|
|
 الصلاة للمستجد والشكر للسنير !
|
جون قرنق دمبيور .... قائد وطنى ورمز سودانى وشخصية تركت بصمة فى تاريخ السودان واضحة .... وجلية ... وربنا يرحمو ... والموت حق ... ومات قبله كثيرون وسيموت بعده اضعافهم .... واخر العمر طويل ام قصير كفن من طرف السوق وشبر فى المقابر ... وسيحفظ التاريخ للرجل ... وسيحفظ السودان انه قاتل بشرف وسالم بوفاء .... ولا اخاف على الرجل وسيرته وحركته وفكرته الا من الانتهازيين ..... ومافيا المآتم .... مافيا الاحتواء .... نشالين ... التاريخ ... والرموز ..... والمواقف ... والبحب قرنق ... بدون نقة وخطابات فجة ... يمشى عديل يدعم فكرو ... ويدعم موقوفو ... وقضيتو ....و( كفكف دموعك ليس فى دموعك الحرى ارتياحي // هذا طريقى وان صدقت محبتك فهذا سلاحى ) وهسة فى حملة كبيرة لضرب الحركة الشعبية لتحرير بوهية جديدة ... وnew look .... ودا مظهرو شنو .... طيور الانتهازيين العاوزة (ترك ) فى شجرة الحركة وفى الظرف دا بالذات ..
أف لكم .... ناس تكتل القتيل وتجى تبكى وتجعر في جنازتو ... أف لكم ... ناس انتهازية .... خلاص الليلة بقيتو جون قرنق الله يرحموا ...رسول ... وما هو قرنق زاتو أللمن تأخر شوية في انو يزيد ليكم حجم العضة ويكبرها قعدتو تلطمو دا بتاع ثنائية ودا بتاع شراكة مع الظلاميين والكلام الفارغ بتاعكم دا .. و(14%) ما بتخارج معانا ونسبة شوية وجيعانة وما تليق معانا والبيعة دى يا سعادتك ما بتغطي وبتخلينا معرجين ! وجهزتو كل ملفات حرق الشخصيات واغتيالها لكن خلاص لمن ربنا كتب عليهو الموت قلتو خلاص نلحق السوق والجمهور عاوز كدا وبقيتو المسكين المنذر بن ماء السماء وبقيتوه نبي ... ( ووب علينا ) وبالمرة برضو الكلام الطيب يصل الزعيم الجديد سلفاكير ... نقدم السبت يا زول عشان نلقى احد اخضر عند الحركة الشعبية ... و مسكين قرنق زى الخاتم عدلان ... البيشوف بكيكم على الخاتم الله يرحمو ما يقول هو نفس الزول الاتهمتوه انو انقسامي وسلختو جلدو حى لكن برضو لمن مات ... قشرتو بموتو واجتهدتو عشان فوق نعشو وجثمانو تعملو ليكم مولد ولمة تزرفو فيها دموع التماسيح ...
الخاتم دا مش هو زاتو الجهجتوه يا جماعة و(حركة حق) دى زاتها مش ياها الطلعتوها سوت وفعلت وبرجوازية صغيرة و(تروتوسكية ) وتعاونت مع ناس فلان ومع ناس علان وانهم بعد فترة اختلفوا عشان سبب كدا (شين ) عارفاه غرفة الاغتيال المعنوى والادبى بتاعة اليسار .. نحكى ولا كفاية طمام بطن !
