|
|
 سنة ويوم .. أديتكم شنو فيها ؟؟
|
وقبل ما أكون بينكم معاكم , كنت مالي الدنيا الهناك , في الدفاتر شخبطة , كلام عن الحب , أسوس أفكار وإتحمق من معلومة مغلوطة , أنادي لي الغيّب الرايعين والروايع , ناس دافي والرحمابي والكتيرين البقية ناس المطر , أراسل بكري هووووي يا سيد الحوش الكبير حأشتكيك لي روحي وأحكم روحي علي حرمانك لي من دخول الحوش متحكر ملاكز ملاكم مجرح مجرجر معكر صفوي بي بوست شكلة , منتشي لي لحن من روايع شيبة وعمنا تنقو .
وجيت البورد
وقفت في اليوم الأول كتبت يا ناس , ما كان في ناس حداشر مرحب وشوية , قلنا بسيطة الناس مشغولة , أديها عذر , صادف حينا دخول واحدة عضو في نفس اليوم , كمين وخمسين مرحب في اليوم الأول , مفارقة قولة مرحب , مشينا اليوم البعدو والشهر البعدو , كل يوم بزيد لجمي كتل معانا ولا مع التانيين .
ماتت بوستات عن زمن مرارة , زمن فيهو حقيقة مغيبة , تحكي عنها معناتا حكمت علي روحك بمزيد من الإقصاء يا أجرب يا اجدب . في الصمت كلام , وناخد الحكمة من أخوان حلقوا ليهم , سكوت .
الشهر التاني والتالاهو والبعد منو , وشوية شوية سكت ال ..
أطلع منهم ,منها , وأمشي لي غبشك الهناك , ولما أستعضت عن وجودي هنا بيكم من تاني بقيت زول قراية , ولما تعبت من القراية والدنيا أم شواغل زادت مشاغلنا حتى من ممارسة طقس القراية , قلت أبعد كمان خطوة لي وراء .
أمسح , مسحت ردود
أمشي , يغالبني الشوق ويغلبني , أجي , أرجع أسأل روحي أضفت شنو بي قعادك هنا ؟ مش كان في ممكن يكون في أولى منك ؟
|
|
 
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
يا تبلدي ...
كيف ما أديتنا ... رايك وقلمك وحسك .. قول ماذا أخدت أنت مننا .. معليش يجب أن تجد لنا عذراً ... أي عذر .. فتش في الدولاب الجوة داك .. بتلقى لينا عذر .. وخلينا نشوف السنة الجديدة .. حا نديك شنو ..
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: Ahlalawad)
|
اقول ليك سر او حقيقة وانا هنا بتكلم عن نفسي
انا شخصيا اديتني ابنوسي وللحق هو من ثلاثة اشخاص خرجت بهم
من هذا المنبر انا شخصيا حامد وشاكر الله علي نعمته اه اكرمني
بيك ايما كرم
انت عارف يا ابنوسي انت عندك قلم من الاقلام السنينة جدا
لدرجة انه البورد ما بتحمل رقة شفرته عشان كدا انت حاسي بي
كدا
اقول ليك سر البورد الناس ديل انا بشاكلهم كل يوم كل يوم
شكلة ومشادة لكن وقت يغيب واحد بسال منه زيهم وقت يمرض
بنعوده وقت يصاب بنواسيه وهم بعملوا كدا معاي عارف
الناس ديل سودانين جدا واحلي حاجة انك تكون سوداني جدا
دحين يا اخوي انا شايفك رافع سعر وما بتجامل اخوانك
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
صديق نبيل
كلام جميل
صراحة متناهبة
ونصائح كريمة
ونقد بناء
هذا ما أخذته منك وانانية مني اتوقع المزيد
يجوز أنني ما أعطيتك الكثير بقدر ما أخذت منك على الأقل
لكن كما قال أهل العوض،، دعنا ننتظر للسنة القادمة
قد يكون القادم أحلى... إن شاء الله بكون أحلى
وسماح
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
أهل العوض يا أهلنا
آخر الدولاب ؟ أولو وآخرو واحد يا أهلنا , ورق , رسايل ورق من اهل لسة قناعتهم بي الصفر واحد زي قناعتهم بي النظرية النسبية وإن كان في بعض أحيان بتكون عندهم أزمة ورق فينقطع مداد أخبارهم فاستعيض عن ذاك بأهل إفتراض يوعدون عند قدوم سنوات أخر أن وصالنا يدوم مادمت فينا بيننا , وكيف ما اكون بينكم مادام أهلنا عوض وبقية من عشم عرفة البورد
وتاني سلام يا أهل العوض وفي الإنتظار
اسأسي
وعن البورداب , صدقت في كل ما قلت , رغم العكننة مرات ما نستحمل غيابهم ونقعد نفتش ونرجع في أرشيف كذا يوم ورا ونشوف آخر دخول ولما ما نلقى ليهم أتر ونتعب من قص الأتر في العالم الإفتراض زي ما قال دكين , نرجع لي تماضر الغايبة برضو ونترجاها ونرجى بوست منها شوفيهم وين الحلوين وين راحوا , ويجوا ونلاقي طلتهم بوست شكلة , لساتنا نتشاكل في البورد زي الدفار مع الكمساري ويكون ده سبب عرفة في سويعات إنتظار فتح كوبري الخرطوم أمدرمان القديم , ويمتد حبل العرفة .
