|
|
 حنان ..أنثي ولا دستة رجال .... ( ولكن ) ..!!!؟
|
زمااااان ....
لمن جينا راحلين من الولاية الشمالية الى الخرطوم ..بي لوري نيسان .. قطعنا المسافة ...الف وشوية كيلو في 7 او 8 يوم .. نفس المسافة دي بيسافروها الان في 8 ساعات ..وما عارف سبب الفرق الكبير في الزمن بين السفر زمان وحسع ..هل تم اكتشاف طرق (اكثر اختصارا ) ام العربات بقت احدث ..ام المسافة انكمشت ..
وصلنا الخرطوم ..وسكنا في الكلاكلة القلعة ..والحلة كانت عبارة عن شليليات او عصابات ..كل الاولاد .(طبعا انا واخي البيكبرنى بي عام كنا شفع لسه) يعنى اخوي كان في اولي ابتدائي وانا كنت لسه مادخلت المدرسة ..كل اولاد الحلة كانو متكتلين وعاملين عصابات ..كل حلة فيها عصابة ..كان قنعان من روحك امشي للحلة التانية ..واول سنة كلها ونحنا دايشين ..محل مانقبل يمسكونا ليك ويكسرونا ..الوالدة لمن ترسلنا سوق الزريبة الجنب السهريج وجنبها كان في خلوه اسمها ود المريوم على ما اظن ..اولاد الخلوه ديل كانو صعبين ..وناشفييين ..لمن ترسلنا الوالده كنا بنتسلح بي طوب وسيخ ونبل حتن نمشي ,.. وبعد ده نجي مدقوقين ومدشدشين والخضار واللحمة ممكن يصلو البيت او نخليهم وقت المعركة وتقوم جارين صوووف . . كان في واحد من اولاد الحلة اسمو (ود الداية ) وامو لا داية ولا حاجة ..بس اسم ..اها الزول ده كان رعديد شديد ...وبيخاف من ضلو ..لكن ماكان مع أي شلة ..وارجل راجل ماكان بيقدر يلمسو ..ده لانو عندو اختو اسمها حنان ..شرسة جدا ..وكل اولاد الحلة كانو بيتدقو منها .. مع انها كانت في نفس عمرنا لاكن كانت شرانية ومعضلة كمان ..ولو واحد هبش ود الداية ...يكون يومو منيل الهبشو ده ..تمرمطو ليك في الواطه وتوريهو النجوم في عز الضهر ..يعنى الزول ده كان محصن ..
اتزكر مرة ناس ود الداية وبيتهم مرقو لي مشوار ..والبيت فاضي ..اها نحنا تلبنا ليك في البيت ..والتلاجة كانت في البرنده المفتوحة ...ولقينا ليك في التلاجه الفواكة الحلل الخضار ..وهاك يا خراب ..اول شي اكلنا ليك الفواكه جت ..والخضار لعبنا بيهو ..اما الملاح ناس الويكه والخضره ..بقينا نمسك الحلة وشوووو في السرير كشح ..وقمنا اتخارجنا ..بعد جو من مشوارهم الزوله دي عرفتنا ليك . كيف ماعارف ..؟؟.ولا كلمت زول ..بقت كل يوم تنفرد بي واحد فينا ..وشلاليت من طرف .. ويوم انا راجع من ميدان الكورة مغبر مع المغربية ..لقيتها ليك واقفة فى نص الطريق زي الاسد ..واول ماشفتها ...فوووو فحطت ليك ..وهى وراي ..والله جراية جري ..انا زاتى كنت فحاط شديد وسكتنى ليك ..ماقبضتنى الا جنب البحر ..والله شربتنى جنس كاسات ..تشيل وتغطسني في البحر ..لمن كوركت وجا لحقنى مزارع . .
.شوية شوية عرفنا انو الشغله دي كده مابتجي ..وانو لازم نعمل عصابة نحنا كمان .. ولازم نعمل تحالفات مع الناس البراهم زينا ....وعملنا عصابة وسميناها (اولاد النمر ) ماعارف ليه التسمية دى .. لكن اظن انو كان في مسلسل اطفال بالاسم ده فى الوقت داك ..اخوى كان هو زعيم العصابة.. وانا طبعا اخو الزعيم ..المدلل ..اها شويه كده وبعد معارك طاحنه مع العصابات الاخرى ..عملنا لينا اسم في الحله ..وبقينا مرييين .. ونمشي نتقدل في كل الحلل الباقية بدون ما واحد يعاين لينا ... بس ..الواحد مايمشي مطرف براهو ..ياويلك لو لمو فيك اولاد حلة ابكر او حلة السوق او اولاد البحر او ...دي اسامي العصابات ..وكلهم كانو بيلاوزو من حنان دى ..واذا لمو فيك الناس ديل مطرف ..والله الا يعرفوك بالهدوم الداخلية . .اها نحن بقينا الزولة دى الرئيس الفخرى للعصابة ..وبقينا ليك ود الداية اخوها ..عضو فعال في المافيا ..المصغره ..وبقينا الولد المابنقدر عليهو نمشي ننادى ليهو حنان ..وكده ..
