فياقتهم ونقول
مش تحمدوا ربكم انه فى حمامات!!!!!!!!!
اما قمة احترام الانسان حمامات المعاقين
ولكم الله يا معاقين بلدى!!!!!!!!
تراجى.
| |
|
|
|
|
|
|
|
|
 Re: هل نحن شعب (مُبشتن)؟..دعوة للنقاش.. (Re: walid taha)
|
..
.
آها يا جماعة الحفلة كانت كيف ؟؟
أن شاء الله ربنا تمم بخير يا وليد !!
وتمبس يكون ساهم فى ضياع الناس لانو ما ذكر مقهي الأمبراطورية بتاع الشيشة
ودا كلوا عشا ن العشاء ..
ان شاء الله العشاء ما مبشتن ؟؟
ودى من الحاجات المحرجة ودليل بشتنه فى مجتمعنا
يعنى أهل العروس يستفروا من العريس عن عدد المدعويين
يقول 500 يجيك يوم السيرة ب 500 راجل و400 مره و900 شافع
وبعد دا تسمع النقة اثناء الحفل وبعد وبعد شهر العسل وسنة ..
الله يقطعها عشاء ما عشتنا ..
عااااد ولدنا الوداهو ليهم هين .. ما يعشوا .. وهااااااااك يا نقة
وما عارفين الذنب ذنب منو ؟؟ ولا بسبب منو ؟؟
ربنا يرفع الظروف المعيشية والفقتصادية ،،
عشان ما العشاء ما يقصر فى اهل العريس وام العروس تسمع كلام فارغ ..
جاى راجــع بس أشوف الثوار،،
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
..
.
عـــودة ،،
بالله شوفوا زى البشتنة دى !!؟؟
دا شعب ينادي بالحرية والمساواة والعدل ..
وما قادر يحافظ على المكتسبات ( الوضيعة) التى وجدها أمامه
ولا ينوى أزالة الحقد والنعرة العنصرية ..
بشتنة أخلاقيات وعدم وطنــية
مش قلنا شعب مبشتن .. لمن غلط ..
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
أخي وليد طه
فعلاً سوادنا الأعظم مبشتن بشتنة ظاهرة بينة ، والبشتنة كما تفضل بعض المتداخلين الأفاضل ليست بسبب الفلس أو قلة الحيلة ، فقديماً قالوا أن الأناقة في البساطة وبالتالي فإذا كان لبس معين matching مع زيد قد لا يكون كذلك مع عمرو ، أنا لست متخصصاً في الأناقة ولا بيوت الأزياء وإن كنت أحرص أن أكون مرتباً مهندماً ما أستطعت إلى ذلك سبيلاً.
مشكلة مشاكلنا أن الكثير منا مصاب بعمى ألوان إن جاز التعبير فكثير ما يكون اللبس متنافر حد الفرار من قسورة ، فالبنطلون البني لا ينفع أن نلبس معه جزمة سوداء على سبيل المثال وأيضاً بنظرة سريعة على ألوان جلاليبنا هذه الأيام تصاب بالصدمة ، صحيح أن هذه الألوان قد تناسب البعض منا إلا أنها لا تصلح للجميع.
المرأة في بلادنا أكثر ترتيباً منا نحن معشر الرجال لعوامل قد يأتي في مقدمتها الإلتزام بالتوب السوداني في الكثير من الأحوال وهو ساتر جيد إضافة إلى طبيعة المرأة وشاعريتها.
ظاهرة عدم الإهتمام بالمظهر تعطي إنطباع أولي أو مبدئي غير جيد عن الشخص المبشتن وهو ما يعرف بالـ First Impression فتجد مثلاً شخصاً حاصل على درجة علمية جيدة ولديه خبرات لا بأس بها في مجال معين ويأتيك لشغل وظيفة وهو غير مهندم أو مرتب بل حتى شهاداته تكون مبرومة برم الجرايد والصحف في الحافلات ومواقف المواصلات وكأنه يريد أن يقتل بها ذبابة بينه وبينها ثأر مبيت.
أعجبتني موضة الحلاقة الجديدة المنتشرة في صوالين حلاقتنا وهي التي يحفحف الشعر فيها من كافة الجوانب عدا وسط الرأس وبالتالي يكون الرأس زي شارع الظلط بعد حلة كوكو في إتجاه الحاج يوسف ، وبعدين عن كون هذه الموضة قزع لا يقرها الدين أو غير ذلك فإنني أري أنها أفضل من الختفسة وتلك التفف المنفوشة عطفاً على طبيعة شعرنا القرقدي أو الشبه قرقدي.
البشتنه لا تقتصر على الملبس فهي أيضاً موجودة في موائدنا وفي بيوتنا وأثاثتها وطبيعة حياتنا بصفة عامة نحن شعب مبشتن حد البهدلة.
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: walid taha)
|
Quote: آها يا جماعة الحفلة كانت كيف ؟؟
أن شاء الله ربنا تمم بخير يا وليد !!
وتمبس يكون ساهم فى ضياع الناس لانو ما ذكر مقهي الأمبراطورية بتاع الشيشة
ودا كلوا عشا ن العشاء .. |
تبلدينا،،
والله البشتنه اقصد الحفلة كانت فاقداك
| |
|
|
|
|
|
|
|
|
|
Re: هل نحن شعب (مُبشتن)؟..دعوة للنقاش.. (Re: waleedi399)
|
بهدلتنا نحن السابلة ويبشتنتنا أفضل من تلك البشتنة التي تتناقلها القنوات الفضائية والأرضية والتي تصل حد الفضيحة بجلاجل ، فحالنا نحن المبشتنون في الأرض يعتبر بكل المقاييس بشتنة محلية ، أما حال كبار الساسة والمفكرين والمثقفين والمذيعين الذين يملؤن شفي حاجة إلى من يديهم النصيحة بعد أن أصبحنا على بعد إختيار بفعل كبسة زر من أزرار جهاز التحكم عن بعد يتفرج عليهم الكثير من خلق الله أو ربما ربنا بيفرج خلقه فيهم.
| |
|
|
|
|
|
|
| |
walid taha
Al-Shaygi
Frankly
أحمد الشايقي
قرشـــو
سجيمان
abuguta
Shinteer
ترهاقا
ودقاسم
مشتاق
مريم بنت الحسين
abas
nashaat elemam
حيدر حسن ميرغني
بلدى يا حبوب
mohamed elshiekh
nour tawir
tmbis
Tragie Mustafa
waleedi399
salah elamin
فيس بوك
تويتر
انستقرام
يوتيوب
بنتيريست