|
|
 ياناس البورد أرحمو شوية البنت اللى اغتربت ولمت قروش العرس. مامكن كده
|
ياااااه لحدى الآن عدد من زار وقراء ذلك الموضوع (اها ياجماعة انا مغتربة ولميت القروش وجاهزة للعرس( للأخت ايمان صالح تجاوز خمسة ألف ولسه الحبل على الجرار.وأمسكو الخشب. بصراحة البت دى خشت تاريخ البورد من اوسع ابوابو. بس المشكلة موش في انو خشت كيف...المشكلة تطلع كيف. يحلها الف حلال منكم
انا شخصيا بهنيء هذه الأخت فاختيار العنوان موفق والطرح جرئ جدا.يعني ضربت معلم . هذه الأخت عرفت كيف تلعبا صح وكيف تعزف على الوتر الحساس. لانو وتر العرس ده بعزف في قلوب الشباب سمفونيات وانغام والحان ولااااا بتهوفن. خصوصا المفلسين منهم وماصدقو يلقو عروس بمواصفات زي مواصفات كاتبة الموضوع.
بس ما لفت نظري وزاد حيرتي هذا العدد الهائل والمخيف جدا من عدد القراء.الناس ديل ضربو ليهم صفارة ولا شنو؟؟ البت دي اكيد لحدى هسه فى حالة ذهول ومخلوعة وخاته يديها في رأسا من هذا الزحف البشري الهادر والعاوز يتعرف ويطلب ود ويد هذه العروس اللقطة مغتربة ومليانه قروش وجاهزة للعرس.
بديت اتخيل وعاوزكم تتخيلو معاي في انو لو كل هؤلاء الزوار وقراء ذلك الموضوع واللى زادو عن خمسة الاف شخص حضرو بشحمهم ولحهم لمنزل هذه العروس المغتربة والمجهزة قروش العرس. وعملو تجمع حاشد وضخم جدا مصحوب بهرج ومرج أمام منزل العروس واي واحد فيهم عاوز يدخل بيت العروس قبل التاني عشان ينال القبول والكرت الأخضر. طبعا حيكون في ضرب وخبط شديد ناس شايله عكاكيز وناس عضلات مفتولة واتنين بهناك ياخي مادفر الدور دوري انا، أنا جيت قبلك. والجايب معاو امو والجايب معاو خالاتو وعماتو . طبعا طابور العرسان حيكون طويل جدا ناس ليهم اسبوع واقفين قدام خشم باب بيت العروس وناس واقفين ليهم أيام وليالي. طبعا اهل العروس موقفين واحد في خشم باب البيت عشان ينظم حركة الدخول والخروج. بيني وبينكم لو الخمسة ألف واحد ديل خشو بيت العروس دى مرة واحده ..الله يستر على أهل العروس. ماعاوز اقول حا يمسكم انهيار..بس بيتم حا ينهار. -لا سمح الله- طبعا الدخول لبيت العروس حيكون بالدور واااحد واحد والعروس واهل العروس يبدو في الفرز والاختيار لا ده طويل . لا ده قصير. وده سمين مابنفع .وده ضعيف وروحو مارقه .وده سجمان ورمدان. وداك خمجان. وده كمان مابنفع طمعان في قروشك ساي يابت. وده برضو مابنفع لانو معرس تلاته وكايس الرابعة. وده برضو مابنفع عينو زايغة واحتمال بعد مايعرسك يقوم يعرس واحده تانية بقروشك
وبعد شهر من الفحص والتمحيص والتدقيق في كل الخلق الواقفة قدام خشم الباب وبعد خراج روح تعثر شهرزاد على شهريار.. شاب وجيه ووسيم ولد ناس ومحترم وعصامي هو صحيح مفلس لكن افضل واحد في كل اللى تقدمو ليك يابت. وفي النهاية وبقروش العروس- أكرر بقروش العروس- يتزوجو ويعيشو في ثبات ونبات ويخلفو صبيان وبنات.
وتوته توته خلصت الحدوته
رايكم شنو نهاية حلوة ولا لا.
على فكرة طبعا اخوكم حيكون من ضمن الخمسة ألف واحد المنتظرين قدام باب العروس .ياربي شهريار ده يطلع مين فيكم
نرجع للمهم والى بيت القصيد ياريت لو كل واحد فيكم يدلو برايو هنا ويخبرنا عن السبب او السر في انو هناك عناوين في هذا البورد لها مفعول السحر وبتجذب أعداد مهولة من عدد القراء وكمثال على ذلك عنوان صاحبة موضوع اها ياجماعة انا مغتربة ولميت القروش وجاهزة للعرس بينما هناك عناوين عادية جدا ، بالرغم من اهمية الموضوع والطرح الذي يطرح فيها نجد عدد القراء قليلين مقارنة بين العناوين ذات البريق والاثارة. وشايف في بعض الناس عشان يلفتو نظر الآخرين لموضوعم تجدهم يستخدموا عناوين مثيرة جدا لدرجة انو كل واحد فينا لازم يدخل على الموضوع عشان يشوف الحاصل شنو..
سؤال تاني في شكل استفتاء :اذا وجدت عروس مستعدة لدفع كل تكاليف الزواج من مهر وشبكة وكافة مراسيم الزواج من الالف الى الياء يعني ماعليك الا تجي (بالهدمة اللى عليك) هل توافق على مثل هذا الزواج .؟ ام ان النخوة والرجولة تمنعانك من مثل هذا النوع من الزواج. جاوب بصراحة وسرك في بير عميييق
سؤال ثالث خاص موجه مني الى صاحبة موضوع اها ياجماعة انا مغتربة ولميت القروش وجاهزة للعرس ايمان صالح اذا كانت من ضمن قراء هذا الموضوع عاوز اعرف شعورك وانتى بتشوفي هذا العدد الرهيب من قراء موضوعك هل كنتى متوقعة ان يكون عددا الزوار والقراء بهذا الكم الهائل ؟؟؟
وملاحظة تانية: بالنسبة للقصة التي نسجتها من وحي خيالي عنك وعن الجماهير المحتشده امام بيتكم فقط من باب الدعابة واتمنى ان لا اكون قد ازعجتك او أسأت ليك. واذا طلبتي سحبها سأسحبها فورا. مع الاعتذار
تحياتي هشام حامد
|
|
 
|
|
|
|
هشام حامد العبيد
فيس بوك
تويتر
انستقرام
يوتيوب
بنتيريست