لمن دخلونى المدرسة ..مدرسة العزوزاب الابتدائيه (بنات).. ايوه بنات .. لانو لمن جيت عشان يسجلونى في المدرسة ...لقو المدرسة بتاعة الاولاد قفلت ..يعنى قالو ما بنستقبل أي زول تانى .. العدد اكتمل .. اها مدرسة البنات متلصقة معاها طوالى ..ولقو ليك خانة فاضيه هناك ..وقامو سجلونا ليك نحن 10 اولاد في مدرسة البنات .. طبعا انا خرخرت خرخره شديده ..وقلت ..افو ..انا زعيم عصابة اولاد النمر المرتقب ..يختونى في مدرسة بنات ..؟؟ ورفضت ..وكل ما ابن عمى يجيبنى المدرسة ..اجري اخش مدرسة الاولاد ..والاساتذه يحنسو فينى (طبعا بيحنسو عشان لسة ما سجلت ولو كنت طالب ..كان اكلونى شجرة النيم كلها ) اصلو ابيت ..في النهاية رضخت للامر الواقع ..وبقين 10 اولاد ..كنبتين ..في مدرسة فيها 12 فصل بنات ..ولكم ان تتخيلو الحالة ...10 اولاد في وسط 1000 بت ...
اها بعد شوية اكتشفت ليك انو الشغلة بتاعة العصابات دى موجوده داخل المدرسة كمان ..يعنى وسط البنات .,.. هيا اهلنا ...عصابات بنات ..؟؟ في البداية ..بعتبار نحن اقلية ..البنات ديل مسكونا ليك معيييط من طرف ...يومى دقة .. ولي شلاقتى ختونى في نفس الفصل مع حنان زولتنا الزمان ...كانت محقرانه شديد ..والله كانت صعبه لي درجة.. انا بالتحديد. يومى تجلدني ليك جلد نضيف ..وكانت نااااشفه شديد ..لمن عقدتنى ليك ...اها نحن اتفقنا العشره اولاد نعمل تكتل ضد قوات العدو المتمثله في الالف بنت ..وبقينا نمسك البنات الصعبات ..الرؤوس الكبيره ....وننفرد بيهم واحده واحده ..في فسحة الفطور او لمن يفكونا (بيوت )اخر اليوم . وهاك يا جلد ...وجضمنا ليك كل البنات ..وبقي يتعمل لينا الف حساب..بس حنان دي ماقدرنا عليها ..وبقت لي عقدة في المدرسة كمان ..بتزكر في اليوم المحدد لي جلدة حنان ..كان في درس عصر اليوم داك ..وهى ماكانت بتمشي البيت لمن يكون في درس عصر ..يعنى بتقيل ..المهم اتفقنا 6 اولاد انو دى فرصتنا ولازم نادبها ..وحوالى الساعة اتنين ونص والمدرسة صااانه ..جينا داخلين المدرسة من البحر ..الكنا مقيلين فيهو ..واول ما شافتنا ليك ..جات علينا هى ..واتلمينا حواليها كلنا ..انا قلت ليها ..هوى انتى عاملة فيها راجل والا شنو ..؟؟ والله الليله حقك راح ..البيحلك مننا شنو ..؟؟ وهي ساكتة ساكت ..نحنا قلنا البت خافت ..الجنبي كان معاهو سوط ..وضربها ليك كده برااحه في رجلها ..جس نبض يعنى ..بس الزوله دى لفت عليهو ..وصااااج .. قطعت فيهو كف ..لمن صاحبنا اندهش ووشو بقي احمررر ..وختفت الصوت منو ..وناولتنى ليك واحده في نص راسي ..وادت واحد تالت بنيه في بطنو لمن قطع صوت .. وبس قمنا ليك صووووف ..جري ...وسكتنا ليك السته ..لحدى باب المدرسة ..
بعد داك عملناها زعيمتنا .. .. عشان نتقي شرها . حتى المدرسين كانو شوية كده بيهابوها ..لانها حقانية شديد ..متزكر كانت في مدرسة استاذه في المدرسة يعنى ..كانت كل يوم تجي وهى مجلطة وشها بالمكياج الاصفر والاحمر .. بشكل يوضح عدم معرفة باستعمال المكياج بصورة صحيحة رغم الكمية الكبيره من البودرة والالوان..اها قامت المدرسة دي عاوزه تجلد ليها كم بنت كده من ضمنهم حنان ..وكانت في يدها قايمة ليها حرارة ..والمدرسة اصرت لازم تتجلد في يدها وحنان تقول لا ...كان عاوزه اجلدينى فى كرعينى او زى الاولاد (الحركة بتاعة الكرسي) تجي للكرسي من الخلف ..من جهة مقعد الضهر ويقول ليك الاستاذ امسك هناااك ..في المقعد ..وطبعا المؤخرة بتكون مشدوووده ..سوط واحد تحس بيهو فى نص نافوخك ..المدرسة اصرت وهى اصرت ..قامت المدرسة ضربتها كف ..وهاجت ليك حنان ..ومسكت ليك المدرسة من شعرها وجرتها ليك ..و ..وعرفنا اليوم داك انو الاستاذه بتلبس باروكة ..الجوطة قامت ..وجا المدير وقالو يفصلوها ..تانى ابوها جا واتناقش وطلعو الاستاذة غلطانة ..وانتصرت حنان ..
