الزمن ...الفضحية....

مرحبا Guest
اخر زيارك لك: 03-28-2024, 06:00 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف النصف الأول للعام 2004م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
04-25-2004, 10:41 PM

omer almahi
<aomer almahi
تاريخ التسجيل: 03-25-2004
مجموع المشاركات: 1507

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
الزمن ...الفضحية....


    يمه وين الهدوم البت بتكون مستناينى..
    الهدوم فى العنقريب البرا....ما تنسى جلابية ابوك .. حقت الصلاة
    الصابون وين ....؟
    بروة امس كملتوها يا آمنة.؟..أمشى لود الشريف صاحب الدكان شيلى ليك لوحين صابون وقولى ليو بنجيبلك القروش
    يمه ما بدينى ... الصباح شلت منو السكر والشاى بالدين
    خلاص يا بتى شيلى (الصرة) الفى توبى ...كنت دايرا ألمها لى غرض تانى هو الغسيل دا لازم كل جمعة يا بتى

    آمنة تدندن باغنية لا تستطيع ان تستبين كلماتها جيدا...
    حملت الطش الممتلىء بالملابس المتسخةعلى رأسها والراديو الخشبى القديم على يدها اليمنى
    وخرجت بعد أن (دنقرت) راسها من (عتبة) الحوش القصيرة محافظة على توازن (الطش) على راسها وهو ممتلىء بالملابس المتسخة قاصدة بيت صديقة عمرها شريفة كما إعتدن على غسل الملابس فى الترعة كل يوم جمعة ...اليوم المخصص للنظافة وترتيب االمنزل
    عندما تقترب آمنة من بيت صديقتها شريفة يخفق قلبها بعنف ودائما ما كانت تتعمد عدم الدخول مباشرة...بل تفضل ان تنادى على شريفة من الشارع وتدرى تماما ماذا يعنى وصول صوتها الى قلب أستاذ صابر شقيق شريفة .الاستاذ بمدرسة القرية.خطيبها منذ اكثر من عامين ..كانت تنتظر خروج شريفة عليها وكم تتمناها ان تتأخر لعل صابر يهزم عناده ويخرج متعللا كما كان يفعل دائما..فى مثل هذه الحالات
    يلا يا شريفة تأخرنا
    صابر مصدع
    آمنة كاد ان يسقط الطش الممتلىء بالهدوم المتسخة من على راسها..ولكنها تماسكت ...
    من يوم فصلو من التدريس وهو ديمة مصدع
    ما يشوف ليهو شغل تانى ...يعنى ح يقعد كدا ؟
    قال ممكن يعينوا مدرسين تانى
    هو داير مدرسة الحلة عشان يساعد أبو فى الحواشة
    الله يجازى الكان سبب...ناس حاج بشرى ديل ما باخافوا من ربهم
    وتشوفى الدقون والصلاة فى الجامع تدى ربك العجب
    تصدقى محمد أخوى قال لى ديل ناس كويسين لكن الناس بكرهوهم بس
    ناس كتيرة يا آمنة منخمين معاهم وما عارفين الحاصل شنو ما عارفين الجماعة ديل سبب سجن طه ود أحمد لفقوا ليهو تهمة باطلة ..بس عشان بقول الحق ..الناس نسوا دكتور الشفخانة..؟ رسلوا لى بتهم وجروا لحقوها معاهو جوا وضربوا .وطردوا..علشان هو زول متعلم ومخالفهم ..ودمروا الشفخانة وجابوا زولهم الما بعرف حتى الحقنة يطعنة دا..؟
    لكن يا شريفة سرقت حواشتنا المرة الفاتت دى عليك الله ما بتقنع اى زول مكضب..؟
    امى مشت تجيب قش للبهائم شافت كاروهم طالعة من حواشتنا وفوقا اولاد حسن الصغار وشافت شوالات العيش فى الكارو ورا
    والناس كلها كرهت الزراعة البقا ما وراها إلا التعب
    وهم يا آمنة عندهم لوارى وحواشات والمال دا كلوا ويسرقوا..؟؟
    مفروض يا شريفة يا بيطلوا الصلاة يا يبطلوا سرقة حق الناس

