|
|
|
 Re: خال فاطمـه و ينك , تعال نكمل (طه البطحاني .. و حمد ود دكين الشكري شيخ العرب ......) (Re: fagyra)
|
الأخ محمد البشير
لك التحايا العطرة
نشكرك على ما تقوم به من تنقيب فى تراثنا الجميل والشكر موصول لخال فاطمة.
هذه الرواية لها وجه آخر وإن كان لا يختلف فى أسماء أبطالها و لكن الإختلاف فى أصل القصة و السبب الذى نظم عليه العبادى هذه الرواية.
طبعا العبادى قصد بها محاربة القبلية عندما قال فى نهايتها :
جعلى و دنقلاوى و شايقى أيه فايدانى
القصةالأساسية لا تشكل ريا فيها أى طرف وإنما إختفاء حمد ود دكين وهو صبى يافع إبن شيخ عرب الشكرية وقد كان فى رحلة إلى عمه وبعد أن أضنى أهله البحث عنه و شى أحد الأعراب بأن مجموعة من شباب البطاحين إجتمعت عليه لسلبه وقد قامهم فقتلوهوا و تركوا جثته فى العراء تأكلها الصقور. وعندما رأى الشكرية عظام حمد فى العراء هبواللثأر من البطاحين و كان زعيمهم طه, وقد كانوا عددا و عتادا لا يمكنهم قتال الشكرية فاحتموا بالمك نمروالذى كان ملزما بحماية البطاحين . وعندما أوشكت الحرب بين الطرفين خرجت شمة زوجة المك نمر وبنت أخ شيخ العرب وكشفت رأسها أمام عمها( فقنعها) وبذلك حقنت الدماء.
و مازالت هذه الرواية تخلق بعض الإحتكاكات بين الرعاة من الشكرية و البطاحين فى سهل البطانة.
لك خالص شكرى
| |
 
|
|
|
|
|
|
|
|
Re: خال فاطمـه و ينك , تعال نكمل (طه البطحاني .. و حمد ود دكين الشكري شيخ العرب ......) (Re: Balla Musa)
|
مسرحية المك نمر
تأليف ابراهيم العبادى
طه: أخوك يا ريّة أخوك وقت الخيول يدبكن
اخوك يا ريّة أخوك وقت الرماح يشبكن
أخوك جبل الثبات وقت القواسى يتحبكن
كم بكيت وكــم قشيت دمـوع الببكن
ريّه: وراك أسـود علىّ ما نمت أسـع طيب
طه: ها بسم الله قـــولى أخــوك طيب
وشديد وحاضـر وقلبوُ ماهـو مغـيب
إلا الشفتو فى النـوم من هوايلو اشيب
*******
الزول فى الصُحى مهضوم عليه شقاهو
وإن غمد شويه تجى الهموم لحقــاهو
الصف أب لؤيس أنا ما بخاف لقيـاهو
يا ريت الحلم فى صحاي كان بلقـاهو
******
كان خير ولو شر برجاه ما بهـم بـالى
وحارثنى الثبات من الكبـار قُبّـــالى
وقت حســع حسيت وشفتك قاعدة قِبَالى
إن إتلخبط الكـون تـانى مـانى مبـالى
ريّه: كعب نوم النهار أمس العصير كنت نايمه
رأيت قدام فريقن اشوف صقـوراً حايمه
كبير غـار على من نـوم تبين غـايمه
صحيت مهجومه لا مفصل ولا فينى قايمه
طه: إنتى كمان رأيتى صقور
(هنا يشعر طه ان حلمهم مع بعض)
علامة كافيه ظنيت الحكايه قريبه
هاك من الصحيح الما بتدخلو الريبه
هذه الحله بعينىّ أشوف تخريبه
دحين يا اختى يلاك لأرض الجعلين نعيش
هناك باقى حياتنا معاهم
( هنا ريّه قنبت تبكى)
طه: ما بفيد البكى وكلامى احسن تنسى
ريّه: كيف ما ببكى كيف افوت مراتع انسى
افقد كل شىء عزي ورجالى وجنسى
تطلق فوقى ناراً عقباً تقولى أنسى
************
ما ببكى الفريق ببكى الرجال قُبالو
شن طعم الفريق ما بيوت شُقاق وحبال
خرابُُ انت حين ما بمر بالبال
إلا يقع قتالا بعده نلقى وبال
طه: هاْ فأل الخير أخير ما شفنا شيتن جدَتَ
كل الشفنا احلام فى طريقَ اتعدت
قبل الليله بيدى حمان قط ما ندت
مانهدم شرفنا لو السماء انهدت
ريّه: ورينى الحلم التورك مذهول
طه: اصبرى لىّ أروق عقد الفكر ممهول
احكيلك شنو الشفتو والله مخول
شفت الوحده..وشفت النار وشفت الهول
احيلك تمام الشفتو ما بتغابه
جاين العصير أنا وانت من الغابه
سايقه ليك بهم قدامك برقابه
بين والفريق اتولعت التقابه
قدر ما نشوف بعيد قدّامن نلقى حريق
وقت النار علت ما شفن تانى فريق
باصرن المروق مالقين لينا طريق
تشكى من العطش واخوك يابس ريق
فترتى قعدتى وانا محتار جلست حداك
حاقب الدركه ختيت سيفى فوق أوراك
وقت بِعد البهم دا كسحتى انتى براك
كسحتى وجيتى ومعاك كور صقور تبراك
