كتب الكاتب الفاتح جبرا المتوفرة بمعرض الدوحة
|
|
 كل يوم محجوب شريف
|
يمكن القول ان مساهمة محجوب شريف الشعرية تحمل قيمة معيارية في سياق الحداثة الشعرية السودانية التي يمكن ان يقاس من خلالها التطور لما سبقها وما اتي بعدها لاحقا من منجز شعري باللغة العربية الشعبية (المحكية) لشمال السودان.
حلم
مره شفتك في المنام
وأنت نازل بين سربين حمام
نازله سكة وادي اخضر
شايله سلة ورد أحمر
وحزمتين أحلى كلام
يتبعوك طفلين حلاوة
طاروا عصفورين عليَّ
ركوا في أسود عينيَّ
ورحت في غمرة نداوة
كنت مُجهَد
قلبي فرهد
ورش ايامي الغمام
صحيت وقفت
مشيت أعاين
ألقى بيني وبين عيونك
كم ضواحي ..
وكم مداين
وأنطوت كل الجناين
في غيابك..
في الظلام
|
|
 
|
|
|
|
|
|
|
 Re: كل يوم محجوب شريف (Re: Napta king)
|
Napta king
التحية لك وللاستاذ محجوب
لو تكرمت نص المرثية التي كتبها الاستاذ محجوب في الراحل عبد الكريم ميرغني وبتقول في بعض ابياتا :
يا مرتبتو يمكن في مكتبتو قاعد يقرا وزهنو صافي !
ودمت
| |
|
|
|
|
|
|
|
|
|
Re: كل يوم محجوب شريف (Re: خالد الحاج)
|
اشكر كل من شارك في هذا البوست وسأعمل على تلبيةطلباتكم اذا توفرت
عما قريب
عما قريب
الهمبريب
يفتح شبابيك الحبيب
والحال يطيب
يا محمد احمد تستجم
والبيت يتم
تتلم تلم
تفرح فرح
تحلم حلم
كم تطمئن
حقك يجيك لا فيهو شك
يمكن وأظن
ويفوتو هم
والعدل يعم
وتغني ام
كادت تجن
كبر الوالد جوا السجن
فاقدا هو وهي
دا كلو كلو ينتهي
زولاً تريدو وتشتهي
تلقاهو في
لا في السجن
لا مختفي
لا يقولو ليك ما تمشي لي
دا كلو كلو ينتهي
دا كلو كلو ينتهي
دا كلو كلو ينتهي
| |
|
|
|
|
|
|
|
|
|
Re: كل يوم محجوب شريف (Re: Napta king)
|
الي العريس / بن بن
تحية وسلام
ومعليش يانبتة كنغ
يابا مع السلامة
محجوب شريف
يابا مع السلامة يا سكة سلامة
في الحزن المطير
يا كالنخلة هامة
قامة واستقامة
هيبة مع البساطة
اصدق ما يكون
راحة ايديك تماماً متل الضفتين
ضلك كم ترامى حضناً لليتامى
خبزاً للذين هم لا يملكون
بنفس البساطة والهمس الحنون
ترحل يا حبيبي من باب الحياة لباب المنون
روحك كالحمامة بترفرف هناك
كم سيرة وسريرا من حولك ضراك
والناس الذين خليتم وراك
وعيونم حزينة بتبلل ثراك
ابواب المدينة بتسلم عليك
والشارع يتاوق يتنفس هواك
يا حليلك حليلك يا حليل الحكاوي
تتونس كانك يوم ما كنت ناوي
تجمع لم تفرق بين الناس تساوي
نارك ما بتحرق ما بتشد تلاوي
ما بتحب تفرق من جيبك تداوي
الحلم الجماعي والعدل اجتماعي والروح السماوي
والحب الكبير
في الزمن المكندك والحزن الاضافي
جينا نقول نفرق نجي نلقاه مافي
لا سافر مشرق لافتران وغافي
وين عمي البطرق جواي القوافي
يا كرسيه وسريرو هل ما زلت دافي
يا مرتبتو امكن في مكتبتو قاعد يقرا وزهنو صافي
يا تلك الترامس وينو الصوتو هامس
كالمترار يساسق يمشي كما الحفيف
كم في الذهن عالق ثرثرة المعالق والشاي اللطيف
تصطف الكبابي اجمل من صبايا
بينات الروابي والضل الوريف
احمر زاهي باهي يلفت انتباهي
هل سكر زيادة ام سكر خفيف
ينده للبنية يديها الحلاوة
والخاطر يطيب
يدخل جنو منو محبوب الشقاوة
يستنى النصيب
الدفو والنداوة السنا والعبير
كالغزلان هناك في الوادي الخصيب
حيث الموية عذبة والغصن الرطيب
كم تحت المخدة اكتر من مودة
للجنا والغريب
