|
|
 شخـصياً معـجب بإجتماعيات حزب الأمة والأنصار وتـدين الختـمية والذكاء الوقادعند الشيوعين.
|
أمه..
شخصياً معجب بالحاجات القلتها دي كلها.. في الحقيقة أنا ما بقدر اقول محايد تماماً لكن بفتكر نفسى ادخل في الحياد واتمني أن يجي اليوم الأكون فيهو محايد تماماً.. اري حسنات الآخرين كلها وتتقلص عندي سيئاتهم. حتي يصلحوها هم او ان أراها انا بعين أخري غير ملونة باي لون سوي اللون الأبيض جامع وجماع الألوان كلها...
خلينا نبدا بحزب الأمة والأنصار في جملتهم:
بجد اجتماعياتهم رائعة، وفيها ألفة وولفة وحنين واريحية وعاطفة حقة، وفيها صفات السودانيين الغبش، موش مجاملات في بيوت الأفراح والأتراح.. ياما شفنا زوجاتهم وبناتهم وسلالاتهم تمشي بين الناس وفي الأسواق.. مرة واحدة من زوجات الصادق. جات حضرت مناسبة زواج. واحدة قريبتنا تربطها بيهم صلة.. جات ومعها مرافقات.. الصالون كان مليان.. الحوش كان مليان.. ا########## مغرب.. بعد صلاة المغرب. الإنشاد العرفاني مدور..مافي زول فاضى الناس كلها وجوم الطير.. مافي كرسى فاضى.. الولد البنظم الجلسة .. أعطاها تربيزة لتقعد عليها.ز قعدت عليها ولم يتغير خاطرها.. واحد تاني كبير سناً شوية من الولد أعطاها مخدة عشان تختها على التربيزة لنو التربيزة حارة.. كمان مسكتها منو.. مرافقاتها.. كمان شافوا ليهم حاجة وفي الأول قعدن على البرش بدون مقدمات وفي سرعة كأنو دا الوضع العادي. بعد شعور الناس بهن أعطوهم وضعهم الطبيعى في تقدير قامات البلد النسائية.. كراسى وعصير وبلح وحلاوة وكدة.. واستمعن للإنشاد حتى آخر قطرة فيه بدون تململ او أعذار.. موش زي ما بيفعل بعض السياسين واسرهم يمد راسو في الفرح وفجأة يقوم ويقوم معاهو الجو معاهو والحفلة كلها تشعر بالدخلة والمرقة والصيت والصولجان والواحد عايز يوري انو مهم .ماعندي زمن مشاركة وشاركت ويكون المتزوج أخوهو او ابن عمو؟. يعني معاملة بتاعة سودانيين ولاد بلد كدة.. من غير تنطع بإسم الدين، او دا حرام او دا حلال، شاهدناهم في اعراس وبكيات وإختلطنا معهم في ظروف الحياة العامة..يصافحوا الناس يسلموا يعانقوا يبتسموا ويضحكوا ضحكات صادقة من الجوف.. مافيش شراب في الرجلين مافيش شراب في الإيدين مافيش كمكمة مافيش عمعمة . ناس عادية ولاد بلد.. هو إن جيت للفتاوي والتشريع والفقه المقارن والمذاهب تجد مثلاً الصادق المهدي يعرف كل شاردة وواردة في هذه الأشياء، وتلقاهو عادي، يسالم ويقالد ويضحك ضحكات صادقة مهدية.. صادقة مهدية دي زمان ذكرتي نميري مسميهو ( الكاذب الضليل) أنا ماعارف نميري شغال على كيفو.. يبدو الصادق ختا مكانا الكاذب.. والمهدي ختا مكانا ( الضليل) فبقت مشتركة الكاذب الضليل.. غايتو نميري الأذية الأذاها الشعب السوداني ماها شوية، شغل بتاع جن كدة، زول مجنون.. لاحول ولاقوة إلا بالله العلى العظيم..
أها قلنا كان للمسائل الفقهية دي نجد اخونا الصادق الصديق عبد الرحمن محمد أحمد عبد الله المهدي الدنقلاوي.. نجده كلها عارفا.. لكن نجدو زول ود بلد سوداني عادي.. يسلم عليهو واحد بي جاي يجرو واحد بي جاي تجروا واحدة بي جاي في القاهرة مثلاً.. ابوي الصادق إزيك.. يابت إنت وافقة من قبيل بي هنا. بت الكلب تعبتي أها شنو؟ عايزة شنو؟ عاملة كيف مع الجامعة؟ اسمعى ما نحولك جامعة النيلين؟ أمك بي هناك مجنناني تبكي كل يوم.. بتي في القاهرة بتي في القاهرة..... أبوي الصادق أنا خلاص اتخرجت كلها شهرين، طيب مصاريفك وصلتك محتاجة لى حاجة؟ لا والله وصلتني.. معليش برضو جاي عيد ومحتاجة تتفسحى هنا في القاهرة.. شفتي الزول داك المحدر عمتو داك؟ ايوا شفتو. بس انا غمزتا ليهو وهو عرف بيديك شوية مصاريف . معليش يمكن تكون شوية سامحينا.. خلاص.. يلا.. ويسالم عادي.... ناس تانيين يجوا يقولوا ليك سلام بي شهوة وسلام بغير شهوة. وهل الملامسة كانت كاملة والله جزئية..وهل شعر بشهوة أثناء السلام. هل تحركت غرائزه..وفتوى اليد الناعمة واليد اللينة واليد الخشنة.. شغلانية بتاعة ناس مرضى ومعقدين..حقو يكون قانونا صلح نفسك وسيب الناس.. شوف نفسك انت الكعب والناس كلها كويسة..
