|
|
 راغب علامة يزور السودان وفتاة سودانية بطلة لفيديو كليب جديد
|
بعد أن انهالت عليه اسواط النقد والاساءة من جميع شرائح المجتمع السوداني وخوفه من ابناء هذا البلد المعروفين بأنهم لن يرضون بأبسط انواع الاهانه والاساءة وخوفا على مستقبله الفني ورصيده بل على حياته ايضا يبحث الفنان راغب علامة عن فتاة سودانية لتكون بطلة أغانيه المصورة في البومه المقبل ، وبخطي سريعة حيث إنتشرت شائعة مفادها أن راغب علامة صرح عبر برنامج تلفزيوني بأن الفتاة السودانية هي الاقبح من بين الفتيات العربيات وأن اللبنانية هي الاجمل وتقول بعض المصادر أن راغب علامة يفكر حاليا بمقاضاة صحيفة الدار السودانية التي روجت الشائعة ، حيث اكد راغب علامة في لقاء مع صحيفة الخرطوم أن الفتاة السودانية رمز للشرف والعفة وان ما قيل مجرد شائعات مشيرا إلى انه يرغب في اقامة حفلات بالسودان ليغيظ الصحفي الذي روج للشائعة ويبحث عن فتاة سودانية لتصوير أغانيه تأكيدا لإحترامه لها.
|
|
 
|
|
|
|
|
|
|
 Re: راغب علامة يزور السودان وفتاة سودانية بطلة لفيديو كليب جديد (Re: المهدي صالح آدم)
|
يااستاذنا مهدى انت وكل الناس القامو هاجمو راغب علامة نسيتو حاجة مهمة جدا,,,البت السودانية على الاقل البنعرفهم هسه وموديلات كاس العالم ايطاليا 82 ومع انو موديلات المكسيك 86 طلعت,, ماعلينا,,ديل بنقول عليهم على نفسها جنت هناية ويستاهلو الحصل والحايحصل ياخى ديل اى وحدة تهبشها لو فى جريدة ولا تلفزيون ولا منتديات تسالها فنانك منو تقول ليك راغب علامة ,تجيها بى جاى تجيك بى جاى تقول ليها محمود تقول ليك برى قالو بتاع سجارات نادر خضر برى بغننى للبنات وليد زاكى الدين سجمى بالغت دا راسو كبير عمر احساس لالا دا غناهو مامفهوم فرفور غناى شدييييييييد غناهو ببكى لكن عندو صلعة توديها للقبالهم زيدان ياخ مابالغت دا قدر ابوى وبعدين دا قادى عربى شديد الخالدى غناى بس حبوب وشو كتيرة ترباس ياخ ترباس دا ببالغ عديل كدا قالو باع الكريسيدا وركب بدرا بس دمو تقيل اذا داير تفضح نفسك وتشعر بالخجل وتزيد السكرى وترفع الضغط خش ليهم فى ناس وردى وود اللمين واللحو وعبدالقادر سالم اما لى مصلحتك ولى مصلحة الناس الفى الشارع ولى مصلحتنا نحن برضو ناس البورد ماتجيب ليهم سيرة سرور وكرومه بيحصل فايتنق عديل كدا
الموديلات دى نست السودانيين وغنا السودانيين وقبلو ليك على ناس راغب لمن ناس راغب قلبو عليهم,,هاااااااااايكة وتانى يكة بعدها جكة
اها خمو وصروووووووو بى راغب العلامة حقكم دا
حاجة اخيرة برضو للمصلحة العامة ,,عليك الله جريدة الدار دى فارقو دربها ديل يوم جابو سمكة قالو نصها الفوق بت والتحت سمكة مابعيد احمد البلال يجيبها ليكم فى الواجهة قريب
| |
|
|
|
|
|
|
|
|
 Re: راغب علامة يزور السودان وفتاة سودانية بطلة لفيديو كليب جديد (Re: المهدي صالح آدم)
|
والله لكن يا ود الديم ضحكتني ضحك مبالغة ، حرام عليك والله ما كلهن كدة ، وبالعكس الناس ديل من اعظم الفنانين الذين اثروا الفن السوداني طيلة اعوام واعوام ...والبيقول غير كدة عندو سطحية في التفكير عمو بتاع المراتب ما بيقدر ينجدها .. غايتو الله كريم
بالنسبة لموضوع الجمال ، ف دائما بنسمع عبارة " الجمال نسبي " ،كرهوا بيها اينشتاين زاتو اليوم الفكر فيهو يعمل نظريات ، على قولهم " ما لي هسي ماسكينها ليهو " ، لكن حقيقي المشكلة في العين البتشوف .. الدشوش والعولمة جاطت الدنيا ، العيون والاضنين واصابت الشعب بزغللة وحوللة وفي بعض شرائح المجتمع ب " حوقلة وحسبنة " في البيحصل ... وين نحن من ثقافات اجدادنا ، زي ناس الأدى شفع الحلة قرش قرش عشان يكوركو حريقة حريقة ، لما البنية جات مارقة قالت ليهو وين الحريقة قال ليها في قلبي .. ديل ناس نظرتهم كانت للجمال وللأنثى عموماً نظرة أصيلة عميقة ، منو الكتب في الغزل والوصف زيهم ، لكن هسي بقى الموضوع مسألة لابسة شنو وعاملة كم لون ، كلما كثرت الالوان زاد الرصيد، والله كان داير الواحد يوصف الا يوصف روعة منتجات اورفليم !! ، يا اولادي البورة ما حارة والسوق واقف الايام دي !! قولو يا لطيف !