تبيت بعجل شافنى جفلن وطارن
غابن من عيونى فى اللعوت إضارن
ما غابت كتير جن إقدلن يتبارن
قدامهم كبيرن عيننى وغارن
سلّ سيف لاقاهم اخوك يالضامرة
تور غنز ام هشيم الفى المجامع دامرة
سيل تلا واندفق فوق السحابه الهامره
حجر الصاقعه فرتاق الصفوف العامره
بادرنى الكبير ، ديلك استعدن وقفن
مامهلتو طار راسو وجناحيه يرفّن
طاراً ديلك وقت بريشو رقد إتكفن
ريّه: عارض ومات الليله يمكن عفّن
طه: نحمد ربنا اليله مات عارضنا
وان كان عمرو طال يا ريّه كان قارضنا
يلحقو بعجل ديش همنا المارضنا
انبدا زواجنا بكرة منو البجى يعارضنا
بطال البعيش فى الدنيا اصلو مناهو
إن كان مالو راح غير اهلو مومدناهو
سمح الفوق اساس ابواتُ تّم بناهو
والزول دون قبيلةُ مناهو شن معناهو
ما بنفرح بمال ونقول كفانا ورثنا
نفخر بالرجال فى الحارة يبقوا ترسنا
نجمع ناسن هيلنا من الكبار حارسنا
يحضروا اهلنا فرحانين يباهوا عرسنا
كل بطحانى يفرح بعرسنا مناهو
ساعت جمعتهم بيتنا بنتم بناهو
عزاب عيش يا ريّه مرض مناهو
سمح الزول حبيبى يلد ويربى جناهو
(كان والدها لم يتم السنه عايزاه كلام ذى دا لا يذكره حكايه العرس)
ريّه : دا الأعوج ترا والشين نهاية حدّو
وان شاع دا الخبر يمل الفريق لآ حدو
يقولو اب كبس من دخل ودّ جدو
فرحوا وعرسوا لا من حزن ولا جدو
وان كان فى الفريق ماتت مرّيه ذليله
للحول يرفعوا العرس البختُ الليله
خليه أب كيس راس الرجال وقليه
لو كان بيقيله تعد تبقى قليله
خليه الكلام وعرسنا سيد الحال
من بالك أمرقُ محال والف محال
على ميتت أبوى الليله حول ما حال
نصبح بكرة ونسه ونشب بشاتين حال
طه: هأ الموت موشمت غايت البفوت والببرو
والجد والحزن ما جابو زول من قبلو
الزول فى الشدايد اول يلزم صبرو
بترج الكريم مولاه كسرو يجبرو
بنخاطر من الوجعه هيلنا برانا
نحن اهل المصاب الناس لُزم جابرانا
فى آخر المراح دايما تجى الفترانا
عات الحد ندوسه الناس عقب تبرانا
ريّه : الناس بالمكارم والفعال تتباها
وينشأ الزول فطرة حسب مرباهو
عادت جِدُ عادتو ومثل أباه نباهو
يلبس توب قبيلتو ان دار والله اباهو
من الليله حول نقضيه تانى اتكلم
الداير يتم رب العباد ان سلم
طه: تانى انا أقضى حول وانا بالحسار أتالم
علىّ حكمك صعب أنا قابلو ما بظلّم
لكن مشيتى للسنه قاسيه وصعبت علينا
ريّه: تمّ الاتفاق من الكلام خلينا
زي عادت البلد لازدنا لا قلينا
إنشاء الله السنه بخير عايده علينا
يا طه البهم قاربن راجوعت الراح
بنات واولاد هديل ناس فريقن الراح
تصبح سمعتها من الكبار الراح
قالوا العربى ما بنعز كما مراح
(هنا تخرج ريه ماشه ويظل طه يعاين ليها ويقول)
طه: آه يا ريت السعادة ان كان بقت بديه
كنت اعيش هنى فى الدنيا بالزنديه
علىّ حكمُ ناس الفيّ طلبوا الدِيه
الموت بالعطش والمويه بين إيدِيّه
ريّه علىّ قاسيه وجايرة فى التفنين
آه يا ربى أرحم صدرى أنس ضنين
يمحق دى السنه ربى الحليم وحنين
يخصم من حياتى رضيت بعشرة سنين
كيف أهن واعيش وانا صبرى ولاّ مودع
وسبب الدخرج المن مامتور مفدّع
جنيت وجنى جنّ وحالى اصلُ مبدّع
اهج فى الجيش اهج فاضلى تانى أجدع
( قامت ماشه على الفريق لاقوها جماعه كدا قدام الفريق بجمالن وبتاع-دا يعنى ملامح من الحلم تقريباً يعنى ديل نفس ود كين ومعاهو جماعه ماشين حِته اسمها ام شديده جات مارة كدا فوقهم ساكت فايته فوقهم ناقم واحد عربى مع شيخ العرب قاليهم)
العربى: بالضيفان تمرّ لا سلام ولا كلام
صدقوا اهل المثل توب العرب صُح لام
(هنا ريه تلتفت اليهم وتقول)
ريّه: حبابكم عشرة من دون كشرة والف سلام
يا وجوه العرب المتلى ما بتتلام
أنا بت الرجال اهل الحدق والسيف
بت الما بهم بحساب الخريف والصيف
بت البيحجزوا المرقوب البكرموا الضيف
انا ريّه ان كان شفتكم افوتكم كيف
العربى: من وين فى الأهل يا بنيه كفاك فخر
ريّه: أنا بنت البيوت المن بعيد معنيه