المهم أجتماعياتهم كلها عسل.ناس حزب الأمة. وموش معناهو أدينا الأنصار صفة وأدينا الختمية صفة وادينا الشيوعين صفة موش معناهو ديل ما عندهم من دي ولاديل عندهم من ديك.. لا لا.. دي مثلاً صفة ملاحظة.. في غالب الأوقات والغالب الأعم.. ومسألة تقدم في زمن معين. يعني صفة صاحبة وقت وفي وقتها تطالب بملئها.. ولكن قد تتقدم عليها صفة اخري مقاربة في وقت آخر . حسب الحوجة وحسب الظروف..
برضو راح نتكلم زيادة شوية عن هذه الصفة عند الأنصار وحزب الأمة.. وبعدين نتحول لغيرها
لصفة التدين السمح عند الختمية وصفة الذكاء الوقاد عند الشوعيين..
|
|
 
|
|
|
|
|
|
|
|
Re: شخـصياً معـجب بإجتماعيات حزب الأمة والأنصار وتـدين الختـمية والذكاء الوقادعند الشيوعين. (Re: منصوري)
|
لسه ماشين في إجتماعيات الأنصار
...........
أحمد المهدي وناسو القريبين منو.. ومبارك الفاضل وناسو القريبين منو وبعض الأمراء ناس نقدالله وغيروبالرغم من بعض المرارات في التجارب والمدارس السياسيةالمتشعبة.. وبعض اوجه الإستقطاب..لكن تجد الناس دي هى هي في علاقاتا مع بعض كأسرة واحدة تمثل بيت سوداني كبير سواء رضى بهم الناس أم ابو.. تبقى الحقيقة..صاح مرات مرات في سحابات طيف أو صيف.تمر بها هذه الأسرة لكن سرعان ما تنقشع.شأنها شأن الأسرة السودانية العادية..
| |
|
|
|
|
|
|
|
|
|
Re: شخـصياً معـجب بإجتماعيات حزب الأمة والأنصار وتـدين الختـمية والذكاء الوقادعند الشيوعين. (Re: منصوري)
|
الختمية:
لو السادة الختمية.. أقاموا على ذكركهم وفكرهم واورادهم وطريقتهم حتى ولو بشقيها السياسي والتعبدي..لو أقاموا عليها ومارسوها ممارسة عملية دقيقة كما نظمها وبوبها السيد الختم ومشى عليها أبناؤه من بعده وأضافوا عليها في مراسيم المحبة والشعر والرسوخ في أذهان تلاميذها لو فعلوا ذلك.. لما أعنتوا في أمر من أمور معاشهم ولامعادهم..
..............
طريقة وسطيه أوسطية وسطي.. تحارب الغلواء في الدين.. تكره التشدد.. تربي عليها سواء كان رضينا أم ابينا أكثر من نصف الشعب السوداني..
.............
رسمت المحبة والتدين كل مناحي الحياة فيها.. عبادات واذكار.. بعد الصلوات.. مراسيم الزواج.. ومراسيم ميلاد الأطفال..مراسم الموت والتشييع.. المولد.. السيرة النبوية. تاج التفاسير.. بإختصار لكل مناسبة دينية ضغيرة أو كبيرة.. لهم فيها شأن وعندهم فيها حديث من القلب.. وليس نظماً فوقياً..
............
تشرب الدين عن تقوي وليس تنطع ودراسات معهدية مفتقرة الى قواعد السلوك..
............
الإهتمام بزي المسلم من النظافة والظهور بالمظهر الرائع كما وصى السيد الختم تلاميذه..
.............
...........
.........
شكرا نصار على تداخلك وانطباعك الرائع..
...........
شكراً جني على المرور..
| |
|
|
|
|
|
|
|
|
|
Re: شخـصياً معـجب بإجتماعيات حزب الأمة والأنصار وتـدين الختـمية والذكاء الوقادعند الشيوعين. (Re: منصوري)
|
Quote: وأناشخـصياً مستعـجب لاجتماعيات حزب الأمة والأنصار وتـدين الشيوعيين والذكاء الوقادعند الختمية.
جنى |
ني قال هذا الكلام..