أما باقي كلامك يا أساسي ف ده أصلك , أصل وبس , وسعيد كتير إني من ضمن تلاتة , بس القائمة قابلة للزيادة ؟ لو إجابتك أيوة خش المتواجدون الآن وأختار أي تلاتة وح تلاقي إنهم نفس التلاتة الأوائل , مش بورد سوداني ؟ بورد وطن ؟ بورد فيهو إنتوا ؟
سلام أساسي
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
بت قضيم الما حنكوشة
ونبدا من آخر كلامك , سماح وعفو لله يا سـتي
في البداية قلت بت قضيم طشت وخشت كتبت رد في بوست تاني , ده كلو أنا يا بت قضيم ؟ طيب اللئامة شنو ؟ وعن مين أخد من مين , حكمها هنا يصعب , مرات هنا ولما الليل بتاع الشوق تزيد ساعاتو ويزيد قلقي , بطلع أمشي الإتصالات حتى لو كان فارق التوقيت صباح إلا بواح وإتصل , قلق , أسمع ألو أقفل الخط وكفاية كويسين وأرجع , ولما الفلس ما يسمح حتى بي قولة ألو دي , بجي هنا البوست أشيل الهم بي كلمتين في بوست طعمو قضيم بي مرارة ولئامة تلسع .
لسة بت قضيم الرجا . ومن دون شكرا أكيد , لأنها واصلة ولسة وصالك عشم .
قد يكون القادم أحلى , أكيد أحلى ( إنشاء الله ) من غير أنانية بس .
سلام
لنا مهدي
كل حضورك ده وإنتي طريد زول يا دوب معدل بوستاتو واحد في اليوم عزاء , ومرات شكر ؟
عجبني كتير حواركم في بوست عنوانو طويل , مخاطبة لي بعض المتسجيرين بي دبلوماسية الصمت تقريبا , وما عجبني إنقطاع أخبارك , منتظرك أعرف الدنيا هناك كيف عندكم .
سلام
| |
|
|
|
|
|
|
|
|
 نوموا عوافي (Re: tabaldy)
|
الأخ تبلدي
صديقي اللدود
يا أخي
والله أنا زعلان منك
وشايف الجماعة تحت تحت قالوا أنت ****
المهم ما عرفتك بي هنا عرفتك بي هناك
ومازلت منتظر منك رسالة
بصراحة في الفترة الأخيرة كنت كسلان زي كدا
لكن نسمع منك
وماذا عن أكاديمياتك
نوموا عوافي
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
يا كومندان
اديتنا السهر وبيتنا بعيد ..
ـــــــــــــــــــــــــــــــــــ
قال ليهو في منتصف تمام تسعة يا سعادتو انحنا ما فاهمين شي ؟؟
فرد ولمبات عنابر التدريب الموحد تضي خلف وجهه :
(تفهم شنو ده كلام جيش..)
واعاد النص من اوله والاهالي يتململو في تمام الطابور ..