أنا بت أب كبس فى النسبه بطحانيه
(هنا شيخ العرب عرف زولتو الدايرة لانو قُبال كدا سمعان بيها ساكت ردّ عليها)
شيخ العرب: آآآهـ عبد الله اب كبس عز البطانه وفخرى
وفى رأس العرب بنعدو ما هو الوخرى
كريم وهميم وصميم وكان للقبائل دخرى
بت شيخ العرب هيلك صحيح تفتخرى
توقد نارو ديما الما بكوس الجمره
وفى ضيفان يمين وسكين دايما حمره
بكاس ما عبر لبن يجيك بالعمره
هيل الشكر..هيل الرّآس..هيلُ الأمره
المرحوم ابوك كان للقبيله قطاه
عزاك قديم حسين ابوطه
إنشاء الله يكون اخوك دى السكه ما تخطاه
(دايره تديه كلمه ناقصه فى ودعمها)
ريّه: كما بسد مكانو قدم ليه يطاه
لا يفوت ولا يموت السعى وت مغشيه
تُهابه الفريق يوقد صباح وعشيه
زايد فى الرجال طالق غفايه وغشيه
ضيوف الليل يكفيهم مرارة وشيه
شيخ العرب: مادخلت التراب البركه فى الزرّيه
والخلاك وراه ماهو المات يا ريّه
دايماً فى القبائل سيرت ابوك مطريّه
بيك وبأخوك تزيد ودى المحريه
(تانى العربى داك سأل)
العربى: ما بتسألى لا من وين ولا وين ترسو
ريّه: كيف العربى يسأل ضيفو كيف تنسو
اول بكرمو وبخابرو ساعه انسو
من مغلب حديث تعرف ابوه وجنسو
العربى: عملتى حسابو ضيفك وكرمو وجيتى
ويخجل كان سالتى واسمو ما عرفتى
واسم شيخ العرب سامعابو ما عرفتى
(داير يوريها بان حمد ودكين دا راجل غنى وراجل كذا وكذا..عشان تقبل بيه)
دا خريف البطانه الفيها ما لو مشارك
هيل السارحه...هيل الصاهله..هيل البارك
ماوقع ليك كلامى ساكت لشنو خبارك
فخرك ود دكين جاك فى فريقك زارك
ريه: مرحب بالعز وموهو كفايه
اب ناراً تولع للضيوف دفّايه
بشيخ العرب الافتخار ما كفايه
تابعو ان جانا نفخربو ونخدمو حفايه
شيخ العرب: بارك ربى فيك عقلك يدوم يا ريه
وكرمك موهو كُلفه دى طبعتك فطريه
إياك بت اب تروب والسمت فيك محريه
قديم فوت البطاحين عزّة للشكريه
(هنا فى المحل دا جاء طه ودعمها)
طه: سلام شيخ العرب مرحب خريفن الزارنا
مرحبتيت حبابك واشرفنبو ديارنا
مرحبتين حباب البيه كل مزارنا
تنزل فى الدرب ليه ماتت نارنا
شيخ العرب: حباب طه الضرس الفى الصهيباب راس
الجود والكرم هيلك قديم ميراس
نارك ما بتموت يا ولدة الحُراس
قاصدين أم شديدة ومعانا عوجة راس
طه: لعدوك العوجات فى الكبس سراى
راسك ما بدوس مليان رجاله وراى
باكر لأم شديدة بركب معاك براى
يا شيخ العرب لكن تختو كراى
(كراى دى لخمت شيخ العرب ما قدر يعرفها قال لطه)
شيخ العرب: هادى الشورة يا طه القلبنا دليلا
كل البنزلو فيك نلقاهو قليلا
طه: كراى الدايرو تبقوا ضيوفى انتو الليله
ترقدوا فى الفريق حتى ان عشاى بليله
شيخ العرب: مسكنا الدرب اسرع قوام ما تلعب
ودارك ديمة عامرة والسمح ما بتعب
بكفينا الوصف لا تشد جمل لا تتعب
وهدنا الطريق عقب الوصول ما يصعب
طه: يمين تخشوا الفريق بتفوتو نحن مغابر؟
شيخ العرب: ما تهدم فرحنا انشاء الله آمر واياك مرسى العابر
مشطوطين خلاس مسكن فى الزمل لزم خاف عوجة الطريق من للمغور خابر
طه: دريب جابر مزم والسكة سالكه ورايقه
فرقان ما بلاقوك ما بعقوك عايقه
أخت خاطرن نحن قالوا واصله السايقه
بتتراوح ام شديدة باكر وماملك فايقه
شيخ العرب: الزول إن وعد شين كان ميعادو يخلفو
وفى ربط اللسان يسخابو دمو يتلفو
سفرى الليله زولين فيه ما بختلفو
&nbs p;ضرورى اصل ام شديدة على وعد بحلفو
ما بعرف ازواق من نشيت تبيت
فريقكم لى فريق وبيتكم يمين بيت
اجيكم ديناً علىّ ان بقيت حفيت
هاك وعداً نجيض أرجاه بكره مبيت
شوفتى للفريق أيام بُكى أبواتك
موغابينى حال وسمعت بأخواتك
فريقك بكرة نحن ضيوفو وما بفوت وحياتك
الا احققك وبراى اشوف نفحاتك
يا ود الهميم النفسُ مومعارضاه
كرم الضيف عليك مكانت ابوك فارضاه
جايك فى أمر أن تاب وان ترضاه
غيرك ما بكوس واملى بس تقضاه
طه: غرضك مقضى إن احتاج لخيل وجمال
والضان والأبل سارح يمين وشمال
