قالو لينا لما جو نحن جينا بالدين لانو الفساد انتشر وسعر الدولار عامل 2 جنيه وشويه والجنه زاده بي 5 جنيه الكيلو، ونحن سله غذاء العالم ومشروع الجزيره والفساد والخ..... طيب وبعدين. الجامعات السودانيه من أحسن الجامعات ويقينا وين، لما كيلو الكهرباء الواحد يكون بي جنيه في حين ممكن يكون مجاني أو ياخي خلو العشره بي جنيه رسوم رمزيه. تلما تتخرج من الجامعه بعد عينك ما تطلع من حق ألمواصلا والشتات والخ وتقعد مع الشباب تحت العمود أو الشجره أو ست الشاي الحبشبه. لما يكون طموحك كل يوم من الصباح 2 جنيه حق الرصيد وحق السجاره أو السفه. لما يكون عمرك 30 أو 35 وما شغال ولا عندك حق العرس ويكون طموحك كلو ساره البنقو أو الحبشبه الحتحنكها عشان تنوم معها الليله وخلاص. لما يكون احسن الأطباء في العالم من السودان والسودان نفسو ما فيو لا دكاتره ولا مستشفيات (بالله عليك هو السودان ما في دكاتره امممم) لما كل الشباب يهاجر يقول ليك انا طموحي اشتغل سواق في السعوديه ( عشان يطلع من عند أمة يمشي يتزله ويتنعل أهل ويقولو ليو يا عب وفي النهايه ما بدو قروش زاتو) لانو رئيسك زاتو بجي كلو يومين ياخد إليها النصيب، عشان يضمن ولائو. لما ابوك يوديك الهند أو ماليزيا تقرأ ونفع نفسك وأهلك وتقضيها بنقو وحشيش ونسوان وترجع ليو فاكي سطر أو مجنون عديل. لما يكون طموحك في العيد تشتري الخروف، ولما يكون نفسك تلاقي لبن لي اولاد، لما يكون طموحك انت كاب انو أولادك ما يعيو ويكون أكبر مخاوفك كمان، لما يكون همك كلو تلاقي حق العيش لي أولادك العيشه البقت بي 2 جنيه. لما سعادة الرئيس يركب طياره خاصه ماشي يحضر كأس العالم والشعب دينو طالع. لما يكون حلمك تلاقي شغل اي شغل وتلاقي الشغل كلو ماسكنو الاجانب زي ما كلنا شايفين، لما تكون مسافر بره وتمشي السفاره السودانيه دا لو لقيتها زاتو يكون وجودها زي عدمو. لما يكون حتي المتعلمين فينا والناس الماسكه مناصب عاليه بره ويجو السودان يقولو بتشتغل ولو بي أقل مرتب يجي كوز معفن يقول ليك انت ما نجحت في المعاينة عشان في كوز خريج معفن جديد دارين يشغل معاهم، وانت يا بتاع شهادات بره العامل خواجه ارجع محل ما جيت. لما يكون حلمك تزرع وما تلاقي جاز وتحصد وماتقدر تبيع وتبيع وتدفع نصها زكاة، هو الزكاه متين بقت قبل البيع؟ لما يكون واحد عسكري متقاعد والمثل بقول ليك ( لو صباعك سكري اقطع) يكون عندو في بيتو120 مليون دولار (جابه كيف دي( ياخي هو بنك السودان مافي دولار بالغلط ولا جرام دهب بالغلط، غير الأراضي والعربات دا البي اسمو طيب خاتي شنو بي اسم مرتك وأولادك، طيب قلنا دا المتقاعد الناس الله في مراكزهم عنهم كم؟؟؟؟ ياخي ما شغلوني معاكم بدل انا مقضيها من عمود كهرباء لي ست شاي ههههه لما صاحبك يمشي يحارب في أليمن ويكون حلمو يرجع عشان يعرس بت خالو الخاطبها ليو 3 سنوات ويستشهد هناك والحكومه حتي لا تجيب جثمان عشان بكل معاها، طيب حق الزول المئات دا وين في بطن وداد وله بشه وله منو بالظبط، لما اي مشروع تسمع بيو يقولو ليك حق وداد لما يكون سعر الريال 10 جنيه تسأل ليه يا جماعه يقولو ليك وداد قالت مفلسه دايره تطلع شوبنج في بريطانيه، بي مناسبه بريطانيه دي ياخي تبيع السفاره الفاتحه في قصر الملكه اليز ما بتخجلو ويقولو ليك تكلفه الصيانه عاليه (دا اسمو حنك النمل الما بعضي، وله طلع بعضي هو) طيب خط هسرو وله الفلل الفي جزيره النخل في دبي تسمع دي فلة مايكل جاكسون ودي حقت ول اسمث دي حقت عوض الجاز ودي حقت وداد وصلاح قوش، من أين لكم هذا يا عيال الحراميه، مع احترامي للحرامي. لما أطفالنا يطلعو يلعبو كوره والحكومه ما تديهم جنيه ويطلعون بي دعم الأهالي البيعة تلفونو وموترو ويشيلو الكأس ويرجعوا، والسنه ابعدها يطلعو اولاد الكيزان ويتطعطقو من اول كوره ويرجعوا، حتي في دي يا سعاده الكوز المحترم. لما توعد صاحبك وتتمنه انو يجي في مواعيدو، لما حتي المصريين يتطاول علينا ويسرقو أرضنا ويقولو ليك نحن اشتكينا للأمم المتحده ياخي قوم لف قال اشتكينا قال. لما البنزين والجاز والجاز يبقه سوق اسود وسعر الأرض في السودان اغلي من سعر الأرض جمب الحرم في مكه، لما تكون ما بتثق في اخوك وخايف انو يكتب فيك تقرير ويسلمو الجماعه الطيبين، يعني حتي أخوة ما بتثق فيو، طيب الحاصل شنو، المشكله وين لما يجي واحد يقول ليك نحن علمناكم اكل اللحم وضوقناكم الأجداد والهوت دوج، ياخي ما بتخجل تقول كدا، دا ولا 1% من الحاصل، طيب الحل شنو نعمل شنو عشان الجماعه ديل يطشو وله القروش العبره ترجع وله وله وله، انا شخصيا داير حقي في البلد داير حق أولادي دا لو جبته اولاد، قالو العرس بقه بالشي الفلاني ههههه بعتزر اني طولت عليكم،بس نكمل المره الجايه تحياتي / أحمد سامي طمبل
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
احمد سامي طمبل
فيس بوك
تويتر
انستقرام
يوتيوب
بنتيريست