إنت ملاحظ يا جني في فرق في اللغة بين معجب التي ذكرتا أنا ومستعجب التي ذكرتها أنت.. وعليه يصبح معنى كلامك كالآتي:-
مستعجب يكون للأنصار. إجتماعيات..؟ يعني كأنو الأنصار طبقة فوقية لاتحتك مع سواد الشعب
ومستعجب لتدين الشيوعيين
وكمان مستعجب أن الختمية عندهم ذكاء وقاد؟
.........
بالنسبة للأنصار أنا وضحت إجتماعياتهم، بالنسبة للشيوعين.أو اليسار.. او الجبهة التقدمية. معنى كلامك دا أنك بتفتكر ما عندهم دين..؟ إفتكر يا خوي جني إنتهى العهد اللى يطلع فيهو نميري في التلفاز ويقول أنا قتلت ( عبد الخالق الذي لايعرف الخالق) من قال أن عبد الخالق لايعرف الخالق؟.. في الحقيقة الشيوعيون متدينون أكثر من فئات كثيرة في المجتمع.. مامعنى الشيوعية؟ لدي الدقة؟ معناها شيوع خيرات الأرض بين الناس بالتساوي؟ وهذه لعمري إشتراكية في مستوى كبير... أما إن كنت تعنى الماركسية.. فالماركسية مدرسة من مدارس الشيوعية لها إخفاقتاها ونجاحاتها..
..........
وما كنت أود الحديث عنه هو مقدرة الحركة الشيوعية السودانية وذكاءها في استقطاب الكوادر النقابية والمقدرة التنظيمية الفائقة في مجاميع المثقفين.. ويعرف لهم دورهم هذا كل من عرفهم في العمل السياسي. وخاصة عدوهم التقليدى في العمل السياسي ولذلك جاءت التضحيات كبيرة عليهم وشاقه..
أما استعجابك ن يكون هنالك ذكاء للختمية..؟ كأنك تفتكر أنهم غير أذكياء والله شنو؟ ما نحن قلنا الصفات دي لها ملابسات أما باقي الصفات فهى تعمل بصورة من الصور..
ليتك تعلم يا أخ جني أن العبادة المجودة لها مقدرة على صقل المواهب. والختمية من اكثر الطرق أخذت المنهاج بقوة ولذلك ظهرت عليهم انعكاسات ذلك في سلوكهم العام وادبهم الجم...
...........
بغختصار يا أخ جني.. أنا رجل عام أري بمنظار عام ولا أبخس الناس أشياءهم.. وأي سوداني مهما كان إطاره.. لكن هو في النهاية سوداني له قيم معينة قلت أو كثرت هنا أو هنالك.. شكري
| |
|
|
|
|
|
|
|
|
|
Re: شخـصياً معـجب بإجتماعيات حزب الأمة والأنصار وتـدين الختـمية والذكاء الوقادعند الشيوعين. (Re: منصوري)
|
هسه الفطور الجماعي لي أي زول الجا عملو الصادق المهدي في بيتو دا أمس... قالوا مبارك الفاضل جاء حضروا. وآخر ونسة وقرقراب... دا برضو ياجماعة يمشى ويصب في خانة إنو الأنصار اجتماعياتهم كاربة.. سماية.. طهور..عرس.. دافنة.. كدة ويؤكد موضوع البوست الأنا ماشى فيهو..
.............
هسه ياجماعة بعملية بسيطة كدة... الصادق المهدي بقي رئيس وزراء سنة 68 أول مرة موش..لو كان خليناهو من الزمن داك ماسك رئيس وزراء ما ناوشناهو.. لو كان ابلد بليد ما كان تعلم ومرق بينا لى برة شوية..بدل الهيصة الحصلت دي من تمانية وستين.. وكانت الشعوب ذاتا احترمتنا بدل الإنقلابات الكثيرة دي والأرواح الكثيرة دي التى زهقت..ونحن في حوجة لآي فرد سواداني.. غايتو.. الله موجود..
| |
|
|
|
|
|
|
|
|
|
Re: شخـصياً معـجب بإجتماعيات حزب الأمة والأنصار وتـدين الختـمية والذكاء الوقادعند الشيوعين. (Re: منصوري)
|
المهم البارح في الفطور الداعى ليهو الصادق الناس في بيتو... قلنا ضحك وقرقراب مع مبارك الفاضل.. الراجل ما ود أعمو عاد..السياسية تطير المهم لحظات الفطور نبقى كلنا سودانيين مع جك الآبري الأحمر... اها واحد من الصحفيين طبعاً بعضهم دايما ضربهم مشاتر.. الحكاية ما سياسة. أها قام سأل الصادق قال ليهو..مبارك الفاضل هل هو لايزال عضو في الحزب..؟ تفتكر الصادق حايقولوا لا؟ ودي فرصة.. قال ليهو طبعاً عضو ولايزال.. وسكته صغيرة وبعدها عشان الناس مايزعلوا.. طبعاً الحزب ليهو دستورو وشروطو وكدة..
| |
|
|
|
|
|
|
| |
منصوري
jini
نصار
فيس بوك
تويتر
انستقرام
يوتيوب
بنتيريست