شيخ العرب: فوق القلتو أنا لىّ فيك آمال
طه: ها الغرض بدمّى دا أقضاه خلى المال
(دا ماشى بجاى ودا ماشى بجاى لكن طه عرفو داير شنو)
شيخ العرب: سمح وين الدرب خطرنا
طه: دربكم فى السلم
شيخ العرب: والله تب ما ودِرنا
وبكره نجيك إن قلينا
والله كترنا
(وقاموا فاتوا)
( باكر بتكلم طه مع بت عمه)
طه: فى البال ضمير شيخ العرب متعوب
وقايم نفسه يختف فى الكلام مزروب
الراجل زمان كان ضحوك ولعوب
موخاتك شى ما شفتى كيف مرعوب
حمد وددكين مرتع دياره وربعو
دا الشىء السمعتو من الأباء والتبعو
الراجل فعايلو بينيلك من طبعو
أنا ود الخلا البعرف أسودو وطبعو
ريه: شين كان يخلف الليله ميعاد جيتو
رجال وحريم عموم أهل الفريق فى رجيتو
قطع السارحه كل زول فى مراحو وسعيتو
كبار وصغار وحتى الراعى خلىّ رعيتو
طه: مُحال يخلف مُحال قال جايبو غرضاً عندى
ريه: كان قرض صعب
طه: كان راس نمر فى شندى
أو عدتو اقضيه وابزل كل جهدى العندى
كان بالمال كان برّاى وكان بزندى
ريّه: هيلك قديم انت البجيك تحجالو
لكن وددكين عاصر بدين برجالو
(تشعر بيها انها عرفت حاجه)
طه: ريّه الكلام دا اخير تقفلى مجالو
وقت اوعدت بقضالو قرضو الجالو
( ها فى محلهم دا جو داخلين عليهم تلات بطاحين عبد الله-خلف الله- واحمد قالو سلام يا طه)
طه: مرحب بكبار قبيلتى وعزى
مرحب بالأسود البكبعوا المستهزى
ريه جات قبيلتك فوق انكعى بهزى
وان زحيت يوم الحارة قرنك جزى
ريه: اولاد بطحان تعيشو ويزيد مراحكم ناير
وناركم فى سرات الوادى تهدى الحاير
بتحلوا النضم بتصدوا غارات الغاير
ما هيلكم تزحوا ان كان يزح الداير
(هنا فى واحد اسمه خلف الله قعد يرجف هاش)
عبد الله: خلف الله ولدى أقعد قبال ودعمك
كلام ريه هذا بشوفو غير دمك
من زمنن بعيد متمنى اسمع نمك
فرج همنا مولاى افرج همك
(دوبينا قول دوبينا)
خلف الله: هنا قعد خلف الله يدوبى-طه جاهم داخل قال ليهم
طه: هداك ود دكين بزملو بان شفناهو
دار اليوم يروح خلف الوعد خفناهو
الراجل فى الأصول موخاتى بمعناهو
يا ريّه استعدى الزول جميع نعناه
(جاهم شيج العرب قال ليهم)
شيخ العرب: أولاد بطحان سلام اهل النبأ والشكرا
سلام عز العرب اهل الفعل والبكرا
سلام يا طه يا اهل راس الكرم والضكرا
جيت لغرضى يا طيب الأصل والذكرا
طه: مرحبتين حباب شيخ العرب حباب خريف الرازه
مرحبتين حبابو البيهو القبائل عازه
حباب سيف النصر البيه هايشه وهازه
فى يمينك قبيلة ما بتقبل فاسدة
عبد الله: هى جيبو الزمل
شيخ العرب: خليها يا عبد الله غرضى ان ما انقضى زملى ما بتدلا
طه: الناس فى رجاك من الصباح فى مله
كدى شوف الطعام شيخ العرب بسمله
شيخ العرب: ما باكل طعام كما حسابى إضرّب
وقضيان الغرض فيكم حقيقه مجرب
الامر العنيتو وجيتو كما ادرب
ما بتنفعنى أكل وما بروينى مهما اشرب
عبد الله: يا شيخ العرب امرك خلاص همّانا
قول قرضك عجل خصصنا او عمّانا
هسى نقضا ليك فى محلنا المّانا
كان بمالنا كان ببالنا كان بدمانا
شيخ العرب: عندكم الغرض لا بدور قلم ولا ورقه
ومو غرضاً تسافرولو وتقيسو الفرقه
بغضا كان قُلتو خير لا بدور سيف ولا ورقه
وإن قلتو لا يروح شمار فى مرقه
ما مقبوض ولا جنى جيتكم فوقى جنيه
بخيرى ومراحى وتانى نفسى غنيه
جيتكم نسيب تدونى بطحانيه
عبد الله: خير سميه
شيخ العرب: فى بت اب كبس لى نيه
عبد الله: بفتخروا البطاحين ساحتم راحت بالك
لكن ريّه امرها منهى من قُبالك
فات فيها الفوات لطه هدا قبالك
من دون ريّه قول الدايرو فى بالك
دا فريق الصهيبان ما فى واحدة
مال ورجال فى الحله مافى فقيرة
كثير زى ريه مليان البلد من غيره
ان درت الكبار وان كان قصدت صغيرة
شيخ العرب: ان مال الشجر ما بتكسرن فرّاعو
وقمحان للطلب لما بجيبو ضراعو
ليه يا اخوانا البيناتنا ما بتراعو
القال راسى موجعنى يربطولو كراعو
عبد الله : حبل المهل يربط وانت ارتاح بيت
