|
|
 أين ذلك الفتي المحروم ؟
|
أعزائي
السلام عليكم ورحمةالله
أذكر معاني قصيدة إنجليزية قراتها قبل زمن طويل لشاعر ما بتذكرو حالياً ، بيقول فيها:
حينما كنت صغيراً
كانت أسرتي فقيرة
تجد بالكاد ما تعيش به
كنت أتسكع فى الأسواق وأنا أنظر من خلف زجاج المحلات
للأطعمة اللذيدة واللعب المثيرة
وكنت أتخيل لو أنها ملكي
مجرد تخيل لأن جيبي كان خاوياً
كبرت
عملت بجد ، صرت من الأغنياء
وإمتلئت الأسواق بالبضائع من كل الدنيا
وبالأطعمة الفاخرة والتحف وكل ما هو مثير
إشتريت وإشتريت وإشتريت
لم أكن ابالي فالأموال عندي وفيرة
ولكن أين ذلك الفتي المحروم؟؟؟
يعني يا أخوانا الزول فقد المتعة وفقد الإحساس بجمال الأشياء
صحيح هو عندو المقدرة لكن أين الرغبة؟؟ كما يقول علماء النفس
أما أنا يا إخوان
بفتقد حاجات من الزمان القديم
طبعأً الزمن ليهو تأثير وكذلك تطور التكنلوجيا
يعني ممكن تتذكرو معاي طحنية سعد الكانت فى علب صفيح مدورة ؟ ما أظنو فى طحنية حالياً ممكن تكون فى حلاوتها
وفتايل الفراولة الكان فيها فلة
وقماش التريفيرا
وطعم الببسي بتاع زمان
وحلاوة كسلا
و
و
و
والمتذكر حاجة ومفتقدا ممكن يقولها لينا
لكن أهم حاجة مفتقدها الأيام دي هي كمية المشاعر والأحساسيس والأشواق الكانت زمان لما عزيز ليك يرسل جواب أو سلام مع مسافر
هسي التلفونات والموبايلات والإنترنت ما خلت مساحة للشوق
أنا ما ضد التكنلوجيا ولا مرور الزمن
لكن
حليل أيام زمان
مع مودتي
|
|
 
|
|
|
|
|
|
|
|
Re: أين ذلك الفتي المحروم ؟ (Re: Fadl Karrar)
|
عزيزي فاضل كرار ،
هذه حالة يصفها الفيلسوف نيتشة بفقد الدهشة "Departure of Surprise"
وهي واحدة من السمات المحزنة المصاحبة للحياة الإنسانية كلما تقدم
الإنسان في السن كلما فقد الأحساس بالدهشة تجاه الأشياء ، كم أذكر
فرحتي بجلباب العيد أو حذاء جديدا ...
ولكن الشيء المربك والمحير في أحايين كثيرة لا نرى تلك الدهشة
في عيون أطفال اليوم ، ربما كان ذلك بسبب الوفرة في حالتهم ،
والندرة في حالتنا مع تعدد مشاهداتهم اليومية سواء من خلال السفر
أو جهاز التلفزيون .. مما يجعل الأشياء تبدو مالوفة ..
جاء لسان عمر الطيب الدوش في إحدى مقاطع الحزن القديم والتي
تغني بها محمد وردي ... تجيني يجيني معاك زمن أمتع نفسي بالدهشة،
فالدهشة ممتعة .. وفقدها محزن ...
ولكن هنالك دهشة ومتعة أخرى يوفرها التأمل والتصوف على ما اعتقد ..
ولك ودي ...
| |
|
|
|
|
|
|
|
|
|
أين ذلك الفتي المحروم؟ (Re: Fadl Karrar)
|
العزيز ود أحمد
أسوأ ما فى إنعدام الدهشة
إنها بقت متفشية
عشان كدا قل الإبداع
يا ريت لو الواحد يندهش مرة مرة كدا كل إسبوع أو كل شهر
عشان يحس بي طعم الدنيا
بس الواحد ما يبقي زي صاحبنا الكان كل ما يقوم من النوم يلقي نفسو مندهش
يوم صحي من النوم لقي روحو ما مندهش قا إندهش
تعرف الدنيا كلها قائمة علي الثنائيات
يعني الحاجات إتنين إتنين
ليل ، نهار
ظلم ، عدل
حب ، كراهية
إرتواء ، ظمأ
إلخ
وتبقي مصيبة لو كل الحاجات بقت واحد
يعني مافي فروق
عشان كدا أهلنا قالو فى المثل
الليل والنهار واحد علي العميان ، واللوم والشكر واحد علي السجمان
مع مودتي
تصحيح الإسم : فضل كرار
| |
|
|
|
|
|
|
|
|
|
Re: أين ذلك الفتي المحروم؟ (Re: Fadl Karrar)
|
ياسـلام علي لحظـة الدهشـة..هي رائعـة لأنهـا جـديـدة في طـبيعتهـاولأنهـا أصبحت نـادرة ..سـأرجـع لهـذا البوسـت ومعي لحظـات دهشة عـديدة أغلبها مـن الماضي البعيـد..اهـديك الآن اعمقها!