ابنوسي ما تغيب كتير بتحلج
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
يمنى أختي يا يمنى
وصلت وفاحت عواطر تحياتكم وألف شكر علي طلتك , بس مية سنة كتيرة شوية , يمكن فوق الكلام كان مشحون شجون زهجة قرفة وما كان واضح كتير , قصدت فوق بي بداية مسح الردود إنها زي الزمن الإضافي في كورة , يعني لو مد الله في عمرنا وحصل المية القلتيها هنا وشوية ف أكيد ح أدخل عند ناس جينس بي واحد من سببين , يا هتاريش شوق أو خطاريف كبر , رغم إنو الأولى كترانة والتانية بدت علاماتا تبين . أخبارك وأخباركم يمنى أختي , تمامين ؟ زي ما بتمنى ؟ وتتمنوا ؟
سلام
الحليلة
ياها يا الحليلة الأربعة نجمات , بس ناقصة واحدة , مصدر خبرك فعلاً ما بتتبل في خشمو حلاوة قطن ناهيك عن فولة , بت قالت , خلينا من قالت وقلت , لسة الجرح ما نشف وداير تخت إيدك فيهو ؟ إنت طبيب مداوي ولا جزار ؟ حأحكي ليك عنها , وين ومتين ؟ لامن ألملم باقي الفضل في أطرافي , هدتني حمّى ووزن أقل من الريشة , وكدست معلبات الشهر صفّين زي صفوف تأشيرة العمرة .
وعن عرفة هنا , هناك , وهنالك يا حليلة , كلها واحد بس بكري قال إسمك في يا سمي أبنوس وأبنوسة , بكري خلاني وأبنوس الهميم المهموم بي قضايا دارفور في سرج واحد , خلاني وأبنوسة الغايبة , الرايعة , الأديبة , الصحفية بمسمى واحد . قلنا ليهو تبلدي , وبرضو شدر , قايمة منو واحدة كبيـرة في حوش حبوبة في بعض ضواحي الأبيض , شربوا منها ولامن دخلت الكرجاكة بقوها ضل محطة لواري أبو زبد وما جاورها , تبلدي , قنقليس بالشطة , أو تمشي ناس البيبور مع واحدة مشروع خطيبة لي كافتيريات النيل السياحية تشرب كباية عصير سوداني مزروعة في السودان , كباية قنقليس ملقطة جريواتو من تحت تبلدية ضلها إتمد ما عد حد المليون ميل شان يقولوا عصيرنا مستورد , تشرب الكباية وتقضي على ما تبقى من جنيهات في الجيب , وقد تقضي على بقايا ألفة ومحبة ليها في اليوم داك , ده تبلدي , أبنوسي , حنس بكري يديني أبنوسي وح أعزمك واحد قنقليس من دون ما تساهم في حفر كنانة والرهد وتدفع ضرايب المحل والعشور وزكاة حبك ليها . حب ؟ قلت لي قالوا ليك مالي ؟ أيوة جنيت يا حليلة وصدقتها لحدي ما بقيت كدة
سلام يا حليلة ونسمع منك قريب
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
كمندانات جنة عدن حسب ما حبّوا يسمّوا أرض ميدان الحرام كانوا بصلوا نص الليل كأنهم شوق حبيبة , بيناتنا لمبة , تلاتة شهور بنعزي في لمبة , لمبة شهيد , دي لمبة ولا المليون شهيد بتاعين الحزائر ما عرفنا , وناس ميز تمانين عندكم بقولوا تنوموا السقد , ما عرفتها الكلمة دي , وما لقيت مصطلح يشرحا بعيد من طوابير العسكر , وما لقيت مرادف لي كلمة الشوق يفيد المعنى هنا ليكم يا عشا البايتات , لقيت صورة البت المغبشة ؟ بقيت زول عرس , مرة في حلة حمد , ومرات مناداة لعم حمد في النشيشيبة وهناك في رياضكم قالوا عملت التالتة , ولو جانا دافي حيبقى الكم كمين , ومشكلتك في ده كلو إنك جادي يظهر بس ما مصدقات لييه ما عارف , شيلتك بقت إطناشر , إقتراح وإن كان في الجيش مافي إقتراحات وفهم , إقتراح إنك تقيف هنا وكفاية الشيلة بقت أربعة تلاتات , يعني إطناشر تقسيم أربعة كل واحدة تاخد تلاتة تلاتة , والقصد من إبراز مهارات الشطارة والحساب دي إنك تقوم تروق وتنزل من البلكونة وتريح ناس البلكونة وترقد بين نايم وبين مشتاق , شوف الشوق أقرب لي منو فيهم , خليهن إتنين , تلاتة ياخي وأدي أخوك البايظ بي شيلتو .