وبكره نمر سوه ونفلى البيوت بيت بيت
وسمى الدايرو لوم البقول آبيت
شيخ العرب: يمين بالله غير الغايه مالى مبيت
طه: يا شيخ العرب امرك بشوفو حقارة
وما جايباك مرة الجابتك بس غارة
وغرّناك كتير نفسك ابيت وغارة
خبرك هذا ما بدورلو دق نقارة
(واحد كان مع شيخ العرب اسمه على ردّ لطه قال ليه)
على: قبلك فى الجج يا طه راحو انهدو
بتجازل على شيخ العرب بتهدو
زولكم مو عاقل يا كبار أكمل تهدو
بعنادو الفريق خايفو يسبب هدّو
طه: انا المالح الكارب خريف وصيفى
المتلك تبيع ما اظن يطل فوق قيفى
كما الليله فى بيتى بعدك ضيفى
فى الشى السمعتو برد عليك بسيفى
شيخ العرب: كفا يا بطاحين فيكم إتغشينا
كرمك جانا طامح رخسه واتغشينا
بعد الشىء السمعنا تانى كما مشينا
خايف فى اجتماعنا تقع وقائعاً شينا
ها طيب فى وداعة الله عُقب بيناتنا مافى علاقه
وإت يا طه إشفيت شبعت شلاقه
أمرت الشر سعيت دليتو بمُعلاقه
نحن وانت بعد الليله يوم نتلاقه
عبد الله: من ولد زعلت كل البلد بتكاور
ارحكم بيت نبيت ونحن زولنا نداور
نتقابل نشوف نحزم جميعنا نشاور
(هنا تشعر بيهم زى الخاف منهم كدا شويه..البطاحين خافوا من الشكريه لانو فى قله بعدين شيخ العرب قال ليه)
شيخ العرب: ضيف الغابه حالف دا الفريق ما يجاور
عبد الله: سمح أرجانا يمكن طه نحن نجبرو
شيخ العرب: الزول فى الرقاد شقه البريحو بخبرو
والزول البليد بيدو بحفر قبرو
عاد بنسوى عوسنا وطه يلزم صبرو
طه: سوى الدايرو وكُتر الكلام خليهو
والشر القصدتو معاى ابقى عليهو
طير اصل السماء حتى القمر دليه
يوم نتلاقى كل واحد بعرف الليهو
(بعدين هنا طه داير يمرق قام احمد لحقه قال ليه)
أحمد: أقيف يا طه عندى نصيحه ليك ابداها
العقدة الصعيبه العاقل بتعداها
الشكريه كتره نحن ما نلداها
انا عندى العرب بريّه اخير نفداها
طه: خلاص يا احمد تراك بفكرك
روح لود دكين وريه يسمع شكرك
يديك مال كتير وقبيلتو ترفع ذكرك
تصبح عمدة فوق روسنا تخلف حكرك
(جأ عبد الله برضو قال لطه غايتُ اتعبو خالص)
عبد الله: ليه احمد تهينو ، نصيحتو موضاراك
موحق النقص إنت بتعرفو براك
وكت بتسوى عوسك وما بتشوف بوراك
نشاور ريّه امكن ريه مودايراك
طه: صدق اللقالو خربانا البلد بكباره
هديل ريّه اسألوه واعرفوا اخباره
من غير السفر ما عندى تانى دياره
نحن وانت بيدى الحاله ما بنتباره
احمد: يا طه المصاعب للقبيله تقودا
مسافر وين مخلى النار بوراك موقودا
طه: انا السمتان جليس الردفولا عقوده
حد السيف بقطع عقدتو المعقوده
ما ولعت ناراً انتو تقعو فيها
شن دايرين براى وانا نارى مدفيها
أحلف ليك يمين دى الحله متقفيها
باكر من صباحى قبل يحس الفيها
عبدالله: نحن كبار اخيرلك ترضى بعرفتنا
مع الشكريه احسن نشترى الفتنا
ندى ود دكين ريه ونكتل الفتنا
ما من خوف ملاقات الرجال حرفتنا
طه: من الفيها ما بزح ان تزحزح مره
وان حين نعود ان طال زمنا ومره
عيش الدنيا ان كان يحلى وان كان مرة
الزين ما بدوم والزول بموت فت مره
عبدالله: وقت صممت ما ترجع وتسمع قولنا
وسفرك دا محال ما بقبلنو عقولنا
الموت ما بنخافو الخوف يمبن مُوهلن
بنعاين بعيد بنخاف بهادل عونا
الشكرية بسيوفنا صغيرنا معتق
ما بنابا القتال ونقول جرحنا اتفتق
مرحبتين حباب الشر محل ما بتق
تنقد الرهيفه إنشاء الله ما تدلتق
طه: الشكريه غوش واكتر علينا حساب
وضيف ليهم يمبن ما بتربطو الأنساب
أنا لغارتم حسبت الف حساب
لو تتعدوا رأى يمين عذابكم ساب
بجيكم حمد ومعاهو الرجال تابعاهو
قولولو طه طفش وريه معاهو
كيف نرضى السفيه الادبه ما برعاه
يرفض طلبك ات ونحن كيف نسعاهو
ابقوا قصادى وحدى القبيله معايد
عقبال من رجع فوق الخسائر عايد
وان كان دارنى انا ما بترجع جموع الزايد
وان حصلنى قط ما اظن يعود بفايد
عبد الله: ما بقيف ودكين واصل السرج ملعوق
وفى دربك بسوق واياك يا طه ملحوق
وات صنديد تصد الميه ما ممحوق