وحنان دي كان كل التلاميذ بيخافو منها ..ويحترموها ..ويحبوها كمان في نفس الوقت ..شخصيتها كده حاجة مامفهومة ..قوية ..وحنونه ..حقانية لابعد حد ..وشرانية في زات الوقت .وبتحب تساعد التلاميذ البلدة في الفصل ..كل امتحان او اختبار كانت بتحلو لي كم واحد حتن تحل ورقتها ..ويوم التسميع كانت بتملى التلاميذ القصيدة او السورة .. عشان كدة كانت بتتدق كتير ..وفاااهمة ..كانت بتقول كلامات كده ماكنا بنفهمها ..ودايما كانت بتقرا ..24 ساعة بتقرا ..كتب غريبة كده ..احسان عبد القدوس ونجيب محفوظ وطه حسين .. بعد خشيت المتوسط وقرونا كتاب الايام بتاع طه حسين ..كنت بندهش لمن اتزكر الزوله الكانت بتقرا الكلام الغير مفهوم ده في الابتدائي .
لمن حصلنا سنة سادسة ..بقت تظهر وسط التلاميذ حركات كده ..بتاعة جوابات وفلان بيحب فلانة.. ولاننا عشرة اولاد قصاد 1000 بت كان طبيعي انو يتشاكلو فينا البنات ..يعنى اى واحد فينا كان قصادو مية بت ..انا براي كنت بحب تلتاشر تلتاشر  ..ازهج منهم احب تلتاشر غيرهم ...نعييييم مش كده ..؟؟ حنان الوحيدة الماكانت راكبة ليها الحركات دى في راسها ..وكانت تستغرب فينا ..وتضحك فينا مع كل شاكوش بل مرات كانت بتدينا نصايح في كيفية ممارسة هذه الاشياء باحترافبس هي اصلا ماكنت بتخش في الحاجات دى .. ممكن لانو ماكان واحد فينا مالي عينها ..انا الشليق قلت احب الزوله دى عشان اكسر عينها .. وعشان اتحرر من سيطرتها على .وبينى وبين نفسي كنت مقتنع انها الاجمل في المدرسة ...وحقيقي كانت جميلة جد ..بس شراستها كانت بتقطي على الجمال
.بس يوم كده ..وكنا في رحلة لجبل اولياء كل المدرسة ..وفوق الاستراحة الفي الجبل الكبير داك مع المنظر الجميل للخزان.. كبيت ليها المكنة المجهزها لي شهر ..انا ..وانا ..وانا .. وانا اسك في النمل بي رجلى .. وهى تعاين لى سااكت ..بعد ماكملت كلامى بالتلتله ..قالت لى ..قلت شنو ..؟؟ وعيونا محمرة ..قطمت انا ومارديت .. قالت ..الحبة التقوم ليك في ..انا لمن احب احبك انت يا..وطاااخ بالشنطة في وشي ..انا تضايقت شديد ولزيتها ليك لمن وقعت في حوض موية ..وجات طالعه من الحوض وهاك ياشكل وياضرب ..والمدرسين جو جاريين وحلحلونا بالعافية ..والغريبه انها ماقالت سبب الشكلة .. والمدرسين لمن رفضنا نقول ..اليوم التانى طلعونا في طابور الصباح .. ورفعونى ليك بي اربعه كبببااار ..ومعط شديد والله كوركت جنس كواريك . .وهي جلدوها في يدها ورجلها واكلتهم بدون ما تتململ ..
ولحدي ما انتهينا واتخرجنا من الابتدائي.. وحنان دي ...في حالها ..لاتقبل الغلط ولا كلام الخمج ... واليرفع عينوعليها ..بتقدو ليهو ..ورغم كده كانت اولة الفصل .وكانت فالحة في أي شي ..اتزكر في الجمعيات الادبية ..كل يوم تلاتاء ..كانت هي البتقدم البرنامج ..ومرة الفت اغنية جميلة للمدرسين والمدرسة ..ولمن تطلع المسرح وتمسك المايك ..تتكلم كلام قوى ومرتب وبي لهجة صارمة ..كانت نجمة المدرسة بلا منازع ..بعد امتحان الشهادة الابتدائيه يوم النتائج ..كانت اعلى نسبة فى الدفعه ..بس ماجات ولمن سالنا قالو سافرت مع اهلها لاحد الدول الخليجية ..ابوها كان موظف فى الخارجية . وانقطعت اخبارها من ديك ..
بعد الابتدائي رحلنا الحاج يوسف . . لمن دخلت الثانوي (قريت الثانوي في 4 مدارس ..لانى كنت كل 6 شهور بنطرد من المدرسة وامشي اسجل في مدرسة تانيه ) ..قريت تالته ثانوي في مدرسة الشعب الثانويه .ببحرى .وبي سبب زحمة المواصلات الرهيبة ..قررنا ناجر حافلة من والى الحاج يوسف ..وبي سبب قلة ععدنا دخلنا البنات معانا .. شوية شويه دخلو معانا في الترحيل ده شلة من البنات ساكنات كوبر ..وبقو يترحلو معانا وكانو بيقرو في مدرسة بحرى الجديده بنات الجنبنا في شارع المدارس المتفرع من شارع المعونه ..طبعا في الحافلة قامت علاقات بين كل ضكر وانتاية ..الا وااحده كانت تجي تقعد جنب شباك وااحد وما بتتكلم حتى مع البنات .. وكل مرة الاحظ ليها ..واتمعن في تفاصيل وتقاطيع وشها الجميل الدقيق اقول البت دي ماغريبة . لحدى مايوم وانا قاعد في الحفلة منتظر الباقين براي جات ركبت ..واتململت شوويه كده ومشيت قعدت جنبها ..اسمك منو وساكنة وين وبتقري في سنة كم و..و .. وهي تعاين لي ساكت ..وما ردت نهائي ..احترمت نفسي وقمت زحيت منها ..جات واحده من البنات البعرفهم كويس وسالتها منها ..قالت لي دي اسمها حنان ...ابوها سفير ..ساكنة كوبر ..قلت ليها حنان منو ..قالت حنان فلان الفلانى ..لاحولاااا ..ياهى زاتها سبحان الله ...نفس الزولة لا اتغير الشكل ولا النظرة المرعبة .. وللاسف ..من تاني يوم ماركبت الحافلة ..