الأهالي إتململوا ؟ نحنا قالوا المرحلة التانية في طور تطور الحشرة ناقصة التطور , بيضة مستجد يرقة وشالوا العذرية ونطّوا لي طور الحشرة , مش جيش ؟ مافي نقاش ؟ .
حأغيب قسر يا دكين , , قسر وجبر , هدية من واحدة الحليلة جاب طرف خبرها خلى كباية الشاي كأنها في خط زلازل الاناضول , ترجف كلها , قصدي الكباية , ما أنا , انا كويس وثابت , انا أخوك إنتي , قلت شنو في تقسيم أربعة علي إتنين ؟
ملحوظة :
حلجت وإنتهيت , قول ليها تجي وحأجي بعد ما أبل الشوق بي طلتها
أبنوسي تاني
سلام
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: Raja)
|
عزيزي أبنوسي،
تحياتي، وعاطر الأشواق،
أعطيتنا شفافية مفرطة، وقدرة على النفاذ للجوهر، من غير مجاملة زائفة للآخر، أو تجريح مفرط. وتتجاوز كلماتك العقل لتنفذ إلى القلب، لأنك مفعم بالمشاعر الخيرة!
وقد وجدتك محفزاً على التفكير السليم، ومبرزاً للتحديات التي تواجهنا بغير تلكف أو تحذلق. ولذلك فإني أرجو دائماً أن أكون عند حسن ظنك، وظن أمثالك من شبابنا البواسل. ويؤسفني أنني كثيراً ما أخيبه.
ولا أملك إلا أن أقول: هنيئاً لنا بك، وبأمثالك!
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: Haydar Badawi Sadig)
|
تبلدي الجميل
كيف اديتنا شنو
ياخي انا كلو ما اشوف اسمك بجري طوالي على البوست و يسبقني الشوق قبل العينين
انت جميل و نضميك بدي الزول احساس غريب اتخيلك دايما تتكلم براحه وبي هدوء وبساطه عجيبة و جمال شفيف
اديتنا حسك الراقي يا ملك لوكنتا بعرف اكتب زي روائعك كنتا قدرتا اعبر ليك اكتر
دمت دوما ابنوسي الالق
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: ايهاب)
|
العزيز تبلدي تحياتي العطرة
كيف تقول ذلك?
تكفي فقط الكلمات الصادقة الطبيعية التي يسطرها قلمك
الشجاع الحساس المرهف
يكفي اننا نلوذ من حر وصفاقة وسطحية بعض المواضيع الي
واحة كتاباتك الرائعة
وعقبال مائة سنة في دارك ودارنا المنبر الحر
ali
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
رجاء الرجا سلام
ولما زعلت من عكننتك الفترة الفات , خارج الرجاء رجا ودبلوماسية كلاما , زعلت حبة , حبيت أقول كدة , جات الغالية كتير راوية ووقفت وقالت هييي دي ما إنتي وقلتي فعلا إنك ما كنتي إنتي وفرحت بي رحعة رجاء , خبرين في الإسبوع ما كفاية , إذاعة أمدرمان حنينة ما بتفارق حد النيلين وتطلع تصلنا وتورينا أخبار ناس في بلاد الشوق , أخبار بلاد الشوق تلاقيط زي رزق السنين دي , خبر هناك من روادي المغاني , لحظات شجاعة إنك تشوف الخبر من تلفزيون جمهورية السودان ( بالمناسبة هي لسة جمهورية ؟ ما بقت مملكة ؟ ) , أو حتى تجي هنا تلاقي الأخبار من بوستات رجاء , أبو عرفة , وآخرين , تقريبا آخر زول عرف خبر كورة الهلال والأهلي كان تبلدي لأنو كان ما قريب من البورد والتلفزيون , وبي مناسبة الكورة تابعت الأمم الأفريقية لأول مرة من بوستكم العامر إياهو . حفزتك شان أرجى المزيد منك رجاء ؟ عشم يا عشم الناس الهناك .
سلام
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
أستاذي حيدر
ولما طال غيابك مشيت هناك الفكرة , عملت بي نصيحة عادل عبد العاطي مرة , قال بكري وصانا مرارا وخوفا علي الباندويدث وإستهلاكو إننا نقلل من إستخدام الماسنجر , ما لقيت ليك إيميل ولا حتى طلات كتيرة هناك في الفكرة , عرفت إنها شواغل الدنيا الكتيرة الما بتخلص , وأهو جيت لعندي والقلوب عند بعضها , وحمد لله إننا سمعنا منك ولا أسكت الله لك حساً .