بنخاف كترتم ويد الرجال بتحوق
طه: ليه خايفين علىّ الدنيا عيشا مخاطر
الواجب نسوى ونرجى ستر الساتر
فى وداعة الكريم الليله فى نيتى خاطر
يا دار ريّه ما كان الفراق بالخاطر
كفايه مع السلامه انتهيت خلاص
غير الشوره دى مالينا تانى خلاص
فى نيتى حرير الدكب القصاص
ما بخاف ودكين ان جانى بالرصاص
(قام مارق منهم وساق بت عمه ماشى بيها طبعاً لارض الجعلين..ماشى للملك نمر يوريه على ان نسيبك دا جاى يقلع منى بت عمى -قام مارق- بعدين احمد قال لعبد الله)
أحمد: عم عبد الله خبرك هذا شيتن فاجع
كيف بنطاوعه من بيناتنا يطفش ناجع
عبد الله: سمعت كلامو من الفيها ما متراجع
وفى الشىء الشايفو غط بهينه ما بيعود راجع
أحمد: نركب نلحقو نخليهو يمشى براهو
عبد الله: شورة القال اخير ما نلحقو ونبراهو
العاقل بحسب للتقيل تافراهو
بنفكر على القدامو والبواراهو
أحمد: فوق السقوط قط فى ظنى ما يخلوهو
كيف موقفنا ساعة يلحقو يكتلوهو
عبدالله: ان وقع القدر ما بتقدرو تصدوه
ودا كتر الكلام اسع اخير تخلوه
( بعدين آ..آ..آ ساق بت عمه وفى الخلا كان بحجى فيها وقاليها)
طه: درقى يكركب كيمُ
رُكبى يشيل بر عمه
أصلى بطرز امه
منى تحود الأمه
جمل يكسر الغربه
سيف يحل من مجربه
قلبى سنين تربه
ما بتدمانى الغربه
يا ريّه الحلم ما شفتى كيف اتهول
واتفسر براهو وبالشين علينا اتأول
داخل راسى فكراً منو ما بتحول
بكتلو ود دكين ان كان قرب او طول
ريه: اسود ود دكين باسمو ما تحجيبنا
هو الفرقنا قمنا من البلد هجينا
عقب فى دار جعل تانى الخراب ما بجينا
ما بسوى الرماد المك نمر بحجينا
ريّه: ماك شايف الدرب
طه: ما شيهو بكرعىّ تلات ايام وضحى وكان معاى سعيه
كيف يلحقنا زول شندى ومعاه معيه
قبيلة دار جعل محميه فيها اسودا
تقدل بالكارم ديمه وحاقدا حسودا
رأس المك نمر كل القبيله اسودا
ركازة القبائل فى السنين السودا
بكره نجيه وسيفاً يجيك بولادو
العز والكرم من الكبار تيلادو
ما أظن ود دكين بشينه يوطا بلادو
ما خد بت اخوه شمه ام اولادو
ان ودعتك المك ما بخاف المتلو
اهون من شراب المويه عندى اكتلو
وارجع للبطاحين تانى وراينا نفتلو
والشكريه تقيو غير حرب ما بتلو
يا ريّه البطاحين أصبحت محقوره
على الشكريه دايما سارحتم مدفوره
ما بتقال عز وتعيد مكان وقوره
إلا الغاره وتقضى صقورة
ريّه: فى داب الشديدة ابقالنا قوم دربنا
بوصفك دحين من شندى نحن قربنا
ما بنفتق عشنا بالفتقه دى نفرقنا
ما بنوم الرجال امكن يمسكوا دربنا
طه: يسمع حركه
ريّه: شد ديل يبقى رعاويه
طه: حركه صُهب دا ركوب سروج مو رعويه
وقربن مننا وفى ظنى ناسها شويه
وكان ناس فزع ما بجيبوا حتى ضويه
ريّه: يا هم ناسنا خمسه عقاب رجال'' وينو
ما بتشوف ودكين برز براهو هوينو
طه: الشىء البين نحن سعينا لتهويلو
وضايقنا الصعج ما أظنو يعود لعويلو
الناس المعاهو عرب صعيد يا ريّه
ما اولاد عم ديل والله ما شكريه
معروفين تمام فى كل بلد وجريه
كان حفرولو بير ولقوه شجره ضريه
عارفين ود دكين ما بهم بخيل وجمال
بكتلنى وبسوقك وهم بسوقوا المال
وبكتلو ود دكين ودى الطانها فى فكرى
بتشوفى الفضائح المابجيك من شكرى
الشكريه فرسان ومستحقين شكرى
دا الصح قلتو ليك انا لا بخاف لا مكرى
ريّه: يا طه استعد الناس عنونا عديل
طه: وين شفتى القطاع بتسوى هم قُديل
بضاير العوقه اخوك الما بهم من ديل
براك بتشوفى ياما اشبعهم من بهديل
(هنا شيخ العرب جا وقف جمبهم قال لطه
شيخ العرب: أتعبت الزمل حفيت وراك مستبقا
احسن ليك تفوت ريّه وتحل الرفقا
طه: كان كل القبائل جات علىّ منطبقا
أفوت من ريّه يا شيخ العرب ما بتبقا
شيخ العرب: البلاوى القبائل ما بسوى سواتك
خربت قبيلتك يا طه وين داواتك
تانى بحد جريك البشهدنو اخواتك
فرقت الثبات فارق درب ابواتك
ابواتك تيوباً كانوا باعون طايل
ايدن للرقاب تحجا وتعدل المايل
سيف باعك كراعك ما بتخاف قول قايل
