|
|
 الحاج بدر الدين شنا
|
عاد أخونا بدر الدين شنا من الحج سليماً معافى ، نسأل الله أن يكون سعيه مشكوراً وذنبه مغفورا وحجه مبرورا وأن يكون قد رجع من حجه هذا كيوم ولدته أمه ، ولما كان تاريخ ميلاد الحاج بدر الدين مبنى للمجهول بسبب أنه مؤرخ بعام حفر البئر في قريتهم يكون ثاني أيام التشريق من عام ألف وأربعمائة وأربعة وعشرون من الهجرة النبوية الشريفة هو تاريخ ميلاد البدري وبذلك يكون أصغر أعضاء منبركم هذا سنا ، وقصدت أن أفرد لموضوع حج بدر الدين مقالاً منفصلاً حتى يرمى الرامون جمارهم وسهامهم ليس في إتجاه جمرة العقبة الكبرى أو الوسط أو الصغرى إنما صوب بدر الدين عديل كده مهنئين ومهللين. سألني الحاج بدر الدين بعد عودته من الديار المقدسه للمنبر الحر أنه قد أنهى حجه ولما كان متزوجاً وله من ذرية صالحة من زوجته نظر وتبسم في خبث متسائلاً ، أها بعد الحج يا ربي يكون باقي لي شنو في هذه الحياة وأكيد بيكون باقي ليهوالماجستير . ولأن السؤال فيه الكثير من الدهاء والخبث أمتنع عن الإجابة.
يعلم الجميع أن من شروط الحج:
الإسلام ، ونحمد الله أن الأخ البدري مسلم بالميلاد وبالفطره وبصبره
العقل ، وأن عقل الأخ البدري يوزن بلد قبل هجرته إلى السلطنة الزرقاء.
الحرية ، وأن هذا الشرط ربما إنتفى من البدري بوجود الكفيل
صحة البدن ، لا تعليق
ملك الزاد والراحلة ، هذا أمر مقدور عليه وميسور لمغترب
أمن الطريق ، شيطانين في كوشه ما بتلمو
وهناك شرط الإستطاعة ، وأحسب أن البدري لم يستوفي هذا الشرط حقه أيضاً حيث أن عليه مديونية لحكومة جمهورية السودان تقدر بمستحقات حولين كاملين من الزكاة وتهرب بين من الضرائب لأعوام عديدة تتراوح بين الأربعة والسبعة أعوام . فهل حج أخونا بدر الدين يا أهل العلم والمعرفة منقوص أم مقصور أم صحيح. ويا داخل هذا الدار صلي على النبى المختار
|
|
 
|
|
|
|
|
|
|
 Re: الحاج بدر الدين شنا (Re: almulaomar)
|
اخونا الحبيب الملا عمر
كل سنة و انت طيب
نهنئ بحج اخونا البدري و عودته سالما غانما فائزا
ان شاء الله تعالى ... و من ثم عودته للبورد
الشوق مطر يا خال ...
| |
|
|
|
|
|
|
|
|
|
Re: الحاج بدر الدين شنا (Re: Raja)
|
حاج البدرى
تقبل الله حجكم وطاعتكم وغفر لكم ذنوبكم وطهركم
وحمدا لله على سلامتكم وحجا مبرورا وسعيا مشكورا
الاخ الجميل دوما الملا عمر
لك التحية والتقدير
حاج البدرى ده مبروك بالحيل ونيتو واصله وانا خايف عليك الجماعة يعرفوا مكانك
وحاج البدرى طبعا لازماه عروس صغيره تدلعة فيما تبقى له من عمر مديد سعيد باذن الله أو سوف يسأل يوم القيامة عن انتقاصه رخصة مثنى وثلاث ورباع وياويلنا من هذا السؤال!!
جمعنا الله واياكم فى العام القادم فى الشعائر المقدسة
أخوكم
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
أتاري انا بقول حج السنة دي مالو كده كده!!
شكرا يا ملا، والف مبروك بدر الدين السمح، حجا مبرورا وربنا يتقبل منك رغم ناس الضرايب، ورغم الملا الذي حرقتو قولة الحاج بدر الدين دي، أصلو داير ينفرد بالالقاب الدينية المقدسة دي براهو.
ويا رب صلي على الحبيب وأوعدنا بزيارته وحج بيتك، آآمييين
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الحاج بدالدين....مبروووووكة يا صديق الكل...وميمونة انشاء الله
ويا الملا عمر...تعرف أول مرة الاحظ حكاية شرط الحرية دي مع وجود الكفيل..المسألة عاوزة فتوي
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الملا عمر
بارك الله فيك .. وعقبال الحجة رقم كم كدا ما عارف
بس الزول دا قال الحاجة الوحيدة الما استفاد منها
قصة ( التحلل الأكبر دي ) الموضوع دا قال غايظو جدا
عزيز .. تحياتي ليك وللمدام
يا الطيب البشير ، غايتو من ناحية السفة الزول دا بطل زمان
لكن اللسان دا ماااا بضمنو ليك ؟؟
تحياتي
رحمابي
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
اللهم أحلل عقدة من لساني يفقهوا قولي
لأنه الملا عمر دا لسانه طويل وقوله أطول وعشان أجاريه في إبداعه وفنه ورصانة إسلوبه خايف اقع في (جدال ورفث و....).