وبقو يرحلوها بي عربية خاصة براها ..وتانى ماشفتها ...
ونواصل ..
|
|
 
|
|
|
|
|
|
|
|
Re: حنان ..أنثي ولا دستة رجال .... ( ولكن ) ..!!!؟ (Re: samo)
|
عثمان وهالة ..
شكرا على طولة البال ..ماعارف انتو قدرتو كيف تقرو الكلام الكتير ده ...
مريم ... قلتي لي شنو ؟؟
Quote: اسلوبك شيق جداً.. ويشد القارئ بقوّة.
|
اكاد لا اصدق .. والله انا راسي كبر لمن قررت انو ما اكتب في البورد تانى ..ولا اكمل قصة حنان ..
لانو البورد ده اصبح دون مستواي الفكري..!!
| |
|
|
|
|
|
|
|
|
|
Re: حنان ..أنثي ولا دستة رجال .... ( ولكن ) ..!!!؟ (Re: samo)
|
شقيقي / سامو
هكرفي
انت اصلك جاي من وين من سركنمتو ماشي 8 ايام لغاية ما تصل الخرطوم
حنان بتاعتك دي هي مهيرة بت عبود ولا شجرة الدر ولا حنان لبط انت متاكد انها كانت انثى
واتكلمت في الكورة انت متاكد اوع تكون قالت ليك كمان بتشجع المريخ
ذي دي تتكلم في المصارعة الغير حرة في الملاكمة وفقع العيون والمطوة قرن غزال
أخو أوع من الرخو
ساندوتش ويكه دي بالغت فيها عديل ! !
حنان يا حنان
حني حني علي انا يا ستي الحاصل بي سببو انتي
والله قديتنا بيها قد
اسمع انت درست في العزوزاب
دروسك استاذ همت واستاذ نورالدين
| |
|
|
|
|
|
|
|
|
 Re: حنان ..أنثي ولا دستة رجال .... ( ولكن ) ..!!!؟ (Re: samo)
|
لمن الواحد يسمع كلمة (اب) او والد .. بيجي في عقلو شخص معين ..بيكون موجود داخل عقلو الباطن الجوووة داك ..يعنى بيكون ليهو نموزج للاب ..ممكن يكون ابوك زاتو وممكن يكون ابو صاحبك او الساكن جاركم او المحاضر في الجامعة ..المهم بيكون في انموزج للاب ..الواحد بيتمنى ابوهو يكون مثلو ..او ابو اولادو لو كنت بنت ..او انت بالنسبة لى اولادك ..لو كنت رجل ..
نفس الشي للام ..داخل عقل كل واحد فينا نموزج مثالي للام ..انا اتمنى أمي تكون مثلها لو هي ما النموزج ده ..واتمني حبيبتى وام اولادي المرتقبة تكون كما اتمناها ..كذالك الاخت ليها نموزج داخل العقل ..والاخ ..والصديق ..وهكذا ..
النمازج دي ..بتختلف داخل كل واحد فينا عن غيرو .. وتوافق الشخص (ابوك وامك واخوك وزوجتك وصاحبك) مع الصورة الفي عقلك ..هو البيولد احترام وتقديس وحب .. وتعلق شديد بالطرف الاخر ..لانو في فرق بين اخوى العادي ..العلاقتي بيهو علاقة خوة وبين اخوى المثل الاعلى لي ..البحبو وبخاف عليهو من الهوى ..وفرق بين زوجتى البحبها عشان هى زوجتى وام اولادي وبين الزوجة البموووت فيها ومقتنع بانو مافي زيها في الكون ..
و ممكن يكون شخص مثالي في نظر كل الناس لكن انا اشوفو عاادى ..و ممكن اشوف فيهو عيوب كمان ....وبالعكس ..ممكن واحدة تكون عادية في نظر كتيرين .. بس انا اشوفها مميزة جدا ..وتكون بالمقاس مع صورة الحبيبة في عقلي .. اقوم ..كف كرف ..اكنكش فيها ..واتغرب وعينى تطلع عشان اوفر حق شيلتها ومهرها وعشان اضمن ليها حياة كريمة ..
واكيد الواحد ما بيقدر يختار اهلو ..والدو ووالدتو واخوانو .لكن بيقدر يختار شريك الحياة والصديق...والاختيار ده هو الامتحان ..وهو النقطة الحتلف حوالينو حياتك ..وبيحتاج دراسة شاملة للشخص وسلوكياتو وتصرفاتو .