يمكن تربيتكم آباءنا الصوفية علي نهج الصوفية خلانا ناخد من التاني الكويس ولو ما لقيناهو منو نمشي ونديهو عذر ودعوة الله يصلحنا ويصلحو ونجري ونرجى سماحو . منكم كل ده منكم , والأصل تتبعه الفروع , وأصلك ممدود من عند حدك لي هنا , باهي وسامق ومثمر إنشاء الله .
وين الفكرة وناس الفكرة , الأفكار ما بتموت , وحملة الأفكار ما ناس بخلوا الدنيا تشغلهم عنها الفكرة , يبقى أكيد حتظهر ويظهر كل أهل الفكرة , أكيد منتظر مع البقية .
كيف ألاقي حروف توافي ما كتبت ؟
سعدت بي وجودك وتحفيزك وتشجيعك ولي كل حرف كتبتو هنا أو في بوست تاني .
سلام
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
LoOoOoOoOoOoL
أو هوبة
كلمة السر يا إيهاب
لو مافي معناتو إيهاب مافي
وين يا زول يا إيهاب ؟
شوف أبنوسي المستهبل عامل فيها حريف , مين الغايب ؟ يا سيدي حضورك باهي رغم قلتو . عملت شنو لي دكين ؟ حصلو الزول ده .
وعن الشوق , فحدث ولا كذب , شوووق ومد حروف الكلمة قد ما تقدر وتلاقيها يمكن تزن وتصلك وتوريك حدو , غبت حتى عن الماسنجر ملح الهوتميل يا إيهاب , المانع خير يا زول ؟
أما الجمال فيبدو إنو الجمال هد فيك وزادك جمال علي جمال , وألف شكر لي كلامك وفعلا زاد الزول يشيلو , البوست خلاني قاعد فرحان وبقرا فيهو مرة مرة , بقيت مزروع مشتول قدام الكمبيوتر بين صفحتين , صفحة أخبار , كورة , مقالات , وأرجع منها لي البوست و أقعد أقرا وأقرا فرحان .
هنا الناس دي بقولوا صوتي ده ما بطلع من الحلق وما بسمعهم , العتب علينا الما بقينا بتاعين مظاهرات زمان وكورنا وطرينا حبال الحنجرة , والهدوء , صدقني أبو الدقيق بس , لكن هنا الناس بتجبرك تكون رايق ومربع إيدينك وتسمع ليهم بي كل أدب لأنهم حرم جمال يا جمال
أبقى أظهر
سلام
| |
|
|
|
|
|
|
|
|
|
Re: سنة ويوم .. أديتكم شنو فيها ؟؟ (Re: tabaldy)
|
يا عـلي
وصلت تحاياك العطرة بي كل شذاها يا دقنة ,
مرات البورد يا دقنة بخلينا نعام , ندفن راسنا سكوت , ونقعد برانا نفتش علي الشجاعة القلتها , شجاعة الكلمة , ونصبر ونبعد ونرجع نجي نلاقي إنو فعلاً لو صبرنا على القائل لقال حقاً . وشجاعة الكلمة صعبة مش في بوردينا بس , يكفي إنها أهدتنا منافي قسر وبقينا نلعن سراً وسراً أكتر , والكلمة طالعة نازلة مع النفس ساساقة ما قادرين نتفّها ونقولا ولا قادرين نبلعها , يا ريت نلاقيها شجاعة الكلمة يا دقنة يا ريت ,
منبرنا فعلا دار فيهو خوة حق منك وليك , ومعاك نمد أمل وصالنا أكتر وأبعد من كلمتين في بوست في الوطن البورد ده .
سلام ليك كتير وشكراً لي كلامك وكلام الناس الهنا الهنا ديل الكلام الحلو ومشجع ومحفز لي كتر النضمي المفيد وما مغططغط وشجاع , وإنو بداية السنة الأولى في السنين المية حسب ما تمنيتوا وتمنيت دوام عرفة بورد عامر بي وجودكم .
سلام
| |
|
|
|
|
|
|
| |
Ahlalawad
بت قضيم
lana mahdi
yumna guta
elhilayla
Raja
Haydar Badawi Sadig
ايهاب
degna
Elmosley
سجيمان
Abdel Aati
فيس بوك
تويتر
انستقرام
يوتيوب
بنتيريست