أشكرك أخي وصديقي الملا عمر على هذه المباركة والتي أسأل الله أن تكون إمتداد وطريق لمباركة العزيز الغفار وقبول وهداية وتوبة نصوحة إن شاء الله
وأسأل المولى أن يسهل للجميع زيارة بيته الحرام في كل عام وزيارة قبر المصطفى عليه الصلاة والسلام
الحمد لله الذي وهبني على الكبر أصدقاء مثل الملا عمر وسلة من الآخرين في هذا الحوش المسكون بالجمال والإبداع
الظريف الصغير (كمال) حسين ملاسي إبراهيم
سلام باللهفة .. (سلام باللهفة دي زي بيض بالطوة).
الله يبارك لك في أهلك وزوجك وذريتك ومالك وأعمالك
الحاجة بمشيئة الله رجاء
سلام ودعوات وسؤال للمولى لك ولإختك راوية بكل الخير ويحفظكن عفيفات وصالحات وطيبات كعهدي بكن ويبعد عن كن كل خبيث
الحبيب عبدالعزيز خطاب
تقبل الله مني ومنك وإن شاء الله يا عبدالعزيز السنة الجاية إنت وسحرك وعيالك حاجين ملبيين مهللين مكبرين وأشكرك كتير على هذه الكلمات الطيبات
الغالي الصاوي سلام
الله يحججك يا الصاوي حجة لا جدال ولا رفث ولا فسوق فيها قول آمييييييييييين
صديقي وحبيبي الرجل الطيب عبدالله جعفر
بارك الله فيك وشوقي ليك لا تحده حدود
ياخي تعال نتلاقى رايك شنو؟؟؟
الرائع اسامة ميرغني
الله يقبل حمدك وشكرك وما وريتني رجعت من السودان متين وكيف لقيت أهلك وأحبابك .. الله يحججك يا الغالي
صديقي القديم الحديث الطيب البشير
أقرط على كدي دي حلوة يا الطيب
غايتو نصيحتي للجميع الواحد يحج وهو صغير سن لأنه الحج عايز مجهود كبير نسأل الله القبول
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الأخت الوفية ميا
ربنا يديدك الفي مرادك يا إنسانة يا طيبة
ويحججك مع من تحبين و(الجمرات) أكتر من الرايحات
الرحمابي
الله يجازي محنك
نحن التحلل الأكبر عندنا ليس بقص الشعر إنما بقص التذكرة
ربنا يحججك مرة تانية
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
البدري .. الحج مبارك عليك .. أها ، الطواقي والسبح ، أهم شي .. والسجاجات .. (ما بتعرف السجاجات؟ ، طيب – نشرح) واحد من أبناء أهل العوض البارين بآبائهم وهو يودع أباه في نقطة السفر الأخيرة .. قال لأبيه ، أها يابا .. ما تنسى السجاجات .. فرد الوالد قائلاً : علا قبل أنا غير السجاجات الموديني شنو >>
بعدين ياخ بيني وبينك حاج بدر الدين دي ما راكبة .. ممكن تكون المعلم بدر الدين .. الأستاذ بدر الدين .. إلا يكون اسمك فضل المولى حتى نلفق معاك صفة الحاج أو الفكي أو مولانا .. غايتو غير واحدة منهن
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
أهل العوض والسجاجات
سلام عليك
أنا بعرف السجاجات و(الكسيدات) كمان والتي تصنع من القصب وليس السعف ولا علاقة لها بقبيلة اشرطة الكاسيت
خليها حاج البدري يمكن تركب
من الله خلقك لاقاك فضل المولى حجا بي قروشو؟؟؟ دائما بكون حججوهو أولاده وأنا حجيت بي قروشي
عبدالله بس
كيف حالك ؟؟؟ ياخي إنت عبدالله منو؟؟؟ وقاعد وين أنا عايز أعرفك أكتر
غايتو على العموم الله يبارك فيك ويحججك حجة تزيد بيها إسمك دا كان يبقى حاج عبدالله
الحبيب القريب أبوذر
شوقي ليك يا المطر
ربنا يسهلك حجة مباركة ومقبولة وما تنسانا من الدعوات يا ود الشيوخ
أماني الجندرية
الله يسلمك يا بت أمي والله الحجر جاني تحت العين بس الحمد لله الحجارة ما كبيرة بحجم حبة الفاصوليا وبالمناسبة دي أحكي ليك الموقف دا
أنا سقت معاي واحد حجا قبل كدا قلت عشان يختار معاي الحجار فكنت كل ما أوريهو حجر يقول لي لا دا كبير .. أها ودا .. لا دا كبير .. ودا كيف ؟؟ لا دا كمان كبير .. أها قلت ليهو
أسمع إنت الشيطان قريبك؟؟؟
Noon3
والله إسمك دا أصعب من رمي الجمرات ما قدرت أقراهو تب (هل هو نون3 أم نونع) فكتبته زي ماهو
أسال الله أن يقبل مننا ومنكم والشكر أجزله
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
بدر الدين الحاج
وأحلل عقدة من لساني يفقهوا قولي. كده يا حاج ، ما عايز ليك وزير من أهلك إن شاء الله وزير دوله أو وزير إقليمي ، فعلاً زي ما قال أهل العوض أنو لقب حاج دي أبداً ما راكبه مع إسمك وحاولنا نركبها شماعة حتى إلا أنها أبت وأستكبرت.