ممكن... ده السبب البيخلي بعض البنات يرفضو كميات من العرسان ..لانهم ما بتوافقو مع صورة الزوج الفي عقلهم ..او صورة الاب ..لى اولادها ..وممكن تقعد كتييير تنتظر الشخص ده ..اللي هو ممكن مايجي ..او ماتصادفو . وبرضو نفس السبب البيخلي الشباب يخطبو وينطو ..او حتى يتزوجو ويطلقو ..و لمن تسالو عن سبب الاختلاف والطلاق حيقول ليك الزولة دي مابتنفع معاى ... ونحنا مامتفاهمين ..او ..جنها نوم..او بتشخر ..او نقناقة ..قرقر كتير يعنى ...او لمن تصحي من النوم بتكون بشعة ..او وسخانة ..مابتنضف البيت . ده كلو لانها اتعارضت مع صورة االزوجة في عقل الشاب.
الكلام الفوق ده ماعندو أي علاقة بي حنان ...نجرتو من راسي بدون مناسبة .. لله كده ...
اها ..
كدي نتم ليكم حكاية زولتنا ..
من اخر مقابلة ..في الجامعة ..ما اتلاقينا تانى .. اتخرجت انا ..وبعد شويتين كده جيت للمصيبة البيقولو عليها السعودية دي ..طبعا الكفلة يطيرو ليك كلمة حنان من قاموسك اللغوى .. نسيتها مع زحمة الشغل والجري .. بالاضافة لي برنامج العمل هنا (نظام الدوامين ) البيخلى الواحد في خلال شهور ينسي امو اسمها منو ..؟؟ دوام ممل وقاتل ...المكتب ثم البيت والاكل ثم النوم ........بس
ولي حظي الشليق ..اشتغلت في مدينة العيش فيها ماساة حقيقية .. والواحد لو كان في الرياض او الدمام او جدة ..ماكان حس بالغربة ..لاني بشوف السودانيين اكتر من (السعوديين + البنقالة + الهنود) مجتمعين ..في المدن دي ...
المهم ..
مرااات كدة الواحد بيمشي على الرياض يفرق مع الاصدقاء والزملاء ايام الجامعة ..(تلتين دفعتنا في المملكة) ..
يووووم مشيت حفل زواج شبه ضهب ..لانو الكان عازمنى هو الفنان ..طبعا مابعرف أي زول في الحفلة ..وجريت لي كرسي وقعدت بعيد امارس هوايتى المفضلة (اعاين للخلق وهم بينططو ويرقصو ..وبعد ما الحفلة تسخن والناس تبدا تنفعل مع الفنان ..بقفل اضنيني واعاين ليهم بدون صوت الموسيقي ..حقيقي شكلهم يجنن ) .
الناس لمن كترت ..بقو يزحفو بي كراسيهم على جهتى حبة حبة ..وفجاءة لقيت نفسي في نص الخلق ..بعد دقايق واحد من القاعدين وراي لكزنى من ضهري .. اتلفت عليهو ..لقيتو معرفة من السودان ..من ناس الحلة يعنى ..لكن من نوع الجلاكين الماكان الواحد عندو بيهم علاقة قوية .. سلمت عليهو ..وبقينا نتونس ونحن بنتفرج ..في الفاصل جا الفنان قعد معانا ..عمك اتكيف شديد من حكاية انو قاعد مع الفنان دي ...وفتح لي فتحا مبينا وقعد يتونس مع الفنان .. بعد شوية لقيتهم قامو ...اها وين ياناس ..عمك قال لي ارحكاكم اعرفكم على زوجتى ..انا رفضت ..وقلت البيودينى شنو في نص 200 مرة ..لا لا ..ماماشي .. صاحبنا الفنان اصر الا امشي معاهم قمت مشيت ..
زوجتو ..مرة ..كبيرة في السن بس لطيفة ودمها خفيف ..وبي طريقة ظريفة كده اقنعتنا نقعد ..وقعدنا نتونس ..حقيقي الاتنين طلع دمهم خفيف وونستهم جرت ..بعد ما الفنان طلع المسرح وعمك مشي يوصلو لي فوق المسرح .. بقيت مع المرة براى نتونس ..
ومن ماجيت قعدت وسط النسوان ديل كنت مكهرب ..لاقادر اتلفت يمين ولا شمال ..حتى عاوز اقوم ارجع محلى ماقادر ..فجاءة ..وبحركة غير ارادية اتلفت يمينى ... وشفتها ليك ..حناااان
امااااك حنان ... حنان زااااااااااتها ...بي شحمها ..وشحمها ....كمية من الشحوم..لحم تك ....سميييينة بقت ..وشايلة شافع ..كانت تجلس وبينى وبينها كرسي فاضى ..بس قمت ... جب ..نطيت الكرسي وقعدت جنبها ..
ازيك يا حنان ..في البداية ماعرفتنى ..وعاينت لي بي ملل..نظرة لا فيها تحدى بتاع زمان ولا فيها اي شي غير القرف..والغباء نظرة عادية ...فيها شي من الخوف ..
ماعرفتنينى ... قلت وانا نفسي قايم ..
قالت بتساؤل ...بعد طول نظر ...سمو ..؟؟؟
قلت ...ايوة
قالت: ازيك ..والله اتغيرت
قلت : وانا امسح راسي ..بقيت وجيه مش كده
ضحكت وقالت : والله الوجاهه في درب وانت في درب
سكت وبقيت اعاين للولد في حضنها ..
ابتسمت وقال: اااااي ولدي
قلت : كدى براحة ..الجابك البلد دي شنو ..وعرسوك متين ..ومنو ده القدر يقنعك بي نفسو ..والله ده بيستاهل ميدالية ..
