يسعدنا اليوم ان يكون ضيفنا اللواء اركان حرب حقوقي مهندس دكتور بروفسور شمس الدين نورالدين قمر الدين! بدأ المحاور ضاحكا: منوّر سعادتك! ما شايف اسمك دة غريب شوية؟ كله دين وضو ونور، مع ان وكت مسكت ادارة الكهربا ،الكهربا قطعت لغاية ما رقوك ونقلوك الزكاة! اسمك بيخدع الواحد زي اسم الإنقاذ، زي زول يكون اسمه بشير وطوالي مربّط وشه بسبب وبدون، او زول يسموه محمد ويكون الاسم الأنسب ليه مسيلمة، كان عندنا زول قريبنا عنده نظرية تانية قال الزول وكت يولدوه يدوه رقم، 11 مثلا او 12أو 109 زي الاي بي بتاع الكمبيوتر، بعد يكبر والناس تشوف فعايله تسميه الاسم المناسب ليه!! أبوك زمان وكت سمّاك كان عارفك حتلم الجماعة الكيزان ولا شنو؟ بسم الله الرحمن الرحيم، الحقيقة حسب ما سمعت من الوالد كان في كسوف قبل ما تتم ولادتي بلحظات، وأول ما خرجت الى الدنيا اشرقت الشمس وإنقشع الكسوف، وهذا هو سبب تسميتي بهذا الاسم: شمس الدين! حلوة إنقشع دي ما سمعتها من زمن برنامج نفحات الصباح بتاع ليلى المغربي، وبالله حالتك أول ما اتولدت إنقشع الظلام وإنداح النور، زي ما بيقولوا ناس التلفزيون، طيب لو كان حصل العكس يعني لو اول ما ولدوك الشمس راحت في حق الله تفتكر كان حيحصل شنو؟، بعدين ليه الناس بيسموكم ظلاميين؟ بسم الله الرحمن الرحيم، وَلَا تَلْمِزُوا أَنفُسَكُمْ وَلَا تَنَابَزُوا بِالْأَلْقَابِ ۖ بِئْسَ الِاسْمُ الْفُسُوقُ بَعْدَ الْإِيمَانِ، ثم ان الظلام هو مهد النور، يخرج النهار من الليل، وجعلنا الليل لباسا وجعلنا النهار معاشا. ضحك المحاور وقال: كان عندي واحد صاحبي زوجته اسمها عاشة، كان بيقول وجعلنا الليل مع عاشة! بسم الله الرحمن الرحيم، ندعو بالهداية لصديقك، لا يجوز مثل هذا التحريف. وجدك قمر الدين دة ولدوه في رمضان؟ ولا كان برضو في خسوف؟ بسم الله الرحمن الرحيم، لم أكن موجودا حين ولد جدي ولا اعرف مناسبة هذا الاسم. وايه حكاية حقوقي مهندس بروفسور لواء اركان حرب دي؟ عرفنا حقوق دي بالمراسلة، الكلية الحربية برضها بالمراسلة؟ ولا دي رتبة فخرية ساكت؟ بسم الله الرحمن الرحيم، درست الهندسة وكنت منتسبا لكلية الحقوق في نفس الوقت، وحين أكملت دراستي تقدمت الى الكلية الحربية التي كانت تطلب تجنيد مهندسين وتدربت فيها لمدة ستة اشهر! ستة شهور ما شوية؟ عشان كدة تفكوا طلقة في الهوا تجي في راس زول! عموما ما مشكلة انت كويس المشيت ستة شهور، في عقداء ولواءات ما شافوا الكلية الحربية ولا في المنام، خلينا في المهم لغاية هسع ما سمعنا منك اي اعتراف، وايه حكاية الفساد في مؤسستكم دي! أنا داير اعتراف، اوع تقول لي ان جاءكم فاسق بنبأ فتبينوا. بسم الله الرحمن الرحيم ، البينة على من إدعى والحلف على من انكر! دي وثيقة بتثبت انك صرفت اكثر من تلتين اموال الزكاة على نفسك و موظفينك تحت بند والعاملين عليها! بسم الله الرحمن الرحيم بند العاملين عليها موجود في مصارف الزكاة، لم نخترعه نحن! موجود نعم لكن ما معناه تلغي المصارف الرئيسية ويبقى هو سيد شباب المصارف أقصد المصرف الوحيد! بسم الله الرحمن الرحيم، لا توجد مصارف رئيسية ومصارف فرعية ثم أنّ هذه الوثيقة التي تحملها غير حقيقية. وهذه وثيقة اخرى عليها توقيعك، تفيد انك صرفت عدة مليارات من أموال الزكاة لتغيير اثاث المؤسسة واثاث بيتك، ووثيقة أخرى تثبت انك تستأجر بيتا غالي جدا في منطقة راقية على حساب المؤسسة، هل تغيير اثاث المؤسسة واثاث بيتك مصرف جديد من مصارف الزكاة؟ يا أخي الفاضل هذه إدعاءات المعارضة الكسيحة، معارضة الفنادق، معارضة ال... نسيت المرة دي تقول بسم الله الرحمن الرحيم، ولا عشان الكلام دخل حوش البيت! بسم الله الرحمن الرحيم، عفوا اخي انه الشيطان أنساني ذلك. والشيطان دة كان وين من الصباح! عموما ما علينا. خلينا في المهم دي صورة من شكوى أرسلها مواطن فقير جاكم عشان تدفعوا ليه تكاليف علاج ابنه، الطفل كان محتاج لعملية عاجلة لاستئصال الزائدة الدودية. المستشفى طلب ثلاثة مليون وانتم بعد أمشي وتعال وشيل دق اديتوه مبلغ خمسة الاف جنيه فقط لا غير، لغاية يستأنف ويشوف طريقة تانية كان الولد مات، رأيك شنو مش الزكاة هي المسئولة عن موت الطفل دة؟ بسم الله الرحمن الرحيم المرض لا يقتل الانسان! والزكاة غير مسئولة عن موت الطفل ما الذي (يكتله) اذن؟ أوع تقول لي اليوم تمّ، في زول قال معظم الناس القعد تموت بالهملة دي، يومها ما تمّ، بتتموه من جيبكم! في مستشفياتكم الممرض ما يطعن ليك الدرب لو ما دفعت تمنه ! الدوا الغالي لمن استطاع اليه سبيلا، و... الذي يقتل الانسان هو الأجل! أجل، كلامك صاح، لكن مش مفروض نعمل العلينا بعدين نعلّق في شماعة الاجل! بسم الله الرحمن الرحيم، لقد قمنا بواجبنا، أعطينا الرجل خمسة الاف من الدراهم، هناك الملايين في الانتظار لا يمكننا أن نحل مشكلة إنسان واحد ونترك البقية ! المشكلة انكم لا تحلون ولا تربطون اية مشكلة. الملاليم البترموها لكل طالب مساعدة ما بتحل ليه المشكلة بالضبط زي مشكلة الولد المات. دي وثيقة تانية بتقول انك دفعت خمسة مليون عشان تغير لون سيارتك! دي في نظري مسألة غير مهمة المبلغ دة كان ممكن ينقذ حياة الولد المات بالزايدة! وعدد من العشرات البيموتوا يومي بالاهمال وغلاء الدواء وانعدام محاليل غسيل الكلى وادوية السرطان! يا زول انت الله ما ليك ولا شنو، نخلص من موضوع البيت تطلع لي بالعربية! أديني نص بيحرّم تغيير لون العربية! بعدين انت زعلان ليه القروش كان طالعة من جيبك؟ ثم صمت مولانا قبل ان يعلن: وأما بنعمة ربك فحدّث فحدّث ولا حرج، يا مولانا تاني مرة تنسى تقول بسم الله، بعدين ربنا قال ليك تحدّث بنعمه مش بحقوق الناس الغلبانة! بسم الله الرحمن الرحيم، إنه الشيطان يا اخي الفاضل! أنساني البسملة! حيرتنا يا مولانا بقينا ما عارفين نحن مستضيفنك ولا مستضيفين الشيطان! طيب نرجع لموضوعنا ولو انه بعد مقابلتك دي مفروض نغير اسم البرنامج من نادي الاعترافات لي نادي النكريبة. أي شيء نكرته حطب يا سعادتك يا مولانا يا دكتور يا بروف، يا الله تدينا الصبر طيب يا مولانا سمعت بقصة اولاد المدارس المساكين، الأولاد ما بيمشوا البيوت في فسحة الفطور ، بيقعدوا فيالمدرسة مش عشان العلم غذا الروح ، وليس بالخبز وحده يحيا الانسان، الخ الكلام الميت دة، لكن لأنّ البيت ما فيه حاجة للفطور! سمعت بقصة الطفل الانتحر لأن المدرس كل يوم يحرجه في الفصل ويقول ليه لو اهلك فقرانين لزوم القراية شنو ما تمشي تشوف ليك شغل! بسم الله الرحمن الرحيم، لقد نهى الله عن الانتحار، قتل النفس حرام شرعا. يا مولانا أقول ليك طفل تقول لي قتل النفس حرام! الظاهر موضوع التعليم برضه حيلحق نادي أمات طه. طيب سمعنا يا مولانا قالوا تزوجت قريب زوجة رابعة، والحفلة بتاعة العرس بي ندى القلعة، وشوهد في حفل الزفاف الأسطوري في احد الفنادق الفخمة، عدد من كبار المسئولين في الدولة يرقصون رقصا مختلطا، الكلام دة مش حرام؟ والتبذير دة كيف في وقت ناس ما لاقية حبة الدوا ولقمة العيش و. يا حاسد يا ابن الكلب! خلصت من البيت والعربية جيت لحرمنا الرابعة المصون! داير تعترض على شرع ربنا يا منافق! نسيت بسم الله تاني يا مولانا! الله أكبر عليك، عشان سكتنا ليك قايلنا ما بنقدر ندافع عن نفسنا، ومن اعتدى عليكم فاعتدوا عليه، رفع الدكتور مولانا البروف عصاه ليدفع عن نفسه اعتداء المذيع ثم تذكر انه لواء اركان حرب فاخرج مسدسه الميري، وطارد مقدم البرنامج الذي فتح باب الاستديو، (وفك البيرق). والعاقبة عندكم في اليوتيوب.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد الملك
فيس بوك
تويتر
انستقرام
يوتيوب
بنتيريست