|
|
 ثلاثة قصائد نادرة لمحجوب شريف
|
1 / هناك قصيدة تتخبى
هفت لي كم هفت
اشوف عين الشمس رفت
اقول حمى البلد خفت
ايادي الشعب التفت
الاقي السلم يتقصد
ايادي الظلم اصطفت
ينابيع الفرح جفت
الاقي امومة تتلفت
هدوم اولادها ما كفت
الاقي طفولة ما رضعت
حليب اماتها ما ادفت
أبى شعبي يدا
من جرحك تبت
افكر فيك واتأمل
اياديك اللي كم ربت
جداول رقت .. كبت
سقت ..
ياما الخلق عبت
مناديلك ضفاف
نيلك قناديلك مدن هبت
وبرضك كلما صبحت
تلاقيها الشمس غبت
مظالم في الحلق شبت
مدامع في القلب صبت
سجوناً حولك اتعلت
عيوناً خلفك إدبت
مع الحاصل ده حتواصل
وتعلى العين وتتحجب
كما صمت البحر صمتك
كذلك جامح الهبة
شديد اللهجة يوم تغضب
تقوم العاصفة تتعبا
حنكبر بكرة نتكلم
وسط اللمة تتربى
شوارع تنتفض لمن
تلاقي النجمة بالحبة
طريق الشعب يا ملهم
منو المنك برجعنا
بنعرف كل شبراً فيك
لا خناك لا بعنا
2 / حليب العزة
ما أنبل حليب العزة
يرضع منو شافعنا
وشمسك كم تطالعنا
ونقدل في شوارعنا
ونكتب بي مداد العصر
ننهل من منابعنا
وتنسج من بريق النصر
راياتك اصابعنا
تعيش انت ونموت نحن
لكي يا غالي ما يكبر
جنانا تحت شرا المحنة
جرحنا اذا بفرهد فيك
حنمشي على البجرحنا
وحزنا لو بضوي سماك
هو الحزن البفرحنا
ودمنا لمن يسقي ثراك
ينزل من جوانحنا
وان راحتنا ما ترتاح
نقول انشاء الله ما ارتحنا
تضيع ايامنا بس ما تضيع
ملامحك من ملامحنا
ولو علينا صوتنا عليك
يا والدنا سامحنا
ياأشرف منابعنا
يا أعظم مدارسنا
بنرجع ليك توصينا
ونسمع ليك تحدثنا
3 / حرر نفسك
ارفع راسك
زلزل أسرك
اصلك شعباً صعبا كسرك
وحد بأسك
انت المجد مقاسو مقاسك
والقهروك زوالم شمسك
كل الايدي وكت تتماسك
تكتب نصرك
تهزم ليلك وظلمة حبسك
حرر نفسك بي ايديك
عندك زودك وحمرة عينك
ودخري الحوبة شبابك زينك
علي هتافك
أدي شراع الهنا مجدافك
خلي الخوف يخشاك ويخافك
ويبقى رماد البينو وبينك
كل الدنيا بتسأل عنك
يا مبدع ثوراتك وينك
انت الزيك ما بتذل
كم من ظالم ظلمك وولى
انا متفائل بيك وبحلم
بل متأكد ما بتتخلى
ما بتتفرج تفضل ساكت
وحفنة تقبقب في خلق الله
انا متفائل بيك وعارف
انك يوما ما بتتخلى
تبقى حديث العالم كلو
اذاعة .. اذاعة .... جريدة ..جريدة
مجلة مجلة
يملا الشاشة ثباتك
وضو عافيتك
وعلمك وقلمك وجلابيتك
وقدلة ولدك وجدلة بتك
ونيلاً قلدك جنب طابيتك
ما من بيتك يا الحبيتك
كل من ظلمك ولا تربيتك
قدرتك انت وامكانيتك
شامخ تبني ديمقراطيتك
وعزة بلدك ورفعة شانك
يا متعدد وواحد ابداً
تحيا العشرة البين اديانك
وسلم حقيقي يزيدك عددا
ويبقى عنان السما عنوانك
|
|
 
|
|
|
|
خالد العبيد
يا بت يا نيل
خضر حسين خليل
فيس بوك
تويتر
انستقرام
يوتيوب
بنتيريست