قالت الزلال بت ود حامد .. ( حبوبتي ) قالت : حجيتكم ما بجيتكم خيراً جانا وجاكم أكل عشاكم وراح خلاكم ، قالوا .. والله يكفينا شر قلنا وقالوا .. قالوا كان في كُدُندارة إسمها ( حَمْرَه قَرقَدانه ) ، أها .. حمره قرقدانه دي راجلا كان إسمو ( أحمد ) .. يمرق أحمد من صباحات الله يلقط في رزقو .. وما يرجع إلا والشمش غاربه ، حمره تقعد في بطن بيتا تخدم خدمتها و تسوي ليهو غداهو داك وتقعد تنتظرو لامن يجي .
............. يداخلني الشتاء حينها .. في ( الحوش الجوه ) .. ملتصقا بها ويداها حولي زنار ( يدفع عني شر الوحشة ) .. يداخلني شتاء في ليلة صيفية .. تحت سماء الديم .. ونجوم وبدر كبير ( لا يشبهه بدر ) .. و كلابٌ نابحاتٌ في البعيد ، والدوي المكتوم لطائرة في المطار القريب ( أصابني برهاب السفر إلى يومي هذا ) ، وبرد لذيذ ..لاسع .. لا يدفأه إلا رائحتها ( أمي الزلال ) : رائحة هي خليط بين رائحة الطفل الرضيع .. وعبق الضريح الكبير طرف البلد .. كما حكى الطيب صالح . ..............
قالت ( أمي الزلال ) : أها .. يوم من الأيام ( حمره قرقدانه ) إتدخنت ، وسوت غداها وقالت تمرق كدي علي الجيران داب ما ( أحمد ) يرجع من شغلو ، قامت علقت غدا ( أحمد ) في المشلعيب المعلق فوق حفرة الدخان .. ومرقت . يومو داك .. ( أحمد ) لشقاوتو يرجع البيت بدري قبال مواعيدو .. و جيعااااااااان ، مد أيدو على المشلعيب وما ختّ بالو من حفرة الدخان الموقده تحتو .. أها المسيكين من طولو داك يقع في الحفرة .. زول جاب خبرو مافي لامن رجعت ( حمره ) من الجيران ، لقت أحمد ميت جوه الحفره ، وقالت كدي تكورك وتسكّل وتعزي ، أها في الوكت داك جَنْ طويرات زرازير .. ركّن فوق الراكوبه .. شافنها تبكي ، قالن لها : :- مالك يا ( حمره قرقدانه ) ؟ . قالت لهن : شِن ( حمره قرقدانه ) أم طمبرة مَلانه .. عقيرب سِلي سلي .. ( أحمد ) وقع مات . قامن الطويرات ديك من بكانن داك زعلانات علي ( أحمد ) إتنفضن و حتن ريشن عدمنو الريشه .. قعدن جلد ساكت ، وفرررررر طارن بي دمعتن .......