وهسة جا الدور على جون قرنق .. وتشغيل اسطوانة حب المهمشين ... مهمشين ... بتعرفو عنهم شنو انتو غير انتحال اسمهم فى المنابر والكتب والبيانات ... ما من منتصف الثمانينات الأحياء الفقيرة دى بقت تظهر في أطراف الخرطوم المويلح وكرتون كسلا ومرزوق وغيرو حكومة الانتفاضة عملت ليهم شنو وهى حكومة بتاعة مستنيرين وقوى وطنية ديمقراطية ... ولا حاجة ... لا وفرت ليهم امن ولا علاج ولا تعليم ... ناس حزب الأمة علمو حاجة ولا حاجة ناس الاتحادى شرحو ... ناس الحزب الشيوعى هم برضو زى اخوانهم ... وهو الشيوعى زاتو يحمد الله اللقى ليهو مقعدين تلاتة يخش بيهم الجمعية التاسيسية ويحفظ بيهم موية وشو ... وجايين هسة تبكو على قرنق وتغنو للمهمشين ... ولا خلاص دا تعبير ومصطلح جديد ننفخ فيهو لمن يبقى حقيقة وبديتو ... عشان الناس تحقق بيهو أهداف تانية غير نصرة المهمشين ديل .... اى ... أهداف تانية .... النظام القعد خلانا نبارى جداد الخلا وغلبنا نزحو دفر ومقالعة وغلبنا نحرش عليهو الشعب بانتفاضة نكرهو عيشتو بانو نعمل ليهو توترات باسم المهمشين .... وشبكتو الناس حقكم رايح اقلعوه حمره عين ... فى الشرق اعملو كدا وثورو ... ما عشان أدروب يصلح وضعو ولكن عشان تعملو للنظام طابور قلق ... وفى دارفور برضو اعملو ثورة مهمشين ... لنفس الغرض .... المساكين يكاتلو ليكم وتغشوهم وتدفروهم في المحارق ما هم المستجد البيصلى والبيمشى اجر صلاتو ليكم ... للسناير ... والصلاة للمستجد والشكر للسنير ... يتعب المساكين ويدفعو تمن فلسفة السياسيين ونخب المثقفين المعقدين ويمشى ثمرة تعبهم دا لناس تانية
والبيحصل انو وخلاص بعد ما النفوس تتعبأ تمام وتنفجر يجى (500 ) زول دا يقولو ليك ناشط فى شنو الله اعلم ودا ناشر نشر شنو ما عارفين ودا حقوقى كيفن ما فاهمين ودا سياسى معتق ما خلى نظام ولا حكومة ولا موكب فى البلد دى ما مشى وعيط فوقو وكورك وفك (الروراى ) والــ(500 ) ديل يشوفو ليهم فندق خمسة نجوم يعملو فيهو وهمة بتاعة سمنار وورشة تناقش جدلية المركز والهامش رغم انو المركز دا كلو ناس جاييه من الضهارى استاذ الجامعة وغفير المصنع كلهم ناس جايين من الاقاليم بتعبير زمان والولايات بتعبير هسة ويقعدو الناس ساعة ساعتين يلتو ويعجنو ويمرقو ليك بحزمة توصيات وحنك سنين بتاع تعايش وتلامس وكدا وفى ناس كمان مستفيدة يخلو السودان كلو ويمرقو يناقشو قضية هوامشو فى بلاد بره مؤتمر شنو ما عارف برعاية مين كدا وتلقى ميزانية التذاكر فى خطوط الطيران والاستضافة وحجوزات الفنادق و(الرقعة ) البعد المؤتمر ممكن تبنى ليها مدرسة فى طوكر ولا صيدلية في ام كردوس وممكن توفر عربية إسعاف في القلقالة ...
شفتو سوء التدبير وسوء المنقلب والخاتمة ... والكلام دا برضك بيشمل الحكومة دى .... اى زول طلع ليهو في فضائية وفك ليهو تصريح تصريحين معارض فيهم ولا متعارض خلاص يكون دا (تنقا ) ونجم التسجيلات ويجيك بكره خاشى من المطار فلاشات وتصريحات بالعودة لحظيرة الوطن .... مسكينة حظيرة الوطن البيخشها اى زول بعد ما يقعد يشوف السعر والتمن والمقابل ... وحتى ناس التجمع القدو الناس دلشيون سنة بالتحول الديمقراطى لى هسة داقين جرس وماسكين صارخات ... مش فى مناقشة قانون بيشيل ضريبة من مواطن ولا بيضع دعم مكتوب وملزم يدعم مسيرة تعليم زول ... لا يا فردة الشكلة كلها فى حقنا كم وضمان صرفو كيف ... ونحنا خمسين ومقاعدكم دى خمسة يا جماعة ... وما ممكن نخمس !
