|
|
 البادية الجميلة
|
هناك فى خط الشمال على ضفاف نهر النيل تبدو البادية كأروع ما يكون تكتسى حلة زاهية من الخضرة والجمال على طول العام
النيل يرفل فى وداعة يمنح السكان أسباب الحياة والنخيل يميس طربا والأطيار تصدح لحونا جميلة الجروف تذداد إخضرارا وتنبت فيها رائعات الورود الطبيعة هناك ساحرة وتمنح الأهالى دافعا كبيرا للإقبال على الحياة بروح الأمل والتفاؤل هناك نستطعم الحياة ولا تنال منا الخطوب ولا تطيب لنا الحياة إلا فى ذات المكان فعليه قد جبلنا وأعتمرت قلوبنا بحبه حتى صار الواحد منا عندما يغادر صوب المدينه لشراء بعض لوازمه يعود أكثر تحرقا وتشوقا
الكل يعمل فى منظومة رائعة دون الحاجة لبروتوكولات مقيدة الكل يعرف ما عليه وماله لذلك تمضى الحياة جميلة وتسير الأمور كما نحب ونرضى تحكمنا الأعراف السائدة قبل القوانين المسنونة نعض على قيمنا الجميلة بالنواجذ ما أستطعنا ننشر بيننا روح المودة والحب وتكاد تلك الأشياء تضاهى الروابط الرحمية متانة وقوة
أفراحنا تفوق أحزاننا وأحزاننا نتغلب عليها مجتمعين بمواساة من يحزن منا ونعمل سريعا على إعادته لمراكب أفراحنا منتشيلنه من أحزانه لا نستطيب العيش إلا شركة ونتفانى فى إفتقاد من تأخر ركبه عنا تلك هى حياتنا التى نحبها ونعشقها ولا نبتغى سواها ونتمناها للكثيرين من أبناء جلدتنا والذين شغلتهم الصراعات عن إعمار هذا الوطن بل أصبحوا
لا يدخرون جهدا فى إفساد ما أخرجته الطبيعة فى راجا وديم زبير ودارفور أيضا
نتمنى أن لاتتكرر تلك المآسى
|
|
 
|
|
|
|
|
|
|
|
Re: البادية الجميلة (Re: نزار باشري ابراهيم)
|
اخى نزار ود عم باشرى ..
كيفنك واريت حالك زين
التحيه لك معطره بنفس اهل الباديه الحنان
سرحت معك بكل حواسى وطفت ديار وبوادى اهلى من خلال سردك الرائع
اعشق الباديه واهلها حد الثماله
لك كل التحايا النواضر
واهديك والاخوة القراء لوحة من لوحات ريفنا الحبيب
وسماحة اهله الغبش ..
اهديك (غبشه) نموذج لبت الباديه
*** غبشه ***
السمحه وارده على البحر
شايله الصفيحه على الصفيحه
وتوبا بالواطه بيجر..
تتناطا من بين الغنيمات المبطحه فى الدريب
وتناحى فى الديك المجفلا غادى كر..
تزازى جاى .. ومره جاى
وتنهر الكلب البهوهو خايفه وتقول ليه جر..
*****
رفيقا تا القبيل سبقنها فاتنها
ما لاقيه واحده تآنسا وتبقالا فى الحالتين وزر..
فطومه مره تمد .. ومره تجك ..
وتتعتر تقشقش فى العرق والدنيا حر..
قديمات الحمام اتغبرن .. والشبشب المهرود
يبرطش فى التراب جاراه فوق كرعيها جر..
****
احى انا .. نفسى انقطع..
تنهيده تمرق من رويحة السمحه
زى فصين درر ..
****
لمن لفت نص الطريق ..لاقت رفيقا تا القبيل
رجعن خلاص من البحر..
يتهامسن .. و يتضاحكن ..
نظراتن الشمتانه تكوى السمحه..
زى كى الجمر..
وقفت ... وبى نظرة عتااااااااب ..
انا ما رفيقتكن .. نسيتن اللمه فى ضل الشدر ؟
اتلملمت لفحت طرف توبا وجرت..
ما عاينت قداما.. فجأة اتعترت فوق الحجر..
****
السمحه مى شبه التعب والبهدله ..
لكن ظروفا القاسيه اقوى من الدهر..
فطومه ديمه شايله شغل البيت..
لا يوم شكت لا اتململت .. واياما فى الدنيا بتمر..
*****
وكتين دنت سمحتنا من طرف البحر..
رمت الصفيحه وكوعت ايدينا فى نص الضهر..
ملت الصفيحه .. اتنهدت ..
لوت الوقايه بى ضجر ..
وهطت الصفيحه.. ورجعت تجرر فى الخطى..
والمويه من خرمين تسيل فوقا وتخر..
***
وصلت خلاااااااص آخر المطاف.. والفيها كملت
من مشيوير الورود ساعة العصر...
تكت الصفيحة تكبها فوق الزوير..
البالى من زمن الجدود مال واتنخر...
فلتت اديا تا الصغار من الوهن ..والمويه سالت..
تحت كرعيها زى جدول عبر..
اتزحلقت .. اتمايلت .. وقعت تراااااااااااح ..
فى لحظه كانت سابحه فى بركة مطر..
اتاوهت .. اتوجعت .. اتندمت 00 اتحسرت
والدمع من عينيها طفر..
اتحكرت فوق طينا داك .. تندب الحظ
المعتر ليها دوم طول العمر..
تندب الحظ المعتر ليها دوم طول العمر..
سوما @@@
اسماء الجنيد مسقط ...
| |
|
|
|
|
|
|
|
|
|
Re: البادية الجميلة (Re: نزار باشري ابراهيم)
|
أهلا أخي صديق
نعم اخي الغالي إنها حديقة وحقيقة في الأرض اليباب والتي إكتست بالحسن علي يد من ذكرتهم من كرام القوم في تلك الرحاب الجد الراحل عليه رحمة الله إسماعين والخالة الفضلي أم الفضل حفظها الله لنا
لقد أعدت لي زمانا جميلا وأناس أحبهم كثيرا
فهذا النص أيقظ في نفسى ذكريات عذاب فأثار الاشواق والشجون فى وجداني وتحركت مطارق الحنين فى أعماقي لتدق علي حبال وصل بينى وبين البلد الذى أقيم فيه تطالبني بالرحيل فورا صوب الارض الحبيبة
لك ودى ومحبتي
| |
|
|
|
|
|
|
| |
نزار باشري ابراهيم
Sidig Rahama Elnour
فيس بوك
تويتر
انستقرام
يوتيوب
بنتيريست