| |
|
|
|
|
|
|
|
|
|
Re: راغب علامة يزور السودان وفتاة سودانية بطلة لفيديو كليب جديد (Re: المهدي صالح آدم)
|
والله ياتونا لا ببالغ ولا حاجة كدى فى الاول ورينى انتى فى السودان ولا طولتى منو؟لو فى السودان بتكونى فهمتى قصدى من كاس العالم وموديلاته لو بره برضو بتكون العينة دى انتو ساهمتو رسلتو لينا منها كتير خلاص لحدى ما بقلنا حقو الحكومة تدخل وتوقف لينا استيراد الموديلات الجديدة يرجعو لينا ناسنا الزمان,,مقايس الجمال مختلفة طبعا عارفة انا طولت شديد خلاص من البورد وجيت افتش لى بوست كان عاجبنى شديد ولى ظروف ماقدرة اشارك فيه اسمو على مااعتقد مقاييس الجمال او حاجة زى كدا ,,,زماااااااان قالو الغرام قسمة هسه الغرام بقى تغريد جبرة وحنان باكمبا اىىىىى عارفنو دا التطور والغنوات لكن كمية السطحية زادت ونحن الشينين ديل بقينا مكروهين شديد خلاص فننا وكورتنا وتمثيلنا وتاريخنا والغريب البنات ديل لو مولودات فى بيكاديلى ولا العين ابهاتهم وامهاتهم تعبو واتخيل لى خشو البلاد ديك كدارى يعنى ماجاييننا من شبه الجزيرة البنمية,,المزعلنى البت السودانية دى ياخ كانت معززة شدييد ومقدسة شديييييييييييد ياخ دى لم يشوفوها دايرة تدفق الموية ساى بيكتبو فيها قصيدة ناس العبادى وسرور هسه الليلة عليك الله تعالى شوفى حالتهم فى مواقف المواصلات والله لا اجارك لو ركبو جمبك فى الحافلة واسمعى ونستهم هم والدلاليك المتابعنهم,غايتو ماعندى غير يخمو ويصرو قايتو انا خايف لحدى ماراسهم يجى ويقبلو على ناسنا نحن زاتو نكون طفشنا وبقينا نغنى ونكتب شعر فى شعوب تانية
ودمتى يا غالية
اخوك ود الديم
| |
|
|
|
|
|
|
|
|
|
Re: راغب علامة يزور السودان وفتاة سودانية بطلة لفيديو كليب جديد (Re: wadaldeem)
|
الاخ ود الدويم والاخت تونا
لكم التحية والاحترام
صحيح ربما اتفق معكم في كثير مما اوردتموه في مداخلتكما ولكني لا اتفق او اوافق الرأي الذي يعتب على البنات الاعجاب والافتتان بالفنانين العرب امثال راغب وغيره لأن الإعلام السوداني لن يساهم في تطوير الفن السوداني والفنان السوداني ايضا ليس لديه دور في تطوير نفسه لمواكبة عجلة التقدم الفني والان ثقافة الفيديو كليب في الفن اصبحت هي المسيطرة على عقلية المستمع او المتذوق للفن سواء كان في العالم العربي او غيره فلماذا لم يتجرأ احد الفنانين الكبار ويذهب إلى جبل مرة مثلا ليصور لنا فيديو كليب ويكون على الاقل ساهم في ابراز منطقة سياحية هامة في ربوع الوطن الحبيب وروج لفنه بطريقة تواكب العصر مازال فنانينا يغنون على طريقة وشاكلة الكاشف وابو داوود وسرور وعاشة الفلاتية ثلاثة كمانات ودربكة واكورديون وريك وبنقذ بينما نجد راغب علامة مثلا في وصلاته الغنائة يصطحب 13 عازف كمان فقط ناهيك عن الالات الاخرى ، لذلك لن يتطوروا وهذا يجعل المتذوق السوداني يهاجر إلى فن آخر كما جعلته الظروف الاقتصادية يهاجر الى وطن آخر ايضا تجعله الظروف الفنية ليهاجر الى مراسي فنية اخرى .
| |
|
|
|
|
|
|
| |
toona
فيس بوك
تويتر
انستقرام
يوتيوب
بنتيريست