أهل العوض
السجاجات يطيرن في السما كفايه عليكم الطواقي ، ويقال والعهدة على الراوي أخي أهل العوض أنه وفي جمرة العقبة الوسطى وأخينا بدر الدين يهم برمي الشيطان إذا بنعال مقاس ستة وأربعين تصفع البدري في مؤخرة دقنوسه حتى كاد أن يخر صريعا لولا أن تدراكته رحمة من الله وبعض عون من حجاج أتراك غلاظ شداد مفتولى العضلات وثلة من حجاج نيجيريا وبعد أن أخد الحاج بدر الدين نفسه وتيقن أنه على قيد الحياة قال مخاطبا جاره الجاب القون منو ، ونظر إليه جاره مهمها بكلام ترك مبهم بأنه لم يفهم.
أخي المطر
لك التحايا والأشواق
العزيز الرحمابي
أما في شأن التحلل فأخشي ما أخشاه أن يكون حاج بدر الدين قد فعل في إحرامه مع فعله جد أخينا وحبيبنا الغائب أب حراز ، فعندما حج جد أب حراز لأبيه وعند الإحرام أخبره أهل الرأى والعلم والمعرفة أنه يتوجب عليه أن يرتدي الإزار والرداء أى قطعتين البشاكير ديل وبس ، فغضب الجد وإعتبر أن هذه مسخرة وقال ليهم دايرني كمان أقعد أم فكو ، كان للعراقي بمرقو لكين على بالطلاق سراولي الطويل بعد ما تككتو ماني مارقو ، عليه يبقى تحلل بدر الدين معلق بتكة سروال جد أب حراز لأبيه إلى قيام الساعة.
الحاجه رجاء
نسأل الله لكي الصحة والتوفيق والسداد ، ودحين يا رجاء يا أختي وإنتي داخله هنا صليتي على النبي المختار ، ما لك دخلتي من الحيطه ما كاتبين وبالخط العريض وبي صفيحتين جير على باب البيت ، أها وجبتي شنو للحاج ولا إنتي نوع ناس أهل العوض بيكون مستني الحاج يجيب ليهو.
الأخ عزيز
لك الشكر والتقدير أخي ، وبالمناسبة الجماعة عارفين مكاني بس عاملين ما عارفين عشان المسألة تطول لأنو أقمار التجسس والتكنولوجيا إياها أصبحت توري ناس البيت الأبيض عدد أسنان خروف الضحية في بيت المال وكمية الماء المضاف إلى لبن شاي الصباح الذي يأتينا مع الفجر من الدروشاب ولن أبالغ وأقول النشال الذي لفح المحفظة التي هي أخوي من فؤاد أم موسى في ميدان أبو جنزير.
حكاية بركة بدر الدين دي لا تعليق أما مسألة العروس حتى لا يسأل يومئذ عن المثنى والثلاث والرباع فأظن أن هناك إتفاق مكتوب بينه وبين أم أواب بأن يكون المثنى والثلاث والرباع في عدد البيوت والركشات والحافلات وهو قاب قوسين أو أدنى من ذلك بحمد الله.
أخي الصاوي
الحج يا أخوى مالو كده ما نفس الحج كل عام وقوف بعرفة وترويه في منى وجمرات في أيام التشريق وطواف وسعى وتشتت. بعدين أنا لا داير ألقاب لا شئ بس برضو أرجع وأقوم حاج مضوى ممكن حاج الصافي ممكن حاج حسن ، حاج أحمد حاج فضل المولى حاج عبد الله حاجه فاطنه كل دي ميه الميه ، أو زي ما بقول ماتشنق ، لكن البمتش لي كلمة حاج مع بدر الدين شنو؟
الأخ عبد الله جعفر
لك الشكر والتقدير وربنا يوعدك وجميع الأخوة والأخوات بحج مبرور إن شاء الله.
الأخ عثمان ميرغني
والله المسألة محتاجه لفتوى ، والأسوأ وأمر من ذلك يا أخي إنو ناس الحكومة عندنا قالوا من لا يملك قوته لا يملك قراره ، وبالضرورة من لا يملك قراره لا يملك حريته وبي كده عقدوا علينا الحكاية أكتر وأكتر يعني بقي كفيل وقوت في نفس الوقت ، وحتى لو قلنا نصوم ما حا ينفع.
الأخت مايا
رمي الجمرات ربما يتطور بشئ من التوعية للحجاج لكين غير كده ما أظن فالمكان نفس المكان والزمان تقريبا واحد وسبق وأن جربوا بأن عملوا مكان رمي الجمرات ون وى تدخلى من هنا تطلعي من هناك ، لكين برضها جاطت وحصل عفيص وموت ، وما بقي ليهم إلا يقولوا ممكن الواحد يرمى بي نبله أو بواسطة الطيران الشراعي.
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
المسافا الرائع سلام
اللهم آمييييين وربنا يسهلك إنت والأسرة
خالد (الحاج)
طب ماهو إنت حاج ولا دي جلابية الوالد
عجبتني نكتة الباشمهندس ربنا يحفظه ويسهله حجة تاني ويكون فيها متمتع بالعمرة والحج ومنال
إن شاء الله يوم ماجستيري ما يجي
| |
|
|
|
|
|
|
|
|
|
Re: الحاج بدر الدين شنا (Re: بدرالدين شنا)
|
بما انو الحاج بدر الدين مديون للحكومة السودانية...فالموضوع اذا فيهو شكك
لكن بما انو الحكومة السودانية زاااتا مديونة لي انا فانا عفيتهم و هم عفوك...