شـكرا علي نقـاء آخـر اخـي فضـل..
Quote: عـنـدما جـائت تتيجـة التحـليل تعـلن أنـني حامـل..هـاجمـني ذهـول مـن شـكـل آخـر.. يثقـل فيـه الرأس..وتسخـن فيه الجـفـون..تنظـر فيه الأعـين بإسـتغراب للمـكـان تحـاول أن تستوعب الكـلمـات
..أنـتي حــامــل!!
أجـل كـان يخـبرني أنـا بالتحـديـد أننـي حـامـل!! خـرج صـوتي غبيـا يسـأل..انت متأكـد دي نتيجـتي?? إمكـن غلطـت?? لـم انتظـر رده..جـذبتـني مـنـار خطـيبة أخـي مـن يدي وهـي تضـحك ..طـبعـا دي نتيجـتك يللا نمشي نفرحـهم فـي البيت..
داخـل ذلك الاحسـاس التائه فـي السـحـاب..عشـت زمنـا طويلا..الحـمـل شـئ طـبيعـي يحـدث كـثيرا للنسـاء..لكـنه لم يحـدث لـي مـن قبـل!! فـتحت ورقـة نتيجـة التحـليل وحـاولت تركـيز النظـرات المتعقـلة..نظـرت الـي حـرف + ثـم قـرأت الكـلمـات..لابـد مـن تجـميع ذلك الاحسـاس التائه فـي السـحـاب..وارجـاع قـواي الي سـاقي..قـربنـا مـن الوصـول للمـنزل..
وبيـن توهـانـي وإحسـاسـي المـذهـول..أسـمع ضـحكـات منـار داخـل العـربة.. .
إنتـي لسـة مـا مصـدقة? والله النتيجـة دي حـقتك!! |
منقـول مـن بوسـت اليوم حـبيبتي آيـة بلغت السـابعة عشـر
Muna
| |
|
|
|
|
|
|
|
|
|
Re: أين ذلك الفتي المحروم؟ (Re: Muna Khugali)
|
الإنبهـار والدهشـة
ايهمـا يأتي اولا?
كـنت أحمـل معي 'جـبنة بيضـاء' في احـدي رحــلات عملي في شـرق السـودان وبالتحـديـد في إحـدي قـري همشـكـوريب..
أعطـيتها لأحـد الأطـفال فـإذا بـه يسـألني..دي شـنو?
تجمـع حـولي أطـفال آخـرين ينظـرون الي قطـعة الجبنة في دهشـة!
في الحـروب ..وفي الفقـر والحـرمـان توجـد لحظـات كـثيرة للدهشة !
مـني
| |
|
|
|
|
|
|
|
|
|
Re: أين ذلك الفتي المحروم ؟ (Re: وفاء تاج الدين)
|
الاستاذة مني
السلام عليكم
هل لا زلت تذكرين طعم دهشة لها 18 سنة؟ ما أروع طعم فرحك آنذاك
أما أنا فأذكر يوم نتائج الصف الأول الإبتدائي فى مدرسة الحصاحيصا شمال
وكنت أول الفصل بمجموع كامل 170 من 170
وطار الخبر إلي منزلنا قبل وصولي
وحينما دلفت من الباب وجدت أمي فى منتصف الحوش وهي تبكي
فقد كنت أنا بكرها
ولم أكن أدري ساعتها أن الفرح يبكي مثله مثل أحساسينا الجياشة الأخري
فرجف قلبي وأنا أقول لها : فى شنو؟ فى شنو؟
من أين لي بفرح يجعلني أبتسم حتي ناهيك عن أن أبكي فى هذا الزمان؟
مع إحترامي
| |
|
|
|
|
|
|
|
|
|
Re: أين ذلك الفتي المحروم ؟ (Re: Fadl Karrar)
|
وجزء من قصيدة أتطلع لإمرأة نخلة لمحي الدين الفاتح
قد أذكر لي سنوات ست
ولبضع شهور قد تربو
أتفاعل فى كل الأشياء
أتساءل عن معني الأشياء
والنفس الطفلة كم تشتط لما تصبو
فى يوم ما
إحتشدت فيه الأشياء
أدخلنا أذكر فى غرفة
لا أعرف كنت لها إسماً
لكني أدركها وصفاً
كبرت حجماً بهتت رسماً
عظمت جوفاً بعدت سقفاً
وعلي أدراج خشبية
كنا نجلس صفاً صفا
والناظر جاء
وتلي قائمة الأسماء
وأشار لأفخرنا جسداً
أن كن ألفة
لحدي هنا كفاية عشان الواحد ما ينداح أكتر من الإندياحة ال ح تجيب خبري دي
| |
|
|
|
|
|
|
|
|
|
Re: أين ذلك الفتي المحروم ؟ (Re: Fadl Karrar)
|
وهناك اندهاشات أخرى
اذكر أن والدي كان يريد أن يسافر
وكل جيراننا
يريدون السفر الى ابن عمي في مكان قصي
وكنت طفلاً بالمرحلة الابتدائية