أها .. الطويرات ديك منتفات نتيفن داك طارن مشن ركن فوق الشدرات آخر الحلة ، الشدرات إستغربن .. قالن للطويرات : - مالكن يا شنقيرش بلا ريش ؟ قالن لو : شن شنقيرش بلا ريش .. حمره قرقدانه .. أم طمبرةً ملانه ... عقيرب سلي سلي .. أحمد وقع مات . قالن كدي الشدرات من الزعل علي ( أحمد ) حتن صفقن داك وقفن عود بس .. يابساااات . أها بعد داك جن غنيمات يرعن تحت الشدرات ديك ، شافن الشدر واقف حطب .. - قالن لو .. : مالك يا شدرنا حيتتون ؟ - قال لهن : شن شدركن حيتتون .. شنقيرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . في بكانن داك .. الغنيمات مسكن لك قريناتن ديك ووقعن فيهن كع كع كع .. كسرنهن ما ما فضلن قرن فيهن من الزعل علي ( أحمد ) , و مشن البحر يشربن .. أها البحر شافن مكسرات قريناتن قال لهن : - مالكن يا بنات عِسِّي بلا قرون ؟ قالن لو : - شن بنات عسي بلا قرون .. شدرنا حيتتون .. شنقيرش بلا ريش .. حمره قرقدانه أم طمبرةً ملانه .. عقيرب سلي سلي .. أحمد وقع مات . البحر من الزعل علي ( أحمد ) قام شرد بقي بس جديول صغيرووون في النُص هنااااك .. جات البنيه شايله برمتها واردة البحر فيشان تشيل المويه .. لقت البحر مشى هناك غادي .. قالت لو : - مالك يا بحرنا شيردون ؟ قال لها : شن بحركم شيردون بنات عسي بلا قرون .. شدرنا حيتتون .. شنقيرش بلا ريش .. حمره قرقدانه أم طمبرةً ملانه .. عقيرب سلي سلي .. أحمد وقع مات . تشيل البنيه برمتها ديك و من الزعل علي ( أحمد ) كششششش تكسرها .......
قالت ( أمي الزلال ) : أها .. البنيه رجعت للبيت لقاها أبوها في الدرب .. : :- مالك يا بنيتنا كبيرون ؟ قالت لو : - شن بنيتكم كبيرون .. برمتنا كيسرون .. بحرنا شيردون .. بنات عسي بلا قرون .. شدرنا حيتتون .. شنقيرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . تقوم يا الراجل تشيلك حجر و تقع في سنيناتك ديك كج كج كج .. كسرن بقاهن نامه ، وقال كدي دخل علي مرتو ، المره شافت الراجل عدمان السنينه قالت لو : : - مالك يا راجلنا فليجون ؟ قال لها : - شن راجلكم فليجون بنيتنا كبيرون .. برمتنا كيسرون .. بحرنا شيردون .. بنات عسي بلا قرون .. شدرنا حيتتون .. شنقيرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . أها المره كانت قاعده تفرك في ملاح أخدر .. شالت مفراكتا ديك و ............
............... : عماد ؟.. عماد ؟؟؟ : ( دفء الشتاء و .. حزن ما .. يصمتانني ) : نام المسيكين .. ( ثم ضامةً راحتي يدها متجهةً إلى السماء ) : رقدنا في أمانك وفي ضمانك وركنين من أركانك .. آية الكرسي كُرُبْ فينا للصباح . .................
الزلال .. يا بت ودحامد .. يُمه .. لا أعرف الطريق إلى قبرك الآن .. سامحيني ..
.............. و .. أكلت ( حفرة الدخان ) أحمد.. و الطير .. و الخضرة .. البهائم .. و النيل .. الرجال .. والنساء .. والأطفال .. و .. البلد و مازالت تلك ( الحفرة ) .. تقتاتنا منذ يونيو 1989 م ....