يلا يا زول حجا مبرورا و ذنبا مغفورا
| |
|
|
|
|
|
|
|
|
|
Re: الحاج بدر الدين شنا (Re: Mandela)
|
يقول مانديلا نفعني الله بسكناته وحركاته الإنقلابية منها والبهلوانية واللاإرادية أن حكومة السودان مدينة له وفي عنقها دين وقروش للسيد مانديلا تأتي يوم لا ينفع مال ولا بنون تحمله أمام الملأ إلى أن يعفو صاحب الحق ويتنازل طائعاً مختارا عن حقه دون تهديد أو وعيد ، ولما تنازل مانديلا للحكومة عن حقوقه أصبح التنازل بالتالي يشمل بدر الدين تماماً مثل الكتابة بالكربون أو حتى صاحب صاحبك صاحبك ، لكن فات على الأخ مانديلا أن في السودان قائمة بطول نهر النيل لها في عنق الحكومة الكثير ولها يوم الحشر الأعظم أن تتنازل أو لا تفعل ، ويبقى حج بدر الدين مجهجها حتى صدور عفو شعبي بالإجماع عن الحكومة.
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
حاج بدرالدين
والله الجمرات دي حاجة صعبة اخير الرايحات
ما قلت لينا الوقفك شنو جنب الشيطان وقام الزول ضربك في عينك؟
وخروف الكرامة رسله لبورداب مسقط بالفاكس انشالله
| |
|
|
|
|
|
|
|
|
|
Re: الحاج بدر الدين شنا (Re: maia)
|
سلام مربع
سيدي الملا عمر
اشارة الى ما ورد اعلاه في متن فتواكم بعدم استحقاقية حجة بدر
وارجاع الامر الى انتقاص حقوق السفارة السودانية من قبل الحاج المذكور وهو تدقيس (الزكويين) والنوم بحقهم ... ولانني مغرووودة في هذه المبالغ ،من اجل التوثيق لطيور السودان ، وتالث شيء انا متحيله وعايزه امشي السودان ، واخاف ان وقفت جمب الوالد ان يدلق فني جازا ويولعني ، فخراج ذلك ان يطلع بدر شنا بحق التذاكر
والله ولي التوفيق
| |
|
|
|
|
|
|
|
|
 Re: الحاج بدر الدين شنا (Re: shiry)
|
الأخ بدر الدين
جعله الله حجا مبرورا ومقبولا وذنبا مغفورا..
ياحاج...الحكايه شنو؟؟؟؟قاطعتنا مالك؟؟ سمعتوا؟؟جابو ليك؟؟وللا عكينا؟؟؟المهم....حج وتعال..تلقانا نحنا يانا نحن..يا نا نحااااا
تحياتي
أخوك/الزاكي
| |
|
|
|
|
|
|
|
|
|
Re: الحاج بدر الدين شنا (Re: shiry)
|
الأمبراطور شيري
الشكيه لي أب أيدن قويه
أنا لم أفتي ولم أصدر فتوى ، فحجة بدر الدين إن شاء الله صحيحة ومقبولة بدرجة جيد جداً وهي قطعاً ليست حجة وداع كما تتخيلي فربما تعقبها حجات أخر كل ما أرادت أن أقوله أنه ربما لم يحج كما فعل معلم وهادي البشرية سيدنا ورسولنا محمد صلي الله عليه وسلم ، وإن كانت حجة بدر الدين أفضل - في تصوري المتواضع ونظري الضعيف - ببضع وعشرين درجة عن حجة أهل العوض - أيده الله - فقد روت الأساطير أن أهل العوض جاء إلى الأراضي المقدسة بالخطأ فقد كانت وجهته إلى المملكة المتحدة لكن خلطاً بيناً وتشابهاً بين المملكتين في الإسم إستقر به القمام في المملكة العربية السعودية ونحمد الله كثيراً أنه لم يذهب إلى مملكة بوتان ، والإعوجاج في حجة أهل العوض هي أنه دخل البلاد بصفة معتمر وأنقضت أيام العمرة وبقى إلى الحج فحج مع من حج في ذلك العام ولم ينضوي تحت أى حملة أو مؤسسة من مؤسسات الحج فكان متعه الله بالصحة والعافية في عز الصبا فلم يجد عنتاً أو مشقة في تكملة حجه مع العلم بأنه كان يعمل طوال فترة الحج بالأجر المادي متكئاً على ما جاء في الآية الكريمة وليشهدوا منافع لهم فهل حجة متأخرات الضرائب أقرب للقبول أم حجة أهل العوض. وقالوا الحجيج قطع طالب نور البقع قلبي زاد وجع حماني القيد منع هذا بالنسبة لأخونا وحبيبنا العمدة قرشو والقيد الذي حمى قرشو هو أن هناك عقرباً كبيراً بين يده وبين جزلانه
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الممتع الرصين الملا عمر
نرمى معك باتجاه بدر الدين
يقال ان حجاج بعض الجهات و لسؤ اعمالهم يسبون الشيطان ب " يا ابن الكلب و يا خائب" ان الشتائم تتناسب طرديآ مع عظم الاثام...اعتقد ان بعض البشر لن يجد المناسب من الشتائم لتناسب افعالهم..
