تلاتين سنه خدمه متواصله عينت نفسك مما قالوا ليك امشى القصر ونحنا بنمشى السجن ومن الليله ديك لى يوم الليله والجماعه عملوا السجن مزار ونظام الزنازين تقول ليهم غيب وتعال لغاية ما اخذ صاحب الوديعه ودائعه ولحكمه يعلمها هو خدمتك متواصله وكمان عايز تمدها بعد سنة 2020 ولى متين الله اعلم...... اللهم انا لا نسالك رد القضاء ونسالك اللطف وطبعن لازما نراجع كشف حسابك عشان هل نقولا نعم؟؟ ولا اصلا حتقولوها انتو بعد الناس ما تمشى ده اذا اساسا جات وطبعن النتيجه جاهزه وما عارف خمة النفس فى شنو ماانتو من عامن اول جيتو راكبين الحديده ديك مافى زولا حنسكم... مالكم اسه انتخابات هو دحين الزول الجا بالانتخابات دى مش فورتو لساتكو ورغم كده كشف الحساب فى الدنيا هنا بيقول اول هام الميزان... ما بنجيب ميزان من السوق لانو جايز يكون مضروب ومايل ونحنا ناس بنخاف الله جد جد عشان كده وليطمئن قلبكم وما يحصل مغالطه حنستخدم ميزانكم اها بسم الله نبدا ونخت الميزان ميزانكم الجيتو هو ماركة{هى لله هى لله لا للسلطه ولا للجاه} ودحين عاوزين نوزن بيه بضاعتكم العرضتوها علينا ومن بدايتها مسكتوا فى الولد المسكين الكان حارس مال اليتامى وقطعتوا رقبتوا؟؟؟ بعد داك جبتوا مسمار مصدى ودقيتوا بدل فى الحيطه فى راس...{ ازدان} بارفع درجات العلم وتحلى باقصى درجات الادب والتواضع وخرج اجيالا واعطاهم بسخاء من فيض علمه ليرد جزء من دين شعبه عليه الذى هيا له سبل التعليم كافه واتيتم انتم وقفلتم بلف العطاء وتنكرتم وحولتم التعليم والصحة والامن الى مولات خاصه بكم ترخيصها فى ادراجكم وابدتم وشردتم لاقاصى الدنيا اناس كانو يتوضاون دون ضوضاء ويصلون عشائهم حامدين شاكرين حاضنين صغارهم شردتموهم من بلاد تسيح شمسها الحديد الى بلاد الى بلاد تتغطى بالثلوج بل حتى اسرائيل كانت ارحم لهم منكم ......منهم من وصل ومنهم من ابتلعته الصحارى والبحار التى كانت لهم ارحم واحن ومن {عثر حظه} وابادته اسلحتكم فى غربنا الحبيب الكان خيرو جوه وبره والكان كسوة الكعبه تطلع منه بامن وامان والنيل الازرق اما الجنوب فقد ذبحتم الذبائح عندما فصلوا عيشتهم من ظلمكم وتعسفكم قطعتم ارزاق الناس ومعايشهم وحولتم الاسر المتعففه الى اسر متسوله ومنهم من تسابق نسائهم طلوع الشمس لتوفر لصغارهم ما يسد رمقهم بعمل حلال يشون وجوههم بنار ظلمكم بدلا ان تشوى بنار الجبار اذا سلكوا دروب هى اسهل ورغم ذلك لم تستوعب يا عمر ان امراة دخلت النار لانها حبست قطه ما جابت ليها اكل وما خلتها تكوس اكلها وانت يا عمر حبست شعب كامل لا اكلتوا ولا عايزو يكوس اكلوا ان شاء الله من الكوش عمر الانت سموك عليه كان بيرجف ويقول لو عثرت بغله فى العراق لسالنى الله عنها يوم القيامه لم لم تسوى لها الطريق يا عمر وانت لو طرشق لستك عربيه جنبك حرسك يطرشقو راس سيد العربيه لانو اقلق امن الرئيس طيب بعد تلاتين سنه حاكم ونسيتو حتى هى لله هى لله لا للسلطه ولا للجاه عملت شنو غير عدمتنا القدامنا والورانا مشروع الجزيره سودانير الموانى البحريه الخطوط البحريه التعليم المستشفيات الخليتو شنو عايز تقبل عليهو بعد 2020 بعد ده كلو