قالت : راجلى ....ونصيبي ..وهي تاشر بي اصبعها باتجاه الناس البيرقصو .
وبدون ما اقبل عشان اشوفو ..
قلت :: يعنى اتزوجتى ..وانا مندهش
قالت: يعنى عاوزنى اعمل شنو ..ما كل البنات بيتزوجو
قلت : عمر الولد الفي حضنك ده بيقول انك اتزوجتى بعد ما اتلاقينا بي شهور تقريبا
قالت : بالضبط
قلت مندهشا : والدراسات العليا .. والطموح ..والتنظيم والسياسة ..والشعر..؟؟؟؟؟
قالت وهي بتنظر بعيييد طموح مين ياعم ..انا تزوجت اول ما اتخرجت و ..
قاطعتها : بدون ارداتك صح ..؟؟
قالت : لا
وكانت صاعقة ..
قلت ليها: اتزوجتى بي رضاك بدون أي ضغوطات ؟؟
قالت : ايوة
قلت وانا واثق من الرد : يعنى اخيرا حبيتى
وكانت الاجابة الثانية الصاعقة : لا
لمن شافت الذهول في عينى ..وبعد صلحت التوب كويس : شوف يا سمو .. انا حختصر ليك ..لانو راجلى اذا جا شافنا قاعدين كده حيعمل لي مشكلة .. انا اتزوجت واحد..بدون حب ...ماعشان المادة ..لانك بتعرف حالتنا ..بس هو اتقدم وانا وافقت بينى وبينك كده ..انا ماكنت بحبوبس كنت بحترمو وافتكرت ده كل شي ..وبعد الزواج كشفت فيهو عيوب ماليها حد ..حاولت اصلحها لكن ماقدرت ..
واتنهدت بحسرة وواصلت : انا شايلة هم باقي عمري حقطيهو كيف معاهو . ..واول ما اتزوجنا ..الحياة الزوجية ياسمو في بدايتها جنة ... كل شي فيها حلو .. انبهرت بيها ..وقررت (في لحظة حميمة مع الزوج انو مستعدة امشي معاك لاخر العمر )
وقالت كلام كتيرر ...كتير . حسيت انها بتحاول تقنع نفسها قبل ماتقنعنى بيهو ..اتغيرت ..ماهي حنان ..هى ست بيت ..وبس .. متحملة زوجها عشان بيتها ..نبل انقرض من زمن امهاتنا وحبوباتنا..بس القوة ..والجرءة .. والنظرة المخيفة ..والشخصية القوية ..والصوت الواضح النبرات ..كلو ..بح ...راح .. بقت واحدة ..زيها وزي اكتر نساء المغتربين في الخليج ..تقوم من النوم الساعة 12 ضهر ..وتجهز الغدا ..يجي سي السيد ..ياكل ..وينوم ..وهى تدخل المطبخ ..تغسل العدة الاتوسخت ..تصحي الراجل ..يمشي الشغل ..وتنتظرو.. مرة تقلب في مجلة ..ومرة في القنوات الفضائية لحدى الساعة 10 مسا ..يرجع تحشي بطنو بالعشاء الفاخر ..الماعندو طعم (اكل الخليج كلو تفافيح واعناب وجداد ومعلبات وكل ماتشتهيهو الانفس ..لكن مسيــــــخ ).. بعد داك ..يتونسو ونسة كل يوم ..المعتادة وينومو ..وتصحي الساعة 12 ضهر ..و ...و والمكنة لافة ...بس ... حنان بي حالها ..دى حياتها ...
بعد ماكملت ..واتململت ..وحسيت انها عاوزانى اتخارج ..قمت من جنبها ..ومشيت ابعد مكان في الحفلة وبقيت افكر ...حقيقة شعور كان غريب الانتابنى في وقتها ..
في نهاية الحفلة ... ونحنا طالعين .. كانت ماشة قدامى ..وجنبها كان زوجها .. ودى كانت الضربة القاضية ..
شخص عملاق وجهااامة .. وسمين ...لابس ليهو جلابية سكروتة ..ويكووورك في جماعة قدامهم ..هو بيمازحهم ..بس مزاح دمو تقيل ..وعامل هيلمانة ..وكل الناس الطالعة بيعاينو ليهو ..خاتي سفة.. دقار لوري بس .. (انا زاتى كنت بتمبك بس مابنفس الطريقة ) .. وجات عربية كريسيدا طالعة من الاستراحة وكانو فيها العرسان ..والظاهر علاقة العريس بي صاحبنا كويسة ..بس مجرد ما جات العربية قصادو صاحبنا كورك بي اعلى صوتو : ابشر ياعريسنا..ابشر ..ابشر .ومشي على العربية ..ووقفت العربية ودنقر علي العرسان واتكلم شوية ..وبعد ما العربية اتحركت من جنبو قال باعلى صوتو : يافلان ..ويقصد العريس ..الطلع راسو من الشباك ..وقال بس براحة على البنية ...زولتك دى صغيرة ..ماتخلعها من اول يوم ..وهاهاهاهاهاهاهاهاها ..بقي يضحك ..والله انا خجلت لمن بقيت عامل فيها بتناقش مع الفنان الطالع معاى.. في طبقات صوتو والتوزيع الموسيقي . . فما بالك بالحريم .