عماد ،، ياروعة في زمن اللوعة يالمتمدد فينا حتى المسام
بخت أمك القاعدة اليومين ديل في ضراك من المغرب حتى الصباح لبنها مدفق لاحد أضانك ترضع في واحد براك بي إرتياح وموجب التاني قافلو بي إيدك وياويله لو قرب صلاح
11-20-2005, 06:05 AM
ثابت محمد ثابت محمد
تاريخ التسجيل: 10-17-2005
مجموع المشاركات: 2006
عم عبدالرحيم كلمات - محمد الحسن سالم حميد اداء- مصطفى سيد احمد
فتاح يا عليم رزاق يا كريم صلى على عجل همهم همهما حصن للعباد وهوزز سبحتو ودنقر للتراب هم فوق هم هما صنقع للسما وكان في الجو في غيم وكم نجمات بعاد .. وكان الدنيا صيف لا قالتو كيف اصبحت كيف .. لا لمسة حنان .. لا لمسة وداد .. لا رمشة طريف من قلب وفي زي ايام زمان ايام الدفي كانت ماها في كانت في المراح .. شدتلو الحمار تحلب في الغنم .. لــي شاي الصباح والطير ما نضم .. ما رسل نغم .. عم عبد الرحيم اتوكل نزل في المشرع لقى زملان الشقا الجا من الجريف .. الجا من الجبل .. عل الناس بخير .. صبح هاظرهم نقنق ناقرهم وغاظوه ونعل وعم عبد الرحيم ما بخبر زعل كل الناس هنا ما بتخبر زعل تزعل من منو وتزعل في شنو كل الناس حنان .. كل الناس صحاب .. كل الناس اهل .. والماهم قراب قربهم العمل الطاق اليطق عشت ابو الزمل بالحال العليك بالفال بالامل عم عبد الرحيم .. كت فتاح في يوم على ايدك تنوم على كيفك تقوم لا دفتر حضور لا حصة فطور تقرع بالقمر تزرع بالنجوم لكن الزمن دوار لابدوم عم عبد الرحيم ماشي على الشغل في الباب القديم انعارض تكل تنشايح جراح ياما كيف الغسل الدنيا ام صلاح تبدأ من التكل من حجة صباح في حق الملاح في اللبس الجديد .. في القسط القديم .. وبيناتن عشم في الفرج البعيد .. امونة الصباح .. قالتو النعال والطرقن هرن .. ما قالتو جيب .. شيلن يالحبيب قشهن النقلتي والترزي القريب بس يا ام الحسن طقهن ما بفيد وانطقن زمن وان طق الزمن لازمك توب جديد بي أي تمن ... غصبا للظروف والحال الحرن عشان يوم الرحول ما تنكسفي يوم... لو جاراتنا جن مارقات لي صفاح .. او بيريك نجاح .. دا الواجب اذن .. وايه الدنيا غير .. لمة ناس في خير او ساعة حزن عم عبد الرحيم ياحر ماك حر ياريت التمر ياريت لو يشيلكل تلات شهر ولا ايام زمان كانت ما تمر كان ما جاك هوان ما لاقاك ضر كان لا ضقت ضيق .. لا انغرغر الصبر لا شابيت غريق لا طوح فقر .. وكان ما كان وكان اكسيك در .. حكومات تجي وحكومات تغور تحكم بالحجي بالدجل الكجور مرة العسكري كسار الجبور يوم قسم النبي تحكمك القبور تعرف ياصبي مرة تلف تدور ولا تقول بري او تحرق بخور هم يالفنجري يالجرف الصبور كل السقتو ما باقي على التمور وارضك راقدة بور.. لا تيراب وصل .. لا بابور يدور .. والماهية اف عيشة هاك وكف في هذا الزمن تف يا دنيا تف يالعبد الشقي ما اتعودت شكي لكن الكفاف فوقك منتكي والسوق فيك يسوق حالاً ما بتسر الا كمان في ناس فايتاك بالصبر ساكنين بالايجار ... لا طين لا تمر واحدين بالايجار ما لاقين جحر سلعتهم الضراع والعرق اليخر عمال المدن .. كلات المواني .. الغبش التعاني .. بحارة السفن .. حشاشة القصوب .. الجالبة الحبال .. الفطن الفرن .. الشغلانتو نار والجو كيف سخن .. فرق شتى بين ... ناساً عيشا دين ... مجرورة وتجر تقدح بالاجر ومرة بلا اجر عيشهم كمهو وديشهم هان قدر وناساً حالا