يحكى عن احدى عجائز اهلى الشايقيه,وهؤلاء قوم امتلأت نفوسهم بالايمان الا انه اختلطت عليهم كثير من الامور, عترت حبوبتنا وهى فى الحج فصاحت كعادتها يا سيدى الحسن فنبهها حاج "حداثي" يا حاجه انتى فى بيت الله وتدعى لغيرو؟؟ اجابت الحبوبه,غفر الله لها, وهى مملؤه بالدهشه والاستنكار هو فى زولآ فوق سيدي الحسن؟؟؟
ولك ولنا وللجميع المغفره واللهم صلى على حبيبك المصطفى
اخونا الحاج بدر الدين
حجه مبروكه و تربا فى عزك
ما يهمك كلام المغرضين امثال خالد الحاج,سنة 1984 وبعد امتحانات الشهاده ذهبت للسعوديه لزيارة الوالد وعملت لى عمره (بالضمه) والبى الفتحه عملتها برضو وبعدها نجحت و دخلت الجامعه وطبعآ يعجبوك امثال خالد اشاعوا بين البشر ان سبب النجاح هى دعواتى فى الحرم وليس قدراتى الذهنيه المحدوده ...هؤلاء قوم غلب عليهم الحسد
حاج بدر الدين مالا؟؟ اها حاج عصام كيف؟؟انتو اصبروا شويه و حتجيكم حاجه سولارا وحاجه سالى وحاج هيثم وحاج مهند مع الاحترام لاصحاب الاسماء,عجيب ارتباط بعض الاسماء ببعض الصفات
السنه دى حققنا امنيه و حلم للوالده انها تحج فصارت تحمل لقب الحاجه بحق وحقيق
اها يا حاج بدر الدين ممكن الواحد يقول عنك انك زميل الوالده.......فى الحج
تحيات و امنيات طيبه للجميع
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الحبيب مانديلا سلام
دائما مانديلا رجل عفو وسلام ومواقف مشهودة
الفاضلة ميا
الحجر الضربني دا بكون حجر (أحوص) يعاين في الشيطان ويطق بدرالدين
شيري بت أم شيري
(حجيتك) ما مجيتك
أنا كان عندي حق التذاكر كنت إتحللت التحلل الأكبر
أخوي الزاكي
وإن شاء الله كمان إنت ذنبك مغفور وعملك مبرور و(عدد) منشور
عصام جبرالله
سررت جدأ بي زيارتك وكلماتك الطيبات وفخور بزمالة الوالدة ربنا يحفظها ويخليها ليكم آمييييين
رجوية الحبوبة
لكي الود دائماً يا اصيلة
الأستاذ حسن الجزولي
أكيد دي حجة مبرورة ومبروكة الجابت الأستاذ حسن الجزولي
الغالية تماضر
أنا لي هسع أضحك وأستغفر من سؤالك لي
الحج حار؟؟؟
زي الحقنة؟؟؟
الله يديك العافية ويشملك بي رحمته ويديني أنا عقد (بكسر العي والقد) عشان أنفك منك
| |
|
|
|
|
|
|
|
|
|
Re: الحاج بدر الدين شنا (Re: yasiko)
|
يحكي أن الحاج بدر الدين أيده الله في طواف الإفاضه والزحام على أشده والأبصار زائقه والقلوب كادت أن تقفز من الحناجر وبدر الدين في الشوط الأول يا دوب وباقي ليهو ستة أشواط دوران حول البيت العتيق وأثناء طوافه وهو يوازن بين ثلاثة أشياء أولها أن ينهي حجه دون رفس أو فسوف أو جدال وثانيها أن يضبط نفسه ويكظم غيظه كل ما جاءته دفرة من كوع أو نقزة من قدم أو كتف من ذات اليمين أو ذات اليسار أو حتى فرملة حاج أمام بدر الدين دون إشعار أو إشاره والأمر الآخر هو أن يظل محافظا ومتشبثاً بإزاره وردائه حتى لا يفلت منه أحدهما أو كلاهما ويقع ما لم يكن في الحسبان ، من عمق هذه الحالة وبفضل من الله أكمل الحاج بدر الدين الأشواط السبعة بعد عنت ومكابدة وخرج منها وكأنه بهلوان ، وعند سؤال مراسلنا له ماذا إذا تم تمديد الأشواط عندها تبسم حاج بدر الدين وقال لمراسلنا لو زادوها دقيقه بطلب التغيير. وبطلب كلمة أخيره من بدر الدين لمراسلنا يوجهها للحجاج أو أهله ، قال الحاج بدر الدين نحن كويسين وطيبين وما عندنا عوجه وهسع نحن في مكه وماشين المدينه وسلامي لي ناس حلة البير وحلة المسيد والحسن ود الوسيله ظالبني خمسين جنيه دحين الليعفاهن لي وبجيب لي معاي طاقيه.