قبل يومين وبعد تلاتين سنه حابس فيها خلق الله وحارمهم يكوسوا اكل عيشهم تجى امراة فى حى اركويت تكابس من الدقش عشان تاكل اولاده بالحلال وتدفع ليهم حق التعليم وحق الايجار شايله عدة شاى يجوا عمالك يكشوها ويصادروا عدتها عشان تجرى وراهم وتدفع ليهم المعلوم البيضمنوا بيها مرتباتهم وسفههم والمسكينه لما طفح بيها الكيل زى ما حرقو حشاها حرقت رمز الظلم ومقره كما فعلها فتى تونس الذى اشعل فتيل الربيع العربى كما اشعل القرشى فتيل اكتوبر من قبل هذه المراة التى اشعلت النار فى مقر القهر والذل والاستعباد لو مات ايا ممن صادفتهم تلك النار ممن سلبوها حقها فان الله لن يحاسبها لانها لم تخالف امر الله الذى حرم قتل النفس الا بالحق بل هى استجابة لامر الدفاع عن العرض والاكل الحلال هى قتلت دفاعا عن عرضها بدلا ان تبيعه فى الشارع حاءت لتبيع الحلال ونسائك التى اعلم انا شخصيا تماما ان ارجلهن كانت مشققه من حوامتن بالشباب التى استبدلوها من عرق نيران ستات الشاى بالكعب العالى والثياب الفاخره والنوم فى فنادق دبى والتسوق من مولات ماليزيا ونسوا الدوكه وعواست الكسره وبيوت الطين التى كانت تاويهم وصارن سيدات اعمال باى حق تريد ان تاتى لتحكم مرة اخرى بعد 2020 ياخى اختشى وشوف المراة الكافره الحاكمه المانيا كانت تاوى من شردتهم انت وعصابتك......تستضيفهم فى بلادها التى ليس فيها ديوان زكاة مبنى من الرخام ومن يستحقونها يتوهون فى الصحارى وتبتلعهم البحار وياويهم الكفار شوف المراة الكافره دى قالت حرم ما عايزه اواصل الحكم اليجوا يمسكوه ناس تانين بالمناسبه اسمها {ام اللاجئين} وانت مكنكنش فيها شوف كم رئيس حكموا ومشوا وكلهم كفار وكلهم شعوبهم من حر مالها بتاوى من شردتموهم يفتحون لهم مدارسهم ومستشفياتهم وياكلوهم ويشربوهم وانت تكش ست الشاى بعد 30 سنه حكم لانها عايزه تاكل من خشاش الارض بالحلال بعد شردت وليها او قتل كمدا وعشان حرقتو حشاها حرقت ليكم رمز اهانتكم ولسه الحريق الاعظم عندما تاتيكم محاججه لك وعصابتك امام الحق العدل وثق انها ستقدل فى الصراط المستقيم فى طريقها الى جنات عرضها السموات والارض ومعها كل المتخاصمين معك امام الله ويومها لن تقوى ركبك لحملك وستهوى الى قاع نار لا مستقر لها تجذبك اليها وكل من اعانك تجذبكم كل الارواح التى ابدتموها والانفس الى حبستموها منعتم عنها الاكل وحرمتموها ان تبحث عنه فشان شنوا ده كلوا؟؟ السؤال دى تجابوا عند الله بعدين لانو ميزانو عدل ولانوا ربنا حرم قتل النفس الذى خلقها وسواها الا بالحق اها جهزوا جوابكم من دلوقت لليوم داك الا ان كان اصلا اليوم داك مافى حساباتكم يبقى ده موضوع تانى لاهاى انساها لانو بى كده كده بتتزاوغ منها....... اها بعد تخش المسكن الجديد فى احد احياء{ ود الاحد }حتزوغ كيف جهز حالك لاول ليله فى مسكنك الجديد ده لانو لا قوشك ولا حميدتيك ولا عثمان ولا نافع حينفعوك وحسبنا الله ونعم الوكيل استودعناه كل مالحقنا منك ومن عصابتك ومن اعانكم فى ظلمنا وقهرنا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سعيد عبدالله سعيد شاهين
فيس بوك
تويتر
انستقرام
يوتيوب
بنتيريست