زين .. مصنع مصنعين طين في طين وين ما مرابا مر بارد همها لا بعرق جبين ولا وشا يصر عين والله عين .. كلها كمها وعزها هان قدر دي الجنة ام نعيم دي الجنة ام قصر يا عبد الرحيم الا ورا القبر لا تسرح كتر فتاح يا عليم وان كان الفقر يا عبد الرحيم اشبه بالكفر حكومات تجي وحكومات تغور تحكم بالحجي بالدجل الكجور مرة العسكري كسار الجبور يوم قسم النبي تحكمك القبور تعرف ياصبي مرة تلف تدور ولا تقول بري او تحرق بخور هم يالفنجري يالجرف الصبور كل السقتو ما باقي على التمور وارضك راقدة بور.. لا تيراب وصل .. لا بابور يدور .. نقرض للحمار ... نقريضة الحمار لا تنسي النعال الطر الخضار اللبس الجديد .. تسريح السفر .. للماشي الصعيد ماشي الديش نفر والبال اشتغل ... والبال اشتغل للابا ما يعيد الحول ما اشتغل والبال اشتعل ... السكة الحديد ياعمو القطر ياعم عبد الرحيم قدامك قطر وسال الدم مطر وطارت دمعتين ونشايح وتر ياطاحن الخبر ما بين القضا ومرحاقة القدر الشدة ام دموع والدمع انهدر ايدهم في التراب .. والعين في القطر عارفين الحصل عارفين في حذر الخبر اليقين دوخ وانتشر اطفال القرى وعمال الحضر ادوهو الطيور ودنو البحر انصاعد سحاب وندافق مطر عم عبد الرحيم في الشارع عصر .. للدار اليسار متفادي الكجر .. عربية الكجر .. دورية الكجر .. جفلت الحمار وطوح زي حجر .. وعم عبد الرحيم اتلافا القطر .. فتاح يا عليم سال الدم مطر .. جرتق بالتراب منشور بكتاب روشتة وجواب ماهية شهر اورنيكين سهر جنب لبدة حمار مقطوعين ضهر عم عبد الرحيم يا كمين بشر صح الموت سلام ما يغشاك شر __________________
عمـاد صح الموت سلام ما يغشاك شر وصحي النوم مع الوالدة حتى تمتعونا
محمد الحسن سالم حُميد جعلني أخلع ثوب الرهبة من حروفك ( قطـر) حُميــد هو حفرة دخان ( حَمْرَه قَرقَدانه ) أو هــكذا أحسستُ أنـا دع قلمك يحفـر في جدار الروح بقوة . . شكراً نبيلاً على هذه اللّـذة الحارقة
11-20-2005, 06:10 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22484
أنا بقرا في حجوة حبوبتك المغفور لها بحوله تعالى .. إنتابتني عدة مشاعر كانت دفينة .. جات طالعة زى حمم البركان .. لامن طفرت مني دمعة و أنا بتذكر حبوبتي فاطنة .. و خصوصا في ليالي الشتا .. و أصابعا بتحوم جوات شعري و رائحة مميزة تضمخ أنفي و صوت سبحتها تموسق ليلي و صوت مواء قطتنا و نقاط الزير .. وووو دندنة لا زالت تطرق سمعي من حين لآخر ..
و ليسامحني الله أيضا .. فمنذ أن واريتها الثرى .. لم أقف على قبرها مسترحما لها المولى .. فليرحمهن الله ..
و ليباركك الرب.
11-20-2005, 01:48 PM
Emad Abdulla Emad Abdulla
تاريخ التسجيل: 09-18-2005
مجموع المشاركات: 6751
ياريت أقدر أحكي زيها .. أو أتكلم .. أتصرف .. أحكم على الأشياء زيها .. يا ريت . ( ما كان بقيت في جنس الهضربة دي ) !!! لكن يا تومه أنا تربية حبوبات .. وياريت أربي أولادي زي ما ربونا حبوباتنا ..
أشكرك تاني و تالت ..
مودتي ليك والإحترام
11-24-2005, 03:23 AM
Emad Abdulla Emad Abdulla
تاريخ التسجيل: 09-18-2005
مجموع المشاركات: 6751
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Emad Abdulla
عبدالرحمن عبدالله أبوشيبة
ثابت محمد
ابو جهينة
عصام عبد الحفيظ
توما
فيس بوك
تويتر
انستقرام
يوتيوب
بنتيريست