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
العزيز يا سيكو سلام
أشكرك على الهدية الغالية رغم أني فشلت في سماعها ولا أدري السبب وياربي يا سيدي تحجج يا سيكو بي إسمو الصحيح لأنه مامكن يكون حاج ياسيكو إلا كان يحج في سويسرا
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الملا عمر سلام تاني
ياخي طلما الدكتوراه بتاعتك في الحج بتاعي عندي سؤال
ونحن راجعين من الجمرات والشارع مزدحم بفعل الحجاج غير النظاميين وساكنين في نفس الشارع بالإضافة للباعة والفراشة والشحادين فكان السير صعب والشارع طويل من الجمرات إلى منى حتى أذكر أنني سمعت سوداني يخاطب زميله وهو يتضجر قائلاً الله يفكنا من الصراط المستقيم دا ويقصد الشارع الواحد الذي يسير فيه الجميع بصعوبة وكل واحد يحاول أن يحافظ على حجه من الرفث والفسوق ووسط هذا الكم الهائل من البشر فجأة أحسست بيد تدفعني بقوة من جهة الشمال وعندما نظرت وجدتها إمرأة لم أر فيها غير العينين والباقي كلو حجاب أسود وخاطبتني بلهجة ونبرة وعيون مشرشرة قائلة
إنت ليش تتلصق على الحريم؟؟؟
أنا ما بوريك ردي عليها كان شنو إلا بعد سماع فتواك
ولك مني كل الشكر
| |
|
|
|
|
|
|
|
|
|
Re: الحاج بدر الدين شنا (Re: بدرالدين شنا)
|
الأخ بدر الدين الحاج شنا آل حجيتك ما بجيتك وخيرا جان وجاك والسامعين إلى يوم الدين
سبب مناكفتي لك وتخصصي المزعوم في شخصكم لأنني أحترمك وويتعدى الأمر شخصك إلى أشخاص آخرين فأنا في شخصك أحترم أشخاص وطبعاً عندي إحترامك خاص بسبب أو بدون، وأكيد الريدة الكتيرة يا حنين شقاوه وكان ما بريدك يا البدري يا أخوي لله فلله ألحس المكوه حاااااره طبعاً عجبتني حجتك دي بالحيل وده السبب الخلاني أفرد ليها شعري قبل أن أفرد ليها موضوع في منبرنا هذا ، وفي المنبر في ناس بدرجة فاء لام ألف تاء هاء في الحج يعني الواحد يكون عمره ثلاثين سنه ويكون حجه كده حوالي أربعين مر.
أما طلبكم أمر الفتوى في قول إمرأة من الأعراب من بني كلاب التي حمرت لك وبحلقت من تحت الحجاب وقالت لك ليش تتصلق في الحريم ولم تدري أنك تجشمت الصعاب وسافرت بتأشيرة وتذكرة وموافقة كفيل وإجازة بدون راتب ، فأعرض وأصفح وقل لها أنحنا العند عروضنا لؤام وجبارين وبعرفنا الصبر والله صبارين ، وخت أيدك في أضانك وشنق طاقيتك حتى لو محرم وزيدها بقولك هيييي هييي يييي نسيتها ولمن أتذكرها بكتبها ليك.
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الملا عمر يازول يارائع
أنا بريدك شديييييييييييييييييييييييييييييييييييييييييييد ومتبع ملتك (بضم الميم وتشديد اللام) وداير أقول كلام كتير لكن لا أقوى على حمل مجاراتك وبقول يا جامع الناس ليوم لا ريب فيه أجمعني بحبيبي وصديقي الملا عمر
| Quote: ولم تدري أنك تجشمت الصعاب وسافرت بتأشيرة وتذكرة وموافقة كفيل وإجازة بدون راتب |
هذا ما دار في خلدي لحظتها ولا أذكر كيف كان ردي
| |
|
|
|
|
|
|
|
|
 Re: الحاج بدر الدين شنا (Re: بدرالدين شنا)
|
الملا عمر .. ان شاء الله نبارك ليك الحجه انت كمان
خالي الجديد .. بدرالدين الحلوووو
ربنا يتقبل الحج .. وراجين الحولية .. والمداح
بس عندي طلب بسسسسسسسسسسسيط
زولك الماشي ده .. ياخ وقفو والله عزبتو معك عديل كده .. وانا كلما القي اسمك وادخل اشوفوك ..القي زولك ده .. قاعد افتر .. ووجع الضهر يقوم علي ..
بس ان شاء الله زكبة الحج ما تكون جاتك 
نشوفك هنا ياعمي الحاج
| |
|
|
|
|
|
|
|
|
 Re: الحاج بدر الدين شنا (Re: ASAAD IBRAHIM)
|
الحاج بدر
حجا مبرورا وذنبا مغفورا
بعد ده نقول بركة السيد الحسن ابو جلابية وحاج بدر
وشكرا يا الملا عمر، على حسب كلامك طلعنا اصغر ناس سنا فى البورد
الحاج بدر ده دفعة لو ما رّبت ليهو سنة سنتين فى الثانوى .
والله يدى العمر.
وعقبالكم
| |
|
|
|
|
|
|
|
|
|
Re: الحاج بدر الدين شنا (Re: garjah)
|
الف مبروك يابدر الدين حلا وحج .
اكيد ان الله عز وجل . أرحم الراحمين ، قد ًتقبله حجاً مبروراً واخرجك منه على الفطرة , كما ولدتك امك . وهو العزيز الرحيم عنذ ظن عبده به . وعقابلنا.