عاينت بي طرف عينى لي حنان ..لقيتها ماشة بعيد منو ..كانو ما معاها ..
اتزكرت كلماتها قبل دقايق (ما كنت بحبو لكن ..بحترمو ..!!!) وسالت نفسي ..اي نوع من الاحترام لشخص مثل هذا ..؟؟
لحدى هنا ..وحكاية الزولة دي انتهت .. بس ماحعلق انا على الموضوع ..وعاوز اسمع رايكم .
.
| |
|
|
|
|
|
|
|
|
|
Re: حنان ..أنثي ولا دستة رجال .... ( ولكن ) ..!!!؟ (Re: samo)
|
العزيز سمو
سواء كانت قصتك هذه حقيقية؛
او هي من بنات الخيال؛ فنهايتها جد محزنة ..
لم افهم تماما الاسباب التي ادت الي ان تقرر بطلة قصتك؛
قرارها بالزواج بهذا الشكل؛
فما حكته يبدو ناقصا في احسن الاحوال
من الناحية الاخري انا اعرف عشرات؛
ان لم يكن مئات الامثلة الاخري؛ لرجال من مدعي التقدمية؛
ممن لحسوا ادعائاتهم في اول لحظة؛
ولم يبحثوا عن زميلات النضال؛ بل تزوجوا بطرق اكثر من تقليدية
هل ساهم هؤلاء وامثالهم؛ في قرار بطلة القصة اعلاه؛
والكثير من رفيقاتها؟
عادل
| |
|
|
|
|
|
|
|
|
|
Re: حنان ..أنثي ولا دستة رجال .... ( ولكن ) ..!!!؟ (Re: samo)
|
اكرر
جميل وشيق جداً ياسامو.
مافعلته حنان قد قامن بفعله كثيرات من لهن نفس صفات حنان.......لماذاااااااااااااا؟؟؟؟؟؟؟؟
هذا ما لا اعرف له رد.
وعندما تسألهن يكون الرد دائماً...(بس كدا...انا ذاتى ما عارفه لى....او ردود غير مقنعة بتاتاً حتى هن غير مقتنعات بمايقولن)
طبعابس ما كل البنات كدا....ولكن للاسف الاغلبية..
اخوك طبعاً داخل افلام ذى دى كتيرة جدا.......وبعضها جاء على رأسى.
عليك الله ياسامو كماجتنى بالماسنجر...فى باقى شمار.
| |
|
|
|
|
|
|
|
|
|
Re: حنان ..أنثي ولا دستة رجال .... ( ولكن ) ..!!!؟ (Re: samo)
|
| Quote: والله قصتك دي اجمل من بوستات كتار اكتب ونحن متابعين وبنقراك |
دوما الرايعه ..انتي دايما الاجمل بحضورك ...شكرا للمتابعة ..وللقراية
haneena ..يشرفني حضورك لبوستنا المتواضع .
حمزاوى ..ويييييييين ياقريبي ...مسكه نوونا ..؟؟
قلت لي | Quote: جاي من وين من سركنمتو |
...ضحكتنى والله ..البيودينى شنو للبلد ام طيرا عجم دي ...
..بس اوع تكون منها ...دى تبقي مصيبة كان طلعت سكداوي ..
طبعا درست في العزوزاب ..يعنى انا الكاتبو فوق ده لاتينى ..؟؟ مسيخ ده ..
قلت لي استاذ منو ..همت ..والله مابعرفو ..ديل شكلهم قدام ..انا امتحنت من العزوزاب (سنة سادسة ) سنة 90 .
بالمناسبة ..يحمزاوى تعرف ..سمير بيكاب ..؟؟؟
الاستاذ عادل .. ماعارف ..لكن لمن تخش ليك بوست بحس انك ..خليت وراك قنبلة وطلعت ..ماعارف الاحساس ده مصدرو ايه .بس قعدت افتش وراك في القنبلة دى ..مالقيت شي ..اتاكدت انك في حالة ..هدنة
اولا القصة من ناحية علاقتها بالحقيقة فهي حقيقية 100% ..ولو لا اشانة السمعة ..كنت زكرت الاسماء الحقيقية ..بس انا عرضت الموضوع حتي تعم الفائده بالنقاش حول القصة ..والتحول الكبير في ..فكر ..وطموح ..ونظرة حنان للحياة ..وتخليها حتى عن بعض مبادئها ..وده حسيت بيهو في اخر لقاء ..
ويمكن احساس انو القصة غير حقيقية جا من الشكل الدرامي الطرحت بيهو القصة ..
وبصراحة انا مالاقانى رجل ..اتخلى عن حاجاتو بالسهولة والشكل (المقزز) ده .. ويخيل لي ... انو الشي ده موجود عند الجنس الاخر ...اكثر
على العموم ..شكرا ليك كتير على المرور ..وشرفتنا جد جد .
الاخ عثمان ...بينى وبينك كده ..انت عجبتك القصة ..ولا بطلة القصة؟؟؟ 
شكلك كده متابع القصة بمزاااااج ..
شكرا على القراية الصااح ..
شكرا كتير يا استاذ على الاهتمام بالموضوع ...لكن جد كده ..حالة الزولة دي ..وقفت عندها كتير ... وبشوف انو الموضوع في مجملو ..يحسس الواحد باحباط غريب ..
