ارفع هتافك للوطن ارفع هتافك للزمن وهتافنا جد وهتفنا جد تسقط وبس ******* ارفع هتافك يا ولد ارفع هتافك للوطن مهما السلاح فوقك رطن غطا المكان بمبان كتير وكمان دخان وحجر حجر يجروا الكجر كنداكة زي هالة القمر من كل بيت كنداكة حازمة ولا مفر مرقت شموس ساقت مواسم الثورة لي فحل الفصول درسني خاطرك يا عصية معنى الوطن (حرية سلام وعدالة) وكيف تهون من أجله كمين من نفوس ارفع هتافك للوطن الثورة في قلب المحاص وجه الشهيد طل الفجر صبح الخلاص يبدأ القصاص لابد منو ولا مناص يرحل وما لازمنا( رقَّاص) يبقى القصاص دم الشهيد محفوظ تمام هاتوا الصور مندس و(قنَّاص) ارفع هتاف ليلك نهار في الحي شباب لستك ونار بِفدي الوطن ناسو الكتار ضد المفاسد والنفاق والسيرتو عار دنياهو اضيق من مضيق موكبنا يا كتاحة اليوم اب عصار ارفع هتاف يا شاب شفيف كنداكة في عز الهجير عز النهار فوق الرصيف ************ ارفع هتافك للوطن دَوْزِن حروفك لا تخاف حَرِّك مَدَارَك في المَحَل شمسَ الخريف فنان وأوتارك تصارع في غنا الوطن النضيف ما بغشاهُ زيف ما الزنازين التعاين عارية تشتاق الرغيف والصغار ماسكة البطون الطاوية مادَّا عيونا للكد الشريف مصلوب علي صف الطوابين أديني خاطرك أنا فيك ما مليت معاناة انتظار رافع الهتاف رافع شعار الثورة في كتاحة اليوم اب عصار وانا ضد كتائب الظل والدم والدمار نرفع هتاف مهما اللي صار موكب مهيب للقصر سار ارفع هتافك يا ولد تسقط وما يفضل أحد تسقط عشان ينضف بلد من كل كوز هداها هد يا شعبي يا سمح الجَلَد كلو ظالم ليهو حد وهتافنا جد تسقط وبس تسقط وبس وهتافنا جد
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة