*** مسكينة الشجرة ,,,, رسائل موبايل ونص حنين***

Quote: بتنا بت الجنيد ازيك امي ماك طيبه والعقب خبرم شنو ، ان شاء الله طيبين لي يوميين بجي بدخل رويسي الزي الدليبه دا وامرقو التكنو مارقلو من شوال دقيق فيتريته حارااااار من بطن حجر طاحونتو مغبر بـ نضميك السمح بالحيييل دا وغير المتاوقه والمحن تب ما بقالي شيتا اسوي ها بت ها ما فجعتينا ما ورمتينا ما هبشتينا في راس المخروقه الليلة الشوق الفاير فينا حلة لبن مقنن بالوجع وريحتو ملت الفريق اللنفجع وجمادتو اتكومت في القليب دهن شوق سد كل الشراين وبقيت افتش في النفيس في ضل شجرتك اللامة كل ولاد البلد كان القالي فيه رقراق امل عاد هو شوق نصاح ؟ دحين آبت حديثك مو حديثا هين ولا هو لين في شان كدى لا تقفلي الماسورة اللنحلجت دي خليها كابه فوق راس الموجوعين بندور نتبردبا من هجير الغربه ودي قعدة اقومنا الله فتك بي عافية

Quote: وضاحكتها الشجرة مبتسمه في غرور وصفقت اوراقها طربا وعانقت افرعها بعضها البعض في انتصار وفرحة

Quote: أختنا العزيزة الشاعرة / سوما ... تحية الصباح المشرق الجميل لك ولجميع من حولك وعلكم جميعاً بخير كعادتك أسماء شعراً أو نثراً نتساب الحروف جزلى مليئة بالصدق ومعتقة بالمحنة والوجد ... وحقيقة يا أسماء أنا مع رأي الأستاذ الفاتح إن هذه الشجرة ليس مسكينة بل محظوظة أن تمكنت من فرد ظلها الوارف عليك .. وأن شهدت البوح الصادق الجميل بينك وبين أبو رامي .. جمعكما الله في القريب العاجل وفق أحسن الظروف يا رب .. ومحظوظين إنحنا ناس سودانيزأونلاين ديل أن أهدتنا الشجرة إياها هذا التداعي الجميل من شاعرة أثيرة كتبت عليها الظروف غربة من بعد غربة .. فأتت حروفها المنضومة كالدرر تنبيء عن معاناة الغربة وألم البعاد ... مبروك مرة أخرى عقد قران شقيقتك الدكتورة نسرين وإن شاء الله تظللها السعادة والأفراح أبد الآبدين ... وإن شاء الله يا سوما كل الأمور ماشيه عال العال .. أما أنا فقد قرأت يس حسب الوعد ... ودمت لنا يا أسماء غيمة معطاءه ما حملت إلا الخير والعطاء الثر للجميع .... مع خالص تحياتي وتقديري ؛؛

Quote: جريت بنبر مهتوك علي اللرض اتعبني الجلوس فللحكي اتكاءته نسجت ماتدلى بعناية وجلست أخري لم استرح بقدر حاجة استماعك فتوسدت اللرض واسندت رأسي المتعلب لنتوء شجرة النيم فتساقط كرمك سلام

Quote: يالله يا سوما تناول رائع للمفرده ..... وسلااام لكل شجر بلدى

Quote: لا نملك مفاتيح لابواب ولا نوافذ ولا نخبر للسياسة وطن بين حنايا الغنا النازف ولا تحت صفحات الجرح القديم حين ينكأ بوجع غريق ولا ليل الغربة يحتاج لزمجرة العواصف والتيارات العكسية الجارفة

Quote: أي كلام حنقولو حيكون مسيخ ... نخُت الخمسة في الإتنين ونسمع/ نقرا/ نشوف/ نحس ............ أي حاجة. سلام بت الجنيد

Quote: عندما وصلت مطار جده قبل 3 يوم تم توقيفي في المطار ووقتها تمنيت ان يرجعوني بلدي 3يوم غالبني النوم الشعب السوداني مليان حنية والغربة تدمي القلوب والفراق حار حار من الام والزوجه والخالة والولد وياربي الواحد الاحد ان ترجع الناس من الغربة وتسعد

Quote: غَدَا فِي زَاوِيَة مَا تُضِئ لَوَحَة الْحَيَاة بِيَرَاع اسْمَاء الْجُنَيْد .. تَغْمِز لِلْعَابِرِيْن تَعَالَوْا هُنَالِك أَنْتُم وَنَحْن وَهُم نُسَافِر عَلَى أَجْنِحَة الْسَّعَادَة .. نَكْسِر أَقْفَاص الْزُجَاج .. يَسْمَع كُل مِنَّا الْآخَر .. سَوْف نَكْتَشِف الْعَالَم مِن جَدِيْد .. وَنَعْرِف إِلَي أَيْن نَذْهَب .. نَذْهَب إِلَي ذِرْوَة الْحَيَاة وَالْسَّعَادَة .. إِلَى الْمَاضِي وَالْحَاضِر وَالْمُسْتَقْبَل.

Quote: اها عاد أصبري لي اللرمي لوية القش دي للبهايم وبجيك صاد جبنتك حرم مابتنفات بجيك صاد

Quote: والزمن يجري ويجري ... ونحن في الغربة مهريين هري .......... وجمعتكم مباركة يا الحنان ’’ البرة البلد والفي السودان ’’’’’

Quote: تسلمي الحبيبة الأصيلة أسماء حديثك جميل و رصين وحنين.. يسلم يراعك الذي الهب مشاعرنا فسكبنا الدمع شوقا وتسألنا متى الرجوع لاهلنا الطيبين ؟ متى يضمد جراح الوطن ويتلم شمل الغائبين ؟

Quote: الحبيبة اماني الحنين جواني والشوق الجاري عليك يقطع كل المسافات عشان يحتويك يقالدك ويسلم عليك تسلمي انتي من كل بلا ان شاء الله ان شاء الله نرجع كلنا ونتلم في ارض المحبة والوطن الحنين بي ناسو واهلو عارفه يا اماني يا اختي والله ما طالباني حليفة انتي من اكتر الشخصيات المتمنية اقابلها ممن اتعرفت عليهم اسفيريا ربنا يحقق الاماني يا اعز اماني وشكرا ليك بكل الوان الطيف

Quote: سلام للجميع يا اخوانا بكرة ده مالو بعيد كدة مشينا سافرنا وبعدنا من سنين وقلنا بكرة بنرجع اها كل ما يقرب بكرة شديد يقوم فجاة يبعد ونحن نبعد وتبقى المسافة من رمشة عين لي ميلين وسنتين ولي بعدين زمان كان مكتوب لافتة صغير بخط اليد في الدكان الجنبنا ممنوع الدين حتى لو بعدين يا ريت لو علقوها يافطة في موانيء السفر ممنوع الاغتراب لاكثر من سنتين عشان ما تروح انت ووطنك ما يروح فرق كبير بين الراحة والارتياح فرق كبير وكل يوم بتزيد جراح زمان الاغتراب ببدا بي حفلة وداع هسه الاغتراب اصبح مركب بدون شراع كل يوم تشيلك موجة لجهة تانية ولمن تقرب من الضفة نلقى نفسك برة الشبكة لنا الله في هذا القدر وياريت بكرة كان امبارح كان رجعنا قبل سنين

Quote: حديثك هذا شرف عظيم و تاج على راسي .. أملي أن يتحقق هذا الحلم ونتقابل في سودان برح يسع حضنه الجميع .. دمت بالف خير..