أفو يا ود حسين فيك السؤال مو خايل
أبقى لى نسيب أحجاك وآمل روعك
وقول الدايرو فى الملك اجيك فى طوعك
من هذا الغرور يا ولدى اولى رجوعك
طه: يا شيخ العرب جربت لحسة كوعك
كل ما اوغرك فى الشينه اراك تتقدم
اتعرميت خلاص ان صبرى حسمه اتهدم
اصلو البينا ما بتنفك من غير دم
الكاينه تكون بوراك مافى ندم
( واحد جاى مع شيخ العرب -عربى- قال لطه)
العربى: أصلو الخملا ما بسمع نصيحة الهادى
اول خفنا ليك من البهادى الهادى
يا طه البهدّى الما بضرب الوادى
يمشو على الرجال ويقرن مقبل فاضى
طه: هسه وصلت الميس دحين حديد يلاقى حديد
ينبرش الطرور ويثبت الصنديد
خليه المضا لاقى البجيك جديد
(واحد برضو مع شيخ العرب قال لطه)
عربى آخر: ما بتشيل قدر يا طه انت عميت
وفى المروق وقعت عترت ما سميت
من الجاى قضيت وبقيت خلاص زول ميت
فى تركتك كفاى انا بركب اب سوميت
(اب سوميت دا جمل طه)
طه: الداير الغنى يعمل حساب لفقرو
وكعب الزله وين المتلى تكابرو
اب سوميت خلى الليله سيدكم اعقرو
وين تانى الملاج وكت يتلب صبرو
شيخ العرب: لم باقى الكلام ياطه بهمك سرّب
جيتك استعد
طه: مرحب حبابك قرب
من قومت الجهل انا للقاك مدرب
يا شيخ العرب الليله يخمل غرب
(وهنا وقع القتال ها ها ها ها..طه ضرب شيخ العرب جدعو والتفت على جماعتو قال ليهم)
طه: ترا شيخ العرب قبض الربح من تجرو
واتوسد تقيله ان شاء الله ما بتصبروا
انتو الشورة كيف عند الزمل بتحجرو
صنقعوا دا السماء بطول والله بتجرو
أحمد: ارنى يا عمر الروح فى يد الخالق
بجيها الدر فى الدرقه ساسك غالب
عمر: عاين دا الخشيم دايما تنط متشالق
ما تنزل عليه ات ماك بالق
طه: دربى صعب على وصف البوصف عازر
وفى قارب التلوج انا ما يدى دايما عازر
اسمعو يا طرش كما بجينى مبارز
واحد منكم بضرب طرف ما فارز
ترا اب سوميت اركب يا عمر سافرت
قبيل وقت الكلام من الأسد طفرت
مالو دمك بهت متل التقول جفرت
عمر: من القلب انا ليك تبت واستغفرت
طه: انا على حلف ان كان بقيتو سريه
منكم انتهى قبال تجى العصريه
جيتكم استعدو تانى مافيش نيه
( وكلهم قالوا ليها)
هادى السيوف واقعين وراك يا ريه
طه: يا خضرة المفرهد فوق جروفه نديه
على الواقع وراك انا كيف اشيل يديه
حتى ان كان كتلنى اعفى ليه الديه
دمى ومالى هيلك واقبليه هديه
ريّه: رجال التابه انتو الستره تب ما فالكم
اتأمنتم قوموا سوقوا جمالكم
حتى جمال ود دكين سوقوه يتبع مالكم
نمشى فى حالنا واتو امشو فى حالكم
(الجماعه قاموا صوف اتلفتت على ود دكين قال لريه
طه: زايله رقد دكين اسد القبيله الراعى
كما ضايقنى هو ما كنت قطتو ضراعى
ريّه: تتأسفلو ليه كان داير يجزبو الراعى
والنعلات حرام ما تضوقا تانى كراعى
( يعنى ان مات ود عمها دا للقيامه ما تلبس نعال)
طه: موت المتلو نقصان للعرب فى الجمله
كان رأس الجرارى وهو البقود الحمله
اطرف عائل يقيف ليه يقيف بعد ما يمله
كما شويه كان داير بعمل العمله
( بعدين قاموا طوالى مشو فى دربهم.. برضو يعنى فى مسيرن برضو ما شيت للمك نمر..طبعاً قبيل كانوا ماشين وحصل ما حصل..هم برضو حيكلموا الملك نمر..ساق بت عمو ولقوا المك نمر قاعد وجماعتو قاعدين جمه الجعليين واولادو قاعدين وهنا جاهم قال ليهم)
طه: التلب الذوم مدخور يفيد العائله
اقدل تمهل فوقو الحمول الهائله
اياك ميز القبائل فيك تسند المايله
فراج كربة الهم اب قبائل جايله
عامر جمعكم انشاء الله ما انفضه
ما جابنى مال ما بدور دهب ولا فضه
بدور المك نمر سيد النحاس الجدضه
جيتو علىّ حملةً غيرك ما تنقضه
المك: تقضى كان بقدره
طه: انت اللزوم ماك حاشى
الف ذى حزمتى تشيلها تقدل ماشى
التقيان تغشه والضيف بتراشى
ما داب قبيلتك النحن بيك نفاشى
جيتك واملى فيك يا مك تكشف همى
فى الأول وداعتك وفى حماك بت عمى
وقتين تقبله ات شلت تلتين همى
والتلت الأخير تحجانى تحقن دمى
بت عمى اب كبس ما كان ابوها فقير
ابوى قبال مات وربانى كنت صغير
وقت اعيش وراه مانى حقير
اصد الغارة على جارى ولعروضى اغير
المك: مالك اسح شن جاك
طه: جاتنى جنيه حربة ربى ما بخاطرى ما بنيه
المك: قتلت منو وجريت
( التفت على بت عمو قال ليها)
طه: ها ما بتسمعى يا بنيه
هدى المابيها لكن خفت ورانيه
الموت ما بخاف الخوف مو هولى
الشىء البخافو بخاف بهادل عولى
الناس الوراى كان براى يسعولى
فى راس الكتلتو اقيف يمين للحُولى
كان هم برضو بتارت ياخدو الهيلتى
ما كنت التجيت ضاقت علىّ مهيلتى
يا مك ناسى قله بخاف يخربو قبيلتى
بجعل احتميت فوقك سندت تقيلتى
الشكريه تقيو وللجوار ما براعو
حمد وودكين فى راسى خت كراعو
سمع بسفرى قاصد شندى قام فى سراع
وقاطع دربى يخرط ريه قال بضراعو
جيتك من اهلى قاصدك ما بقبل تار
انكشف الامر براك دحين اختار
آما تبقى بينى والبخافا ستار
ام تكتلنى ات نسيبو تاخد التار
اياك عز القبائل والكرم فيك طبع
وجارك ما بهم ان يسوى السبع
ان كان اجلو تمّ اخد قصاصو السبع
والليكالو الاسد اخيرلو من الضبع
(آآآ..المك نمر هنا التفت على الجعلين القاعدين جمبو قاليهم)
المك: مطارق جعل اتو الكلام سامعنو
قولو دحين رايكم وفكركم الشارعنو
(واحد جعلى تلب وقف على حيلو قال ليه)
جعلى : كان ضيفنا ما نحميه وندافع عنو
نرمى سيوفن ليه تانى الحصان ساعينو
قديم يا مك ديارنا مرتع الامال
وشعبه الكون ، ركازة الزمان ان مال
سعين من جارى العوق يمين وشمال
بدمان التنزيل نحجاه قبل المال
اديه الامان يقدل ويلقى مناه
البقى فى آمان المك منو البدناه
كل اسم جعل من اعله لادناه
محال يقرب والمك نمر ادناه
المك: انت كبارنا شورتكم ما معنى بتعمرو
مارستو الدهر ضايقين حناضلو وتمرو
قايت الحى فناه الموت نهايه امرو
لكن بوراه ذكر يصبح عمرو
اياه الضامره وعليها كنت مصمم
ما اتعداه رايكم جاى ليها متمم
صار فى امانى طه الزمام متزمزم
ادوه هدومى وبعمامتى اليكون متعمم
ارتع فى امانى انا البغش البطقو
الزمنى غرورو وللرقاق ما اعتق
بالمال الشرت عازم اباصر رتقو
وان قال لا عقبن نوسع فتقو
تقول بالأمان فوق النحاس بشربو
لامن يسمعو الناس البعاد والقربو
عقب البدنو طه يمبن عقاب نخربو
انا المك نمر كبريت يحرق الجربو
(طه طبعاً اتكيف من كلام المك نمر خلاص قال)
طه: نمراً يركب الكيك البطل اتحرن
نمراً يقلب العوقه اب صفوفن جرن
خلوات صدرة فى علوم الحروب كم قرن
سيفو بنسرف الدرع الحديد مقرن
مو متل الشجر حاضن فروعو مقيل
دا النمر البضاير الصف محل ما يميل
كل ما اقول شكر القاه فيه قليل
كفو بيخجل العين اب سحابه ميل
غابة المك قبيلة ما تخطى اصولا
العشمان يعيش فوق ضلها ومحصولا
بالشينه البدوره بعيد عليه وصولا
فروعه سيوفه ومطارق جعل فى اصولا
عرمان جدكم النسبه عباسيه
وايان فضلكم لليله ما منسيه
هاهى الدنيا حيه بفخركم مكسيه
نزيلكم ما بهم ان سوى الف سيئه
من سابقه العرب فى اصلها وفخوره
مثبوت الرجاله وعندكم ماخوزه
صغيركم يدخل الحارة ميوس يخوده
مجرب من قديم سيفكم بوابر الخوده
(واحد حاجب كان قاعد جم نمر قال)
الحاجب: نبه بالامان فرسان فازن وهزت
دقين النحاس فوق الرجال انعزت
عروس الكُجرة فرحانه وطرب اهتزت
عرمان عزُّ لله قبيله بيك اعتزت
المك: وصلو طه للبيت المخصص ليه
واحفظ كل موجودو وجميع ماليه
خدمتك باحسن تقعد معاهو تسليه
فى كل يوم تعيت ناس يغفر عليه
طه: عشمكم
المك: ابدى بنصايحك وبيها أخير انصحنا
واختم بالحماس بالفيها قولىّ نحن
النصيح: خلى عجب النفس الدنيا قيد قصير
وبشرك اصيحو لا تكون دوام متغير
لا يغيرك هوا الضُحى المتغير
كم سبق الاجل خلا الامل متحير
ليكم يا شباب وكل نسة وانتم بالف خير
من بوست قديم للخواض
| |
|
|
|
|
|
|
| |
Mohamed Elbashir
خال فاطمة
fagyra
Balla Musa
bayan
Abdulla Ageed
فيس بوك
تويتر
انستقرام
يوتيوب
بنتيريست