عش وعشب اخضر جدول من حليب
يابا ابوي يا يابا
الشمس البتطلع بلت منو ريقا
والنجمة البتسطع فيه تشوف بريقا
الندى في حركتو يطفيها الحريقة
ننهل من بركتو زي شيخ الطريقة
شاييهو وطرقتو والايدي الصديقة
يلا نسد فرقتو حب الناس درقتو
يا موت لو تركتو مننا قد سرقتو
كنا نقول ده وقتو لكنك حقيقة
النفاجو فاتح ما بين دين ودين
نفحة محمدية دفئاً كالضريح
ميضنة كم تلالي جيداً في اليالي
مجداً في الاعالي
مريم والمسيح
قلباً نبضو واصل ما بين جيل جيل
ما بين كان وحاصل او ما قد يكون
ما بتشوف فواصل الا الذكريات
وآلام المفاصل بعضاً من شجون
يابا مع السلامة يا سكة سلامة
في الحزن المطير
| |
|
|
|
|
|
|
|
|
|
Re: كل يوم محجوب شريف (Re: Napta king)
|
محجوب ده بحب الاطفال حب غريب جدا
وخبو للاطفال ده حب للمستقبل وحب للثوره علي فكره
ياخ ده قال(( سلمو لي عليهم جمله ختي اللسه قبل الخلق
والتكوين ))
تسلم يا عزيز
| |
|
|
|
|
|
|
|
|
|
Re: كل يوم محجوب شريف (Re: Ibrahim Algrefwi)
|
ليلة الميلاد
يامشتل فرحنا الشال
ويا مرسى الشراع الضال
ويا واحة قليبا كان زمان رحال
يفتش عن عيون إنسانة...
ينسى لديها حزناً طال
ولما لقاك فرهد ياما
بالفرح اللى عندو محال
ولمًّا لقاك رسّلو القمر منديل
وركّت نجمه..
ضوّت في الدرب قنديل
وهشّت زهرة
كانت تبكي طول الليل
وجات من بعد طول الهجرة ..
غنوات الفرح
وكانت ليلة الميلاد
أقدم نفسي ليك:
إنسان...
عزاي الشعر والآمال
وطيبة القلب
وحسن الفال
وأحب كل العيون لمن تحب عينيك
وأحب كل القلوب ...
لمن تعاين ليك
وأحب حتى البغير
من حبي ليكي عليك.
| |
|
|
|
|
|
|
|
|
|
Re: كل يوم محجوب شريف (Re: Napta king)
|
الغايب
سافر زمان..
قُبال سنين
لا جاب جواب لا جاب خبر
أمو تسأل كل طاير
وكل عائد من سفر
خيالو ما فارق عيونها..
وطيفو ما غاب ...
ليهو أثر
***********
وما زال هناك..
في الركن داك
صوتو وغناهو وضحكتو
وصورو المعلقة في الجدار
وجرايدو
والكتب الزمان
الليلة كاسيهم غبار
مصباحو في الركن الحزين
ومكانو مازال في انتظار
أصحابو انداد الطريق
قدّام عيونها مشو اخضرار
**********
ياماشي لي بلداً بعيد...
قول للمخاصم أسرتو
قول للمفضل هجرتو:
ما عاد قطار
ووصل جواب
اسمك تهزّها ذكرتو
والبيت وراك لو شفتو كيف ..
ضاعت مواسمو وخضرتو
**********
يا حليلو لمن كان صغير ..
تلميذ بيمشي المدرسة
تشفق عليهو من الطرق
وتخاف عليهو من المسا
كيف ينسى عيديَّه وحنان
وكفاح سنين كيفن نسا؟
*********
سافر زمان..
قبال سنين
لا جاب جواب
لا خبر
| |
|
|
|
|
|
|
|
|
|
Re: كل يوم محجوب شريف (Re: Napta king)
|
أشوفك
أشوفك جنبي .. وأتمناك
وأكذب عيني إني أراك
أصدق كيف بتحكي الشوق
وليل الغربة .. لي مضناك
لي أنا .. اللي بحلم بيك
ولي أنا .. اللي بترجاك
يا حلمي البعيد .. وعزيز
زمان يا حلمي ما أقصاك
أعِد أيامي .. واحسب بيك
ثواني العمر.. واستناك
وما فكرت يوم أنساك
ولو فكرت كيف أنساك ؟
وذكراك يا أعز حبيب
دوام رغم الزمن ذكراك
أنتَ الليله .. جنبي قريب
بأي مشاعر .. أتلقّاك ؟
وين أعصاب بتتحمل ..
وين أحرف ِبَقدْر هواك ؟
تعال يا ماضي من عمري
تعال..أنا من جديد أحياك.
| |
|
|
|
|
|
|
| |
Napta king
bunbun
ود العجمى
Ibrahim Algrefwi
فيس بوك
تويتر
انستقرام
يوتيوب
بنتيريست