كنت اسمعهم أنهم يجهزون للسفر
وقررت في ذاتي أن أسافر معهم
خدعوني وقالوا لي سننتظرك حتى تأتي من المدرسة
وكانت الاندهاشة أو الدهشة الأولى
فعندما اتيت وجدت { الدار خلاء }
اتت جارتنا وأحضرت لي طعام الافطار
فكانت الدهشة الثانية حينما رميت عليها الطعام
كنت غاضباً وقتها
كيف سافر هؤلاء من دون أن يخبروني
أما الدهشة الثالثة فقد قبضت على كل { الجداد } بالمنزل
لم أترك ديكاً ولا جدادة ولابيضاً الا وأخذته
بعته كله لأحد الجيران بعد أن خدعته بذلك
ومباشرة الى الطريق العام الذي تأتي به المواصلات
ركبت بقروش الجداد أكثر من اربعة لواري
حتى وصلت نفس القرية التي ذهبوا لها
وكانت هنا الدهشة الكبيرة
صدموا جميعاً 00 كيف وصلتهم
والدي لم يصدق
ووالدتي اصيبت بالذهول
وكذلك ابن عمنا المحتفى به
الغريب أنني وجدت الخروف لم يجهز حتى الآن
قال طفل قال
| |
|
|
|
|
|
|
|
|
|
Re: أين ذلك الفتي المحروم ؟ (Re: ابوحراز)
|
أتاريك يا أبو حراز من يومك شقي؟
قلت لي بعت الجداد؟
والله دي ما سبقك عليها شافع كلو كلو
لكن معاك حق لأنو أهلك كضبو عليك
لو حصل نفس الموقف دا مع شافع امريكاني أو إنجليزي من أهلو أكيد رد فعلو كان ح يكون عنيف جداً جداً، ودا الفرق بين تربيتنا وتربيتهم
إتخيل هنا فى السودان فى مقولة بتقول لو ماغشوك ما كان ربوك
لا حول ولا قوة إلا بالله
يا زول دا موضوع تاني وخطير جداً أحسن نخليهو هسي
ونرجع لي حكاية الفتي المحروم
شنو يا أبو حراز الحاجات الكنت بتستمتع بيها زمان وهسه فاقدها أو فاقد طعم المتعة الزمان رغم وجود نفس الحاجات؟
| |
|
|
|
|
|
|
|
|
|
Re: أين ذلك الفتي المحروم ؟ (Re: Fadl Karrar)
|
كنت استمتع بأي جلابية جديدة
أول شيء { الترزي بيكره حياتو }
لأني لا افارقه نهائياً
ولا أتحمل أن انتظر حتى االبيت
فلابد من لبس الجلابية الجديدة عند الترزي
وأذكر أنني كثيراً ماتركت له الجلابية القديمة في محلها
وانت عارف طبعا الواحد عندما كان طفلاً
يعني من النادر أن يكون لابس { سروال }
كان هذا الأمر لايهمني كثيراً
وكان الترزي يموت من الضحك
عندما يشاهدني وأنا البس الجلابية الجديدة
الآن 00 فقدت الجلابية تلك الدهشة من الزمن الماضي
حتى { ريحة المكنة } وتلك النكهة السابقة لم تعد كما كانت
الآن تلبسها جديدة وكأنها صنعت منذ أكثر من مائة عام
شيء مؤسف ومقرف
وبعد كل هذا تجد من يتشبث بها ويطلبها منك في كل يوم
في السودان كثيراً ماتعرضت لمثل هذا الموقف
يسألك أحدهم 00 راجع السعودية متين
فترد عليه بكل براءة بعد شهرين
أها طوالي يقول ليك { بالله لمن ترجع أديني الجلابية دي }
واحد مرة ضيف جانا بالليل
أها قلت الراجل دا يمكن ماعاوز الجلابية تتكرفس
قلت ليه { علق جلابيتك في الشماعة وهاك الجلابية دي عشان تنوم بيها
والراجل فعلاً لبس جلابيتي
والصباح قام قال لي { عاوز كيس } قلت ليهو لشنو يا ابن الذين ؟
قام قال : عشان { يخت جلابيتو في الكيس }
عليك امان الله لمن قلت ليهو كيس مافي
جاب الجريدة ولفاها زي { الطرقة }
وفات بالجلابية بتاعتي
كمان شنو قال
كثر الله خيرك يا ابوحراز وأكثر من أمثالك
قال أمثالك قال !!!
| |
|
|
|
|
|
|
| |
Fadl Karrar
wadahmed
Muna Khugali
وفاء تاج الدين
ابوحراز
فيس بوك
تويتر
انستقرام
يوتيوب
بنتيريست