|
|
 أبنائي فى المنتدي أرجوكم أقبلوا هديتي
|
السلام المرتقب
فتحت الجريده
وبي نظره أضناها الحذر
أطلت النظر
((اكوس )) ملهوفه
لي ذاك الخبر
الليهو كل زول
تلقاهو ((واقف منتظر))
يا ربي هل حل السلام؟
واتنشر الخبر؟
وبي فرحه لا توصف
قريتو مضمون الخبر
وهتفت من جواي
ربي عوضّنا الصبر
*****************
ومن بلاد الغربه
في البدو والحضر
من الدمام العريقه
من الراس والخُبر
بقيت اردد كل حين
صحيح والله (قد صح الخبر)
بقيت اردد من جواي
اسمعوا يا أعادي ويا أحبة
يا اماركا و ياغجر
بكل جِد من غير هذر
شوفوا كيف عم السلام
في ربوع بلدي الحبيب
وفرّح ملايين البشر
وقالوا سودانا الحبيب
الليله بالخير ازدهر
وقالوا هجرتنا الطويله
قد وصلت مداها المستتر
وبكره .. ناوين السفر
****************
يا ربي يتحقق مرادنا
ويبقى (حقيقه).. مضمون الخبر
وما يبقى الكلام
عاري من ( صدق الخبر)
وما يبقى تنفيذ السلام
ضرب من أوهام فِكر
ومايبقي سودانّا الحبيب
حق لي جماعة ومحتكر
ارباب المصالح
الما بيعجبم سمح الخبر
***************
لكنو مولانا الكريم
الأقوى من كل الخلوق
كل البشر
لن يرد.. دعوة مهاجر مُنْكَسِر
والسلام سيزف عروس
لكل واقف منتظر
السلام سيزف عروس
لكل واقف منتظر
وحلم الملايين يصبح حقيقة
زي شمس الضُهُرْ
وكل مظلوم ينتصر
وتغرد حمامات السلام
في ربوع وطني الحبيب المنتصر
وتكمل معاناتنا الطويله
بي أسعد خبر
وتبقى غربتنا الطويله
ذكرى ساواها الدهَرْ
*******************
ام مجاهد/ السعودية
7/1/2004
|
|
 
|
|
|
|
|
|
|
 Re: أبنائي فى المنتدي أرجوكم أقبلوا هديتي (Re: omdurmani)
|
العزيز ام مجاهد
نشكرك كثير علي هديتك واتمني ان يكون سلاما حقيقي يحقق تتطلعات هذا الشعب الصابر علي ويلات الحروب
وحاجه اخيرة
ضحكت لمن قريت كلمه ابنائي في المنتدي ما تخافي يا ام مجاهد والله في ناس هنا اكبر من بعانخي
ولك ودي
| |
|
|
|
|
|
|
|
|
|
Re: أبنائي فى المنتدي أرجوكم أقبلوا هديتي (Re: motaz)
|
سلام أم مجاهـد،
قصيــدتك تمام! إلا الأماركـة ديل مالم؟ دحين موش هم الأماركـة اللى مسكــو النفـرين دول وقعـدوهـم فى الواطا وخلوهـم يمضـو على شيتـا ما مقتنعين بيـه؟
إذا فرحانين بخبـر السـلام دا جـد، حقو نشكــر الناس الجابـوه، وهم الأماركـة.. البشيــر زاتو ماشى واشنطون عشـان يشكـرم هناك فى بلدم.. ما تسمعى الكلام، هم غلطـو فى تهجى الإســم سـاكت.. مرة يقولو مشاكوس ومرة نفاشــا وهم عايزين واشنطون!
| |
|
|
|
|
|
|
|
|
|
أعزائي ..لكم الشكر الجزيل (Re: أم مجاهد)
|
الأعزاء الكرام في منتدانا الرائع
Omdurmani..vhabib alkul..hamam..HOPEFUL..motaz..Abureesh
لكم مني أطيب المنى ..ؤلكم شكري الجزيل على ردودكم الرائعة وتشجيعاتكم الجميلة ..والتي نمضي بها ولها..