    الحواشات رقدت بوار والشفخانة خليناها بقينا نمشى عيادات الحلل التانية المدارس بقت كلها أولادم ..العندو شهادة والما عندو يجى يقرى ..عشان ما يخش واحد غيرم
    أعوذ بالله منهم مشاكل وحقارة وظلم وسرقة
    هم ديل يا شريفة دمروا مستقبلى مع مستقبل اخوك يجيبوا نسيبهم يشغلوا مدرس فى مكان صابر عينك عينك
    انزلت آمنة الطش الثقيل الممتلىء بالملابس المتسخة من على راسها واتبعته بالراديو ...الخشبى
    الحوار الذى دار بينها وبين شريفة أصابها بالدوار ...تمنت لو انها تستطيع ان تغسل هموم الحلة وحزن الناس ..مثل ما تغسل هدوم أفراد أسرتها هنا على هذه الترعة
    كان الراديو الخشبى يخرج منه صوت مزيع مرتوى يعدد الإنجازات الإقتصادية خلال عام مضى
    وكانت شريفة فى هذه اللحظة مشغولة بوضع الملابس على الارض...ويصل إليها صوت المزيع ...كانه يتكلم عن مكان آخر فى هذا العالم ...قالت آمنة وهى تدلق الماء من الطش سمعتى يا شريفة .؟؟.قالو بشرى قال لى أخوه حسن ..نحن الناس دى كلها كرهتنا وكرهت اولادنا وضايقونا والحلل كلها أبتنا وأبت حلتنا وقاطعونا وأى زول بقا يقول نحن كعبين وسمعتنا بقت فى التراب ...اها حسن قال ليو ...والله انا ذاتى داير هسة اقول ليك الكلام دا
    يا بشرى يا خوى لازم من حل
    حل كيف قولى بس ؟؟
    الحل صعب يا حسن أخوى
    كيف ؟
    بيتنا دا نقوم نقسموا... ولازم نختلف... أنا.. وانت ...انت أخوى الكبير والبينا بتكون عامرة .... لكن قدام الناس نعمل فيها مختلفين قالت هذا آمنة والتفتت الى شريفة وهى تلوى جلبابها وكان الوسخ قد بدأ ينزل وأصبحت الجلباب اكثر بياضا
    اها وتانى شنو الحصل يا آمنة وهم أخوان وبيتم واحد كيف يفترقوا
    لكن يا شريفة يعملوا شنو..؟الناس كلهم كرهوهم وعزلوهم وبقا لا فرح لا كره بدخل عليهم زول ..حتى الحلال الجبنا عرفوا كل شىء
    تتوقعى ناس الحلة ح يصدقوا الكلام دا ويخش راسم ..؟
    بصدقوا يا شريفة وليه ما يصدقوا وهم يشوفوهم مختلفين ويقسموا بيت العائلة الكبير ويفرزوا عيشتم
    والله حيرتينى يا آمنة بس أنتى بتجيبى الكلام دا من وين
    حسن اشترى بيت فى الحى الشعبى
    والعداوة من هسة بدات بيناتم
    عداوة جد جد يا آمنة ولا حركات ساى زى ما قلتى
    طيب الأولاد ؟
    الأولاد علاقتم مع بعض كويسة إلا الكبار مع أبواتم
    والناس كدا مابتعرف منو البطال ومنو الكويس

    المزيع على الراديو الخشبى مازال يلهث
    رغوات الصابون الابيض تغطى المكان وبعض من أطراف شريفة
    صمت يغطى المكان ...صوت عصفور صغير يشقشق .. كان صوت العصفور أكثر صدقا من ذلك المزيع الذى يلهث من داخل الراديو الخشبى
    الشمس تقترب من كبد السماء ..
    الصلاة قربت يلا يا شريفة ابوى منتظر الجلابية
    ينطلقن نحو القرية.... الهادئة فى هذه الساعة عادة
    وأخذت آمنة تردد ...فى دواخلها كل الناس صدقوهم ...كل الناس صدقوهم
    .............
    و المزيع مازال هناك يلهث








                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de