|
بكرة النقة .... بكرة النقة
|
قالوا في مرة سودانية نقاقة نقة شديدة مع زوجها. بعدين لمن زهج وفتر من النقة الكتيرة قام اتفق معاها وقال ليها نقتك كلها تأجليها ليوم الأربعاء . ويم الاربعاء دا كلو مبروك عليك نقي زي ما عايزة. اصاحبتنا بقت من يوم التلاتاء الصباح شغالة ليك اليوم اليوم كلو. بكرة النقة بكرة النقة.
أها أسي البورد دا كلو بقى زي زولتنا دي. ياجماعة الحاصل شنو. هل نحن فعلا شعب نحب النقة والكلام الفارغ ودا ياهو الخلانا ماشين إلى الخلف وبخطى حثيثة. نمسك أي موضوع ونحكو لمن يجيب الدم ونمسك في الصغائر وننسى الأهم. فعلا نحن شعب نحب الثرثرة والخطب الرنانة والدليل على ذلك قادتنا . واصبحنا نحن نقلدهم. وكل واحد فينا مافاض في التاني وعامل فيها هو ياهو المقددا وهو ياهو الفاهم في الساسة وفي الدين وفي الفلسفة وفي الاقتصاد وفي التربية وهو ياهو حامي الدين (طبعاً دي حتجيب لي الطراوة).
بالله أسي يعني خلاص مشاكلنا كلها اتحلت وبقت المشكلة إنو يعلقوا عضوية موناليزا أو هوبفل . الموضوع تم علاجه وانتهى وقد يكون العلاج مرض للبعض وغير مرض للبعض الآخر. لكن خلاص الموضوع يعتبر انتهى وكل واحد أدلى بدلوه وربنا عليم بكل السرائر وقادر على أن يحفظ ذاته ورسله وقادر على أن يعاقب موناليزا. ننتهي من ديل نلقى أساسي فاتح الجبهة الشرقية بهناك ومطالب بحقو. قبل دي ما تنتهي يقوم عادل والأوباش يفتحو جبهة دارفور.
وما فيش حد أحسن من حد
فأنا أطالب بالجميع أن يعتذروا لي لأنكم ستتهموني بأنني زول ما عندي شغلة وزول أي كلام لأن الاختلاف ظاهرة صحية وهنالك الرأي والرأي الآخر. وكل زول حر. والله شي غير فلفستنا وعنترياتنا دي نحن السودانيين ما في شي مودينا التوج. يلا بلا لمة
رجاء من الأخ بكري أو من لديهم دراية بتقنيات الكمبيوتر أن يقوموا بإعداد إحصائية عن البوستات الجادة والمفيدة وبوستات الشكل والمحاسبة . بس للعلم ساكت.
|
|
|
|
|
|