هل ياترى ..يمكن ان يكون في البورد معنا ..من يمكن ان يتخلى عن ..كل عالمه ..لمجرد ..عيون شريك الحياة ..وهل يمكن ان تتحول النظرة الثاقبة للامور ..الى نظرة سطحية ..بحيث لايري الشخص ابعد من انفه ..ويجد نفسه في الوضع الذي وجدت فيه حنان نفسها ...؟؟
قلت لي | Quote: اخوك طبعاً داخل افلام ذى دى كتيرة جدا.......وبعضها جاء على رأسى. |
...ده انت طلعت اي كلام يا جدع ..
| |
|
|
|
|
|
|
|
|
|
Re: حنان ..أنثي ولا دستة رجال .... ( ولكن ) ..!!!؟ (Re: samo)
|
انت يا سمو أتاريك كتاب كتابة و وصاف وصف و نضام نضم خلاص أنا بعد كتابتك السمحة دي أضفتك للستة بتاعة ناس بت قضيم و شيري و ود قاسم
و الزمن ده كلو غاشينا و تقول ما بتعرف تكتب!
حنان دي ممكن تكون واحدة من "حنانات كتار" في بلدنا كان يمكن أن يستمرن قويات مصادمات في دروب الحياة و ...لكن! و آه من لكن هذه فلا أعرف حقيقة ماذا يحدث لحواء السودان بعد الحصول على الشهادة الجامعية و الزواج، كلهن( الا من رحم ربي) يتحولن الى كائنات ممتليئة الجسد، ثقيلة الخطى ، باهتة الشخصية مع الكثير من رسوم الحنة و نقوشها العجيبة، هل يا ترى يستعضن بألوان الحنة للتعويض عن شحوب ملامح الشخصية؟
| |
|
|
|
|
|
|
|
|
|
Re: حنان ..أنثي ولا دستة رجال .... ( ولكن ) ..!!!؟ (Re: Nada Amin)
|
سمو سلاماات
القصة مباااالغه . و الله انت ذى ما بيقولوا ( قصاص و رصاص)
عنوان القصة زكرنى بموقف حدث معى منذ سنتين . كنت و زميلتى اول بنات مهندسات فى شركة بترولية فى السودان , و بعد اسبوع فقط فى الشركة ارسل كل الاولاد فى القسم فى مهمة خارج السودان, و لاننا انا و زميلتى كنا جداد و بنتعلم فى طبيعة الشغل فى الشركة بقينا فى المكتب. جاء المدير فى احد الايام , عاين لينا و كان بيتكلم فى التلفون مع المير العام و قال ليه البنات طفشوا الرجال من المكتب و قعدوا , قمت انا (تحت تحت ) قلت لصحبتى (انا ب ٦٠ راجل ), المدير قفل التلفون و قال لى قلتى شنو ؟ . و من اليوم داك كل ما يكون عندى اجتماع معه و مع اى عميل فى المكتب اول حاجه بيحكى القصة دى.
حنانات و السبب ببساطه المجتمع , اى حنان بيلمو فيها خالاتها و عماتها ( بعد التخريج على طول ) و كل يوم يسالوها ( ما جاك عريس ؟). و لو عرست واحده من بنات خالاتها قبلها تكون كارثة اجتماعية.
يا جماعة ارجوكم ( من اجل الاجيال القادمه ) ,علموا و عرفوا بناتكم بقيمتهن ,وروهم ان كل واحده عبارة عن انسان كامل له قيمة .و ان قيمتها فى احترامها للناس و لنفسها و الاهم تعليمها و عملها.
| |
|
|
|
|
|
|
|
|
|
Re: حنان ..أنثي ولا دستة رجال .... ( ولكن ) ..!!!؟ (Re: خضر حسين خليل)
|
Samo it is a fantastic story !!! I read it one go. I quote here the reponse of Adil Abdel Ati
Quote: من الناحية الاخري انا اعرف عشرات؛
ان لم يكن مئات الامثلة الاخري؛ لرجال من مدعي التقدمية؛
ممن لحسوا ادعائاتهم في اول لحظة؛
ولم يبحثوا عن زميلات النضال؛ بل تزوجوا بطرق اكثر من تقليدية
هل ساهم هؤلاء وامثالهم؛ في قرار بطلة القصة اعلاه؛
والكثير من رفيقاتها؟
|
Because I think it is a very valid question !!! I also know many Sudanese men who ''claim'' to be democaratic and liberal BUT when it comes to marriage they marry in a very traditional way. They had deep relationships with their collegaues in the univeristy or in politics and some caused severe hurt for these women
. !!!
I wonder what is the reasons for such a behaviour !!!!!!! Is it a double stand in what they say and what they practice !!!! or is it because Sudanese men can not get rid of the grandparents mentality that is deeply grounded in their mind!!! like what some of them said to explain their behaviour.
This remains an open question !!!! Why some democaratic Sudanese men(if not all ) feel attracted to strong, indpendent and educated women but when it comes to the decision of who to marry they choose the humble , obedient women. Are they afraid of rebelion women ?? are they afraid of feeling jealous of the success of their partners in the future (in case they marry their counterparts
Thanks again for the nice post
| |
|
|
|
|
|
|
| |
samo
Osman Hamad
مريم بنت الحسين
doma
haneena
Abdel Aati
smart_ana2001
manubia
ودقاسم
خضر حسين خليل
فيس بوك
تويتر
انستقرام
يوتيوب
بنتيريست