قول امين فان دعوتك مستجابة .
| |
|
|
|
|
|
|
|
|
|
Re: الحاج بدر الدين شنا (Re: Rawia)
|
الحاج بدرالدين شنا
والله انا زعلان بالجد منك ومن الحاج صديق احمد
معقولة تجوا مكة وما تحاولوا تتصلوا بيه!!!؟؟
لكن ما في اليد الا نقول حجاً مبروراً وسعياً مشكوراً وذنباً مغفوراً
وربنا يتقبل صالح الأعمال
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الحبيب تمبس سلام
حجيت عشانك كسلا (شوية سربعة)
زولي دا ما بقيف إلا يكمل الحجر بتاعو وأنا سألتو قبل كدا قال هو جاري من الزول الشايل العكاز الشغال مع قرجة
لك حجي وتحياتي
أستاذي موصلي
والله إسمك دا فيهو حلاة حاج (حاج الموصلي) ربنا يسهل ليك ونحج سوى
حنينة الحنينة
الله يقبل حمدك ويباركوا ليكي السمح
موية زمزم بتلقيها جنب الجوائز الوعدوك بيها زمان
العزيز جني
الله يجازي محنك
وأنا أقول ليه الحجر جاني في عيني؟؟؟
الله يحججك قول آميييييييييين
الغالي سعد إبراهيم
والله أنا سعدت بي زيارتك يا سعد
ربنا يسعدك أكتر وأكتر ويسهل ليك حجة إنت والأسرة
صديقي ترهاقا
أنا ربت سنة واحدة بس لكن دخلت المدرسة عمري 11 سنة
وإن شاء الله أربِّت في الحج كم سنة وإنت معاي
آوت كاست
شكري وتقديري وتمنياتي الطيبات لكم بحجة مقبولة
حاج نايل 1
سلام يحمل كلام مضمونه حبي وتقديري
يا قرجة يا نبع الحنان
الله يبارك فيك فعلاً مريت على دياركم دون علمكم وأنا الخاسر وتمنيت لو كان تلفونكم بحوزتي حتى أتصل بكم وأزيد حجتي تشريفاً بلقياكم يا حبيب لكن خليها الحجة الجاية وأنا ناوي وممكن ننسق نحج سوى
يا سلاااااام يا تراث
أولاً حمد لله على سلامتك إنت وإن شاء الله خلاص حجرت وبقيت عال العال
وياربي يا سيدي تون لتراث والجندرية ومحمد الصغير حجة مباركة
راوية
إن شاء الله يا راوية وإنتي كمان تحجي ومعاك أهلك ومحبيك وكل سنة وإنتي طيبة والسنة الجاية عيد ميلادك حا يكون في عرفة
الله أكبر .. الله أكبر بكري أبو بكر شخصياً
أسأل الله لك يا بكري التوفيق في كل خطوة تخطوها وقدمك لإبو إبراهيم وزيارة قبر المصطفى وأشكرك على اللوحة الزاهية (التي ذبحتها لي بمناسبة قدومي من الحج) فهي هدية المباركة ومعتبرة
الحبيب جمال
هو أنا كان عارفك في مكة بسكن في حي ملاوي ماكنت سكنت معاك عديل لكن العيب في جهلي والجايات أكتر من الرايحات ولك العتبى حتى ترضى
وربنا يحججنا مع بعض ياجمال
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
حنينة الحنينة سلام
هاك أشربي لكن ما تكمليها
الصديق سمباتيكو سلام
والله أنا ما نسيت زول دعيت لي ناس البورد كلهم (بإسم البورد)
وربنا يسهل ليك إنت ومن تحب حجة مبرورة وما تنسانا من الدعوات
| |
|
|
|
|
|
|
|
|
|
Re: الحاج بدر الدين شنا (Re: بدرالدين شنا)
|
اخونا وصديقنا الحاج بدرالدين..
الحجة مبروكة..والعودة مبرورة
لكن بعد ما حجيت يا اخوي حقو
تمرق من فنجان القهوة دة ..
و تستحمة وتلبس ليك جلابية
بيضا الناس بجوك....
| |
|
|
|
|
|
|
|
|
|
Re: الحاج بدر الدين شنا (Re: بدرالدين شنا)
|
الحاج بدر الدين
امسياتكم بشكل المانجو
والله يابدر الدين اخوي لو ناس الدي اتش ال بقبلوا هديتنا ليك
واللي عبارة عن كبــش مانع ليهو قرن
كنا فعلنا ذلك ..
لكنهم خرخوا في اخر لحظة متحججين بدواعي الامن واحتياطاته القومية
لذلك
اقبل تبريكاتنا وانشاء الله عقبال السابعة والميه
كمان
| |
|
|
|
|
|
|
|
|
|
Re: الحاج بدر الدين شنا (Re: شرير والبرتقاله)
|
أيها المسكون بالإبداع يا صاحب المقدمات والتحيات الجميلة يا من يرش عبيره في هذا المنتدى الحر يا أيها الشرير والبرتقاله لك وحشه وغيابك طال. وبعد
طالما أن أصحاب البريد السريع من دي إتش إل ودي إن أيه لا يرغبون في نقل هديتكم ممثلة في ذلكم الكبش الأقرن الأملح فيمكن لكم أن ترسلوا للحاج بدر الدين بشناته وحلاته برتقالتكم وتبقي شريراً بدون برتقاله إلى أن تتفضل وتذهب إلى سوق الخضار المركزي
| |
|
|
|
|
|
|
|
|
|
Re: الحاج بدر الدين شنا (Re: شرير والبرتقاله)
|
أيها المسكون بالإبداع يا صاحب المقدمات والتحيات الجميلة يا من يرش عبيره في هذا المنتدى الحر يا أيها الشرير والبرتقاله لك وحشه وغيابك طال. وبعد
طالما أن أصحاب البريد السريع من دي إتش إل ودي إن أيه لا يرغبون في نقل هديتكم ممثلة في ذلكم الكبش الأقرن الأملح فيمكن لكم أن ترسلوا للحاج بدر الدين بشناته وحلاته برتقالتكم وتبقي شريراً بدون برتقاله إلى أن تتفضل وتذهب إلى سوق الخضار المركزي
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
الملا عمر
صباحاتكم بطعم
اشتياق معنون
للاحبه
هي الحياة ومشاغلها اضف اليها الكفيل وشناة المدير
وسائلين عنك وعن مداخلاتك الملئ بالجمال والابداع
وتشكراتنا التمام التمام اليك
اما فيما يختص بالبرتقال ، فهي باقيه معي ، لانها تذيب الشر
والا فان البورد حقو راح ، اساسي ذاتو لن يقدر على كبح جماح
شروري
ربنا يخليك يا طيب
| |
|
|
|
|
|
|
|
|
|
Re: الحاج بدر الدين شنا (Re: شرير والبرتقاله)
|
أخي شرير أدام الله عليك نعمة الصحة والعافية والإبداع ، ولك شكري وتقديري على هذه الإطلالة وأسأل الله جلت قدرته أن تزول كل الظلمات من كفيل ومدير وإغتراب وضرائب وخلافه وأن تعود إلى هذا المنتدى أكثر تجدداُ وأكثر نشاطاً وأكثر إبداعاً.