مسكين قرنق ومساكين المهمشين .... ومسكين أنت .... ومسكين أنا !
|
|
 
|
|
|
|
|
|
|
 Re: الصلاة للمستجد والشكر للسنير ! (Re: محمد حامد جمعه)
|
| Quote: والــ(500 ) ديل يشوفو ليهم فندق خمسة نجوم يعملو فيهو وهمة بتاعة سمنار وورشة تناقش جدلية المركز والهامش رغم انو المركز دا كلو ناس جاييه من الضهارى استاذ الجامعة وغفير المصنع كلهم ناس جايين من الاقاليم بتعبير زمان والولايات بتعبير هسة ويقعدو الناس ساعة ساعتين يلتو ويعجنو ويمرقو ليك بحزمة توصيات وحنك سنين بتاع تعايش وتلامس وكدا وفى ناس كمان مستفيدة يخلو السودان كلو ويمرقو يناقشو قضية هوامشو فى بلاد بره مؤتمر شنو ما عارف برعاية مين كدا وتلقى ميزانية التذاكر فى خطوط الطيران والاستضافة وحجوزات الفنادق و(الرقعة ) البعد المؤتمر ممكن تبنى ليها مدرسة فى طوكر ولا صيدلية في ام كردوس وممكن توفر عربية إسعاف في القلقالة |
الحته دى تحديدا عجبتنى جدا
Quote: لا يا فردة الشكلة كلها فى حقنا كم وضمان صرفو كيف ... ونحنا خمسين ومقاعدكم دى خمسة يا جماعة ... وما ممكن نخمس !
مسكين قرنق ومساكين المهمشين .... ومسكين أنت .... ومسكين أنا ! |
وكمان دى ,,,
وحتات تانيه ...
| |
|
|
|
|
|
|
|
|
|
Re: الصلاة للمستجد والشكر للسنير ! (Re: WadAker)
|
"ديل مناضلى الكيبـورد"
المكاشفى..
ممكن يسموك من "مدافعى الكيبورد"؟؟
وماذا يفعل محمـد حامـد جمعـة فى مصلحـة من أعلن أنه ينتمى إليهـم عندمـا جاء للبورد؟؟ هل يمكن مناداتـه بـ "مستميتى الكيبورد" من أجل الدفاع عن عصبـة إجراميـة؟
"فى الشرق اعملو كدا وثورو... ما عشان أدروب يصلح وضعو ولكن عشان تعملو للنظام طابور قلق"
محمـد حامـد جمعـة..
حتى لو صـدقنـاك إنك ما عميـد، لكن أكيـد ماهيتك تقـدر بالشئ الفلانى.
بس أبعـد من ناس الشـرق ديل.. ديل ما بعرفـو الهظـار!
| |
|
|
|
|
|
|
|
|
|
Re: الصلاة للمستجد والشكر للسنير ! (Re: Abureesh)
|
Quote: محمـد حامـد جمعـة..
حتى لو صـدقنـاك إنك ما عميـد، لكن أكيـد ماهيتك تقـدر بالشئ الفلانى.
بس أبعـد من ناس الشـرق ديل.. ديل ما بعرفـو الهظـار! |
والله وقعت يا ود جمعة
انت اللماك في ناس ادروب ديل شنو
وقرنق مات وماهية واحد ما صرف !!!!!!!!!!!
| |
|
|
|
|
|
|
|
|
|
Re: الصلاة للمستجد والشكر للسنير ! (Re: علي محمد علي)
|
الاخ محمد حامد جمعة
سؤال خارج موضوعك ،
لماذا يدفع الشعب المسكين مرتبك ؟ ألا يأتي مرتبك من خزينة الدولة ؟ كم تبلغ ميزانية SMC الشهرية وليست السنوية ؟ ماذا يستفيد الشعب مما تقدم فيه مقابل ذلك المرتب المدفوع لك ؟ من حقك ان تكون كيفما تشاء ، ولكن لماذا لا يدفع المؤتمر الوطني مرتبك ؟
و اذا كانت تقديراتي عاليه كلها خاطئة ، فما هي مصادر دخل SMC ؟
مع الود ايضا
| |
|
|
|
|
|
|
| |
محمد حامد جمعه
المكاشفي الخضر الطاهر
Abureesh
فيس بوك
تويتر
انستقرام
يوتيوب
بنتيريست