|
|
 طه وقرنق فى ( ثرثرات وقطيعة الشارع العام )
|
لا ادرى شيئا عن الراى العام الدائر فى اوساط اخوتنا السودانيين فى المهاجر وكيف ينظرون من على البعد لتطورات الاوضاع السياسية بالداخل وبذات القدر لا يدرى المرء ما يدور فى اروقة كثير من القوى السياسية بالداخل فى ذات المسالة اللهم عبارات وتصريحات ينسخ قديمها حديثها كان يهاجم حزب ما اتفاقية السلام صباحا ثم فى اليوم التالى يقبلها ويدعمها ثم فى المساء يندد بها !
ولكن اسمحوا لى بنقل مشاهد من رؤية (الشارع ) الاغبش والمواطنين للحدث الكبير المنتظر يوم غد والمتمثل فى وصول الدكتور جون قرنق دمبيور الى الخرطوم وادائه غد اليمين الدستورية نائبا للبشير .
نقاش فى مركبة عامة :
الحافلة (الكوستر ) التى كانت تقلنا من امدرمان الى الخرطوم كان يدور فيها نقاش ( حلو ) عن المشهد السياسى الان اهم ملامحه ونقاطه ان هناك تفاؤل كبير وترحاب بعودة قرنق ودخوله للقصر حيث تبرع احد الركاب باعلان انه سيكون فى مقدمة مستقبلى الرجل بالمطار وانه سيصوت للحركة الشعبية فى اية انتخابات قادمة لانها فى رايه تنظيم يعمل ويعرف ما يريد وتخاطب مشاكله وانها اى الحركة ( بتاعة شغل مش كلام زى الاحزاب الشمالية )
راكب ثانى : غايتو انا ما فارقة معاى اصلو السياسة دى ما شغال بيها لكن فى الايام الاخيرة ومن بدا شغل السلام دا بديت اركز فيها وشايف انو على عثمان وقرنق ديل ناس مفتحة وعقلها كبير حتى الخواجات مقتنعين بيهم ودا كويس معانا عشان الراحات والترطيبة .
يتدخل طالب - يبدو انه منتمى لفصيل لا يعجبه كل ما يجرى -
الاتفاق والشغل دا كلو ( قسمة فيفتى فيفتى ) بين الكيزان وقرنق وما فى حاجة حتتغير لا فى حرية جاية ولا ديمقراطية و...
يقاطعه سائق المركبة : حرية شنو وديمقراطية شنو نحن عاوزين تولا دى تمرق فى العافية يا ولدى كم سنة ضيعو فيها البلد دى فى اوهام حرية ويدمقراطية .. يا ابوى نحن عاوزين صحة تعليم ومعيشة رضية وانشاء الله قال ليك بعدها يقرضو الاحزاب ديل ما يخلو فيها نافخ النار.. . هى البلد دى غير الترابى والصادق المهدى الضيعها منو !
مجلس شبابى فى احد الاحياء :
يتقدم نحوه ( ياسر ) يا شباب انا ماشى ندوة الترابى فى ميدان المولد فى زول ماشى معاى ... صمت ... ثم يعلق (حسين ) ياخى انت زول ما عندك موضوع ... ندوة شنو وميدان مولد انت ما شايف الجو دا ملغم كيف احتمال تجى كتاحة ولا مطرة تبوظ عليك برنامجك .. تكل معانا .
فيتدخل (سراج بسة ) بعدين الندوة حيكون فيها شنو يعنى عمك دا حيقول شنو فيرد ( ياسر ) عمك دا انا بس ماشى اتمتع بحنكو والفت البفتو للحكومة والحركات اللذيذة البعملها لمن يكون عاوز يضقل ليهو بزول .. فيعود ( حسين ) ويتدخل ... يعنى ماشى تتفرج وتقضى وقت للضحك .. فيجيب ( ياسر ) اى والله ماشى اتفرج واضحك ... !
السوق الشعبى :
حركة جرى وهرولة وصوت يصيح ( اتخارجو يا فرد طارة النظام العام والمحلية كبست ) فيتمتم عبد الله وهو يطرد زبائن (الشيشة ) معليش يا جماعة حنقفل ... ثم يلتفت الى احد اصدقائه ( شنو يا مان دا حالتو الدنيا سلام ووهمات يعنى لو رجعنا الحرب تانى نبقى كيف ) فيرد صديقه وهو ينهض ليتخذ لنفسه موقعا قريب من مركز (الكشة ) لاشباع فضوله ( ما تشيل هم يا حبة عمك جاى يوم الجمعه والفارات ديل الا يكشو الهوا تانى )
احد وكالات السفر :
فى صالة كبيرة لوكالة سفر ذهبت اليها برفقة احد اقاربى ممن ينتون اداء العمرة هذا العام وجدت ان الزبائن وفى اثناء انتظار اكمال معاملاتهم قد (دورو الونسة ) وكلها كانت تركز على ( حدث الغد ) وسمعت اشادات كبيرة بعلى عثمان وقرنق وانهما سمن على العسل وسيعبران بهذه الاتفاقية الى نهاياتها .
|
|
 
|
|
|
|
محمد حامد جمعه
فيس بوك
تويتر
انستقرام
يوتيوب
بنتيريست