ها هي خيلنا أخي بدأت تجقلب بليل بهيم وأنا ما عندي تجربة في بوليس السواري أو الهجانه وأخشي ما أخشاه أن تضيع حجة أخونا بدر الدين شنا بين حوافر تلك الخيول لذلك أستميحك العذر في السؤال بشأن صورة بدر الدين التي وضعها بدلاً لذلكم الشخص الغاطس في فنجان القهوة هل ما يرتديه فعلاً إحرام من قطعتين أم أنه يحاول تقليد صرعة لاعبي منتخب الكاميرون في الكأس الإفريقية الأخيرة ، وهل يجوز الحج في إزار ورداء الإثنين في واحد شأن الشامبو والكوندشنر والذي جاب شعر رأس أحد أصدقائي الواطه وأنطبق عليه المثل التسوي كريت في القرض.
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
صديقي وصديق البرتقالة الشرير
شوقي ليك طول يا حبيب
هرشك لحم كبشك
أشكرك واشكر كبشك وأعتبرني أكلتو والله يسامح ناس ال دي إتش إل
وما تختفي أيها القاص المتفرد
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
Quote: كلو ما اجي ابارك البوست يعلق ما عرفتا الحكايه شنو
اصلو انت حجيت وين يا زول LOoOoOoOoOOoOoOoOOLZ |
حجيت في (المعيلق)
إيهاب إنت المعلق بيك الله عالمبو (تكونوا دايرين تبقوا تلاتة؟؟؟)
تحياتي للمدام وشكراً لتكبدك المشاق إلى المسنجر
| |
|
|
|
|
|
|
|
|
|
Re: الحاج بدر الدين شنا (Re: ebrahim_ali)
|
الحاج كل سنة وانت طيب ، والحجة مبروكة ، طبعا خجلان مني وما سالتني متاخرة ليىى في المباركة عشان اول ما جيت وقفت بعييد وحتى مديح النادي باستقبالكم ما حضرتو ولا جبت لينا معاك موية زمزم ولا حتى صلاية ...ولا حتى سبحة 33
| |
|
|
|
|
|
|
|
|
|
Re: الحاج بدر الدين شنا (Re: almulaomar)
|
إبراهيم ود حاج علي كيف حالك؟؟؟
الله يقبل حمدك ويسهل أمرك
ناس مسقط طيبين وبيسلموا عليك وبقولوا ليك إنت وين؟؟؟
تحياتي لك ولأهلك يا حاج إبراهيم
عشة بت فاطنة سلام
يعني صحي خير وسيلة للدفاع الهجوم
أنا خايف كان أديتك سبحة تلبسيها في رقبتك والناس يقولوا المرة دي مجنونة أما موية زمزم ما بوزعوها في البيوت زي عضم السماية بشربوها الناس البجوا يباركوا (الله يبارك فيك) تحياتي ليك ولي بيرق والعيال
الحبيب ياسر
سلام كتير وشوق شديد وينك مختفي؟؟؟
داير تكتلني مش؟؟؟
أنا عرست وحجيت صاح لكن أسأل الله أن يوفقني أحجج أمي وزوجتي وأحج حجة أهبها للوالد رحمة الله عليه بعد داك إن شاء الله أموت مرتاح البال كما أسأل الله أن يحججك إنت وأهلك
عاطر تحياتي
| |
|
|
|
|
|
|
| |
almulaomar
Hussein Mallasi
Raja
عزيز
Osama Mirghani
الطيب بشير
AlRa7mabi
بدرالدين شنا
Ahlalawad
THE RAIN
الجندرية
Al-Masafaa
shiry
nile1
حسن الجزولي
Tumadir
yasiko
tmbis
Elmosley
haneena
jini
ASAAD IBRAHIM
ترهاقا
Outcast
garjah
تراث
Rawia
بكرى ابوبكر
HOPEFUL
مريم الطيب
عمر بانقا
ebrahim_ali
عشة بت فاطنة
Yassir7anna
فيس بوك
تويتر
انستقرام
يوتيوب
بنتيريست