بعدين يا 7habib alkul والله انا حاسة أني فعلا امكم لو ما كلكم فعدد
كبير منكم في سن إبني مجاهد والله يحفظكم..
الأخ Abureesh
عارف الجماعة ديل فعلا دورهم كبير في الشغلة دي .. وأنا
عاااااارفة لو ماهم ضغطوا الجوز ديل ما كان الحكاية تمت .. وطبعا هم أصلهم محل ما يختو رجلهم في أي حته (بجييهوها)!!!!!
لكن والله عندهم عمايل تغطي على لفتاتهم الجميلة دي ..والخوف ما ينطبق عليهم المثل البقول (ما بجري فالح بلا مصالح ) وخوفي كلو نطلع من المولد بدون حمص..ربنا يستر ويجيب العواقب سليمة
ولكم من الود أعذبه
أم مجاهد / السعودية
| |
|
|
|
|
|
|
|
|
|
Re: أعزائي ..لكم الشكر الجزيل (Re: أم مجاهد)
|
الخالة ام مجاهد
نرجو ان تكتمل الفرحة
وندفن جثث الأفكار والأحزان القديمة
والهجرة والإغتراب والمعانات الأليمة
وبتوقيع اتفاق السلام
نكون ادينا ميقات الإعتراب الذي فرض علينا
وآخر دعوانا نسأل الله
ان نهنئ بالسلام ونعيش في أمان
ولابد من شكر أمريكا لأنها هي التي تحمل
السلام القادم
| |
|
|
|
|
|
|
|
|
|
Re: أبنائي فى المنتدي أرجوكم أقبلوا هديتي (Re: أم مجاهد)
|
ام مجاهد
لك التحية
نتمنى - مثلك - و نفرح كما تفرحين ان يعم السلام ربوع بلادنا
و ان يجنى اهلنا الطيبين ثمار صبرهم الذى طال
و ان نعود نحن المكتوون بنار الغربة و - رماد الرجاء - الى ديار الاحبة .... حيث لا كفيل
لا ضريبة
و لا غنيمة - الا كوامن الحب -
حيث الحضن الدفيئ
| |
|
|
|
|
|
|
|
|
|
Re: أبنائي فى المنتدي أرجوكم أقبلوا هديتي (Re: KOSTA)
|
الخاله الغاليه ام مجاهد
لك التحيه والتقدير
لا تحلمى بعالم سعيد
فالقادم اخطر وابشع بل وافظع اذا لم!!!!!!
متعك الله بالصحه والعافيه وجعل ايامك كلها امن وسلام
لست متشائما ولكنها الحقيقه اذا!!!!!
ولك مودتى
| |
|
|
|
|
|
|
|
|
|
Re: أبنائي فى المنتدي أرجوكم أقبلوا هديتي (Re: ملكة سبأ)
|
ام مجاهد يامبدعة
قصيدتك زى الشمس مشرقة
تحدثين عن السلام
عم البلاد..وخيوله
جاءت مسرعة
وبكرة كل مهاجر
يرجع للبلد ويحزم
الامتعة
دى قسمة بين اتنين
يامبدعة
والاحزاب الباقية
ستظل مهلعة
فى الشرق وفى دار فور
النار مولعة
مرحب بكل حل
يوقف الحرب المهلكة
بس خليهم ينصبوا
الاشرعة
ونحن كمان نحزم
الامتعة
| |
|
|
|
|
|
|
| |
7abib_alkul
HOPEFUL
motaz
Abureesh
EMU إيمو
KOSTA
mohamed elshiekh
Ehab Eltayeb
ملكة سبأ
abuguta
فيس بوك
تويتر
انستقرام
يوتيوب
بنتيريست